Ɓalɔma 6
6
Kuwo nʉ kʉsɨana nʉ ɓʉɓɨɓɨ, nʉ kuɓio kʉkʉʉ ɨzɔ nʉ Klisito
1Kʉ ɓwanɨ, kʉkwanana tiga kusigo tanɨ? Ajʉ kʉsɨnganaka kuɓio tʉkʉ amati ʉ ɓʉɓɨɓɨ aka ekoo ngia ɓɔ ɨjɨɔ yɨ Asʉɓɨɨ yɨ꞊sɨnganaka nʉpɛɛ ɓiɛ? 2Chʉkɔɔ, yambʉkɔmʉ ɓwanɨ! Akʉ moni nga kʉ ɓʉɓɨɓɨ isu ka꞉wu woni, ɨkyɛkyɛɓʉmʉ tanɨ kaɓio ɓata amati ʉ ɓʉɓɨɓɨ? 3Ajʉ nambʉkɔmʉ kʉmbɨa ɓɔ ati ngia ɓa꞉tiɓatiso‑ɔɔ isu ka꞉jubunio tiga nʉ ɔɔ Yeso Klisito, nʉ kʉ aka ekoo jubunio nayɔ akʉ ingyo ngiangɔ ɓiɛ? 4Kʉ ɓwanɨ, ɨngbaa akʉ uɓatiso, ka꞉jubunio tiga ɨzɔ nayɔ akʉ ingyo nʉ hʉnanɨa ngiangɔ, aka ekoo ngia ɓɔ, kʉndʉ Klisito a꞉jʉkana akʉ ingyo akʉ angu wʉ ɨbɨba ngia yɨ Tidoo, isu kʉkwanana tiga kʉ kuɓio nʉ ʉɓɨɨ wʉ ɨtakɨ‑takɨ.
5Jʉ ndʉ kaɓio kujubunieni nayɔ 'upi akʉ ingyo ngbanga kʉndʉ iya yangɔ, isu ka꞊kwanana kʉ kujubunio nayɔ 'upi akʉ jʉkana akʉ ingyo ngbanga kʉndʉ iya ɛyɔ a꞉jʉkana. 6Pimiseni kusigo ɓɔ ɨkyananakɨa yɨ jɛnɛ ngiindɛsʉ ɓa꞉ɨɓakaka ɨzɔ nʉ Yeso ekoo ʉ mʉsalaba, aka ekoo ngia ɓɔ ndʉtʉ ngiindɛsʉ yɨ ɓʉɓɨɓɨ yɨ꞊wo woni, ambʉ kɔɔɓio tii ɓata ɓabayo ɓʉ ɓʉɓɨɓɨ. 7Jʉ ndʉ mombi aawo, ambʉ uɓununikio akʉ ɓʉɓɨɓɨ ɓununikioo. 8Ndʉ yaɓio ɓɔ kuweni ɨzɔ nʉ Klisito, kanʉ baya ɓɔ kaɓio kʉkʉʉ kʉ ɨzɔ nayɔ. 9Kakʉmbɨa ɓɔ Klisito a꞉jʉkana akʉ ingyo jʉkanaa, nʉ ambukuwo tii ɓata, jʉ ingyo yambʉkɔmʉ tii ɓata nʉ angu ekoo angɔ. 10Klisito a꞉wo tʉkʉ nɨsɨ mingono, nʉ ingyo ngia a꞉wo, yi꞉nye tʉkʉ kʉwa angu wʉ ɓʉɓɨɓɨ, jʉ ɨtakɨ‑takɨ ngiakɛ a kʉkʉʉ, nʉ ʉɓɨɨ nguangɔ wa tii tʉkʉ aka ekoo ʉ Asʉɓɨɨ. 11Ngbanga kʉ ɓwanɨ, inu nʉkwanana kʉchɨkana ɓɔ akʉ moni nga kʉ ɓʉɓɨɓɨ na꞉wu woo, nʉ na kʉndʉ ɓombi ngiɓa ɓa kʉkʉʉ akʉ Asʉɓɨɨ amati ʉ jubunio nʉ Yeso Klisito.
12Kʉ ɓwanɨ, nɔɔsɨakɔmʉ ɓʉɓɨɓɨ kʉɓaa ndʉtʉ ngiindɛnʉ yɨ ingyo angu, ambʉ nɔɔɓio tii ɓata kʉkpata taa yɨ ndʉtʉ yɛɛ ɓɨɓɨ ngiinanɨ. 13Iiya ɓɔ, nɔɔsɨakɔmʉ ɓata lizi lʉ ndʉtʉ ngilʉndɛnʉ kʉ di di di kʉkyɨa ɓʉɓɨɓɨ, nʉ nɔɔlɨnɨtanakisokɔmʉ ɓata kuɓio ndʉ lɨkyɛmɛ lɔɔ lɨkyɨɛ moni ngika kambʉkɔmʉ ngbingbii. Ɨkyɛmɨngana, nzoneni kʉkyananakɨa Asʉɓɨɨ ndʉ ɓombi ngiɓa ɓʉ꞉jʉkana akʉ ingyo kuɓio kʉkʉʉ, nambunzono kʉkyananakɨa Asʉɓɨɨ nʉ lizi lʉ ndʉtʉ ngilʉndɛnʉ ngbanga ndʉ lɨkyɛmɛ lɔɔ kyɨɛ moni kɔɔ ngbingbii. 14Ɓʉɓɨɓɨ ɓambʉkwanana tii ɓata kuɓio nʉ angu ekoo ʉndɛnʉ, jʉ inu nambʉkɔmʉ tii ɛsɨ ʉ ʉpanʉ, ɨkyɛmɨngana na ɛsɨ ʉ ɨjɨɔ ngia yɨ Asʉɓɨɨ.
