२ टिमोठि 2
2
खिरिस्ट येसुमि नुऎ टिलिङ्गा
1काम् पासा रक्मान आना टिमोठि, खिरिस्ट येसुमि नाम्नावाँऎ चॆकुवॆ लिसॆ। 2डिरिक् याॽमिचिम् लुम्पि आनॆ कॆ माङ् लोमिम्पा खेम्डुना, म खानावाँ होइढा निवाँयुङ्मा चिन्हिखुबाचि सङ्क चिनॆचॆ। आनॆ काम् खानावाँ खेम्डुना लोमिम्पा खानावाँबि चुमॆक्सङ् होइढा याॽमिचि सङ्क चुक्मि। 3खिरिस्ट येसुमि चाइबानऎ टिलिङ्गार लिमानुङ् आनॆ सङ्क आम् डुखा काङ्का नुङ् हासॆ। 4टिलिङ्गा लिमिम्पा याॽमिऎ उम् निवाँ गरमर लॆटुनि, मान्ठाभनॆ खोम् निवाँ उम् टुङ्घङ्पा चेन्चामिॽमॆबि टेःॽन टिकु। 5चाइबानऎ खेलाबि भाग लाखुबॆ, आक्क खेलाबि लॆःॽमा लॆऎ यायेॽमा रक्न मालॆपा खोसॆ इनाम टक्चाउनि। 6टाङ्पामि होप्ठॆॽवा अङ्मिसे रोपाबि योम्पक् मुखुबान सिमिम्पा उम्चामि भाग याॽल टक्चाखुबा लिमा लॆ। 7कॆ लोमिम्पा मिट्टुहा खानावाँबि काम्नुःर निवाँ टिसॆ, मान्ठाभनॆ इघा चोब्न खानावाँ वाप्माम् लागि पारभुऎन आना निवाँ पि।
8डाउड हाङ्मि सामॆक्बिऎ सिखॆम्पाबाङ् हिङ्पम्पा येसु खिरिस्ट निवाँबि युङ्ढाङ्सॆ। कॆ खेम्मिॽमिम्पा नुऎ खानावाँ मन। 9हाङ् म नुऎ खानावाँ खेम्मिॽमिम्पासॆन काङॆ डुखा आङ्मॆ पाइकुङ् हाङ् एक्क आब्डिक् नुङ्मा याॽमिर चॆक्चिमि पाडाक्ऎ हिक्टिखॆॽमानुङ् सॆक्ढिङ्खॆडिङ। टर निवाँहाङ्मि खानावाँ चाइ पाडाक्ऎ हिक्टिखॆॽनि। 10मसॆ निवाँहाङ्ऎ सॆःक्मिम्पाचिम् लागि कॆ चोब्न डुखा आङ्मा हेकुङ्, मसॆ खोचि सङ्क हिङ्चामा नुङ् खिरिस्ट येसुबि चुऎ हानाम्स लुक्खॆॽनॆ निङ्लावा टक्चाउचिर। 11ग चाइबानऎ खानावाँ यो
कानि खोनुङ्न सिखारि हाङ्ग, फेरि खोनुङ्न हिङ्चाकि।
12कानि डुखा आङ्से लाम्ढुसि हाङ्ग, खोनुङ्न हाङ्डाम् सङ्क लॆकि।
हाङ् खो कानिऎ सिच्चाआ हाङ्ग, खोसॆस कानि सिच्चाकि।
13कानिऎ निवाँयुङ् लॆटिनि हाङ्स, खिरिस्ट येसु निवाँयुङ्ऎन लॆ
मान्ठाभनॆ खो खोसॆॽन खोम् खानावाँ चेन्हिसुनि।
हिच्चि खालाहा चिन्खुबाचि
