1 Ɓakolito 'Ʉtʉ wʉ moni
'Ʉtʉ wʉ moni
Kolito i꞉nye gʉlʉ ɔɔ ʉja nʉ ʉndʉʉ wʉ ɨkʉmbʉ yɨ Ɓagiliki. Pɔlɔ a꞉tindakɨa ɓombi ɓʉ baya amati ʉ gʉlʉ ʉ Kolito ʉbalʉa naɓɔ kʉngakɨa lɨngbaa lʉ moni ngila li꞉nye ati ʉndaɓʉ, nʉ kutisio moni akʉ lɨngbaa lʉ moni ngila ɓa꞉muɓukuo. Kʉ ɓwanɨ, ʉbalʉa nguakɛ wanʉ mapanʉ maja ngika ɓombi ɓa꞉kwanana nakɔ kʉkyananakɨa, abana kʉndʉ ɓombi ɓʉ baya ɓʉ makwaa ngika kʉ ɓʉɓʉnɨ.
Pɔlɔ a꞉yaka lɨngbaa lʉ moni lɨja. Ila lɔɔ lɨkpɔkpɔ li꞉nye aka ekoo ʉ kyɨkyanaka mangɔnɔ ati ʉ ɓombi ɓʉ baya, nʉ lɨngbaa lʉ moni lɔɔ ɓɨɓɨ ngila li꞉nye amati ʉ ɨkʉmbʉ yɨ Kolito. Yi꞉nye ɨkʉmbʉ yɨ magabʉ nʉ yɨ falanga, nʉ ɓombi ɓi꞉nye ʉngwa akʉ lɨkʉmbʉ kʉ di di di. Kolito i꞉nye mbɨanɨa ndʉ izi yɛɛ bibise ɓamʉngʉ ɓʉ yakanaka nʉ izi yɛɛ kyɨɛ ɨndambʉ. Amati ʉ ʉbalʉa nguakɛ, yanʉ mapanʉ maja ekoo ɓombi ngiɓa ɓa꞉baya Asʉɓɨɨ, kusigo ɓɔ ɓɔɔɓiokɔmʉ ɓata kʉkyɨa ɨndambʉ, ɨkyɛmɨngana ɓuɓio tʉkʉ kubibiso Asʉɓɨɨ akʉ angu wʉ 'Ʉtʉma wɔɔ Tu. Pɔlɔ a꞉tisio moni maja ekoo ʉ ʉɓɨɨ ngua wʉ ɔɔ gue nʉ moi, nʉ chɨkana, ambʉpanɨa ɓaklisito ɓɔ ɓʉsɨa lɨngbaa lɔɔ ɓɨɓɨ, ɓambuɓio tiga nʉ ʉɓɨɨ ngua wʉ ɓaklisito, nʉ maiso moni amati ʉ kanisa.
Pɔlɔ apananiso moni ekoo ʉ kanisa, iya a ndʉ ndʉtʉ ngia yɨ Klisito. Pɔlɔ a꞉nzo mapanʉ ekoo ʉ ɓʉkʉnda, nʉ jʉkana akʉ ingyo, nʉ ngakanakiso ɓamoni ngiɓʉnanɨ kʉ tine tine, nʉ kʉpanɨa ɓɔ Mubio kʉ Asʉɓɨɨ ka kusigo tanɨ ekoo ʉ lɨngbaa lʉ moni ngilʉnanɨ. Mbise ʉ makwaa ngika a꞉kyɨa anʉ Kolito ndʉ igo mɨngana nʉ igbiti, ambʉsa tiga anʉ Ɛfɛsɔ akʉ a꞉tɨndakɨa‑ɛɛ ʉbalʉa nguakɛ ati ngia i꞉nye‑ɔɔ akʉ gʉlʉ ngiinanɨ.
Moni kɔɔ mʉkpɔkpɔ
'Ʉtʉ wʉ moni 1:1-9
Kyɨkyanaka mangɔnɔ amati ʉ kanisa 1:10—4:21
Ɨndambʉ nʉ ʉɓɨɨ ngua wʉ ɔɔ gue nʉ moi 5:1—7:40
Ɓaklisito nʉ ɓombi ngiɓa ɓambʉɓayakɔmʉ Yeso 8:1—11:1
Ʉɓɨɨ wʉ ɓombi amati kanisa nʉ bibiso Asʉɓɨɨ 11:2—14:40
Jʉkana ngia yɨ Klisito nʉ iya yɨ ɓombi ngiɓa ɓa꞉baya 15:1-58
Nzikinikio apɛpɛ ngia wʉ ɓaklisito ngiɓa ɓʉ Yudɛa 16:1-4
Kunzo ɓombi kʉ di di di igue‑gue nʉ moni kʉ 'upipio 16:5-24
ទើបបានជ្រើសរើសហើយ៖
1 Ɓakolito 'Ʉtʉ wʉ moni: BudKoya
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2021, Wycliffe Bible Translators, Inc.