१ कोरेन्ठि 7
7
भ्यामि खानावाँ
1ह चाइ आन्नॆ काङा माङ् साप्हाङ्सिङ्नि आक्कमि बारेबि लोकानि। ऎॽवा याॽमिचि गर काग्मि, “एक्क वाठाङ्पाऎ मेॽनुङ्मा नुङ् ऎइम्चामान नुऎ लि।” 2टर काङा चाइ गर काॽङा ब्याबिचारा आलिर कामानुङ् चोप्पासॆ भ्या लॆःॽमान नुऎ लिक। चोब्न वाठाङ्पाचिम् टाङ्पाम खिम्टाङ्मा हाङ् चोब्न मॆनुङ्माचिम् टाङ्पाम खिम्टाङ्पा लिर। 3वाठाङ्पॆ टाङ्पाम् खिम्टाङ्मा सक्पि लॆःॽमा लॆऎ योम्पक मुसुर हाङ् मॆॽनुङ्मॆ सङ्क टाङ्पाम खिम्टाङ्पा सक्पि लॆःॽमॆ योम्पक यिगुर हाङ् हिप्पाङऎन टाटाङ्पामि योम्पक् यिक्चिर। 4खिम्टाङ्मामि सालुङ्पि खिम्टाङ्पामि ढुप्पाट्ट लि। आक्रक्न खिम्टाङ्पामि सलुङ् स खिम्टाङ्मामि ढुप्पाट्टबि लि। 5खिम्टाङ्पानुङ् खिम्टाङमा नुःर टङ्चासे एक्कसॆ होइकमि ढुप्पाट्ट खासिमानुङ् सोरि लिमा लॆकानि। इम्चामॆ खानावाँबि फाग्मा सिट्टानि हाङ्स पारठानामि लागि टे खानावाँ टङानॆहाङ् ऎच्छक्मि लागि फागानॆ। हॆॽनि सोरि मान्लिसानि हाङ्ग आम्नि निवाँ ठुब्हिसानिनिर साइटानऎ फोब्डाङ्कानि। 6काङॆ ग खानावाँ लेमान लॆ कामानुङ् हॆॽनॆ टर लेटकाम्ने कामानुङ् लोडानिहा यो। 7चोब्न याॽमिचि काङा रक्न लिमिर मिनुॽङा। टर कानि चोब्न याॽमिचिऎ निवाँहाङ्बाङ् होइक होइकन बारडाना टक्चामिम्पा लि।
8ह काङॆ भ्या मान्लॆटिॽमिहा याॽमिचि हाङ् लाङ्मिॽमाचिम् लागि लोमॆ पाइकानि, खोचि काङा रॽन भ्या मान्लॆरे पेनुॽमि ग नुऎ रेम। 9टर आन्नॆ टाङ्पाम निवाँ ठुब्मा हेसाम्निनि हाङ्ग भ्या लॆटानॆ। इम्चाटिॽमॆ मिन्चामा भान्डा गग भ्या लॆमा नुऎ लि।
10भ्या लॆखुबाचिबि खिम्टाङ्माऎ खिम्टाङ्पा ऎयाइटुर। ग खानावाँ काङॆ लोमिम्पा हॆॽनॆ, टर पारभुमि खानावाँ यो। 11हाङ् याइइटु हाङ्स भ्या मालॆःॽरे पेन्ल हाङ् डॆङ्पि खोम् खिम्टाङ्पानुङ्न टङ्चार। गरहाङ्न खिम्टाङ्पाऎ खोम् खिम्टाङ्मा याइॽमा फॆन्नि।#मट्टि ५:३२; १९:९; मारकुस १०:११-१२; लुका १६:८
12हाङ् आन्ना होइडाचि स काङॆ गर लोकानि, ग पारभुमि खानावाँ हॆॽनॆ टर काम खानावाँ यो। खिरिस्टियन बुबुनुसाचिऎ टाङ्पाम् खिम्टाङ्मा खिरिस्टियन हॆॽनॆ हाङ्स फाग्मा मिन्नि हाङ्ग खो याइॽमा फॆन्नि। 13हाङ् खिरिस्टियन नानुसाचि स आन्नाम खिम्टाङ्पा खिरिस्टियन हॆॽनि हाङ् आन्नाबाङ् फाग्मा मिन्नि हाङ्ग खो याइॽमा फॆन्नि। 14मान्ठाभनॆ निवाँयुङ् आलॆखुबा खिम्टाङ्पा चाइ निवाँयुङ् लॆखुबा खिम्टाङ्माऎ नुऎ मुकु हाङ् निवाँयुङ् आलॆखुबा खिम्टाङ्मा निवाँयुङ् लॆखुबा खिम्टाङ्पाऎ नुऎ मुकु। हॆॽनॆ हाङ्ग खोचिम पासाचिऎ आसिका आटक्चाखुबा लॆटामि। टर उम्चि पासाचि ग नुहा लिडामि। 