Ɓalɔma 15
15
Kʉkyɨa ɓangɛ iɗo
1Isu ɓombi ngiɓa kanʉ baya yɛɛ ɓʉmʉ, kʉkwanana kufuɓuo ɓuɓuto ɓʉ ɓadʉɓa, kɔɔhatakɔmʉ kʉkyɨa tʉkʉ moni ngika kaatɨkataa isu ɓakʉɓɔngɔ. 2Ɨkyɛmɨngana, mombi kʉ nangana nangana ati ʉndɛsʉ ʉkwanana kʉkʉndaniso mangɛ, nʉ nayɔ kʉkyɨa iɗo ambʉ ʉmʉmaiso ɓʉ ngbɔmʉ amati ʉ baya. 3Jʉ abana Klisito a꞉hatakɔmʉ kʉkʉndaniso ɛyɔ makʉɔngɔ. Ɨkyɛmɨngana, kʉndʉ ɓa꞉tɨndakɨa amati ʉ Mubio ɓɔ: « Zɨaka ngia yakwanana ɓʉnazɨaka ɔwɛ, ya tiga nɛmɛ kʉtʉɨa ɛmɛ. »#Popoko Mʉm 69:10
4Jʉ moni kʉ muɓomu ngika ɓa꞉kʉtɨndakɨa jɛnɛ amati ʉ Mubio kʉ Asʉɓɨɨ, ɓa꞉kʉtɨndakɨa nisu kʉpanɨa ambʉ kutinzo igue‑gue kuɓio kusiɓo nʉ 'ʉtʉma wɔɔ ʉta kʉnyɨa nʉ ɨkyɛmɛ ngia ka‑ɔɔ kʉnapɨa itungwio. 5Kʉ ɓwanɨ, Asʉɓɨɨ ngia aanzo ɓombi 'ʉtʉma wɔɔ ʉta, nʉ igue‑gue, uninzo angu kuɓio nʉ 'ʉtʉma mungono ati ʉndɛnʉ, kʉkpatanakɨa nʉ isisinio ngia yɨ Yeso Klisito. 6Aka ekoo ʉ ɓio nʉ 'ʉtʉma mungono nʉ ʉɗaɗa mungono, nakwanana tiga kubibiso Asʉɓɨɨ, Ɨsɛ ʉ Makʉʉndɛsʉ Yeso Klisito.
Ɨsaʉ yɛɛ Iɗo akʉ ɓombi kʉ ɓuɓomu
7Kʉ ɓwanɨ, inu nʉkwanana kʉpʉkɨana ati ʉndɛnʉ kʉndʉ iya Klisito a꞉nɨpʉkɨa inu aka ekoo ngia ɓɔ Asʉɓɨɨ ʉchɨka ɨbɨba. 8Jʉ ma ninu kʉɓɨa ɓɔ Yeso Klisito a꞉ka tiga ndʉ mombi ʉ kuu wʉ Ɓayuda, kupananiso ɓamoni kʉ di di di ngiɓa Asʉɓɨɨ a꞉panaka jɛnɛ ɓɨsʉngʉɛ ɓʉndaɓʉ, nʉ kupananiso ɓɔ Asʉɓɨɨ aayaka tʉkʉ ingono. 9A꞉ka ɓata kʉ aka ekoo ngia ɓɔ ɓombi ngiɓa ɓambʉkɔmʉ Ɓayuda ɓubibiso Asʉɓɨɨ aka ekoo ʉ 'ʉtʉma wʉ ikoko nguangɔ, kʉndʉ akʉ ɓa꞉tɨndakɨa‑ɔɔ amati ʉ Mubio kʉ Asʉɓɨɨ ɓɔ:
« Ya aka ekoo ʉ moni ngikʉnanɨ iya ma꞊nabibiso‑ɔɔ
ati ʉ ɓombi ngiɓa ɓambʉkɔmʉ Ɓayuda.
Nʉ ma꞊sʉa sina ɨta kubibiso ino ngiisɔɔ. »#Popoko 2Sam 22:50
10Mubio kambusigo ɓata kʉ ɓɔ:
« Kweni ɨgyagya
inu ɓombi ngiɓa nambʉkɔmʉ Ɓayuda, ɨzɔ nʉ ɓombi ɓangɔ. »#Popoko Tung 32:43
11Mubio kambusigo ɓata kʉ ɓɔ:
« Bibiseni Makʉʉɓɨɨ, inu mababa kʉ ɓombi.
Inu ɓombi ɓʉ ɨtaka kʉ ɓuɓomu, mubibiseni bibisoo. »
12Ɨgbɛ Ɨsaya ambusigo ɓata kʉ ɓɔ:
« 'Ʉnɔnɔ wʉ Yɛsɛ wa꞊ka sina
kʉdya ɓʉngama ekoo ʉ ɓombi ngiɓa ɓambʉkɔmʉ Ɓayuda.
