१ कोरेन्ठि 15
15
खिरिस्ट सिखॆम्मिपाबाङ् हिङ्पॽमिम्पा
1बुबुनानुसाचि, काङॆ आन्ना खेम्मिडानिहा नुऎ खानावाँ मिॽलामिॽमा मिट्टानि। आक्क नुऎ खानावाँ आन्नॆ टिङाम्नि हाङ् आक्क खानावाँब्न आन्ना चुकानि। 2हाङ् काङॆ खेम्मिॽमिम्पा ग नुऎ खानावाँ टिङ्ढाङ्साम्नि हाङ्ग, गसॆ आन्ना हिङ्चामिकानि। हॆॽनॆ हाङ्ग आन्नॆ लॆःॽमिम्पा निवाँयुङ्ऎ माङ्स योम्पक् यिगुनि।
3काङॆ टक्चाडुङॆ चोब्नबाङ् ढ्या खानावाँन आन्ना पिडानि। निवाँनेन् साब्चिराऎ लोमिम्पा रक्न आक्क खानावाँ चाइ माङ्भनॆ, खिरिस्ट कानिम् हिङ्वामि लागि सिखारा,#यासाइया ५३:५-१२ 4हाङ् निवाँनेन् साब्चिराऎ लोमिम्पा रक्न खो येःॽमाबि हुमुचि हाङ् सुम्चि डिनाबि हिङ्पका।#खोम्मिम्पासाम् १६:८-१० 5हाङ् खो पाट्रुस नुङ् खाङ्मुसा, आक्क डॆङ्पि एपङहि टिङ्खुबाचि नुङ् खाङ्ङुसा। 6म डॆङ्पि निवाँयुङ् लॆखुबा ङाकक्बाङ् डिरिक निवाँयुङ् लॆखुबाचिबि खाङ्ङुसा। खो खाङ्खुबा याॽमिचि हस ऎॽवा चुःॽमि। टर ऎॽवा चाइ सिखारामि। 7मबाङ् येसु याकुब नुङ् खाङ्ङुसा, आक्क डॆङ्पि चोब्न सॆःक्ढुङ्पाचि नुङ् खाङ्मुसा।
8हाङ् काङा चाइ माटङ्मिम्पा लःबि जान्म लिडिङॆ याॽमिर खो काङानुङ् चोब्बाङ् डॆङ्पि खाङ्ङुसा। 9सॆःग्ढुङ्पाचिबि चोब्बाङ् मिःछुपा काङान। काङॆ निवाँहाङ्मि मान्डालि एट्टान डुखा पिॽमिम्पासॆ काङा सॆःग्ढुङ्पा लोमा खॆन्चाखुबा याॽमि चाइ हॆॽङानॆ। 10टर गरक्ल काङा माङ् लॆःॽमॆ पाइङॆ, ग चाइ निवाँहाङ्मि नाम्नाँवाबाङ्न लिःॽडिङॆ यो। हाङ् खोसॆ काङा सक्पि होडुवॆ नाम्नाँवा मरक्नऎ मालि। मान्ठाभनॆ काङॆ होइढा सॆःक्ढुङ्पाचिऎबाङ् डिरिक् योम्पक् मुसुङ। गर लोमॆ पाइमार काङॆन ग हॆॽनॆ टर काङानुङ् चुऎ निवाँहाङ्मि नाम्नावाँऎ योम्पक् यिःक्डुवॆ रेम। 11मसॆ काङॆ खेम्मिॽमिम्पा हाङ्स, खोचिऎ खेम्मिॽमिम्पा हाङ्स, आन्नॆ निवाँयुङ् लॆःॽमिम्पा खानावाँ चाइ एक्कन।
सिखॆॽमॆ नुङ् हिङ्चामॆ खानावाँ
12कानिऎ चाइ खिरिस्ट सिखॆम्पाबाङ् हिङ्पका कामानुङ् खानावाँ खेम्मि टर आन्नामि लुम्पि ऎॽवा याॽमिचिऎ याॽमि सिखॆम्पाबाङ् हिङ्चामिनि काग्मि, मान्टक्ल खानावाँ टङॆ? 13सिखॆॽमिम्पा याॽमिचि हिङ्पक्मिनि हाङ्ग, खिरिस्ट स सिखॆम्पाबाङ् हिङ्पॽमिम्पा हॆॽनॆ। 14हाङ् खिरिस्ट सिखॆम्पाबाङ् हिङ्पक्मिम्पा हॆॽनॆ हाङ्ग कानिऎ खेम्मिॽमिम्पा खानावाँ हाङ् आन्नॆ लॆःॽमिम्पा निवाँयुङ् सङ्क हुन्नऎ लिक। 