सॆःक्ढुङ्पा 19
19
पावल एफिसस हाटाबि
1अप्पोलोस कोरेन्ठि हाटाबि चुआर, पावल एसियामि सङ्पिटुहा ठाल वाइसे एफिसस हाटाबि युसा। हाङ् आक्कुबि एक्क हिप्पा येसुमि टिङ्खुबाचि चुबुचि। 2हाङ् खोसॆ आक्खाचि सिमुचि, “माल आन्नॆ निवाँयुङ् लॆटाम्नि हाङ् सॆङ्सॆङॆ लावा भॆट्टकाम्निहॆ?”
खोचिऎ पावल लोसुचि, “काङ्कॆ सॆङ्सॆङॆ लावा चु लोमॆ खानावाँ माखेम्टिटुङ्का।”
3मसॆ पावलऎ आक्खाचि सिमुचि, “आक्र हाङ्ग आन्नॆ मन्टक्मा बाप्टिस्मा लासानिहा टा?” खोचिऎ खानावाँ ऎम्पिटुचि, “युहान्नाऎ चिन्मिम्पा बाप्टिस्मा लासिङ्का।”
4हाङ् पावलऎ लोसुचि, “युहान्नाऎ ग हिङ्वाबाङ् ऎन्पक्मॆ बाप्टिस्मामि खानावाँ इयुक्सुचि। हाङ् काङा डॆङ्पि टाखुबा निवाँयुङ् लॆःॽमा लॆ कामानुङ् लोयुक्सु। म टाखुबा चाइ येसु लॆटा।”
5ग खानावाँ खेमुचिहाङ् खोचिऎ पारभु येसुमि निङ्पि बाप्टिस्मा लासामि। 6पावलऎ खोचि सक्पि खोम् हुक् युङ्पिटुचि, हाङ् आक्खाचिबि सॆङ्सॆङॆ लावा टाआ। हाङ् खोचिऎ होइढा खाप्पि यामुसामि हाङ् निवाँहाङ्मि खानावाँ लोसुचि। 7आक्कुबि खोचि हिपङ्हि जानार याॽमिचि चुआमि।
8पावल याहुडिचि खोम्ठाम् खिम्पि खॆस्से सुम्चि माहिनाढारि ढ्या आँटानुङ् यामुसा। खोसॆ लोमिम्पा खानावाँ याहुडिचिऎ वाबुचिर कामानुङ् खोसॆ निवाँहाङ्मि हाङ्डाम्मि बारेबि इमा मायाइटु। 9टर एक्क हिप्पॆ उम्चि निवाँ लुङ्कॽवा रक्मान मुसुचिहाङ् निवाँयुङ् मालॆटुचि। हाङ् याॽमिचिम् लुम्पिॽन आक्क पावलऎ इमिम्पा लाम्फुमि खानावाँ चेनुचि। मसॆ पावलऎ आक्खाचि याइडाउचिहाङ् खोम् टिङ्खुबाचि चिःक्मानुङ् खाइटा। हाङ् टिरानास लोमॆ याॽमिमि चिन्मॆ खिम्पि डिनाहु येसुमि बारेबि खानावाँ इसु। 10गरहाङ्न खो हिच्चि निङ्ढारि पाइटा। मसॆ एसिया ठालबिहा चोब्न याहुडि नुङ् गिरिक्चिऎ पारभुमि नुऎ खानावाँ खेमुचि।
एफिससबि आक्खॆॽमाहा योम्पक्
11निवाँहाङ्ऎ पावलमि हुक्बाङ् होइढा निवाँयुङ्न लॆःॽहिनॆ आक्खॆॽमाहा योम्पक् यिगु। 12गरकढारि रु, खोसॆ डिन्चाम्पा चे नुङ् बट्टाङ् लाखॆसॆ टुक्खुबाचि डिन्चामिॽयुक्सुचि। हाङ् टुक्खाचि नुबक्युक्सामि हाङ् टुक्खाचिबाङ् खारिॽमाङ्चि खाइहाङ्युक्सामि।
13आक्कुबि वाइसे खारिॽमाङ्चि लाबक्खुबा एक्क हिप्पा याहुडिचि सङ्क चुआमि। खोचिऎ सङ्क पारभु येसुमि निङ् लामानुङ् खारिॽमाङ्चि लोसुचि, “कॆ आना लोक्ना, पावलऎ खेम्मिॽमिम्पा येसुमि निङ्पि आम्पकॆहाङ् खाइटॆ।” 14याहुडि चोब्बाङ् ढ्या याटाङ्पामि सामॆक्बिऎ एक्क स्केवास लोमॆ याॽमिमि वाङ्चि जाना पासाचिऎ आक्र लॆःॽयुक्सामि। 15मसॆ इॽया खारिॽमाङ्ऎ आक्खाचि गर लोसुचि, “कॆ येसु लेकुङ् हाङ् पावल सङ्क लेकुङ्, टर आन्ना चाइ आसार?” 16आक्क खारिॽमाङ्ऎ लाॽमिम्पा याॽमि खोचि सक्पि चेडापा। हाङ् आक्खाचि चोब्न हेचाउचि, हाङ् नाग्हिर नागुचि। मसॆ खोचि हुवा टे पिक्खारामि हाङ् चेः मॆड्डिङ् खिम्बाङ् पिल्लाह्रामि।
