1 Ɓakolito 9
9
Kuu nʉ ʉpanʉ ngua wʉ titima
1Ajʉ mambʉkɔmʉ‑zʉ 'uɓununukie ɓiɛ? Ajʉ mambʉkɔmʉ‑zʉ titima ɓiɛ? Ajʉ ɛmɛ ma꞉nakɔmʉ‑zʉ Yeso Makʉʉndɛsʉ ɓiɛ? Ajʉ inu nambʉkɔmʉ‑zʉ masɔɔ kʉ kuu ngiisɛmɛ makʉkyɨa Makʉʉɓɨɨ ɓiɛ? 2Abana ndʉ ɓombi nga ɓɔmɔ ɓambukuɓio kʉbaya ɓɔ ma titima kititi, ɨkyɛmɨngana inu naanabaya tʉkʉ ɓɔ ma titima. Pɛpɛ tɔgɔ, inu na isisinio iya yakumbiiso ɓɔ ma tʉkʉ titima aka ekoo jubunio ngiindɛnʉ nʉ ɔɔ Makʉʉɓɨɨ.
3Moni ngika maatiisio ati ngia ɓombi ɓaanʉnapɨa‑ɔɔ nʉ 'ʉkɔmbɔ ɨkɔ ɨkʉnanɨ. 4Ajʉ mʉkwananakɔmʉ‑zʉ ninu kʉta idyo nʉ ɨkyɛmɛ yɛɛ mwɛ akʉ kuu ngiisɛmɛ ɓiɛ? 5Ajʉ mʉkwananakɔmʉ‑zʉ kʉ kʉsa kɨnda ɨzɔ nʉ moi ngia a muklisito, ngbanga kʉndʉ iya ɓatitima nga ɓɔmɔ ɓakʉkyɨa, abana kʉndʉ ɓamanye ɓʉ Makʉʉɓɨɨ, abana kʉndʉ Pɛtɛlɔ? 6Ajʉ tʉkʉ isu nʉ Balanaba kʉkwanana kʉhatanaka kʉ isu ɓakʉɓɔngɔ kumbo ngia kanʉ taa yengo akʉ ʉɓɨɨ ngua wʉndɛsʉ ɓiɛ? 7Sʉda tɨmanɨ‑zʉ iya aakwanana kʉkʉana kumbo ʉ ɗite kʉ ɛyɔ makʉɔngɔ? Mombi tɨmanɨ iya ndʉ ahʉna mijabibo ambʉkʉdya lipumo lɔngɔ? Nʉ mʉpɨmakɨa wʉ ɓanama tɨmanɨ iya ambakamwa maɓɛɛ kʉ imbi yɨ ɓanama ngia aakyɨa kʉpɨmakɨa engo?
8Nɔɔna ndʉ makʉyaka moni ngikakɛ tʉkʉ ndʉ mombi ʉ ɨtaka. Abana tʉkʉ Mapanʉ ngika kʉ Mʉsa ka꞉yaka moni aka ekoo moni ngikakɛ kʉ yakaa. 9Kʉ ɓwanɨ, moni ngika ɓa꞉kʉtɨndakɨa amati ʉ Mapanʉ ngika kʉ Mʉsa kakusigo ɓɔ: « Wɔɔsangakɔmʉ ngɔmbɛ moni ati ngia a‑ɔɔ kɨta nganʉ. » Ajʉ Asʉɓɨɨ aawununikio ɓangɔmbɛ ɓiɛ? 10Ajʉ yambʉkɔmʉ‑zʉ tʉkʉ aka ekoo ʉndɛsʉ iya Asʉɓɨɨ a꞉yaka‑ɔɔ moni ngikʉnanɨ ɓiɛ? Kingono moni ngikʉnanɨ ɓa꞉kʉtɨndakɨa tʉkʉ aka ekoo ʉndɛsʉ. Yɨkwanana ɓɔ mombi ngia aaɨma watɨnɨ, nʉ gwa ngia aadʉa nganʉ ɓuɓio kʉnapɨa itungwio ɓɔ ɓʉnyɨa nʉ mwanʉ idyo akʉ kuu ngia ɓakʉkyɨa kʉbʉa masɔɔ.