15-16माल् निवाँयुङ् लॆखुबा मॆॽनुङ्मॆ उम् खिम्टाङ्पा हाङ् निवाँयुङ् लॆखुबा खिम्टाङ्पाऎ उम् खिम्टाङ्मा हिङ्पॽमिॽमा हेकु कामानुङ् आन्नॆ लेसाम्निनॆ? टर निवाँयुङ् आलॆखुबाऎ चाइ टाङ्पाम खिरिस्टियन खिम्टाङ्पा हाङ् खिम्टाङ्मा याइॽमा मिनुॽमि हाङ्ग याइॽमिटाम्नॆ। आक्रहाङ्ग निवाँयुङ् लॆखुबा बुबुनुसाचि सॆक्सिखॆॽमिनि। निवाँहाङ्ऎ आन्ना सान्टिमि लागि सॆःग्डानि।
निवाँहाङ्मि निवाँ रक्न हिङ्चामॆ
17निवाँहाङ्ऎ आन्ना सॆःगानि माङ्माङ् योम्पक्पि टिडानि म आन्नॆ खासिमा लॆ। हाङ् आन्ना आक्रहाङ्न हिङ्चामा लॆकानि। काङॆ चोब्न मान्डालिचि चिन्मिम्पा खानावाँ सङ्क गन यो। 18हाङ् आसा चाइ सालुङ्पि खाट्ना लिखॆडा आक्कसॆ खाट्नामि लायुङ् चुम्मा आयगाम्नॆ। हाङ् खाट्ना मालिलिम्पाचिऎ चाइ खाट्ना लॆःॽमा आयग्मिर। 19मान्ठाभनॆ खाट्ना लिमानुङ् आलिमाबि माङ्स माआ। निवाँहाङ्ऎ लोमिम्पा खेम्मान ढ्या खानावाँ यो। 20निवाँहाङ्ऎ सेःॽमार खो मान्टऎ लॆटा मरॽऎन लिडाङ्र। 21निवाँहाङ्ऎ सेःॽमार आना योम्पक् मुखुबा लॆटाना हाङ्ग, आक्रक्न लिङिसॆ। टर आना आक्कबाङ् फाक्बखॆॽमॆ ल टक्चाडुना हाङ्ग फाक्बखारॆ। 22मान्ठाभनॆ योम्पक् मुमामि लागि हिःक्टिखॆॽमिम्पा याॽमि पारभुबि फुक्का याॽमि लिसि सॆःग्मिम्पा रेम। हाङ् सेःॽमार फुक्का याॽमि चाइ खिरिस्टमि योम्पक् मुखुबा लिमाम् लागि सॆःग्मिम्पा यो। 23निवाँहाङ्ऎ आन्ना इन्डानि। मसॆ याॽमिमि योम्पक् मुखुबा आलिसानॆ। 24मसॆ बुबुनानुसाचि, मान्टऎ लॆटानिर सेरानि, आक्रक्मान लिसे निवाँहाङ्बि पेन्डाङ्सानॆ।
भ्या लेःॽमा ठाबाक्मिपाचि हाङ् लाङ्मिॽमाचिम् खानावाँ
25भ्या लेःॽमा साब्डुचिहामि लागि पारभुऎ काङा माङ्स मान्लोटिॽङा। टर काङॆ पारभुमि नाम्नावाँ टक्चाडुङॆसॆ कॆ आन्ना काम्नुःर लोमॆ पाइकानि। 26गरॽलऎ डुखा मिॽलामार, आन्ना आसा मान्टहाङ् हिङ्चाडानि आक्रहाङ्न हिङ्चामा नुऎ लि कामानुङ् मिनुॽङा। 27माल् आन्ना भ्या लॆडानिहॆ? आक्रहाङ्ग खिम्टाङ्मानुङ् फाग्मा आयगानॆ। माल् आन्ना भ्या मान्लॆटिटानिहॆ? आक्रहाङ्ग भ्या लॆःॽमा आयगानॆ। 28आन्ना भ्या लॆकानि हाङ्स हिङ्वा ग लिनि। मरहाङ्न भ्या मालॆःॽमिम्पा मेॽनुङ्माऎ भ्या लॆकु हाङ्स हिङ्वा लॆटुनि। टर भ्या लॆखुबाचिऎ ग बाखाटेम्पि एट्टान डुखा चाःक्मि। हाङ् काङॆ चाइ आन्ना आक्क डुखाबाङ् फाक्मा यगुकानि।
