१ कोरेन्ठि 9
9
सॆःग्ढुङ्पामि ढुप्पाट्ट
1माल काङॆ माङ् मिनुॽङा म योम्पक् यिक्मॆ ढुप्पाट्ट निवाँहाङ्ऎ मापिट्टिॽङॆहॆ? माल काङा सॆःग्ढुङ्पाङा हॆॽङानॆ? माल काङॆ कानिम् पारभु येसु खिरिस्ट माखाङ्टिॽङॆहॆ? माल कॆ पारभुमि लागि यिक्मिम्पा योम्पक्बाङ्न आन्नॆ खो टिङ्मिम्पा हॆॽनॆ? 2ऎॽवा याॽमिचिऎ काङा सॆक्ढुङ्पा मिॽङामिनि हाङ्स आन्नॆ ग मिङानि। आन्नॆ खिरिस्ट टिङ्मिम्पा खानावाँऎन काङा सॆःग्ढुङ्पाङा लोमॆ चुमॆक्सङ् पिकु। 3काङा आब्डिक् टिखुबाचिमि खानावाँ ऎम्पिॽमाम् लागि कॆ गन लोकुङ्चि, 4माल बारनाबास हाङ् काङॆ आन्नामि लुम्पि काङ्कॆ योम्पक् यिक्मार आन्नाबाङ् चामा डुङ्मा टक्चामॆ ढुप्पाट्ट काङ्कानुङ् माचुहॆ? 5माल होइढा सॆःक्ढुङ्पाचि हाङ् पारभुमि नुसाचि हाङ् पाट्रुसऎ रक्न टाङ्पामि खिम्टाङ्मा चिःग्मानुङ् पारभुमि योम्पक् यिक्मॆ ढुप्पाट्ट काङ्कानुङ् माऎ? 6माल काचिगा हिप्पाऎ टे टाङ्पाम् बःक् टाङ्पॆॽन हिङ्मा लॆऎ? 7माल टिलिङ्गाऎ टाङ्पाम् याङ्ऎ योम्पक् यिगुयॆ? माल आङ्गुर लिखुबाऎ आङ्गुर चाउनॆहॆ? माल पिक्चि हिङ्खुबाऎ डुरु डुङ्मा टक्कुनिहॆ?
8इघा खानावाँ चाइ काङॆ याॽमिम् निवाँबाङ् टे लोमिम्पा हॆॽनॆ, यायॆॽमाऎ सङ्क कॆ लोमिम्पा रक्न इकु। 9मान्ठाभनॆ मोसामि यायॆॽमाबि गरहाङ् साब्डा, “डाँइ लॆःॽमार हिक्मिम्पा पिक्चि महला ऎटिबिटाम्नॆ।”#यायेॽमा २५:४ माल ग खानावाँ निवाँहाङ्ऎ पिक्मि लागिन लोमिम्पा हॆ? 10माल खोसॆ आक्क खानावाँ कानिम् लागि लोमिम्पा हॆॽनॆ? चाइबान आक्क खानावाँ कानिम् लागि लोमिम्पा यो, मान्ठाभनॆ रोपा चेक्खुबॆ चारुङ् खोम्चाटकुङ् मिन्से चेरुकु हाङ् डाँइ लॆखुबॆ चारुङ् टक्चाकुङ् कामानुङ्न डाँइ लॆकु।
11हाङ् काङ्कॆ चाइ आन्नामि लुम्पि लावामि उम्चा टुब्डुङ्का हाङ्ग, काङ्कॆ काङ्का पाबुहा ठःका आन्नाबाङ् टक्चामॆ ढुप्पाट्ट चुआ हाङ्स आन्नाबाङ् माङ्स मालासुङ्का। 12हाङ् होइढा याॽमिचिऎ आन्नाबाङ् माङ्माङ् टक्चाकुचि हाङ्ग, काङ्कॆ झाना टक्चामा लॆऎ हॆॽनॆ? टर काङ्कॆ आक्क ढुप्पाट्ट माफॆरुङ्का। बोरु खिरिस्टमि नुऎ खानावाँ खेम्मिॽमॆ योम्पक्पि ऎक्मॆ योम्पक् आलिर कामानुङ् काङ्कॆ चोब्न खानावाँ आङुङ्का। 13हाङ् माल निवाँहाङ्मि खिम्पि योम्पक् यिक्खुबाचिऎ आक्कबाङ्न चाःक्मि हाङ् युङ्ठङ्पि योम्पक् यिक्खुबाचिऎ आक्कबाङ्न टक्चाकुचि लोमॆ आन्नॆ लेसाम्निनिहॆ? 14गरहाङ्न नुऎ खानावाँ खेम्मिखुबाचिऎ आक्कबाङ्न खो पाबुहा ठःका टक्चाउर कामानुङ् पारभुऎ काङा।
पावलऎ खोम् ढुप्पाट्ट फॆॽङानि लोमिम्पा
