१ कोरेन्ठि 1
1
1निवाँहाङ्मि खोम् निवाँबाङन खिरिस्ट येसुमि लिसि सेःॽमिम्पा काङा पावलनुङ सोस्ठेनेस नुसाबाङ्, 2हाङ् कोरेन्ठिबि चुखुबा खिरिस्टऎ सॆङ्सॆङॆ मुमिम्पा मान्डालिनुङ् होइढा सॆङ्सॆङॆ याॽमिचि रक्न खोचि निवाँहाङ्मि याॽमिचि कामानुङ् सॆःक्से साङ्गाटिबि सोरि चुखुबा याॽमिचि यो। खिरिस्ट चाइ आक्खाचिम् नुङ् कानिम् पारभु यो। 3निवाँहाङ् कानिम् आपा हाङ् पारभु येसु खिरिस्टऎ आन्ना नाम्नावाँ नुङ सान्टि पिट्टानिर।
कोरेन्ठिबिहा याॽमिचि ओहाक् पिॽमिम्पा
4आन्नामि लागि हाङ् खिरिस्ट येसुबि निवाँहाङ्ऎ आन्ना पिॽमिम्पा नाम्नावाँमि लागि काङॆ हानाम्स खो ओहाक् पिकुङ। 5मान्ठाभनॆ खिरिस्टबि आन्ना चोप्ठकाऎ चासुम्टाङ्पा लिडानि। मसॆ आन्नाबि चोप्ठका यामुमॆ चॆक्मावा हाङ् इहिमॆ निवाँ चु। 6गरहाङ् खिरिस्टमि बारेबि पिॽमिम्पा चुमॆक्सङ् चाइबानये कामानुङ निवाँहाङ्ऎ आन्ना खाङ्मिटानि। 7मसॆ कानिम् पारभु येसु खिरिस्ट ऎन्टाऎ लाम् खाङ्मार आन्ना पाबुकानिहा चोब्न बारडाना टक्चाडाम्नि। 8कानिम् पारभु येसु खिरिस्ट टाऎ डिनाढारिन आन्ना आब्डिक् मॆड्डिङ्हा लिसानॆ कामानुङ खोसॆ आन्ना डॆङ्पिढारिन येप्हिखुबा मुमॆ पाइकानि। 9हाङ् निवाँहाङ् निवाँयुङऎ लॆ। हाङ् खोसॆ आन्ना खोमि पासा कानिम् पारभु येसु खिरिस्टमि साङ्गाटिबि सेःरानि।
मान्डालिबि निवाँ माटङ्मिम्पा
10पारभु येसु खिरिस्टमि निङ्पि कॆ आन्ना बुबुनानुसाचि नुःर लोकानि, आन्ना एक्क निवाँ नुङ्मा लिसानॆ, आन्नामि लुम्पि ऎखिसानॆ हाङ् एक्क निवाँ नुङ्मा हाङ् टङ्चामानुङ् पाइखुबा लिसानॆ। 11मान्ठाभनॆ काङॆ आन्नाम लुम्पि खिमा पःग्डा लोमॆ खानावाँ कालोऎमि खिम्पिहा याॽमिचिबाङ् खेम्डुङ। 12हाङ् काङॆ माङ् खेम्डुङ् भनॆ आन्नामि लुम्पि कोइ “काङा पावलमि” कोइ, “काङा अपोल्लासमि” कोइ “काङा चाइ पाट्रुसमि” हाङ् कोइ “काङा खिरिस्टमिङा” कामानुङ् काकानि हॆमु। 13माल् खिरिस्ट फाक्बडॆ? माल् पावल आन्नामि लागि कुरुसाबि कॆङॆ? माल् आन्नॆ पावलमि निङ्पि बाप्टिस्मा लासानिहॆ? 14-16काङॆ किरिस्पासनुङ गायसबाङ् होइढा आसास बाप्टिस्मा मापिट्टिॽङाचि। काङॆ स्टिफानासमि खिम्पिहाचि सङ्क बाप्टिस्मा पिट्टुङचि। मसॆ काङॆ निवाँहाङ् ओहाक् पिकुङ। आक्खाचिबाङ् होइढाचि बाप्टिस्मा पिॽमिम्पा खानावाँ काङॆ मिॽलाङानि। मसॆ आन्नॆ काङामि निङ्पि बाप्टिस्मा लासुङ्का कामानुङ आसॆस काटकानिनि। 17मान्ठाभनॆ खिरिस्टऎ काङा बाप्टिस्मा पिस्सि हॆॽनॆ, टर नुऎ खानावाँ खेम्मिसि पाङ्हाङ्डिङ। हाङ् काङा यामुसिङ्र ढ्या ढ्या खानावाँ माइङा। आक्र लॆटिङ्ग कुरुसाबि खिरिस्टमि सङ्टिम्पा हिङ्खामामि चॆक्मावान माङ्स योम्पक् आपिक्खुबा लिखुबा लॆटा।
खिरिस्ट न निवाँहाङ्मि निवाँ नुङ् चॆक्मावा