17ग खानावाँ एफिससबिहा चोब्न याहुडि नुङ् गिरिक्चिऎ खेमुचिहाङ् किसिखारामि। मसॆ खोचिऎ पारभु येसुमि निङ् ढ्या कामानुङ् ठेरुचि। 18डिरिक् निवाँयुङ् लॆखुबाचि टाआमिहाङ् याॽमिचिम् लुम्पि हिङ्वा योम्पक् लॆटिङ्कानि कासामि। 19गरहाङ्न डिरिक् चाटाक् खाङ्मिखुबा याॽमिचिऎ उम्चि चाटाक् खाङ्मिॽमाह् साब्चिरा खोमुचिहाङ् याॽमिचिम् लुम्पि हिॽलाङ्सुचि। आक्खा साब्चिरा इन्मार ङापङबङ्र सिःमि याङ् सिॽयुङ्सा। 20मसॆ पारभुमि खानावाँ चॆक्मावा नुङ् फुबक्से खारा।
एफिससबि खिमाटुमा
21आक्क डॆङ्पि पावलऎ लावाबाङ् माकेडोनिया हाङ् आखाइया लोमॆ ठाल लिमानुङ् यारुसालेम खॆॽमॆ निवाँ मुसु। हाङ् खो गर कास, “आक्कबाङ् का रोम खॆॽमान लॆङा।” 22हाङ् खोसॆ खो मुबाक्खुबाचि टिमोठि नुङ् इराटस माकेडोनियाबि पाङ्हाङ्सुचि। टर खो चाइ एक्क हिप्चि डिना एसियाब्न पेना।
23आक्रल एफिससबि पारभुमि लाम्फुमि बारेबि खेम्मिॽमिम्पासॆ ढ्या याटॽमाटक् लिसा। 24मान्ठाभनॆ डेमेटिरियास लोमॆ याॽमिऎ सिः डुप्मानुङ् आरटेमिस#१९:२४ गिरिक् याॽमिचिऎ आरटेमिस लोमॆ डेउटा होइढा चोब्न डेउटाचिम् मा कामानुङ् निवाँयुङ् लॆःॽयुक्सुचि। एफिससबिहा याॽमिचिऎ एक्क काम्नुऎ ढ्या निवाँहाङ्मि खिम् हेॽमिम्पा लॆटुचि। आक्कुबि आरटेमिसमि मुर्टि चुङ्युक्सुचि। लोमॆ डेबिमि युङ्ठङ् मुयुक्सु। आक्क योम्पक्बाङ् खोम ढ्या बेप्पारा लिबिम्पा लॆटु। हाङ् होइढा डिरिक् याॽमिचि सङ्क योम्पक् पिॽमिम्पा लॆटु। 25डेमेटिरियासऎ खोम् योम्पक् मुखुबाचि नुङ् होइढा खोम् रक्मान योम्पक् मुखुबाचि खोमुचिहाङ् लोसुचि, “लाङ्काम्चि, ग योम्पक्बाङ्न काङ्कॆ याङ् डुप्मिम्पा ग आन्नॆ ग लेकाम्नि। 26टर ग पावलऎ एफिसस हाटाबि टे हॆॽनॆ, टर चोब्न एसियाबि याॽमिमि हुगॆ मुमिम्पा ठका निवाँहाङ् लिनि कामानुङ् याॽमिचि चोम्पम्पा ग आन्नॆ खाङ्डाम्नि हाङ् खेम्डाम्नि। 27गरक्मा खानावाँऎ ग, कानिम् योम्पक् टे हॆॽनॆ, टर एसिया नुङ् बाखाटेम्पिहा चोब्न याॽमिचिऎ चुङ्कुचॆ ढ्या आरटेमिस डेबिमि खिम् ङेःप्मा याइकुचि हाङ् आरटेमिस डेबिमि नाबुक् चेल्लिङ् खॆ।”