15टर काङॆ आक्खा माङ्स ढुप्पाट्ट माफॆॽटिॽङा। हाङ् काम् लागि आन्नॆ आक्रहाङ्न चोब्न टङ्मा लॆ कामानुङ् ग साब्चिरा साप्मिम्पा स हॆॽनॆ। आक्र लॆःॽमाबाङ् ग काङा सिःखॆॽमा काम्नुऎ लि। काङॆ काम् योम्पक्बि नाबुक् ठेॽहिङार कामानुङ् काङॆ आन्नाबाङ् माङ्स लाङानि। 16काङॆ नुऎ खानावाँ याॽमिचि खेम्मिॽमिम्पाबि काङा ढ्या लॆङ्मॆ खानावाँ माङ्स माआ मान्ठाभनॆ काङॆ ग योम्पक् यिक्मान लॆ। काङॆ नुऎ खानावाँ याॽमिचि माखेम्मिटुङ्चि हाङ्ग, आक्क काम् लागि एट्टान काइसॆ लि। 17काम् लागि होइक लाम् सङ्क टा माआ मसॆ निवाँहाङ्ऎ पिॽमिम्पा योम्पक् यिक्मे पाइकुङ। टर काङॆ ग योम्पक् काम् टाङ्पॆन यिगुकुङ् हाङ्ग, निवाँहाङ्ऎ काङा नाम्याक् पिःॽङा। 18आक्र हाङ्ग काङामि नाम्याक् चाइ माङ्लो टा? काङानुङ् ढुप्पाट्ट चु हाङ्स याॽमिचिबाङ् माङ्स मालारे मरॽन नुऎ खानावाँ खेम्मिॽमॆ योम्पक् टक्चामान काङामि नाम्याक् रेम।
19काङा आसाम्स योम्पक् मुखुबा ग हॆॽनॆ, मरहाङ्स याॽमिचि खिरिस्टबि निवाँयुङ् लॆःॽमिॽमाम् लागि काङॆ काङान चोब्न याॽमिचिम् योम्पक मुखुबा मुडुङ। 20हाङ् याहुडिचिम् लुम्पि योम्पक मुमार खोचिऎ खिरिस्टबि निवाँयुङ् लॆटुचिर कामानुङ् काङा खोचि रक्मान लिसिङ। हाङ् काङा मोसामि यायेॽमा हङ्सि पेन्ङानि हाङ्स मोसामि यायॆॽमा रक्न पाइखुबाचिम् लुम्पि खोचिऎ खिरिस्टबि निवाँयुङ् लॆटुचिर कामानुङ् का सङ्क खोचि रक्न यायॆॽमामि ढुप्पाट्टबि पेनिङ। 21हाङ् यायॆॽमा मॆड्डिङ्हा हॆॽनिबारॆक्चिम् लुम्पि योम्पक् मुमार खोचिऎ खिरिस्टबि निवाँयुङ् लॆटुचिर कामानुङ् काङा सङ्क खोचि रक्न यायॆॽमाबि मॆड्डिङ्मा याॽमिर पाइटिङ। कॆ लोमा यकुङॆ खानावाँ चाइ काङा निवाँहाङ्मि यायेॽमाबि माइङ लोमिम्पा हॆॽनॆ, टर खिरिस्टमि यायेॽमा चुःॽङा लोमिम्पा यो। 22हाङ् निवाँयुङ्बि चॆकुमिनिहाचिम् लुम्पि योम्पक मुमार खोचिऎ खिरिस्टबि निवाँयुङ् लॆटुचिर कामानुङ् काङा स खोचि रॽमान लिसिङ। गरहाङ् याॽमिचिऎ मान्ट हाङ्स खिरिस्टबि हिङ्खामा टक्चाउचिर कामानुङ् खोचिमि लागि काङा चोप्ठःका लिसिङ। 23नुऎ खानावाँमि लागिॽन काङॆ इगा चोब्न योम्पक् यिक्मे पाइकुङ् हाङ् ग योम्पक्बाङ् टाऎ आसिका सङ्क टक्चाकुङ् कामानुङ् मिनुॽङा।
24चाइबान आन्नॆ लेकाम्नि, पिन्मॆ खेलाबि चोब्न पिनुॽमि, टर नाम्यक् टक्चाखुबा चाइ हेचाखुबा एक्कसॆ टे टक्चाकु। गरहाङ्न आन्ना सङ्क नाम्याक् टक्चाकुङ्न कामानुङ् पिनानॆ। 25खेलाबि भाग लाखुबाचिऎ चोब्ठकाबि टाङ्पा नुःर चिनुकुचिमि। खोचि ग आक्क सोप्खॆऎ माला टक्चामाम् लागि आक्र लॆःॽमि, टर कानि चाइ हानाम्स लिडाङ्ऎ मुकुटमि लागि गरक्मा योम्पक् यिगुकि। 26मसॆ काङा हिॽयापार हाबि ग हाबि पिन्टिॽङानि। हाङ् चोब्न वाबुकुङ् हाङ्टेःॽन पिनुॽङा। 27टर काङॆ काङाम् सालुङ् चाइ एट्टान डुखा पिॽमानुङ् टाहा टिकुङ। गर मालॆःॽङा हाङ्ग काङॆ होइढा याॽमिचि नुऎ खानावाँ खेम्मिॽमार काङा चाइ हुन्नऎ याॽमि लिःॽङा।
ទើបបានជ្រើសរើសហើយ៖
१ कोरेन्ठि 9: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society