Kija ɛɓɔ ɓa꞊napɨa itungwio ngiindaɓʉ ekoo angɔ. »#Popoko Ɨsa 11:10
13Asʉɓɨɨ ngia aanzo napɨa itungwio, unihuiso nʉ ɨgyagya yɛɛ ɨja nʉ majɨɔ aka ekoo baya ngiindɛnʉ ekoo angɔ, ambʉ napɨa itungwio ngiindɛnʉ yɨsɨnganaka nʉpɛɛ akʉ angu wʉ 'Ʉtʉma wɔɔ Tu.
Kuu ngia yɨ Pɔlɔ
14Inu ɓayoo, ɛmɛ makʉmbɨa kingono ɓɔ na iɗo ati ʉndɛnʉ, nʉ nakʉmbɨa moni ngika kɔɔ muɗo, nʉ na ikanzi ngia nanzono mapanʉ ekoo ɔngɔ nzonoo. 15Ɨkyɛmɨngana, inu ɓayoo, amati ʉ ʉbalʉa nguakɛ, ma꞉nɨtɨndakɨa pongo moni ɓʉ ngbɛlɛ ngbɛlɛ amati lizi ngana ngana lʉ ʉbalʉa, ninu kutungwiso moni ngika ɓa꞉nɨpanɨa. Ma꞉nɨtɨndakɨa pongo ɓwanɨ tʉkʉ aka ekoo wʉ ɨjɨɔ ngia Asʉɓɨɨ a꞉pananiso ekoo asɛmɛ, 16ambʉ muɓio tiga bayo wʉ Yeso Klisito ɔɔ ɓɨakɨɛ ɓombi ngiɓa ɓambʉkɔmʉ Ɓayuda Ɨsaʉ yɛɛ Iɗo. Kuu ngiinanɨ makʉkyɨa engo ya kuu yɨ ɓakumu‑kumu kʉɓɨakɨa Ɨsaʉ yɛɛ Iɗo ngia yɨ Asʉɓɨɨ. Makʉkyɨa aka ekoo ngia ɓɔ ɓombi ngiɓa ɓambʉkɔmʉ Ɓayuda ɓuɓio apɛpɛ ɔɔ kataɛ Asʉɓɨɨ nʉ ɔɔ 'ʉjaɓanakɨɛ nʉ 'Ʉtʉma wɔɔ Tu.
17Kuu yɨ Asʉɓɨɨ ngiinanɨ makʉkyɨa engo ya nɛmɛ kunzo ɨmbʉka aka ekoo ʉ jubunio ngia kanayɔ amati ʉ Yeso Klisito. 18Jʉ mambʉkʉkwanana kʉyaka moni kɔmɔ, yambikinye tʉkʉ ika Klisito a꞉kyɨa ɨngbaa akʉ kuu ngiisɛmɛ yɛɛ panɨɛ, aka ekoo ngia ɓɔ ɓombi ngiɓa ɓambʉkɔmʉ Ɓayuda ɓʉkyananakɨa ʉpanʉ ngua wʉ Asʉɓɨɨ. A꞉kyɨa moni ngikʉnanɨ ɨngbaa akʉ mapanʉ, nʉ kʉkyɨa kuu, 19ɨngbaa akʉ ɓamoni ɓɔɔ ɓʉmbangɛ, nʉ ɓakɔkɔ ngiɓa a꞉pananiso ɨngbaa akʉ angu wʉ 'Ʉtʉma wʉ Asʉɓɨɨ. Iiya ɓɔ ma꞉ɓɨakɨa Ɨsaʉ yɛɛ Iɗo ngia yɨ Klisito mʉa kʉ uɓomu, kʉʉngwa anʉ Yelusalɛma kʉɓʉya tʉkʉ akʉ gɨpa ʉ Ililiko. 20Iikwa taa yɨsɛmɛ yi꞉nye pongo ɓɔ mʉɓɨakɨa Ɨsaʉ yɛɛ Iɗo, chʉkɔmʉ akʉ mʉa ngua ɓi꞉nye ɓʉɓɨakieni‑ɔɔ Ɨsaʉ ngia yɨ Klisito pɛɛ. Ma꞉kyɨa ɓwanɨ ambʉ mɔɔtɨakɔmʉ ɨkáa akʉ 'ʉkʉpa wʉ mukopi ngua mangɛ a꞉ʉtɨa. 21Mi꞉nye kʉkpata tʉkʉ moni ngika ɓa꞉tɨndakɨa amati ʉ Mubio kɔɔ Tu ɓɔ:
« Ɓombi ngiɓa ɓambʉɓʉɓɨakɔmʉ sina Ɨsaʉ ngiangɔ, ɓa꞊mʉna naa,
nʉ ɓombi ngiɓa ɓaɓio ɓambʉkenikɔmʉ Ɨsaʉ ngiangɔ, ɓa꞊ipimiso pimisoo. »#Popoko Ɨsa 52:15
Kɨnda ngia yɨ Pɔlɔ anʉ Lɔma
22Moni ngika ka꞉nʉnangyo pongo nɨsɨ maja ɓɔ mɔɔkakɔmʉ na andɛnʉ ɨkɔ ɨkʉnanɨ. 23Ɨkyɛmɨngana, tiga ɨtakɨ‑takɨ ngiakɛ mambʉkɔmʉ tii ɓata nʉ kuu yɛɛ kyɨɛ akʉ ɓagɨpa ngiɓakɛ. Jʉ kʉndʉ yɨpa tiga mugo maja aka ma꞉faniso‑ɔɔ tananɨa kʉsa na andɛnʉ, 24makʉnapɨa itungwio ɓɔ ma꞊nɨna tiga ati ngia maɓio‑ɔɔ kʉsa anʉ Ɛsɨpanyɛ. Kija ndʉ ka꞊kwa ɨgyagya ninu akʉ wati ɗɛkɛkɛ, mambʉnɨta ɓɔ nasalɨeni tiga akʉ kɨnda ngiinanɨ kʉ salɨaa.
