१ टिमोठि 2
2
पारठानामि खानावाँ
1कॆ आन्ना ढ्या खानावाँ लोकानि, चोब्न याॽमिचिम् लागि पारठाना लॆटानॆ। निवाँहाङ् खोचि मुबाकॆ कामानुङ् लोसाम्चिनॆ, निवाँहाङ् नुङ् खोचिम् लुम्पि यामुबिक्खुबा याॽमि लिसानॆ हाङ् चोब्नमि लागि निवाँहाङ् ओहाक् लोसाम्नॆ। 2हाङ् हाङ्चि नुङ् टुङ्घङ्पाचिम् लागि सङ्क पारठाना लॆटानॆ। मसॆ कानि सान्टि नुङ् भाक्टिबि सॆङ्सॆङॆ लिमानुङ् नुऎ हिङ्खामा हिङ्चाहिकि। 3गरहाङ् चोब्नमि लागि पारठाना लॆःॽमॆ योम्पक् काम्नुऎ यो, गरक्मा योम्पक्ऎ कानिम् फाक्खुबा निवाँहाङ् चेन्चाक् यो। 4मान्ठाभनॆ निवाँहाङ् चोब्न याॽमिचि हिङ्चामिर हाङ् चाइबानऎ निवाँ लेसुचिर मिनुक्। 5निवाँहाङ् एक्क टे चु हाङ् याॽमि नुङ् निवाँहाङ्मि लुम्पि येप्पिखुबा सङ्क एक्क टे चु। म याॽमि चाइ खिरिस्ट येसु यो। 6हाङ् चोब्न याॽमिचि हिङ्पॽमिस्सि खो टाङ्पॆ टाङ्पान सङ्टिबिइट्टु। गन निवाँहाङ्ऎ नुऎ लबि बाखाटेम्बिहा याॽमिचि हिङ्पक्मिस्सि पिॽमिम्पा चुमॆक्सङ् यो। 7हाङ् गमि लागिॽन काङा निवाँहाङ्ऎ पाङ्कुचा नुङ् सॆःक्ढुङ्पा लिमाम् लागि सॆःगिङ। हाङ् होइढा हॆॽनिबारेक्चिम् लागि चाइ चाइबानऎ निवाँयुङ् चिन्खुबा लिसिङ। कॆ लोमिम्पा खानावाँ चाइबानऎ, काङा ढाटु बङ्चाङानि।
8मसॆ चोब्न ठालबि वाठाङ्पाचिऎ उम्चि सॆङ्सॆङॆ हुक् ठेॽमानुङ् सिरि मॆड्डिङ् हाङ् याबियाबि मॆकारे पारठाना लॆःॽमिर कामानुङ् मिङ्ङा। 9गरहाङ्न मेॽनुङ्माचिऎ सङ्क नुऎ खॆन्चाखुबा चे चाङ्मिर। हाङ् टाङाक् एट्टा ऎचागुचिर हाङ् डिरिक् याङ् सिक्खुबा फिःइया नुङ् चाक्मारा आचाॽमिर, 10टर निवाँहाङ् चुङ्सि चुप्लाङ् मुखुबा मेॽनुङ्माचिऎ खोचिऎ मुमा खॆन्चाकुयॆ नुऎ योम्पक् टे यिक्से टाङ्पा चाक्मा लॆ। 11हाङ् मेॽनुङ्माचिऎ खोचि सक्पि ढुप्पाट्ट लॆखुबा मान्डालिबिहा टुङ्घङ्पाचिम् ढुप्पाट्ट हङ्सि पेन्से यङ् उःक्मानुङ् चिन्मिर।
12काङॆ चाइ मेॽनुङ्माऎ वाठाङ्पा सक्पि ढुप्पाट्ट लेःॽमा हाङ् चिन्मा पिॽङाचिनि। खोचि यङ्उक्मानुङ् खासिसे चिन्मा लॆमि। 13मान्ठाभनॆ याॽल आडाममि सिरिस्टि लिसा हाङ् आक्क डॆङ्पि टे हाब्बामि सिरिस्टि लिसा। 14हाङ् साइटानबाङ् याॽल आडाम् फोप्सिखॆॽमिम्पा हॆॽनॆ, टर मेॽनुङ्माऎ चाइ फोप्सिखॆॽमानुङ् हिङ्वा लॆःॽमिम्पा रेम। 15टर मेॽनुङ्माचि नाम्नाम् पिसिॽमे खानावाँबि, निवाँयुङ्पि हाङ् सॆङ्सॆङॆ लिःमानुङ् पेनामि हाङ्ग चाचा टक्मार खोचि हिङ्चाक्मि।
ទើបបានជ្រើសរើសហើយ៖
१ टिमोठि 2: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society