15हाङ् काङ्का चाइ निवाँहाङ्मि बारेबि हुन्नऎ खानावाँ यामुखुबा याॽमिचि लिकिङ्का, मान्ठाभनॆ निवाँहाङ्ऎ खिरिस्ट सिखॆम्पाबाङ हिङ्पमिट्टु कामानुङ् काङ्कॆ चुमॆक्सङ् पिडुङ्का। टर याॽमिचि सिखॆम्पाबाङ् हिङ्पॽमिनि हाङ्ग निवाँहाङ्ऎ खिरिस्ट स सिखॆम्पाबाङ् माहिङ्पमिट्टु कामानुङ् वाप्मा लॆ। 16मान्ठाभनॆ सिखॆम्पा याॽमिचि हिङ्पक्मिनि हाङ्ग खिरिस्ट सङ्क सिखॆम्पाबाङ् माहिङ्पक्मिटु। 17हाङ् खिरिस्ट सिखॆम्पाबाङ् हिङ्पॽमिम्पा हॆॽनॆ हाङ्ग आन्नामि निवाँयुङ् स हुन्नऎ लि। हाङ् आन्ना हस आम्नि हिङ्वा बिॽन चुकानि। 18गरक्टे हॆॽनॆ, खिरिस्टबि निवाँयुङ् लॆःॽमानुङ् सिखॆखुबाचि चोब्न लुक्खॆडामि। 19हाङ् खिरिस्टबि कानिऎ ग सालुङ्मि हिङ्खामामि लागि टे आसा लॆडि हाङ् आक्क डॆङ्पिऎ हिङ्खामामि लागि हॆॽनॆ हाङ्ग, कानि चाइ चोब्न याॽमिचिबाङ् एट्टान नाम्नावाँ टक्चामा लॆकिहा याॽमिचि यो।
20टर खिरिस्ट ग सिखॆम्पाबाङ् हिङ्पॽमिम्पान। हाङ् खोसॆ सिखॆॽमिम्पा याॽमिचि हिङ्पःक्मि लोमॆ काम्नुःर खाङ्मिटु। 21मान्ठाभनॆ मान्टहाङ् एक्क याॽमिबाङ् चोब्न याॽमि सिखॆॽमा सिट्टा, मरहाङ्न एक्क याॽमिबाङ्न सिखॆम्पाचि हिङ्पमि। 22मान्टहाङ् आडमबाङ् चोब्न याॽमिचि सिखाराखि आक्रहाङ्न खिरिस्टबाङ् चोब्न याॽमिचि हिङ्पक्मि। 23टर सिखॆॽमाबाङ् हिङ्पक्मॆ खानावाँ टाङ्पा टाङ्पामि पाल रक्न लिक, खिरिस्ट चोब्बाङ् याॽल सिखॆम्पाबाङ् हिङ्पका हाङ् खो होइखेपा सङ्क ऎन्टामार खोम् याॽमिचि हिङ्पक्मि। 24म डॆङ्पि बाखाटेम लुक्खॆ। हाङ् खिरिस्टऎ चोब्न हाङ्डाम्, ढुप्पाट्ट हाङ् चॆक्मावा नासॆ लॆकु हाङ् खोसॆ खोम् हाङ्डाम् निवाँहाङ् आपा चोब्न ढुप्पाट्ट पिकु। 25मान्ठाभनॆ निवाँहाङ्ऎ खो सिच्चाखुबाचि चोब्न खोम् लाङ्सुॽवा खुग्माबि मान्टॆःॽलढारि खिरिस्टऎ हाङ्डाम् लॆःॽमान लॆः।#खोम्मिम्पासाम् ११०:१ 26चोब्नबाङ् डॆङ्पि हेचाइॽमालॆऎ सिच्चोऎ खानावाँ चाइ सिखॆॽमान यो। 27मान्ठाभनॆ निवाँनेन् साब्चिराऎ गरहाङ् लोकु, “निवाँहाङ्ऎ चोब्न ठका खोमि लाङ्सुॽवा खुग्माबि टॆःॽडु।” ग लोमिम्पा चाइ निवाँहाङ्न खोम् ढुप्पाट्ट खुक्माबि लिमिम्पा हॆॽनॆ, टर निवाँहाङ्ऎन चोप्ठका खोम् ढुप्पाट्ट हङ्सि युङ्पिडु लोमिम्पा रेम।#खोम्मिम्पासाम् ८:६ 28हाङ् चोब्न ठका खिरिस्टमि ढुप्पाट्टबि लि, मबाङ् निवाँहाङ्मि पासा खिरिस्ट चाइ निवाँहाङ्मि ढुप्पाट्टबि लि मसॆ खिरिस्टमि ढुप्पाट्टबि चोब्ठका युङ्पिखुबा निवाँहाङ्न चोब्न खानावाँबाङ् ढ्या लिर।
