1 Ɓakolito 6
6
Tɨna 'ʉkɔmbɔ ati ʉ ɓayoo
1Ndʉ mombi mʉngana ati ʉndɛnʉ ɓaɨbana nʉ mangɛ, jʉtanɨ abi‑zʉ nayɔ kʉchʉngɨa tʉkʉ apɛɛ ʉ ɓombi ngiɓa ɓambʉbayakɔmʉ, chʉkɔmʉ ambʉsa nayɔ kʉchʉngɨa apɛɛ ʉ ɓombi ɓʉ Asʉɓɨɨ? 2Ajʉ inu nambakambɨa ɓɔ tʉkʉ ɓombi ɓʉ Asʉɓɨɨ ɓa꞊tɨna sina 'ʉkɔmbɔ wʉ ɨtaka ngiakɛ ɓiɛ? Nʉ ndʉ yaɓio ɓɔ kʉ inu na꞊tɨna 'ʉkɔmbɔ wʉ ɨtaka, ajʉ nambʉkɔmʉ kʉ ikanzi ngia na꞊tɨna‑ɔɔ ɓamoni ɓɔɔ ɗɛ ɗɛ ɗɛ ɓiɛ? 3Ajʉ inu nambakambɨa ɓɔ kʉ isu ka꞊tɨna sina 'ʉkɔmbɔ wʉ ɓamalaika ɓiɛ? Kʉ ɓwanɨ, tiga kʉɓaana ka꞊kwanana tiga kʉ kʉtɨna 'ʉkɔmbɔ wʉ ɓamoni ɓʉ ʉɓɨɨ nguakɛ. 4Kʉ ɓwanɨ, jʉtanɨ‑zʉ ndʉ ɨbana yaakwa ati ʉndɛnʉ, naasa nʉ moni kɔngɔ tʉkʉ apɛɛ ʉ ɓombi ngiɓa ɓambʉkɔmʉ nʉ ʉpanʉ amati ʉ kanisa kʉtɨna engo? 5Makʉyaka moni ngikʉnanɨ, ya pɛpɛ soni akʉ inu. Ajʉ ati ʉndɛnʉ yambʉkɔmʉ nʉ mombi gʉkʉ mʉngana iya anʉ 'ʉtʉma wɔɔ pimise moni iya a꞊kwanana kʉtɨna moni ati ʉndɛnʉ ɓaklisito ɓiɛ? 6Jʉtanɨ ayoo amati ʉ Klisito a tiga kʉsa kʉchʉngɨa aba angɔ apɛɛ ʉ ɓombi ngiɓa ɓambʉbayakɔmʉ?
7Kingono, kuɓio kʉchʉnganakɨa ati ʉndɛnʉ yakʉpana tʉkʉ ɓɔ moni ka꞉nɨɓaa angu ɓaa. Ajʉ nambʉkʉkwanana kʉpɨa ɓʉɓɨɓɨ ngiɓa ɓangɛ ɓaanɨkyɨa ɓiɛ? Ndʉ mombi anahɨnɨa ɨkyɛmɛ, jʉtanɨ nambʉkwanana nayɔ kʉsɨa ɓɔ ʉɨchɨka naa? 8Ɨkyɛmɨngana, inu nambʉkɔmʉ ngbingbii nʉ naakyɨa kuhinyoo ɓombi kumbo ʉndaɓʉ. Ɓombi ngiɓa naaɓʉkyɨa ɓwanɨ ɓa tʉkʉ ɓayoo ɓʉndɛnʉ ɓaklisito! 9Inu naambɨa tʉkʉ iɗo kusigo ɓɔ ɓombi ngiɓa ɓaakyɨa ɓʉɓɨɓɨ ɓambʉkʉkwanana kʉnyɨa nʉ izi akʉ Ɓʉngama ɓʉ Asʉɓɨɨ. Nɔɔɓiokɔmʉ amati ʉ ɓujangi‑jangi, kuɓio ɓombi ɓʉ ɨndambʉ, ɓombi ɓɔɔ ɓubibise ɓamʉngʉ ɓʉ yakanaka, ɓombi ɓɔɔ ɓʉkʉndɛ ɓugue yɛmɔ ɓoi ɓʉ ɓangɛ, nʉ ɓugue ɓɔɔ ɓʉkwaanɛ kʉ ati ʉndaɓʉ, nʉ ɓoi kʉ ati ʉndaɓʉ, 10ɓagandiɓo, ɓombi ɓɔɔ ɓʉtananakɨɛ kumbo wʉ ɓangɛ, ɓombi ɓʉ ɨdamʉ, ɓombi ɓɔɔ ɓuchwie ɓangɛ nʉ moni kʉ ɓʉʉ, ɓombi ɓɔɔ ɓuhinyoe kumbo ʉ ɓangɛ, ɓombi ngiɓʉnanɨ kʉ ɓuɓomu ɓambʉkʉnyɨa sina nʉ izi akʉ Ɓʉngama ɓʉ Asʉɓɨɨ. 