२ युहान्ना 1
1
1काङा मान्डालिमि टुङ्घङ्पा युहान्नाऎ ग साब्चिरा साप्हाङ्मे पाइकुङ। हाङ् ग साब्चिरा चाइ निवाँहाङ्ऎ सॆःक्मिम्पा मेॽनुङ्मा हाङ् खोम् पासाचिम्#१:१ गसॆ लोमा यकुवॆ चाइ मान्डालि हाङ् आक्कुबि चुःक्मिहा याॽमिचि रेम। हाङ् ग साम्देन ४ नुङ् ५ पाडबि स खाङ्मु। १३ पड्बि चुऎ नानुसाचि लोमॆ चाइ होइक ठालबिऎ निवाँयुङ् लॆखुबाचि यो। लागि यो। आन्ना कॆ नाम्नाम् पिसिकानि। काङॆ टे हॆॽनॆ, टर चाइबानऎ खानावाँ लेखुबा चोप्पासॆ नाम्नाम् पिसिकानि, 2मान्ठाभनॆ चाइबानऎ खानावाँ कानिनुङ चु हाङ् आक्क कानिनुङ् लिढाङ्।
3हाङ् निवाँहाङ् आपा नुङ् उम् पासा येसु खिरिस्टबाङ् कानिबि नाम्नावाँ नुङ् नाम्नाम् पिसिॽमॆ खानावाँ हाङ् सान्टि लिर। म खानावाँ खोम् चाइबानऎ खानावाँ हाङ् नाम्नाम् पिसिपे चुखुबाचिनुङ् लिर।
चाइबानऎ खानावाँबि हिङ्चामॆ
4हाङ् आनामि पिसाचिबि ऎॽवाचिऎ निवाँहाङ् आपॆ लोमिम्पा खानावाँ खेम्मिम्पा रक्न लाम्ढुम्डामि लोमॆ खानावाँ कॆ लेटक्डुङ् हाङ् एट्टान चेन्चाडिङ। 5कॆ आन्ना उम्चङ्ऎ खानावाँ इमिम्पा हॆॽनॆ, टर याॽलऎबाङ् कानिनुङ् चुऎ खानावाँन इमा परक्डुङ। लाङ्काम्चो, म खानावाँ माङ्भनॆ कानिऎ एक्कसॆ होइक नाम्नाम् पिसिपे चुइयॆ कामानुङ् लोकानि। 6हाङ् नाम्नाम् पिसिमाबि पेन्मान निवाँहाङ्ऎ लोमिम्पा खेम्मॆ रेम। हाङ् आन्नॆ याॽलऎ बाङ्न खेम्कॆॽमिम्पा खानावाँ सङ्क म आन्ना नाम्नाम् पिसिॽमाबि पेनानॆ लोमॆन।
7मान्ठाभनॆ येसु खिरिस्ट सालुङ्पि टामिम्पा हॆॽनॆ काखुबा डिरिक् याॽमिचि बाखाटेम्पि टाडामि। आक्खाचि चाइ याॽमिचि फोप्सिखुबाचि हाङ् खिरिस्ट सिच्चाखुबा यो। 8मसॆ आन्नॆ यिक्मिम्पा योम्पक्मि नाम्याक् आमाइटुम्यॆ कामानुङ् नुःर पाइखुबा लिसानॆ। आन्ना नाम्याक् माइखुबाचि हॆॽनॆ, टर आक्क खेःॽल टक्चाखुबा लिसानॆ। 9हाङ् आसा खिरिस्टमि खानावाँबाङ् होइक खानावाँबि लागालि, आक्कनुङ् निवाँहाङ् लिनि। टर आसा चाइ खोम् खानावाँबि लि, खोनुङ् निवाँहाङ् आपा नुङ् पासा हिप्पान लिक्चि। 10मसॆ आसॆ चाइ आन्नाबि टामानुङ् खिरिस्टमि बारेबि चाइबानऎ खानावाँ इसुनि, आक्क याॽमि आम्नि खिम्पि ऎलाखॆटाम्नॆ हाङ् स्यासुऎस्यामिटाम्नॆ। 11मान्ठाभनॆ आसॆ चाइ आक्रक्मा याॽमि स्यामिकु, खोसॆ आक्क याॽमिऎ मुमिम्पा काइसॆ योम्पक् मुबाक्मिम्पा लिक्।
12हाङ् काङॆ आन्ना लोमॆ खानावाँ ग डिरिक् चु, टर आक्खा खानावाँ ग साब्चिराबाङ् हॆॽनॆ। आन्ना कॆ सॆॽलन चुःप्कानि हाङ् लोकानि, आक्रल कानि ऎट्टान चेन्चाकि। 13हाङ् निवाँहाङ्ऎ सॆःक्मिम्पा आम् नुसामि पासाचिऎ सङ्क आना स्यामिडामि यो।
ទើបបានជ្រើសរើសហើយ៖
२ युहान्ना 1: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society