29हॆॽनि सिखॆम्पा याॽमिचि हिङ्पक्मिनि हाङ्ग बाप्टिस्मा लाखुबाऎ माङ् नुऎ योम्पक् लिसॆ? सिखॆम्पाचि हिङ्पक्मिनि हाङ्ग, माङ्सिॽल आक्खाचि बाप्टिस्मा पिॽमिम्पा?#१५:२९ पावलऎ ग खानावाँमि बारेबि माङ्स लोसिनि। खोसॆ ग खानावाँमि बारेबि इःकु मान्ठाभनॆ ऎॽवा कोरेन्ठिबिहा याॽमिचि सिखॆम्पा याॽमिचि हिङ्पक्मिनि कामानुङ् कायुक्सामि, टर होइढा ऎॽवाचि चाइ सिःखॆम्पा याॽमिचि हिङ्पःक्मि कामानुङ् बाप्टिस्मा लायुक्सामि। 30हाङ् मान्ठा काङ्कॆ सङ्क हुन्नऎ योम्पक्पि हानाम्स हिङ्चामा ना सिखॆॽमा लिमानुङ् पाइमॆ? 31बुबुनानुसाचि, आन्ना नुङ् पारभु येसुबि काङॆ ढ्या नाबुक् मुकुङ। गरहाङ्न काङॆ लोकानि काङा हानाम् हाङ्स सिखॆॽमा हेकुङ। 32याॽमिऎ लोमिम्पा रक्न हाङ्ग एफिसिबिहा याॽमिचि ठाब्नाम पोसुचिर लिसे काङानुङ् खिःसामि हाङ् काङा आक्खाचि नुङ। गसॆ काङाम् लागि माङ् काम्नुऎ योम्पक् यिगुवॆ? सिखॆम्पा याॽमिचि हिङ्पॽमिनि हाङ्ग कानि चाइऎ, डुङिऎ मान्ठाभनॆ वेन्डा सिखॆकि।#यासाइया २२:१३
33बङ्सिॽमॆ खानावाँबि आसिट्टानॆ, काइसॆ याॽमि नुङ् लाङ्काम् लॆङ्मार काम्नुऎ याॽमि सङ्क काइसॆ मुकु। 34काम्नुऎ निवाँबि ऎन्टाआनॆ, चेन्पकानॆ, हिङ्वा योम्पक् यिक्मा याइटानॆ। आन्ना ङेसिखारानॆ कामानुङ् कॆग खानावाँ लोकानि, आन्ना ऎॽवासॆ निवाँहाङ् मालेटिटाम्नि।
सिखॆम्पाबाङ् हिङ्पॽमिम्पा सालुङ्
35टर आन्ना ऎॽवाचि गर काकानि, “सिखॆम्पा याॽमिचि निवाँहाङ्ऎ मान्टहाङ् हिङ्पक्मिःकुचॆ? हाङ् आक्खा याॽमिचि हिङ्पॽमिर उम्चि सालुङ् मान्टक्मा ङिमानुङ् टाःक्मिहा?” 36आसॆ चाइ गरक्मा खानावाँ इकु आक्क निवाँ मॆड्डिङ्मा याॽमि यो। आन्नॆ लेकाम्निन, चारिक् बाखाबि टुॽमाहाङ् आक्क मान्सिखॆपा कॆप्पॽनि। 37आन्नॆ सिःचाम् हाङ् होइढा माङ्मि चारिक् बाखाबि टुबुकाम्नि हाङ्स बोटा हॆॽनॆ, टर उम्चान टुबुकाम्नि। 38हाङ् निवाँहाङ्ऎ खोम् निवाँ रक्न आक्क बोटा लिःमिकु हाङ् चोब्न खालाहा चारिक्मि लागि होइक होइक बोटा लिमिकु। 39हाङ् मरहाङ्न चोब्नमि सालुङ् एक्कन ङिऎ लिनि। याॽमिमि सालुङर पोसुचिमि लिनि, हाङ् सवाँमि रक्मा सालुङ् ङामि लिनि।
40हाङ् नाम्फलॽवाबि चुहा खानावाँ नुङ् बाखाटेम्पि चुहा सालुङ् सङ्क चु। हाङ् पारुबि चुहा नुङ् बाखाटेम्पि चुहा सालुङ्मि रुपा होइक होइकन लिक। 41नाम् खोम् पाराऎ हा, पाप्पाला होइक पाराऎ हाः हाङ् साङ्केम्माचि उम्चि पाराऎ हाःक्मि हाङ् उम्चि लुम्पि स खोचि होइक होइकन पाराऎ हाक्मि।