11Yinyeni‑zʉ ɓɔ isu kʉhʉna masɔɔ kʉ 'ʉtʉma amati ʉndɛnʉ, ajʉ kʉnɨta moni kɔɔ maja ndʉ isu kanyɨa nʉ ɨkyɛmɛ yɛɛ salɨɛ akʉ ndʉtʉ amati ʉ kumbo ngia nanayɔ ɓiɛ? 12Yinyeni‑zʉ ɓɔ ɓapananakɨa ɓɔmɔ ɓʉnyɨa nʉ kumbo kʉʉngwa akʉ lɨkɔndɔ lʉndɛnʉ, ajʉ isu kambʉkɔmʉ kʉ ikanzi ngia kakwanana‑ɔɔ kʉ kʉnyɨa nayɔ ɓiɛ? Ɨkyɛmɨngana, isu kambakakpakpa ɓɔ ɓʉtɨkyɨa moni ngikʉnanɨ ndʉ akʉ yɨkwananaka‑ɔɔ nisu. Isu kakʉpɨa moni ngikʉnanɨ tʉkʉ kʉ muɓomu, ambʉ kɔɔnangyokɔmʉ kuu yɛɛ ɓɨakɨɛ Ɨsaʉ yɛɛ Iɗo ngia yɨ Klisito. 13Jʉ naambɨa iɗo ɓɔ ɓombi ngiɓa ɓaakyɨa kuu akʉ ɨkáa yɨ Asʉɓɨɨ, ɓaanyɨa nʉ ɨkyɛmɛ yɛɛ dyɛ kʉ akʉ ɨkáa yɨ Asʉɓɨɨ. Nʉ ɓombi ngiɓa ɓaaya apɛpɛ wʉ ɓanama akʉ gbɔgbɔ ɔɔ yɛ 'ʉtʉmbɨa, ɓaanyɨa nʉ ɨkyɛmɛ yɛɛ dyɛ nga yɨndaɓʉ kʉ amati ʉ apɛpɛ ngiinanɨ. 14Ngbanga kʉ ɓwanɨ, Makʉʉɓɨɨ a꞉nzo jɛnɛ ʉpanʉ ɓɔ, ɓombi ngiɓa ɓaaɓɨakɨa Ɨsaʉ yɛɛ Iɗo, ɓaadyakaka kʉ nɨngbaa yɨ kuu ngiinanɨ.
15Ɨkyɛmɨngana, ɛmɛ ma꞉hatakɔmʉ kʉnyɨa nʉ dada ikanzi ngiinanɨ gʉkʉ ɗɛkɛkɛ. Nʉ mambʉkɔmʉ nɔwɛ kʉtɨndakɨa ɨsaʉ ngiakɛ jʉ makʉhata ɓɔ mʉnyɨa nʉ ɨkyɛmɛ ekoo ɔngɔ. Ya gʉtʉ iɗo ɓɔ muwo, chʉkɔmʉ aka mombi a꞊kwanana‑ɔɔ nɛmɛ kʉhɨnɨa ɨbɨba ngiinanɨ.#9:15 Ɨbɨba ngia yɛɛ ɓɨakɨɛ Ɨsaʉ yɛɛ Iɗo ɨsʉkʉɓwanɨ, chʉkɔmʉ kʉnyɨa nʉ ɨkyɛmɛ. 16Ɛmɛ mʉkwananakɔmʉ kuɓio kʉbɨbana ekoo kuu ngia makʉkyɨa engo iya yɛɛ ɓɨakɨa Ɨsaʉ yɛɛ Iɗo, jʉ tʉkʉ Asʉɓɨɨ a꞉nanzo kuu ngiinanɨ ɓɔ muɓio kʉɓɨakɨa engo. Kʉ ɓwanɨ, yaɓio ikoko nɛmɛ ndʉ mambukuɓio kʉɓɨakɨa Ɨsaʉ yɛɛ Iɗo. 17Ambʉ́ ndʉ ma꞉fuɓuo kuu ngiakɛ nʉ ɓʉkʉnda ɓʉsɛmɛ makʉɔngɔ, ambʉ́ ma꞉kwanana tiga kʉ kusiɓo kʉnyɨa nʉ ʉkʉa wɔngɔ. Ɨkyɛmɨngana, jʉ ya kuu ngia ɓa꞉nafuɓiso nʉ tɛlɛ, mʉkwanana tʉkʉ kʉkyananakɨa engo. 18Kʉ ɓwanɨ, ʉkʉa nguʉsɛmɛ wa ɨmanɨ? Ʉkʉa nguʉsɛmɛ wa tʉkʉ kʉɓɨakɨa Ɨsaʉ yɛɛ Iɗo ɨsʉkʉɓwanɨ, chʉkɔmʉ aka maɓio‑ɔɔ kʉta ɨkyɛmɛ ngia mʉkwanana kʉnyɨa nayɔ akʉ kuu ngiakɛ.
