Maki 8
8
Iesua muvelunu la'ilali noxi'a tamitema tavu'alola
1Ioxe mune'ela, la tamitema tavu'alo e tavu'alo mipitapita noxoula. La ane'i la'ilali so i'ou uasi. Laso Iesua mu'avali'a tatisaipeliou mo muvikalane'i lexe, 2“Eni talelixa'a tamitema latala 'o. Xo ane'i xe nenge texolu lai 'o voxo tatalu mo ane'i i'ani uasi. 3Xe loxo apalusi'a so ilivulivu no tuatualasi'a la masi ie'i uxalixalili no vote'i xo isolixa'a. Mo se'i noxi'a ne so tuatuala nopaxapaxa.” 4La ane'i tatisaipeliou mikolinu lexe, “Ai, xale lia ano'o tuala vile no anu uasio. Nenge taxalisou pileti ne'ei so ikalusou masaxa na'a no anu?” 5La Iesua mutali'isi'a lexe, “Xo ngingi pileti ta'ei mo uai ne?” La ane'i mi'oxo lexe, “A 7 mososi.”
6Ioxe, laso Iesua muvikalane'i tamotu latala ne lexe italutalupexa no lia. La anu muno'u pileti 7 ne mo muvikala laixe noxou Mosinge. Mukalu la anu muse'ise'inu mo mulosi'a tatisaipeliou so ivelunuxa'a tamitema. Mivelunu mivelunu xo la mimomoxa'a latala ne mukalusi. 7La kalumo sinana kitua vilevilesi muai noxi'a. Laso Iesua muno'u mo muvikala laixesou noxou Mosinge. Mukalu la mupalusi'a tatisaipeli lexe iveluvelunu kalumo. 8Xe tamitema mi'ani mi'ani xo la mikalusou masaxa na'a avile. Mikalusou masaxa na'a xe mipitanu matomatovinu la mumomomo no anu lakela 7. 9La tamitema e Iesua muvelunuxa'a ne navasi'a mumomomo no anu 4000. Mukalui laso anu mupalupalusi'a milailai. 10Milailai io alaxu vilesisi anu oli'a tatisaipeliou mitelo no pouti so milai no xale lia ne Talimanuta.
Tapalisi mivikalanu Iesua lexe u'oxonu sosovo so xavi
11Ioxe, mixali ne Talimanuta mukalu la Tapalisi mine'e noxou Iesua mo mitovonu so iua'ulixu no anu vaikala. La mivikalanu lexe, “Ioxe, nini nano'u xavi no tualasou Mosinge mo na'oxonu mi vile so nasosovosou no iexi 'o.” Ane'i mivikala axone so itovonu lexe u'oxo axova. 12Mivikalanu axone la anu muemuaxu xo oponu tu'umaxu. La mu'oxo lexe, “Ai, loxova so tamitema vaimomo 'o imasaxau isaxisou sosovo no ie'i 'o? Eni avikala manina lexe tamitema ano'o imaisou sosovo vile uasi e uasi manina.” 13Muvikala axone mukalu la mu'umesi'a mulivu mutelo no poutila. La anu oli'a tatisaipeliou milutu milai xalevile no kupa.
Iesua mu'oxonu latilovo so isiti noxi'a Tapalisi xe Eloti
14Oli'a milai la tatisaipeli tane'ivulusiou pileti so ino'u. Ia soxu vilesisi a muai no pouti. 15Xe Iesua mupelototosi'a lexe, “Masi ngamalei laixe. Ngalaxa'inu isiti noxi'a Tapalisi oli'a Eloti so opongengi ulai no anu uasi.” 16Milomusou la mivikalane'i ngato'o lexe, “Masi uvikala axone xo nenge tano'u pileti uasi.” 17Iesua mulavusou vaikalai'a ne la mutali'isi'a lexe, “Xo loxova so ngavikalasou pileti lexe tano'u uasi toxone? Xo ngalamana uao mo ngalavulavu uao? Ngingi opongengi masi pakia'u, ne? 18Ngingi iengi, ia lamana so ngasaxi uasi? Mo ngingi sangalinge, ia mutomu so ngalomu uasi? Mo axova, tangengi vuluvulusi ne? 19Xo no voxo loxo evelunuxa'a tamitema 5000 pileti ta'uve la ngingi ngepitanu matovinu no anu lakela ta'eimo?” La ane'i mikolinu lexe, “Lakelasou 12 muana'ana.” 20Xe mutali'ila lexe, “Xe ili'i evelunuxa'a tamitema 4000 pileti 7 la ngepitanu matovinu no anu lakela ta'eimo?” La mikoli lexe, “A lakelasou 7.” 21La anu muvikalane'i lexe, “Mi ne ngemaisou no iengi ia ngalamana uao?”