25Ɨkyɛmɨngana, ɨtakɨ‑takɨ ngia ma‑zʉ kʉsa anʉ Yelusalɛma kʉkyananakɨa ɓombi ɓʉ Asʉɓɨɨ ngiɓa ɓa akʉ gʉlʉ ngiinanɨ. 26Jʉ Ɓaklisito ngiɓa ɓa anʉ Makedonia nʉ Akaya ɓa꞉na pongo iɗo ɓɔ ɓugisiko apɛpɛ kʉsalɨa ɓombi ɓʉ Asʉɓɨɨ ngiɓa ɓa amati ʉ ɓanangyɨa anʉ Yelusalɛma. 27Ɓa꞉kwaisio pongo kunzo apɛpɛ ngiinanɨ tʉkʉ nʉ 'ʉtʉma wʉndaɓʉ, ɨkyɛmɨngana yi꞉nye pongo kʉtanɨa ɓɔ ɓʉkyɨa tʉkʉ ɓwanɨ. Jʉ ndʉ Ɓayuda ɓa꞉nzo ɓombi ngiɓa ɓambʉkɔmʉ Ɓayuda apɛpɛ wʉ 'ʉtʉma, ya꞉kwanana ɓɔ ɛɓɔ ɓunzo ɓaklisito ɓʉ Ɓayuda apɛpɛ wʉ lɨkyɛmɛ kʉ nzoo. 28Kʉ ɓwanɨ, ati ngia ma꞊pipo tiga‑ɔɔ kuu ngiinanɨ nʉ naɓɔ kunzo apɛpɛ ngia ɓa꞉ɓʉmʉmakɨa, ma꞊ɓaa tiga 'upi na andɛnʉ akʉ kɨnda ngiisɛmɛ kʉsa anʉ Ɛsɨpanyɛ. 29Makʉmbɨa iɗo ɓɔ ati ngia mabi‑ɔɔ na andɛnʉ, ma꞊ka nʉ ʉmbʉa ngua wʉ Klisito ɨzɔ nɛmɛ kʉ kpekini.
30Inu ɓayoo, maninu kʉta ɓɔ akʉ ino yɨ Makʉʉndɛsʉ Yeso Klisito, nʉ akʉ ɓʉkʉnda ɓʉ 'Ʉtʉma wɔɔ Tu ɓɔ jubunieni ɨzɔ nɛmɛ, nɛmɛ kʉtɨa Asʉɓɨɨ. 31Natɨeni ɓɔ mʉɓwanaka akʉ lɨkɔndɔ lʉ ɓombi ɓɔɔ ɓʉtatɛ baya ngiɓa ɓa anʉ Yudɛa, nʉ ɓɔ ɓombi ɓʉ Asʉɓɨɨ ɓʉbaya kumbo ngia makʉsa nayɔ anʉ Yelusalɛma tʉkʉ bayaa. 32Kʉ ɓwanɨ, ndʉ Asʉɓɨɨ akʉnda, ma꞊ɓʉya na andɛnʉ 'uhue nʉ ɨgyagya kija ma꞊humuo‑zʉ akʉ mwanʉ wati ɗɛkɛkɛ izi mɨngana ninu. 33Asʉɓɨɨ ngia wʉ majɨɔ uɓio ɨzɔ ninu kʉ ɓuɓomu! Ya ɓwanɨ.
ទើបបានជ្រើសរើសហើយ៖
Ɓalɔma 15: BudKoya
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2021, Wycliffe Bible Translators, Inc.
