१ कोरेन्ठि 3
3
निवाँहाङ्मि योम्पक मुखुबाचि
1बुबुनानुसाचि, काङा आन्नानुङ् यामुमार लावाबि चुखुबाचिनुङ् यामिम्पार मान्यामुङा। काङा आन्नानुङ् बाखाटेम्पि सालुङ्पि पाइखुबा याॽमिचिर यामुसिङ। आन्नानुङ् चाइ हन निवाँयुङ् लॆखुबा याॽमिचिर काङा यामुसिङ। 2काङॆ आन्ना छाक्कॆ चामा ठःका हॆॽनॆ, टर चाचाचिर डुरु डुङ्मा पिट्टानि मान्ठाभनॆ याॽल सङ्क आन्नॆ छाक्कॆ चामा ठःका माचाहिसाम्नि हाङ् ह सङ्क चाहिसाम्निनि। 3हाङ् आन्ना हस बाखाटेम्पिऎ सालुङ् रक्न पाइकानि हाङ् आन्नाम् लुम्पि काइसॆ मिप्पेचुमॆ हाङ् खिमाटुमा चुढ्याङ। माल् आक्र लॆकानि हाङ्ग बाखाटेम्पिहा होइढा याॽमिचि रक्मान मालिसानिहॆ? 4एक्कसॆ “काङा पावलमि” हाङ् होइकसॆ “काङा आपोल्लोसमि” यो लोमॆ खानावाँ बाखाटेम्पिहा याॽमिऎ लोमिम्पा रक्मान मान्लिहॆ? 5आपोल्लोस आसार? हाङ् पावल आसार? काचिगा हिप्पान आन्ना निवाँयुङ्पि टॆखुबा योम्पक् मुखुबाचिगा। हाङ् पारभुऎ लोमिम्पा रक्न खोम् योम्पक यिगुक्चिगा। 6काङॆ चारिक टुबुङ्, आपोल्लोसऎ योवा टिसु टर निवाँहाङ्ऎ पुबॽमिट्टु। 7मसॆ चारिक टुप्खुबा हाङ् योवा टिखुबा ढ्या हॆॽनॆ, टर पुबॽमिक्खुबा रे ढ्या। 8लिखुबा हाङ् योवा टिखुबाचिऎ मरहान योम्पक् यिगुक्चि। निवाँहाङ्ऎ हिप्पान खोचिम् योम्पक् रक्न आसिका पिकुचि। 9मान्ठाभनॆ काङ्का चाइ चोब्न निवाँहाङ्मि योम्पक् मुखुबा रेम। हाङ् निवाँहाङ्मि रोपा चाइ आन्नान।
हाङ् आन्ना निवाँहाङ्मि खिम् रेम। 10निवाँहाङ्ऎ पिॽमिम्पा बार्डाना बाङ्न योम्पक् मुमा लेक्खुबा गार ठक्खुबाऎर जाक् ठुगुङ। हाङ् होइढा याॽमिचिऎ चाइ आक्क सक्पि खिम् हेब्कुचि। हाङ्खिम् हेप्खुबाचिऎ मान्टहाङ् हेब्मा लॆऎ लोमॆ खानावाँबि नुःर निवाँ टिसुचिर। 11मान्ठाभनॆ निवाँहाङ्ऎ ठुग्डुवॆ एक्क जाक् येसु खिरिस्ट न। होइक आसॆस माङ्मि सङ्क जागा ठुग्हिसुचिनि। 12हाङ् ऎॽवाचिऎ ग जाक् सक्पि फिःइया नुङ् सिःमि, डिरिक् याङ् सिहा ठःका हाङ् होइढाचिऎ चाइ सिङ्लुङ्ऎ, पाराल नुङ् घाँसाऎ खिम् हेबुकुचि, 13चोब्न याॽमिचिमि काम्नुहा नुङ् काइसाहा योम्पक् निवाँहाङ्मि न्यायॆमि डिना खाङ्मु मान्ठाभनॆ आक्क न्यायेमि डिना उम्चि योम्पक् मान्टक्मा लॆऎ कामानुङ् मिबि सि। 14हाङ् आक्क याॽमिमि योम्पक् आक्क मिःबि माङ्स मालि हाङ्ग आक्कसॆ आसिका टक्चाकु। 15हाङ् उम् योम्पक् मिःबि हिॽलारा हाङ्ग, खोसॆ आसिका टक्चाउनि टर खो आक्क मिःबि सिॽनि।
16हाङ् आन्ना निवाँहाङ्मि खिम् यो। हाङ् आन्ना हङ्सि खोम् लावा पेनुक्। ग खानावाँ आन्नॆ लेसाम्निनॆ? 17हाङ् आसॆ चाइ निवाँहाङ्मि खिम् नासॆ लॆकु, निवाँहाङ्ऎ आक्क याॽमि नासॆ लॆकु मान्ठाभनॆ निवाँहाङ्मि खिम् सॆङ्सॆङॆ लि। हाङ् आक्क निवाँहाङ्मि खिम् चाइ आन्नान।
18आसॆस टाङ्पॆ टाङ्पान आबङ्सिटुर। आसा चाइ आन्नामि लुम्पि खो गरक्लऎ निवाँटाङ्पाङाये मिनुकु, आक्कसॆ चाइबान निवाँटाङ्पा लिमाम् लागि निवाँ मॆड्डिङ्मा याॽमि लिर। 19मान्ठाभनॆ निवाँहाङ्मि ङारिङ्पि बाखाटेम्पिहा निवाँटाङ्पा खानावाँ माङ्स हॆॽनि। हाङ् निवाँनेन् साब्चिराबि गरहाङ् साब्डा, “निवाँहाङ्ऎ आक्खा निवाँटाङ्पा याॽमिचि उम्चि चॆन्टुबाङ् खानावाँबिन निवाँहाङ्ऎ लाबुकुचिमि।”#आयुब ५:१३ 20हाङ् होइक ठालबि सङ्क निवाँनेन साब्चिराऎ गरहाङ् लोकु, “निवाँटाङ्पाचिमि निवाँऎ माङ्स योम्पक् यिगुनि कामानुङ् पारभु निवाँहाङ्ऎ लेकु।”#खोम्मिम्पासाम् ९४:११ 21मसॆ आसॆस याॽमिचि सक्पि काङानये मिन्मा फॆन्नि। मान्ठाभनॆ चोब्न खानावाँ आन्नामि काम्नुऎमि लागिन। 22पावल हाङ्स, आपोल्लोस हाङ्स, पट्रुस हाङ्स, बाखाटेम्, हिङ्खामा नुङ् सिखॆॽमॆ खानावाँ हाङ् हहा नुङ् डॆङ्पिहा चोब्न खानावाँ। 23हाङ् आन्ना चाइ खिरिस्टमि हाङ् खिरिस्ट चाइ निवाँहाङ्मि यो।
ទើបបានជ្រើសរើសហើយ៖
१ कोरेन्ठि 3: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society