Iesua mupaipounu itema vile iou selevenu
22Xe mune'e la mixali no tuala ne Vetisaita. Mixali la tamitema mine'enu itema vile iou selevenu mo milinga noxou Iesua lexe umulaxu avolu noxou itema ne. 23Laso Iesua mutila'u mulaixu noale no utu. Sila anu mutuvesou iou itema ne xe mukalu la mumulaxu avolu vaxa noxou. La mutali'isou lexe, “Nini namaleisou mi vile o uasi?” 24La anu mukolinu lexe, “Eni amaisi'a tamitema ixixao olele ia atongone'i laixe uasi. Ane'i loxo ovuovusi.” 25La Iesua mumulaxu avolu vaxa no ioula, la itema ne mumatamataki xe iou laixenu avile mo musaxi lamanasi. 26La Iesua mupelototosou lexe, “Nalivu avile no tasine. Napolo no taine'i tamitema no tuala uasi.”
Iesua mutali'isi'a tatisaipeliou lexe, “Eni ena'eio?”
27Mukalu la Iesuaena milutu so mixixao no tuatuala no xale lia ne Sisalia Pilipai. La no vote'i Iesua mutali'isi'a tatisaipeliou lexe, “Tamitema ivikala lexe eni ena'eio?” 28La ane'i mikolinu lexe, “Se'i ivikala lexe nini Tioni e itema so u'oxo ilixo so kelele. Xe se'i i'oxo lexe nini Elaitia. Xe se'i ivikala lexe nini polopeti vilela ane.” 29La anu mutali'i la mumaititi lexe, “Ia ngingi ngaxavutala lexe eni ena'eio?” La Pita mukolinu lexe, “Nini ane so Kalaisiti a.” 30La Iesua mu'apixa'a lexe ipala'anixu noxi'a tamitema uasi.
Iesua mupela'a tatisaipeliou lexe anu usoli ka umaulila
31Xe mukalu la Iesua musoko'u so mupela'a tatisaipeliou lexe ili'i la usoli. Muvikalane'i lexe, “Itema ane molu noxou Mosinge utavulenu tu'utu'umaxu tavu'alo ili'io. Mo tatiatila noxi'a Taiuta xe noxi'a Tapilisiti xe tamitema so lavulavu no anu lavuloto ixililiiou. Ixililiiou la ipilixinu noxi'a tamitema so ivau usoli. Usoli mo uai voxo tatalu ka umaulila.” 32Anu muvikalane'i lamana axone la Pita mulaixu va'axu sevile mo mulavixu so vaikalaou ne. 33La Iesua muxiu mo mumaisi'a tatisaipeli mo mulavixu Pita lexe, “Nini Uluaou a navikala ne. Na'apixo uasi, nalai no tumalilo. Oponeni ulovou Mosinge oponu uasi, nini namulinu masamasaxa noxi'a tamitemasi ane.”
34Iesua muvikalanu Pita axone mukalu la mu'avali'a tamitema latala oli'a tatisaipeliou ine'ene'e noxou. La muvikalane'i lexe, “Loxo itema umasaxa so umulileli la upilixinu masamasaxa noxou. Upilixinu ukalu la ulalaxinu oponu so lexe loxo umulileli xe uxalisou tu'umaxu o mailasou, la u'ume uasi. Anu loxo u'itinu ovu valautu so usoli no anu mo utavulenu so umulilelisi. 35Xo aloxo 'o. Loxo itema vile u'apisou maulixu lexe noxoumo, la maulixu usu'a vitanisi ane. Xe loxo itema vile upilixinu maulixu so ua'aloxo mo uxalixu ualasilo utila, la anu maulixu uxalixu nene'axu laixe. 36Xe loxo vote'i so itema utaxusou mimi no lialia mukalusi, ia loxo ulenu usu'a, la mimi ne usu'ulinu axova? 37Xo loxo uxalisou mimi lailaixe la unava? U'oxo lexe, 'Mimi ano'o ano'u ia uleleli la usu'asi.'? Ne, uvikala axone? Uasi to! 38Xo tamitema no voxo ano'o milailai vitanisi va'axu noxou Mosinge mo opone'i utulu no anu sususi. Laso maixene ane'i tavu'alo imaila so imulileli mo ane'i ixiunu tumali'aou vaikalaxeli. I'oxo axone ia ili'i la Itema ane molu noxou Mosinge une'e no anu iaxu Momu mo oli'a ta'angelo talaixe ane. Une'e axone laso ane'i ane mixiunu tumali'a noxou vaimomo 'o, la anu ukoline'i mo uxiunu tumalou noxi'a ane.”
ទើបបានជ្រើសរើសហើយ៖
Maki 8: ATA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright 1999 New Tribes Mission, Sanford, FL 32771-1487