14हाङ् खोचि ग खानावाँ इमानुङ् पारभुमि ङारिङ्पिॽन लोसॆचॆ, यामुमिम्पा चोब्न साम्देन्पि खोचि हुन्न टक्भॆहा टक्भॆहा खानावाँ आइमिर, आक्कसॆ माङ्स काम्नुऎ योम्पक् यिगुनि, टर खेम्खुबाचिम् निवाँ इऎ मुबिकुचि। 15ऎङेसिमॆ खालॆ हाङ् चाइबानऎ खानावाँ काम्नुःर फॆॽहिखुबा योम्पक् मुखुबा एक्क याॽमिर पाइसॆ हानाम्स निवाँहाङ्मि ङारिङ्पि नुऎ याॽमि लिमाबि निवाँ टिसॆ। 16योम्पक् पिॽनॆ हुन्नहा खानावाँबाङ् मिउन पेनॆ। आक्रहा खानावाँऎ ग याॽमिचि झाना काइसॆ मुमानुङ् निवाँहाङ्बाङ् मिउ टॆकुचि। 17आक्खाचिम् खानावाँ ग नाॽबखुबा हुवा रक्मान। हुमेनियास नुङ् फिलेटासऎ इमिम्पा खानावाँ सङ्क मन। 18खोचिऎ चाइबानऎ खानावाँ याइडुचि हाङ् सिखॆम्पाबाङ् हिङ्पक्मॆ खानावाँ याॽलिन लिखारा काग्मि। हाङ् ऎॽवा जानामि निवाँयुङ्न नासॆलॆपिडुचि। 19हाङ्स निवाँहाङ्पि चाइबान निवाँयुङ् लॆखुबाचिम् निवाँयुङ् चाइ खिम्मि चॆकुवॆ जाग्र हानाम्स योरॆॽनि। मान्ठाभनॆ जाग्बि गरहाङ् साब्डा, “खोसॆ टाङ्पाम् याॽमिचि लेकुचि” हाङ् “पारभुमि निङ् लाखुबॆ काइसॆ योम्पक् याइमान लॆ।” 20टर एक्क चासुम्टाङ्पामि खिम्पि फिःइया नुङ् सिःमि टे कक्नाम् लिनि। आक्कबि सिङ् नुङ् बाखामि कक्नाम् सङ्क लि। ऎॽवा कक्नाम् चाइ ढ्या योम्पक्मि लागि फॆरुक् हाङ् ऎॽवा चाइ मिछुॽमा योम्पक्मि लागि फॆरुक्। 21मसॆ आसा चाइ आक्खा हुन्नहा खानावाँबाङ् आम्प हाङ् टाङ्पा सॆङ्सॆङॆ मुकु, आक्क ढ्या योम्पक्पि फॆरुऎ कक्नाम्र लि, मान्ठाभनॆ खोसॆ टाङ्पा सॆङ्सॆङॆ मुकु हाङ् टुङ्घङ्पामि लागि योम्पक् टाखुबा कक्नाम् लि। 22वॆन्चा लिमार निवाँबि टाहा काइसा खानावाँबाङ् मिउन पेनॆ बोरु निवाँनेन् याॽमिचि नुङ् निवाँयुङ्पि, नाम्नाम् पिसिॽमाबि हाङ् सान्टिबि पेनॆ। 23टर निवाँ मॆड्डिङ्हा हाङ् योम्पक् पिॽनिहा हुन्नहा खानावाँबाङ् मिउ पेनॆ, आनॆ लेकुना गरहा खानावाँऎ ग खिमाटुमा टॆ लाबकु। 24हाङ् पारभुमि योम्पक् मुखुबॆ खिमॆटुमा फॆनफॆन्नि, टर खो चोब्ननुङ् टङ्चाखुबा, चिन्मा हेखुबा हाङ् आङ्हिखुबा लिमा लॆ। 25हाङ् खो सिच्चाखुबाचिनुङ् सङ्क नुःर यामुमानुङ् चिन्हिखुबा लिमा लॆ। हाङ्टेःॽन निवाँहाङ्ऎ उम्चि निवाँ ऎम्पिकुचि हला हाङ् खोचिऎ चाइबानऎ खानावाँ वाप्हिकुचि। 26हाङ् उम्चि निवाँ हेम्ब हाङ् साइटानमि चिःप्लुङ्बाङ् आम्पक्मि। ह आक्कसॆ खोचि उम् निवाँर पाइमिॽमाम् लागि ठुब्भुङ्डुचि।
ទើបបានជ្រើសរើសហើយ៖
२ टिमोठि 2: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society