Ɓabayo ɓʉ ingono
15Ya tɔ ɓata ɨmanɨ? Ajʉ kʉkwanana tii kʉkyɨa ɓʉɓɨɓɨ tʉkʉ jʉ kambʉkɔmʉ tii ɛsɨ ʉ ʉpanʉ ɓiɛ, gʉ jʉ ka ɛsɨ wʉ ɨjɨɔ ngia yɨ Asʉɓɨɨ ɓiɛ? Chʉkɔɔ, yambʉkɔmʉ ɓwanɨ! 16Nakʉmbɨa iɗo ɓɔ ndʉ nanzono inu ɓakʉɓɔngɔ aka ekoo mombi mʉngana kuɓio ɓabayo ɓangɔ, nambuɓio nayɔ kʉkɔ kingono, yakusigo ɓɔ na kingono ɓabayo ɓʉ mombi ngiinanɨ nanayɔ kʉkɔ. Nʉ ndʉ naɓio ɓabayo ɓʉ ɓʉɓɨɓɨ, 'upipio wɔngɔ wa tʉkʉ ingyo, nʉ ndʉ yaɓio ɓɔ nakʉkɔ Asʉɓɨɨ, 'upipio wɔngɔ wa tʉkʉ ʉɓɨɨ wɔɔ ngbingbii.
17Ɨkyɛmɨngana, ɨbɨba akʉ Asʉɓɨɨ, jʉ inu ni꞉nye jɛnɛ pɛɛ ɓabayo ɓʉ ɓʉɓɨɓɨ, ɨkyɛmɨngana ɨtakɨ‑takɨ ngiakɛ na tiga kʉkɔ ɓamoni ngiɓa ɓa꞉nɨpanɨa nʉ 'ʉtʉma mungono. 18Na꞉ɓununikio akʉ ɓubayo ɓʉ ɓʉɓɨɓɨ ɓununikioo, nʉ ɨtakɨ‑takɨ ngiakɛ na tiga ɓabayo ɓʉ moni kɔɔ ngbingbii. 19Makʉyaka ndʉ mombi ʉ ɨtaka aka ekoo ʉ ɓayadʉɓa ngiɓa ɓʉndɛnʉ ɓʉ ɓombi ɓʉ ɨtaka. Jɛnɛ pɛɛ, na꞉nzono kingono kuɓio ɓabayo ɓɔɔ ɓʉkyɨɛ ɓamoni ɓʉ 'ʉsʉgʉ nʉ ɓʉɓɨɓɨ, iiya na꞉ka tiga‑ɔɔ ɓakwa ɓʉ Asʉɓɨɨ. Ngbanga kʉ ɓwanɨ, nzoneni tiga kuɓio ɓabayo ɓɔɔ ɓʉkyɨɛ ɓamoni ɓɔɔ ngbingbii, ambʉ ɓieni tiga nʉ ʉɓɨɨ wɔɔ jaɓanakɨɛ.
20Ati ngia ni꞉nye‑ɔɔ ɓabayo ɓʉ ɓʉɓɨɓɨ, nambikinye iso akʉ moni kɔɔ ngbingbii. 21Kʉ ɓwanɨ, na꞊nyɨa tiga nʉ dada tɨmanɨ ndʉ naɓio kʉkyɨa ɓamoni ngiɓa ɓaninu kunzo soni ɨtakɨ‑takɨ ngiakɛ? Jʉ 'upipio wʉ moni ngikʉnanɨ wa tʉkʉ ingyo! 22Ɨkyɛmɨngana, ɨtakɨ‑takɨ ngiakɛ na꞉sɨana tiga nʉ ɓʉɓɨɓɨ sɨanaa, nʉ na tiga ɓabayo ɓʉ Asʉɓɨɨ. Nʉ dada ngia na꞊nyɨa nayɔ aɓio tiga kʉjaɓanakɨa apɛɛ ʉ Asʉɓɨɨ, nʉ akʉ 'upipio nambʉnyɨa tiga nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá. 23Jʉ 'upipio wʉ ɓʉɓɨɓɨ wa tʉkʉ ingyo, ɨkyɛmɨngana apɛpɛ wʉ ɨjɨɔ ngia yɨ Asʉɓɨɨ, ya ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá amati ʉ jubunio nʉ Makʉʉndɛsʉ Yeso Klisito.
ទើបបានជ្រើសរើសហើយ៖
Ɓalɔma 6: BudKoya
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2021, Wycliffe Bible Translators, Inc.