29बुबुनानुसाचि, कॆ आन्ना लोकानि, ल चाइ लुख्खॆटाडा। मसॆ हऎबाङ् चाइ खिम्टाङ्मा चुखुबाचिऎ सङ्क खिम्टाङ्माबि टेः निवाँ टिमा फॆन्नि। 30मिॽवाबि चुखुबाचि मिॽवाबि आसिॽमिम्पार हाङ् चेन्चामाबि चुखुबाचि आचेन्चाइन्ट लॆःॽमिर। टाङ्पॆ इन्टॆॽमिम्पा ठका सङ्क टाङ्पामिर आमिट्टुचिर। 31हाङ् आसा आसा माङ्माङ् योम्पक्पि चुःक्मि, खोचि माङ्स आलॆखुबाचिर लिमिर मान्ठाभनॆ बाखाटेम् लुक्खॆॽमॆ ल गुबिॽन टाखॆडा।
32आन्ना फोप्सिखॆॽमॆ खानावाँबाङ् मॆअङ् पेन्मिॽमा मिकानि। हाङ् आन्ना भ्या आलॆःॽमिम्पा याॽमिचिऎ मान्टहाङ् पारभु चेन्चामिॽमॆ लोमॆ खानावाँबि निवाँ टिकाम्नि। 33भ्या लॆखुबा याॽमिऎ मान्टहाङ् काङाम् खिम्टाङ्मा चेन्चामिॽमॆ कामानुङ् बाखाटेम्पिऎ खानावाँबिन निवाँ टिकु। 34हाङ् खोम निवाँ हिच्चि पोट्टि फाक्ब। आक्रहाङ्न भ्या मान्लॆमिम्पा मॆॽनुङमॆ खोम् सालुङ् नुङ् लावा पारभुमिन कामानुङ् पारभुमि योम्पक्पि निवाँ टिकु, टर भ्या लॆखुबा मॆॽनुङ्मॆ चाइ मान्टहाङ् टाङ्पाम खिम्टाङ्पा चेन्चामिॽमॆ कामानुङ् बाखाटेम्पिहा खानावाँबि निवाँ टिकु। 35काङॆ ग खानावाँ आन्ना यायेॽमाऎ ठुब्मामि लागि हॆॽनॆ, टर आन्नाम नुऎमि लागिन इमॆ पाइकुङ। टर आन्ना पारभुबि हिङ्चाहिसानिर हाङ् पारभुबि निवाँ टिहिसानिर कामानुङ् लोमिम्पा रेम।
36हाङ् एक्क याॽमिऎ एक्क मेॽनुङ्मा नुङ् भ्या लॆःॽमॆ निवाँऎ आक्क मेॽनुङ्मा नुङ् पाइ हाङ् मेॽनुङ्मामि सङ्क भ्या लॆःॽमॆ लः लिखॆडा हाङ् भ्या लॆःॽमा मिनुक् हाङ्ग आक्खाचिम् भ्या लॆपिटाम्नॆ। गर लॆःॽमार माङ्स हिङ्व लिनि। 37टर आक्क याॽमिमि निवाँ चॆकुवॆ लॆ हाङ् आसाम्स किसिमाबि माआ हाङ् उम् निवाँ सङ्क ठुब्मा हेकु हाङ् खोसॆ मेॽनुङ्मा भ्या आलॆःॽमॆ निवाँ मुकु हाङ्ग आक्कसॆ काम्नुऎन योम्पक् यिगुकु। 38हाङ् आसॆ चाइ ङाक्सिॽमिम्पा मॆॽनुङ्मा भ्या लॆकु, आक्क याॽमिऎ नुऎन लॆकु। हाङ् भ्या मान्लॆटु हाङ्ग एट्टान काम्नुऎ लॆकु।
39खिम्टाङ्पा हिङ्चारडारि खिम्टाङ्मा चाइ खिम्टाङ्पामि ठुप्पाटबि लि। टर खिम्टाङ्पा सिखॆहाङ् खोसॆ होइकनुङ् भ्या लॆमा टकु, वाठाङ्पा चाइ निवाँयुङ् लॆखुबा लिमा लॆ। 40टर खो भ्या मान्लॆरे पेनुॽहाङ्ग खोबि सान्टि लि। ग चाइ काङामि खानावाँ यो। हाङ् काङा मिनुॽङा, आन्ना कॆ माङ्माङ् लोसानि चोब्न निवाँहाङ्मि लावाबाङ्न लोसानि।
ទើបបានជ្រើសរើសហើយ៖
१ कोरेन्ठि 7: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society