42याॽमिचि सिखॆॽमिम्पाबाङ् हिङ्पक्मिर गरहाङ्न लिक। सालुङ् सिखॆ हाङ् बाखाबि हुमुक् टर आक्क सालङ् हिङ्चाढाङ्मामि लागि हिङ्पक। 43हाङ् कानिम् सालुङ् हुम्मार काइसॆ हाङ् माङ्स योम्पक पिॽनिऎ लि, टर फेरि हिङ्पॽमार चाइ चॆक्मावा नुङ् निङ्लावा नुङ्मा लि। 44हाङ् कानि हुम्मार सालुङ्पि हुमुक् टर आक्क सालुङ् लावामि सालुङ् लिमानुङ् हिङ्प। मान्ठाभनॆ मान्टहाङ् कानिमि सा नुङ् सॆकॽवामि सालुङ् लि, मरहाङ्न लावामि स सालुङ् लि। 45मसॆ निवाँनेन साब्चिराबि गरहाङ् साब्डा, “चोब्बाङ् याॽलऎ याॽमि आडम चाइ हिङ्चाऎ याॽमि लिःसा।”#उट्पाटि २:७ हाङ् चोब्बाङ् डॆङ्पिऎ आडम, खो चाइ खिरिस्ट यो, खो हिङ्खामा पिक्खुबा लावा रेम। 46टर याॽलि सा नुङ् सॆकॽवामि सालुङ् टाआ हाङ् आक्क डॆङ्पि लावामि सालुङ् टाआ। 47याॽलऎ आडम चाइ बाखाटेम्पिऎ बाखाबाङ् मुबॽमिम्पा रेम, टर होइक आडम चाइ पारुबाङ् टाआ। 48हाङ् बाखाटेम्पिहा याॽमिचि चाइ बाखाबाङ् मुबॽमिम्पा याॽमि रॽमान लिःक्मि। गरहाङ्न पारुबिहा याॽमिचि चाइ पारुबाङ् टाखुबा रॽमान लिःक्मि। 49मान्टहाङ् कानिऎ ग बाखाटेम्पि बाखामि सालुङ् टक्चाडा, मरहाङ्न डॆङ्पि पारुबिऎ याॽमिमि रक्मान सालुङ् टक्चाकि।
50बुबुनानुसाचि, कॆ आन्ना लोकानि, ग सा नुङ् हारिमि सालुङ् लुक्खॆ। हाङ् ग सालुङ् चाइ हानाम्स लुक्खॆॽनॆ निवाँहाङ्मि हाङ्डाम्पि भॆन्मा हेसुनि 51खेमानॆ, काङॆ आन्ना निवाँहाङ्मि चुम्मिम्पा खानावाँ लोकानि, कानि चोब्न सिखारिनि, टर चोब्न उम्चङ् लिखॆकि। 52आक्क खानावाँ चाइ डॆङ्पिऎ डिनाबि पॆँपिलिमामि साम्ला टामा अक्सि हाङ् एच्छक्पि लिखॆ। सिखॆमिम्पाचि हानाम्स आसिखॆॽमॆ हिङ्खामा टक्चामानुङ् हिक्पक्मि। हाङ् कानि हिङ्चाखुबाचि चाइ होइकन ङिबकि। 53मान्ठाभनॆ लुक्खॆखुबा सालङ्ऎ आलुक्खॆखुबा सालुङ् हाङ् सिखॆखुबा सालुङ्ऎ हानाम्स सिखॆॽनिऎ सालुङ् टक्चामा लॆ। 54हाङ् लुक्खॆखुबा सालुङ् आलुक्खॆखुबा लिमार हाङ् सिखॆखुबा सालुङ् हानाम्स सिखॆॽनिऎ लिमार निवाँनेन साब्चिराऎ गरहाङ् इकुवॆ खानावाँ टङुक्, “सिखॆॽमॆ खानावाँ हेचाइटा।”#यासाइया २५:८
55“ओ सिखॆॽमॆ खानावाँ, आनॆ हाम्पि हेचाउनॆ?
आम् चॆक्मावा हाम्पि खाइपिटॆ?”#होसे १३:१४
56सिखॆॽमॆ खानावाँमि चॆक्मावा हिङ्वा यो हाङ् हिङ्वामि चॆक्मावा चाइ यायॆॽमा यो। 57टर निवाँहाङ् ओहाक् पिकुङ्! खोसॆ पारभु येसु खिरिस्टबाङ् कानि हेचाइमिकि।
58मसॆ काम् बुबुनानुसाचि, चॆकुवॆ याॽमिचि लिसानॆ हाङ् आन्नामि निवाँ गरमर लॆःॽमा आपिट्टाम्नॆ। हाङ् हानाम्स नुःर निवाँ टिःमानुङ् पारभुमि योम्पक यिगानॆ, मान्ठाभनॆ आन्नॆ लेकाम्नि, पारभुमि लागि यिक्मिम्पा योम्पक् हुन्नऎ लिनि।
ទើបបានជ្រើសរើសហើយ៖
१ कोरेन्ठि 15: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society