१ युहान्ना 5
5
निवाँहाङ्मि पासाबि निवाँयुङ् लॆॽमॆ खानावाँ
1हाङ् येसुन खिरिस्ट कामानुङ् निवाँयुङ् लॆखुबाचि चोब्न निवाँहाङ्मि पासाचि यो। हाङ् आसॆ निवाँहाङ् आपा नाम्नाम् पिसिकु, खोसॆ खोम् पासा सङ्क नाम्नाम् पिसिकु। 2हाङ् कानिऎ निवाँहाङ् नाम्नाम् पिसिटा हाङ् खोम् खानावाँ खेमा हाङ्ग खोम् पासाचि सङ्क नाम्नाम् पिसिकुचिमि कामानुङ् लेःॽन। 3मान्ठाभनॆ निवाँहाङ्मि खानावाँ खेम्मान खो नाम्नाम पिस्सिम्पा रेम। खोम् खानावाँ ऎनऎपाइहिमॆ खालॆ लॆःॽनि। 4मान्ठाभनॆ निवाँहाङ्मि चोब्न पासाचिबि बाखाटेम्बाङ् टाङ्पाबि टामिम्पा काइसॆ खानावाँ कानिबि चुऎ निवाँयुङ्बाङ् हेचाइ। 5बाखाटेम्बाङ् टामिम्पा काइसॆ खानावाँ हेचाखुबा आसारटा? लोमार आसॆ येसु निवाँहाङ्मि पासा कामानुङ् निवाँयुङ् लॆकु खोन।
येसु खिरिस्टमि चुमॆक्सङ् पिक्खुबाचि
6येसु खिरिस्टऎ खो निवाँहाङ्मि पासा लोमॆ खानावाँ योवामि बाप्टिस्मा लामानुङ् हाङ् कुरुसाबि हारि अङ्मिॽमानुङ् खाङ्मुसु। खो योवाबाङ् टे हॆॽनॆ, टर हारिबाङ् सङ्क टाआ। गमि चुमॆक्सङ् सॆङ्सॆङॆ लावाऎ पिडु। आक्क चुमॆक्सङ् पिक्खुबा सॆङ्सॆङॆ लावा चाइबानऎ यो। 7मसॆ इघा सुम्चि खानावाँऎ चुमॆक्सङ् पिकु। 8हाङ् सॆङ्सॆङॆ लावामि चुमॆक्सङ्, येसुमि योवामि बाप्टिस्मा हाङ् कुरुसाबि हारि अङ्मिॽमिम्पा खानावाँ, इघा सुम्चि खानावाँऎ खो निवाँहाङ्मि पासा कामानुङ् खाङ्मुकु। 9याॽमिऎ पिॽमिम्पा चुमॆक्सङ्बि कानिऎ निवाँयुङ् लॆकि, टर निवाँहाङ्मि चुमॆक्सङ् चाइ याॽमिमिबाङ्स ढ्या यो मान्ठाभनॆ आक्क निवाँहाङ्मि चुमॆक्सङ् रेम। म चुमॆक्सङ् खोसॆ खोम् पासामि बारेबि पिःॽडु। 10हाङ् आसॆ निवाँहाङ्मि पासा सक्पि निवाँयुङ् लॆकु, आक्कमि निवाँ हङ्सि निवाँहाङ्ऎ पिॽमिम्पा आक्खा चुमॆक्सङ् चाइबानऎन मिनुकु। टर आसॆ आक्खा खानावाँबि निवाँयुङ् लॆटुनि, खोसॆ निवाँहाङ्ऎ खोम् पासामि बारेबि पिॽमिम्पा चुमॆक्सङ्पि निवाँयुङ् लॆटुनिहाङ् निवाँहाङ् बङ्सिखुबा मुकु। 11हाङ् चुमॆक्सङ् चाइ गन निवाँहाङ्ऎ कानि हानाम्स आसिखॆॽमॆ हिङ्खामा पिट्टि हाङ् आक्क हिङ्खामा खोम् पासाबि चु। 12हाङ् आसानुङ् चाइ पासा चु, खोनुङ् हिङ्खामा लि हाङ् आसानुङ् चाइ निवाँहाङ्मि पासा माआ खोनुङ् हिङ्खामा लिनि।
हानाम्स लुक्खॆॽनॆ हिङ्खामा
13हाङ् निवाँहाङ्मि पासाबि निवाँयुङ् लॆखुबा आन्नॆ हानाम्स सिक्खॆनॆ हिङ्खामा टक्चाडाम्नि लोमॆ खानावाँ वाबाम्नॆ कामानुङ् कॆग साब्चिरा साप्मॆ पाइकानि। 14हाङ् निवाँहाङ्मि निवाँ आनुसारॆ नुऎ खानावाँ कानिऎ ङागि हाङ्ग, खोसॆ म कानिम् खानावाँ खेम्कु कामानुङ् नुःर ले। 15हाङ् कानिऎ माङ् ङागा हाङ्स खोसॆ कानिम् खानावाँ खेम्कु कामानुङ् वाबुॽ हाङ्ग, कानिऎ ङाग्मिम्पा खानावाँ खोसॆ पिडि कामानुङ् सङ्क ले। 16हाङ् एक्कसॆ होइक उम् खिरिस्टियान नुसाऎ नाराक्पि ऎटॆखुबा हिङ्वा योम्पक् यिक्मॆ पाइमिम्पा खाङु हाङ्ग, खोसॆ उम् खिरिस्टियान नुसामि लागि निवाँहाङ् नुङ् पारठाना लॆपिटुर, हाङ् निवाँहाङ्ऎ आक्क हिङ्खमा पिकु। टर गरक्मा हिङ्वा योम्पक् सङ्क चु, आक्कसॆ नाराक्पि ल्हॆकु। आक्रक्मा हिङ्वा योम्पक् यिक्खुबामि लागि पारठाना लॆःॽमा लॆ कामानुङ् काङा काङानि। 17चोब्न काइसा योम्पक् हिङ्वा योम्पक्न। टर गरक्मा हिङ्वा योम्पक् सङ्क लि, आक्कसॆ नाराक्पि ल्हॆॽनि।
18हाङ् निवाँहाङ्बि जान्मा लिमिम्पा याॽमिऎ हिङ्वा योम्पक् यिक्ढाङ्सुनि लोमॆ कानिऎ लेः। मान्ठाभनॆ खो निवाँहाङ्मि पासाऎ खाङ्कु हाङ् साइटानऎ आक्क माङ्स लॆहिसुनि। 19हाङ् चोब्न बाखाटेम् साइटानमि हुक्पि चु हाङ्स कानि चाइ निवाँहाङ्मि पासाचि लोमॆ कानिऎ ले। 20हाङ् ग खानावाँ कानिऎ ले निवाँहाङ्मि पासा टाआ हाङ् कानिऎ चाइबानऎ निवाँहाङ् लेसुचिर कामानुङ् निवाँ पिट्टि। हाङ् गरक्ल कानि चाइबानऎ निवाँहाङ्बि चुकि, मान्ठाभनॆ खोम् पासा येसु खिरिस्ट नुङ् कानि चुकि। खो एक्क टे चाइबानऎ निवाँहाङ् हाङ् हानाम्स आसिखॆखुबा हिङ्खामा लोमॆ कानिऎ ले।
21हाङ् कॆ नाम्नाम् पिसिम्पा पिसाचि, याॽमिचिम् हुगॆ मुमिम्पा निवाँहाङ्बाङ् आन्ना मिउन पेनानॆ।
ទើបបានជ្រើសរើសហើយ៖
१ युहान्ना 5: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society