एफिसि 3
3
हॆॽनिबारॆक्चिम् लागि पावलमि योम्पक्
1मसॆ काङा पावल, आन्ना हॆॽनिबारॆक्चिम् लागि खिरिस्ट येसुमि योम्पक् मुमार सॆक्चिम्पि सॆक्ढिङ्खॆडिङ। 2हाङ् खोमि नाम्नावाँमि बारेबि आन्नॆ खेमाम्नॆ कामानुङ् निवाँहाङ्ऎ काङा सॆःक्मिम्पा खानावाँ ग आन्नॆ खेम्डाम्निन। 3हाङ् निवाँहाङ्ऎ काङा खोमि चुम्मिम्पा खानावाँ मान्टहाङ् खाङ्मिटिङ् लोमॆ काङॆ आन्ना मिॽमिःक्म ग इसिडानिन। 4आन्नॆ काङॆ साप्मिम्पा खानावाँ पाढालॆःॽमार, काङॆ खिरिस्टमि बारेबि चुम्मिम्पा खानावाँ वाप्डुङ् कामानुङ् वाबुकाम्नि। 5याॽल ग खानावाँ आसास मॆन्खाङ्मिॽमिम्पा लॆटा, टर ह ग खानावाँ सॆङ्सॆङॆ लावाऎ निवाँहाङ्मि सॆङ्सॆङॆ सॆःक्ढुङ्पाचि हाङ् निवाँहाङ्मि खानावाँ लोखुबाचि खाङ्मिडुचिमि। 6आक्क चुम्मिम्पा खानावाँ चाइ माङ्भनॆ, हॆॽनिबारॆक्चिऎ सङ्क नुऎ खानावाँबाङ् इस्राएलिचिऎ रॽन आसिका टक्चाकुचि। खोचि सङ्क एक्क सालुङ्पिऎ याॽमिचि रक्मान यो। हाङ् निवाँहाङ्ऎ खिरिस्ट येसुबि हिःग्मिम्पा चुप्लाङ्बि खोचि सङ्क सिःक्मि।
7निवाँहाङ्ऎ खोम् चॆक्मावाबाङ् काङाबि योम्पक् यिगु हाङ् खोम् नाम्नावाँबाङ् खोसॆ काङा होइढा याॽमिचि नुऎ खानावाँ खेम्मिॽमॆ योम्पक् पिट्टिङ। 8हाङ् चोब्न निवाँहाङ्मि याॽमिचि हङ्सिबि काङा चाइ मिःछुपाङान हाङ्स माङ् नुङ् सङ्क ङेःप्हिनॆ खिरिस्टमि नुऎ खानावाँ हॆॽनिबारेक्चि खेम्मिॽमॆ योम्पक् निवाँहाङ्ऎ काङान पिट्टिङ। 9हाङ् चोब्न खानावाँ मुखुबा निवाँहाङ्न। हाङ् खोसॆ याॽलिऎबाङ्न चुम्मिम्पा खानावाँऎ मान्टहाङ् योम्पक् यिगुकुवॆ कामानुङ् याॽमिचि इबिॽमॆ योम्पक् खोसॆ काङा पिट्टिङ। 10मसॆ गरॽलहा निवाँयुङ् लॆखुबा याॽमिचिबाङ् नाम्फलिॽवाबिहा चॆक्मावाचि हाङ् टुङ्घङ्पाचिऎ निवाँहाङ्मि निवाँ ऎॽवा चुक् लोमॆ लेसुचिर कामानुङ् आक्खा खानावाँ चुम्मिम्पा लॆटा। 11हाङ् ग योम्पक् चाइ येसु खिरिस्टबाङ् लिः कामानुङ् निवाँहाङ्ऎ याॽलऎ बाङ्न मिन्मिम्पा लॆटु। 12हाङ् खोबिॽन हिङ्चासे, निवाँयुङ् लॆःसे कानि निवाँहाङ्बि खॆॽमॆ पाङ्नुमॆ निवाँ टक्चाडि। 13मसॆ काङॆ आन्ना नुःर लोकानि, आन्नामि लागि काङॆ आङ्मॆपाइकुङॆ डुखा खाङ्से निवाँ आसेराम्नॆ। गग आन्नामि नुऎमि लागिन लि।
एफिसिबिहा याॽमिचिमि लागि पावलमि पारठाना
14मसॆ काङा चाइ निवाँहाङ् आपा हुहु पोप्मानुङ् स्यामिसे पारठाना लॆःॽङा। 15बाखाटेम हाङ् पारुबिहा#३:१५ याॽलिहा याॽमिचिऎ उम्चि निङ् खोचिम् निङ् चुचाखुबा टुबालाबाचिमि निङ् टक्टिॽमानुङ् साप्युक्सुचि। हाङ् पावलऎ चाइ गुबि पारु नुङ् बाखाटेम्पिहा चोब्न याॽमिचि मुखुबा निवाँहाङ् रेम कामानुङ् लोकु। चोब्न खानावाँ मुखुबा खोन। 16निवाँहाङ्मि लावाऎ आन्नामि हङ्सिऎ लावा खोम् ढ्या हाङ् निङ्लावा नुङ्मा चॆक्मावाऎ चॆकुवॆ मुबिटानिर कामानुङ् पारठाना लॆःॽङा। 17हाङ् आन्नॆ निवाँयुङ् लॆटानॆ हाङ् खिरिस्ट आन्ना हङ्सि लिःर हाङ् नाम्नाम् पिसिॽमॆ खानावाँबि आन्ना काम्नुःर पुःसानॆ कामानुङ् पारठाना लॆःङा। 18हाङ् निवाँहाङ्मि चोब्न याॽमिचि नुङ् सोरि खिरिस्टऎ ऎॽवाकॆ नाम्नाम् पिसिकिहा लोमॆ वाप्हिकाम्नि। 19हाङ् याॽमिमि निवाँऎ वाप्हिनॆ खोमि नाम्नाम् पिसिॽमॆ खानावाँ वाबाम्नॆ। हाङ् निवाँहाङ्बाङ् टाःहा चोब्न खानावाँऎ आन्नामि हिङ्खामा चेप्खॆटुर। 20कानि हङ्सि योम्पक् मुखुबा खोमि चॆक्मावाऎ कानिऎ ङाग्मिम्पा हाङ् मिॽमिम्पाबाङ् सङ्क ढ्या योम्पक् यिक्मा हेकु। 21आक्क निवाँहाङ्मिन चोब्न मान्डालिबि हाङ् येसु खिरिस्टबि हानाम्स निङ्लावा लिःढाङ्र। आमेन।
ទើបបានជ្រើសរើសហើយ៖
एफिसि 3: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society