सॆःक्‍ढुङ्‌पा 24

24
पावल फेलिक्‍स्मि ङारिङ्‌पि
1ङाचि डिना डॆङ्‌पि चोब्‍बाङ् ढ्‌या याटाङ्‌पा हननियाऎ एक्‍क हिप्‍पा याहुडि टुङ्‌घङ्‌पाचि हाङ् एक्‍क टरटुल्‍लस लोमॆ यायेॽमा लेक्‍खुबा याॽमि चिःक्‍मानुङ् मिम्‍मु काइसारियाबि युसा। हाङ् खोचिऎ टुङ्‌घङ्‌पा फेलिक्‍समि ङारिङ्‌पि पावलमि आब्‍डिक् गरहाङ् लाटॆटुचि। 2पावल आक्‍कुबि लाटॆटुचि, हाङ् टरटुल्‍लसऎ पावलमि आब्‍डिक् गरहाङ् फेलिक्‍समि लुम्‍पि युङु,
“टुङ्‌घङ्‌पो, आनॆ डिरिक् याॽलबाङ् काङ्‌का सान्‍टि पिडाचिम्। हाङ् आनॆॽन काङ्‌काम् हाङ्‌टेम्‍पि काम्‍नुहा काम्‍नुहा योम्‍पक् लॆपक्‍डुना। 3ग खानावाँ काङ्‌कॆ लेकुङ्‌का, हाङ् निवाँ हङ्‌सिबाङ् ओहाक् पिक्‍चिम्। 4कॆ आनाम् डिरिक् लः मॆलारे, मिःक्‍म खानावाँ खेम्‍पिॽमा। 5ग याॽमि काङ्‌कॆ किॽमालुऎ खिमाटुमा लॆपक्‍मिक्‍खुबा याॽमि भॆट्‌टकुङ्‌का। गसॆ बाखाटेम्‍पिहा चोब्‍न याहुडिचिम् लुम्‍पि खिमॆटुमॆ खानावाँ टिबिडुचि। हाङ् खो नासरटबिऎ#२४:५ याहुडिचिऎ याहुडाबिऎ नासाराट लोमॆ ठालबिहा याॽमिचि योवा टङ्‌नॆ याॽमिचि कामानुङ् खाङ्‌युक्‍सुचि। टारटुल्‍लासऎ पावलऎ यायेॽमा रक्‍न टङ्‌नॆ योम्‍पक् यिःगुऎ रु कामानुङ् मिॽमिम्‍पा लॆटु। येसु टिङ्‌खुबाचिम् टुङ्‌घङ्‌पा सङ्‌क रेम। 6-7गसॆ निवाँहाङ्‌मि खिम् सङ्‌क सॆङ्‌सॆङॆ मॆड्‌डिङ्‌मा मुमा परक्‍मिम्‍पा लॆटु। टर काङ्‌कॆ लाब्‍भुङ्‌सुङ्‌का।#२४:६-७ एक्‍क हिच्‍चि साब्‍चिराबि (हाङ् काङ्‌कॆ काङ्‌काम् यायेॽमा रक्‍न न्‍यायॆ लॆःमा मिॽमिम्‍पा लॆटुङ्‌का। ७ टर काप्‍टान, लुसियास, टिलिङ्‌गाचि नुङ् टाआहाङ् पावल काङ्‌काम् हुक्‍बाङ् लाफॆटु। ८ हाङ् पावल आब्‍डिक् लॆखुबाचि आनाबि टाआनॆ कामानुङ् लोसिङ्‌का) लोमॆ येट्‌टिडा। 8आना टाङ्‌पॆॽन ग याॽमि सिमुना हाङ्‌ग काङ्‌कॆ खो टिमिम्‍पा आब्‍डिक् चाइबानऎ कामानुङ् लेटकुना।”
9आक्‍कुबि चुक्‍मिहा होइढा याहुडिचिऎ सङ्‌क ग खानावाँ चाइबान कामानुङ् उम्‍चि खानावाँ टङ्‌टिसुचि।
फेलिक्‍समि लुम्‍पि पावलमि खानावाँ
10हाङ् टुङ्‌घङ्‌पाऎ हुगॆ पावल यामुसॆ कामानुङ् लोसु। हाङ् पावल गरहाङ् यामुसा, “टुङ्‌घङ्‌पो, आना ग हाङ्‌टेम्‍पि डिरिक् निङ् याॽलबाङ् न्‍यायेढिस लिडानॆ खानावाँ लेकुङ। मसॆ काङा खोचिऎ लोमिम्‍पा रक्‍मा याॽमि हॆॽङानॆ कामानुङ् चेन्‍चासे इकुङ। 11काङा यारुसालेम्‍पि निवाँहाङ् चुङ्‌सि ठाङ्‌डिङॆ एपङ्‌हि डिनाबाङ् डिरिक् मायाक्‍टिटु लोमॆ ग आनॆ मरक्‍न लेॽइकुना। 12काङा आब्‍डिक् टिखुबाचिऎ निवाँहाङ्‌मि खिम्‍पि कॆ याॽमिचि नुङ् याटक्‍माटक्‍मि खानावाँ इमिम्‍पा माखाङ्‌टिॽङामि। हाङ् हाटाबि नुङ् याहुडिचि खोम्‍ठाम् खिम्‍पि हाम्‍पि स याॽमिचि कॆ चोम्‍पक्‍मिम्‍पा माखाङ्‌टिॽङामि। 13हाङ् खोचिऎ काङा टिमिम्‍पा आब्‍डिक्‍मि चुमॆक्‍सङ् सङ्‌क आनाम् लुम्‍पि लाबक्‍हेसुचिनि। 