19Ɛmɛ mambʉkɔmʉ bayo ʉ mombi gʉkʉ mʉngana. Ɨkyɛmɨngana, ɛmɛ makʉɔngɔ ma꞉napɨanɨa kuɓio bayo ʉ ɓombi aka ekoo ngia ɓɔ mʉnyɨa nʉ ɓombi ɓaja nadɨndɨ. 20Ati ngia maakyɨa‑ɔɔ ati ʉ Ɓayuda, maakyɨa ngbanga kʉndʉ 'Uyuda aka ekoo nyɨa naɓɔ. Ʉɓɨɨ nguʉsɛmɛ wambʉkɔmʉ ɛsɨ ʉ mapanʉ kʉ Mʉsa. Ɨkyɛmɨngana, ati ngia maakyɨa‑ɔɔ ati ʉndaɓʉ, maakyɨa kʉ kʉkpataka mapanʉ ngikʉnanɨ aka ekoo ngia ɓɔ mʉnyɨa nʉ ɓombi ngiɓa ɓa ɛsɨ ʉ mapanʉ ngikʉnanɨ.
21Ngbanga kʉ ɓwanɨ, iya maakyɨa‑ɔɔ ati ʉ ɓombi ngiɓa ɓambakakyananakɨa mapanʉ kʉ Mʉsa, maakyɨa ngbanga kʉ ndʉ ɛɓɔ, chʉkɔmʉ kʉkpata mapanʉ ngikʉnanɨ tʉkʉ aka ekoo ngia ɓɔ mʉnyɨa naɓɔ. Moni ngikʉnanɨ kambʉkɔmʉ kusigo ɓɔ mambʉkɔmʉ kʉkpata mapanʉ kʉ Asʉɓɨɨ, jʉ ɛmɛ ma ɛsɨ ʉ ʉpanʉ ngua wʉ Klisito. 22Nʉ ati ngia maakyɨa‑ɔɔ ati ʉ ɓombi ngiɓa ɓambakakyɨa nʉ baya yɛɛ ɓʉmʉ, maakyɨa ɓata ngbanga kʉ naɓɔ tʉkʉ aka ekoo ngia ɓɔ mʉkwanana kʉnyɨa naɓɔ. Apɛɛ ʉ ɓombi kʉ ɓuɓomu maakyɨa tʉkʉ angu ɓɔ muɓio ngbanga tʉkʉ naɓɔ, tʉkʉ aka ekoo ngia ɓɔ muhiiso ɓombi ngana ngana ati ʉ ndaɓʉ akʉ lɨngbaa kʉ di di di. 23Makʉkyɨa lɨngbaa lʉ moni ngilʉnanɨ kʉ liɓomu tʉkʉ aka ekoo ʉ Ɨsaʉ yɛɛ Iɗo ambʉ mʉnyɨa nʉ wagba wʉ ʉmbʉa wɔngɔ kʉnyɨaa.
Kʉkpata mapanʉ ndʉ mombi ɔɔ chwɛ bangʉ
24Naambɨa tʉkʉ iɗo ɓɔ ɓombi ngiɓa ɓaakyɨa magbii wʉ bangʉ, abana ndʉ ɛɓɔ kʉ ɓuɓomu ɓaagʉa bangʉ kititi, ɨkyɛmɨngana yaakyɨa tʉkʉ nʉ mombi mʉngana ati ʉ ndaɓʉ iya aakwanana kʉnyɨa nʉ ɨgaɨ yɨ ɓʉngama ɓɔngɔ. Inu chweni bangʉ kʉ ɓwanɨ. 25Ɓombi ngiɓa ɓaakyɨa tamba yɛɛ chwɛ bangʉ ɓaakyɨa kʉkanyoko tamba ngiinanɨ ɓinyeni kʉtayanɨa. Ʉna tɔ, ɓaakwanana kʉkyɨa ɓwanɨ tʉkʉ aka ekoo nyɨa nʉ ɨgaɨ yɨ ɓʉngama ngia yambakagbalɨa. Ɨkyɛmɨngana, isu kakʉkyɨa ɓwanɨ aka ekoo nyɨa nʉ ɨgaɨ yɨ ɓʉngama ngia yɛɛ gbalɨɛ. 26Iikwa maagʉa‑ɔɔ bangʉ mi꞉nyeni tʉkʉ nʉ itungwio yɛɛ nyɨɛ nʉ ʉkʉa. Ɛmɛ ma ngbanga tʉkʉ nʉ ɓombi ngiɓa ɓaaɓɨndana makɔfɨ. Ɓombi ngiɓʉnanɨ ɓambakaɓɛnda ʉhʉ ɨsʉkʉɓwanɨ. 27Ɨkyɛmɨngana, maakyananaka ndʉtʉ ngiisɛmɛ ɓʉmbʉmʉ mambuɓio kʉ 'utiiso engo, aka ekoo ngia ɓɔ mbise ɔɔ ɓɨakɨɛ ɓombi nga ɓɔmɔ ɨsaʉ yɨ ɓʉhɨa, ɓɔɔnagisokɔmʉ ɛmɛ.
ទើបបានជ្រើសរើសហើយ៖
1 Ɓakolito 9: BudKoya
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2021, Wycliffe Bible Translators, Inc.