Ta'aposeli 14
14
Polu ilou Vanavasi mivotovoto ne Aikoniamu
1Ioxe, Polu ilou Vanavasi milai mixali ne Aikoniamu la ilou mimulinu ilixo aloxo milavusou i'oxonu no tuatuala, ane'i milai no tasou lavuloto noxi'a Taiuta. Milai ne xe mivotovoto no anu xavi, la tamitema tavu'alo noxi'a Taiuta xe Takiliki, milopala. 2Ia se'i noxi'a Taiuta mixilili mo ilopala uasi. Xe mi'ou tane'i tamitema so noale'ale se'i mo so la'iaxa'ai'a tavivinge talopala ne. 3Laso Polu ilou Vanavasi mixolu ne Aikoniamu maxuveni sevile mo ilou i'ume'a tamitema uasi, mivotosou Tatananengesi. La anu musu'uline'i so mi'oxonu sosovo so xavi iouiou xe tamitema mimaisou la tane'ililiou. Laso axone, la Tatananenge muvalaxu vaikalai'a so iaiama noxou lexe manina. 4Ia no tuala ne tamitema mikalipala. Se'i opone'i vilesisi noxi'a tatiatilasi'a Taiuta so mixilili xe se'i ne mivalaxa'a ta'aposeli.
5Xe mune'e la Taiuta oli'a tamitema so noale'ale se'i milai noxi'a tatiatilasi'a. Milai noxi'a so ipitanu xavutalai'a so imasuane'i Polu ilou Vanavasi. Mi'oxo lexe ileaxa'a no anu lavolavo'o so ive'a isoli. 6Ia ilou milomusou mi ane milalaxinu so i'oxonu noxi'a ne, sila ilou mi'ume milai no xale lia ne Likonia. Milai no tuala tamei no apu ne, vile ualasou lexe Lisitila xe vile ualasou lexe Tevi. Mo mixixao no xale lia ne avile. 7Mixixao xe mixali no tuala aneva la ilou mivotovoto so a'alo laixesou Iesua.
Ilou mixaxai ne Lisitila xe ne Tevi
8Ioxe ne Lisitila ne, itema vile tava'u musoisoli a muxoxolu. Tava'u musoisoli no mi ne nenu mivo'onu mole anu a mutalupexasi. 9Itema ne a muxolu ulomusou Polu muvotovoto. Sila Polu mumatakisou mo mutongonu lexe anu a mulopala lexe loxo Mosinge umasaxau, la anu upamaulinusi. 10Mutongonu axone laso anu mu'ava tatila lexe, “Nini natulu!” Sila alaxu vilesisi itema ne mutulu avile mo mumuamua'i.
11Xe tamitema latala ane mixolu ne mimaisou Polu mu'oxo axone la mi'ava'ava no anu vaikalai'a Talikonia lexe, “Tamomosinge mixali tamitema, mo ane'i a!” 12La milemolu Vanavasi ualasou lexe Susi. Xe Polu ne anu itema so vaikala laso milemolu lexe Elemesi. 13La tasou mosi'a kalavoi Susi ne uxolu alai no tuala ne. Xe itema so usaxila'u tani ne muno'a takau se'i ilou xixi tavatavalanu. Muno'u mo mune'enu no aitengaxu vimelusou tuala ne. Mu'oxo axone xo oli'a tamitema mimasaxau i'oxonu ilixo so navu so i'itinu ualasi'a ta'aposeli tamei ne.
14Ia ta'aposeli Vanavasi ilou Polu milomusou mi anene la mikuluke mo miteanu mimii'a so imaxa'u lexe opone'i tu'umaxu. Ilou miiave mi'una no taitaine'i tamitema xe mi'ava'ava lexe, 15“Ai tamitemao, loxova so nga'oxonu mi ane xo ne? Nexi 'o nexi tamitemasi, nenge nenge'a ienge vilesisi. Nexi noxou tene'e so taa'alomengixu vaikala laixesi mo so ngapilixinu ili'ilixo vuluvulusi aloxo nga'oxonu 'o. Ngapilixinu mo ngaxiungengi noxou Mosinge ane anusisi a uxoxolusi. Anu Mosinge ane mu'oxonu loxotolo ilou lialia xe luaki oli'a tatemanu. 16Tatei la anu mupilixine'i tamitema no xale tuatuala so mixolu no anu xavutala na'asi. 17Ia anu utalumenenge uasi manina. Anu upala'anixu no anu mimi ane mumulaxu so usosovosou. Anu mumaxa'u sexela noxou xo anu ulosinge uali molu no loxotolo xe u'oxonu mimi uleme mo uxali no anu tautaunu. Xe anu u'itinenge la'ilali mo u'oxonu oponenge u'osa.” 18Ilou milemolu vaikala anene ia ialuxu noxi'a so ixiunu tamitema opone'i. Ane'i pakia'asi lexe i'oxonu ilixo so navu so i'itinu ualasi'a ilou.
19Ioxe mune'e la Taiuta se'i me'a ne Anitioki xe ne Aikoniamu mixali ne Lisitila ne. Ane'i mixali la mi'unanu tane'i noxi'a tatemanu tuala ne so ixililie'i Poluena. Mixililiie'i sila mivavau no lavolavo'o xe milavenu vasimolu milaixu no utu xo mikalavoi lexe musoli. 20Ia talopala se'i mine'e mixalilixu Polu la anu mutulu mumauli mo mulivu mu'unalai no tuala. Xe loxo ne'iela la ilou Vanavasi milutu so ilai no tuala ne Tevi.
Ilou milivu milai ne Anitioki ne Silia
21Ioxe, ilou mixali ne Tevi la mia'aloxu vaikala laixe noxou Tatananenge noxi'a tamitema. Mia'aloxu la tamitema tavu'alo milopala. Xe ili'i la ilou milivu milai ne Lisitila xe ne Aikoniamu xe ne Anitioki. 22Ilou milivu no tuatuala ne so i'oxonu pakia'a talopala. Mipelototosi'a lexe, “Ngingi masi ngaxolu pakia'inge no anu lopalasi. Xo nenge'a ane so ta'una taxolu no voxo loxo Mosinge molu u'uli laxune'i tamitemaou, ia no vote'isou 'o la tatavulenu tu'umaxusou tavu'alo.” 23Mo ilou misosovosi'a tamitema so saxila'u no anu pita vilevilesi. Xe ilou opone'i mutulu so ivikalasi'a talopala noxou Mosinge mole i'ani uasisi. Mipilixine'i noxou Tatananengesi xo milopala noxousi.
24Ioxe, ilou milivu la mipolo no anu tuatuala ane tei mine'e no anu no xale lia ne Pisitia xe ne Pamivilia. 25Milai milai xo la mixali ne Pexa la mivotovoto nela. Xe milutula, la mixali ne Atalia. 26Mixali ne Atalia xe mitelo no lasipi la milai mixali avile ne Anitioki. Anitioki e talopala mi'italone'i noxou Mosinge mala'o no anu xaixai ane mi'oxonu ne. 27Ilou mixali mukalu la mipitane'i talopala so mia'aloi'a no anu muamua'i noxi'a. La mipala'anixu noxi'a lexe, “Ai, Mosinge mu'oxonu vote'isi'a tamitema noale'ale so ilopala kalumo.” 28La ilou mixolu noxi'a talopala ne Anitioki maxuveni sevile.
ទើបបានជ្រើសរើសហើយ៖
Ta'aposeli 14: ATA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright 1999 New Tribes Mission, Sanford, FL 32771-1487