18कुरुसाबि खिरिस्ट कॆङ्से सङ्टिम्पा खानावाँ सिखॆखुबाचिम् लागि माङ्स हॆॽनॆ, टर कानि हिङ्चाडिहामि लागि चाइ निवाँहाङ्मि चॆक्मावा रेम। 19मान्ठाभनॆ निवाँनेन् साब्चिराबि निवाँहाङ्ऎ गर काङा,
“कॆ निवाँटाङ्पामि निवाँ लुक्पिकुङ्
हाङ् चॆन्टुबाङ् याॽमिमि चेन्टुबावाँ निवाँ हुन्नऎ मुकुङ।”#यासाइया २९:१४
20निवाँटाङ्पा याॽमि हाबि माखारामिहा? निवाँनेन् खानावाँ चिन्खुबा हाबि माखारामिहा? ग लःबिऎ खानावाँ लोखुबाचि हाबि माखारामिहा? निवाँहाङ्ऎ बाखाटेम्पिहा निवाँ हुन्नऎ मान्मुसुऎ? 21हाङ् निवाँहाङ्ऎ टाङ्पामि निवाँमि चॆक्मावाऎ बाखाटेम्पिहा याॽमिचिऎ निवाँहाङ् लेहिसुचिनि कामानुङ् मिॽलाउ। मसॆ काङ्कॆ खेम्मिॽमिम्पा हुन्नऎ खानावाँबाङ्न निवाँयुङ् लॆखुबाचि हिङ्पमिॽमा मिट्टुचि। 22याहुडिचि आक्खॆॽमा लुहा योम्पक् खाङ्मा यगुॽमि हाङ् हॆॽनिबारॆक्चि चाइ निवाँ टक्चामा यगुक्मि। 23टर काङ्कॆ चाइ कुरुसाबि कॆङ्खुबा खिरिस्टमि खानावाँ खेम्मिकुङ्चिका। हाङ् याहुडिचिमि लागि ग खानावाँ टःक्सिमॆ खानावाँ लिसा हाङ् हॆॽनिबारॆक्चिम् लागि चाइ हुन्नऎ खानावाँ लिसा। 24टर निवाँहाङ्ऎ सेःॽमिम्पा याहुडिचि नुङ् हॆॽनिबारॆक्चिम् लागि चाइ खिरिस्टऎन निवाँहाङ्मि चॆक्मावा हाङ् निवाँ खाङ्मुकु। 25मान्ठाभनॆ निवाँहाङ्मि माङ्ना माङ्ऎ निवाँ#१:२५ निवाँहाङ्मि माङ्ना माङ्ऎ मिःछुपा निवाँ लोमिम्पा चाइ येसु कुरुसाबि कॆङ्मिम्पा बारेबिऎ खानावाँ रेम। याॽमिमि निवाँटाङ्पामि निवाँबाङ्स ढ्या लि हाङ् निवाँहाङ्मि एट्टान मिछुॽमा योम्पक् सङ्क याॽमिमि चॆक्मावाबाङ् चॆकुवॆ लि।
26बुबुनानुसाचि, निवाँहाङ्ऎ सेःॽमार आन्ना मान्टहा याॽमि लॆटानिहा लोमॆ मिॽलापाम्नॆ। ग बाखाटेम्पि चुखुबाचिबि आन्ना हङ्सिबि ऎॽवा याॽमिचि निवाँटाङ्पा मालॆटानि। चॆक्मावा नुङ्मा सङ्क मालॆटानि हाङ् निङ् चुचाखुबा सङ्क मालॆटानि। 27टर निवाँटाङ्पाचि ङेसि खॆःॽमिम्माम् लागि निवाँहाङ्ऎ बाखाटेम्पिहा निवाँ मॆड्डिङ्हा याॽमिचि सॆगुचि। हाङ् चॆक्मावा नुङ्मा याॽमिचि ङेसि खॆःॽमिम्माम् लागि बाखाटेम्पिहा माङ्ना माङ्हा याॽमिचि सॆगुचि। 28हाङ् काङानङाये मिन्खुबाचि ङेसि खॆःॽमिम्माम् लागि बाखाटेम्पिहा याॽमिचिऎ मिछुॽवा हाङ् माङ्स हॆॽनाहाचि हाङ् योम्पक् आपिक्खुबाचि कामानुङ् मिम्मिम्पा याॽमिचि निवाँहाङ्ऎ सॆगुचि। 29आसॆस निवाँहाङ्मि ङारिङ्पि काङानङाये कामानुङ् आमिम्मिर कामानुङ् खोसॆ ग योम्पक् यिगु। 30खोसॆ आन्ना खिरिस्ट येसु नुङ् एक्कन मुडानि। हाङ् खिरिस्ट चाइ निवाँहाङ्बाङ् कानिम निवाँ लिडा। हाङ् कानि खोबाङ् निवाँहाङ्मि ङारिङ्पि नुऎ लिकि हाङ् सॆङ्सॆङॆ नुङ् हिङ्चामिम्पा याॽमि लिकि। 31मसॆ निवाँनेन साब्चिराऎ गर लोकु, “आसा चाइ काङानङाये मिनुक् हाङ्ग खोसॆ निवाँहाङ्ऎ यिक्मिम्पा योम्पक्बिॽन काङानङाये मिनुःर।”#यारमिया ९:२४
ទើបបានជ្រើសរើសហើយ៖
१ कोरेन्ठि 1: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society