28ग खानावाँ खेमुचिहाङ् खोचि सोम् खेस्से ङाङ्पखॆट्टाआमि। हाङ् गरहाङ् याकाबकामि, “एफिसिचिम् आरटेमिस डेबिमि निङ् सङ्पि लिर।” 29हाङ् ऎच्छक्पिॽन हाटाबि ढ्या याटकमाटक् लिसा। याॽमिचि खोम्टि खारामि हाङ् पिन्से टाआमि हाङ् पावल नुङ् माकेडोनियाबाङ् टामिम्पा गायस नुङ् अरिस्टाखारस लाबुचिहाङ् सॆस्से खाङ्चामॆ ठालबि लाटॆटुचि। 30पावल सङ्क याॽमिचिम् लुम्पि खॆॽमा मिना, टर निवाँयुङ् लॆखुबाचिऎ खो आक्कुबि खॆॽमा मापिट्टुचि। 31एसिया ठालबिऎ एक्क हिप्पा टुङ्घङ्पाचि पावलमि लाङ्काम् लॆटामि। खोचिऎ पावल खाङ्चामॆ ठालबि ऎखाङ्मुर कामानुङ् खानावाँ पाङ्हाङ्सुचि।
32हाङ् आक्कुबि खोम्टि खॆॽमिम्पा याॽमिचिम् लुम्पि एक्कसॆ एक्क खानावाँ हाङ् होइकसॆ होइक खानावाँ इसुचि। मान्ठाभनॆ खोचिबि डिरिक् याॽमिचिऎ माल् लिडॆ कामानुङ् मालेमिम्पा लॆटुचि। हाङ् खोचिऎ काङ्का गुबि मान्ठा खोम्टिखॆडिङ्कॆ लोमॆ खानावाँ उम्चि टाङ्पॆॽन मॆवाबुचि। 33आक्रल याहुडिचिऎ आक्कुबि माङ् लिडॆ लोमॆ इमाम् लागि अलेक्जेन्डर लोमॆ याॽमि यामुसॆ कामानुङ् चोम्पकुचि। हाङ् खोसॆ हाटाबि माङ् लिडॆ लोमॆ खानावाँ इमाम् लागि याॽमिचि हुगॆ यङ् उगानॆ लोसुचि। 34टर खो याहुडि कामानुङ् याॽमिचिऎ लेटकुचि। हाङ् खोचि हिच्चि घान्टार गरहाङ् याकासामि, “एफिसिचिम् आरटेमिस डेबिमि निङ् सङ्पि लिर।”
35आक्क डॆङ्पि हाटाबिऎ साॽमारा साप्खुबाऎ चोब्न याॽमिचि यङ् उग्खॆमिट्टुचि हाङ् लोसुचि, “एफिसिबिहा चोब्न याॽमिचि, ग एफिसिचिम् हाटा ढ्या आरटेमिस डेबिमि खिम् हाङ् नाम्फलिॽवाबाङ् हेॽडिमिम्पा उम् मुर्टि खाङ्खुबा हाटा लोमॆ खानावाँ चोप्पासॆ लेसुचिनिहॆ? 36ग खानावाँ आसॆस चेन्हिसुचिनि। मसॆ ह आन्ना यङ् उगानॆ, हाङ् नुःर निवाँ माटिरे माङ्स आलॆटानॆ। 37मान्ठाभनॆ आन्नॆ लाटॆॽमिम्पा इघा याॽमिचिऎ आरटेमिसमि खिम्बाङ् माङ्स माखुटिटुचि,#१९:३७ एफिसिचिम् चालाना रक्न निवाँहाङ्मि खिम्बाङ् खुःमा चाइ चोब्बाङ् ढ्या काइसॆ योम्पक् लिःयुङ्सा। हाङ् कानिम् निवाँहाङ् काइर सङ्क मालोटिटुचि। 38हाङ् डेमेटिरियास नुङ् खोम् योम्पक् मुखुबाचिम् होइढा याॽमिचि आब्डिक् लॆःॽमॆ खानावाँ चु हाङ्ग न्यायॆ लॆठाम् खिम् नुङ् न्यायॆढिसचि चुक्मि। आन्नामि खानावाँ न्यायॆ लॆठाम् खिम्पि लाटॆहिकाम्नि। 39टर आक्क बाङ्स होइकन खानावाँ चु हाङ्ग, यायेॽमा रक्न याॽमिचि खोम्मा लॆःॽमि। 40आइ लिमिम्पा ग याटॽमाटक्मि आब्डिक् रोमि टुङ्घङ्पाचिऎ काङ्का सक्पि टिसुचि भनॆ, ग मान्ठा लिसॆ कामानुङ् माङ्स काहिसिङ्कानि।” 41साॽमारा साप्खुबाऎ आक्र लोसुचिहाङ् याॽमिचि पाङ्हाङ्सुचि।
ទើបបានជ្រើសរើសហើយ៖
सॆःक्ढुङ्पा 19: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