14टर आनाम् ङारिङ्‌पि ग खानावाँ चाइ ह काॽङा, मान्‍ठाभनॆ खोचिऎ हुन्‍नऎ लोमिम्‍पा पारभु बाङ्‌न कॆ कानिमि पाप्‍पा टुबाचिम् निवाँहाङ् चुङुकुङ। हाङ् निवाँहाङ्‌मि खानावाँ लोखुबाचि नुङ् यायेॽमाबि साॽमिम्‍पा खानावाँबि निवाँयुङ् लॆकुङ। 15खोचिऎ रक्‍न कॆ सङ्‌क निवाँनेन् नुङ् हिङ्‌वाचि सिखॆम्‍पाबाङ् हिङ्‌पक्‍मि कामानुङ् निवाँहाङ्‌बि निवाँयुङ् लॆकुङ। 16मसॆ हानाम्‍स कॆ काम् निवाँ निवाँहाङ् नुङ् याॽमिमि लुम्‍पि हेःर काम्‍नुःर युङ्‌मा मिकुङ।
17“यरुसालेम्‍पि डिरिक् निङ् डॆङ्‌पि काम याॽमिचि याङ् पिस्‍सि हाङ् निवाँहाङ् चुङ्‌सि यारुसालेम डाप्‍मिम्‍पा लॆटिङ। 18खोचिऎ काङा निवाँहाङ्‌मि खिम्‍पि चुब्‍मार कॆ सॆङ्‌सॆङॆ लिमॆ चालाना यॆस्‍सिम्‍पा लॆटुङ। कानुङ् आक्‍कुबि डिरिक् याॽमिचि माचुआमि हाङ् खिमाटुमा सङ्‌क माचुआ। 19टर आक्‍कुबि एसिया ठालबिऎ एक्‍क हिप्‍पा याहुडिचि चुआमि। काम् बारेबि काइसॆ खानावाँ चुआ हाङ्‌ग खोचिऎ आनाबि टामाहाङ् खानावाँ इमा लॆटॆ। 20हॆॽनॆ हाङ्‌ग गुबि चुखुबाचिऎ सङ्‌क याहुडि टुङ्‌घङ्‌पाचि खोम्‍ठाम् ठालबि काम् खानावाँ लिमार माङ् काइसॆ खानावाँ भॆट्‌टकुचॆ, म इसुचिर। 21खोचिऎ काङा एक्‍क खानावाँबि टे आब्‍डिक् टिहिङामि हला। मान्‍ठाभनॆ उम्‍चि लुम्‍पि कॆ ढ्‌या साम्‍लाबि याकामानुङ् गर लोडुङ्‌चि, सिखॆम्‍पा याॽमिचि फेरि हिङ्‌पक्‍मि लोमॆ निवाँयुङ् लॆमिम्‍पासॆ आयु काङा आन्‍नॆ न्‍यायॆ लॆःॽमॆ पाइङानि।”
22ग फाक्‍मॆ लाम्‍फुमि बारेबि फेलिक्‍सऎ याॽलन नुःर वाप्‍सिम्‍पा लॆटा। मसॆ खोसॆ लोसुचि, “ह कप्‍टान लुसियस उङुॽहाङ् टे आन्‍नामि खानावाँ खाङ्‌कुङ।” 23हाङ् फेलिक्‍सऎ एक्‍क काप्‍टान लोसु, पावल गरमर लॆःॽमिटॆ टर नुःर खाङॆ। हाङ् खो पाबुआ ठका लाटॆखुबा उम् लाङ्‌काम्‍चि चुप्‍मा पिट्‌टॆ कामानुङ् लोसु।
पावल फेलिक्‍स नुङ् डुसिल्‍लानुङ् यामुमिम्‍पा
24एक्‍क हिच्‍चि डिना डॆङ्‌पि फेलिक्‍स उम् याहुडि खिम्‍टाङ्‌मा डुसिल्‍लानुङ् टाआ। खोसॆ पावल सेःरुहाङ् खिरिस्‍ट येसुबि निवाँयुङ्‌मि बारेबि पावलऎ लोमिम्‍पा खानावाँ खेमु। 25टर पावलऎ निवाँनेन् लिमानुङ् योम्‍पक् यिक्‍मा लॆ, टाङ्‌पा टाङ्‌पॆॽन खाङ्‌मा लॆ हाङ् निवाँहाङ्ऎ पिॽमॆ डान्‍डा टामॆ पाइ लोमॆ खेमुहाङ् फेलिक्‍स किसिखारा हाङ् लोसु, “आयुमि लागि गरक्‍टेन, साबु, ह आना खारॆ। कॆ होइक ल टकुङ् हाङ्‌ग फेरि सेखाना।” 26खोसॆ पावलबाङ् याङ् चामा टकुङॆरु मिनु। मसॆ हसहस सेःॽमानुङ् पावल नुङ् यामुचाआ।
27ह हिप्‍चि निङ् डॆङ्‌पि फेलिक्‍समि ठालबि पोरकियास फेस्‍टास लोमॆ याॽमि टुङ्‌घङ्‌पा लिटाआ। टर फेलिक्‍सऎ याहुडिचिम् निवाँ चेन्‍चामिस्‍सि पावल सॆक्‍चिम्‍पिन याइडाउ।

ទើបបានជ្រើសរើសហើយ៖

सॆःक्‍ढुङ्‌पा 24: LBR

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

វីដេអូសម្រាប់ सॆःक्‍ढुङ्‌पा 24