11Ɓombi ɓɔmɔ ati ʉndɛnʉ ɓi꞉nye ngbanga kʉndʉ ɛɓɔ ɓombi ngiɓʉnanɨ. Ɨkyɛmɨngana, inu na꞉jaɓanakɨa akʉ ɓʉɓɨɓɨ jaɓanakɨaa, nʉ Asʉɓɨɨ a꞉nɨnapɨa tiga kʉ di, ambunikiso ngbingbii apɛɛ angɔ akʉ ino yɨ Makʉʉɓɨɨ Yeso Klisito 'upi akʉ 'Ʉtʉma wʉ Asʉɓɨɨ ngiʉndɛsʉ.
Kunzo ndʉtʉ akʉ ɨbɨba yɨ Asʉɓɨɨ
12Ɓombi ngana ngana ati ʉndɛnʉ ɓaasigo ɓɔ: « Ɓa꞉natitio kʉkyɨa ɓamoni kʉ muɓomu. » Ya ndʉ ananɨ, ɨkyɛmɨngana moni kʉ muɓomu kambʉkɔmʉ muɗo akʉ inu. Mʉkwanana kʉ kusigo ɓɔ ɓa꞉natitio kʉkyɨa moni kʉ muɓomu. Ɨkyɛmɨngana, mambʉkʉbaya kuɓio bayo wʉ ɨkyɛmɛ gʉkʉ mɨngana. 13Naasigo ɓata kʉ ɓɔ: « Idyo ya꞉kyɨanɨa akʉ ekoo ʉ ɓʉa, nʉ ɓʉa ɓa꞉kyɨanɨa aka ekoo ʉ idyo. » Ya ndʉ ananɨ, ɨkyɛmɨngana Asʉɓɨɨ a꞊wa idyo nʉ ɓʉa kʉtaa. Ɓa꞉kyɨakɔmʉ ndʉtʉ aka ekoo ʉ ɨndambʉ. Ɨkyɛmɨngana, ɓa꞉ɨkyɨa aka ekoo ʉ Makʉʉɓɨɨ, nʉ ɛyɔ a makʉʉ ʉ ndʉtʉ. 14Asʉɓɨɨ ngia a꞉jʉkaniso Yeso akʉ ingyo, a꞊tɨjʉkaniso sina isu kʉ jʉkanisoo akʉ angu ngiangɔ.
15Ajʉ nambakambɨa‑zʉ kusigo ɓɔ ndʉtʉ ngiindɛnʉ ya izi mɨngana yɨ ndʉtʉ ngia yɨ Klisito ɓiɛ? Ajʉ yɛɛ iɗo ɛmɛ kʉchɨka izi yɨ ndʉtʉ ngia yɨ Klisito nayɔ kʉ ikiso izi yɨ ndʉtʉ yɨ moi yangaka yɛngɔ ɓiɛ? Gʉkʉ ɗɛkɛkɛ! 16Ajʉ nambakambɨa ɓɔ gue ujunikieni nʉ moi yangaka yɛngɔ, ambʉ ɓʉka tii tʉkʉ ndʉtʉ mɨngana nayɔ ɓiɛ? Jʉ ɓa꞉tɨndakɨa ɓɔ: « Ɛɓɔ ɓapɨnɨ ɓa꞊ka tiga ndʉtʉ mɨngana. » 17Ɨkyɛmɨngana, mombi ngia ajunikio nʉ Makʉʉɓɨɨ, amati 'Ʉtʉma nguangɔ, ɛɓɔ nayɔ ɓa tii tʉkʉ ɨkyɛmɛ mɨngana.
18Kumeni ɨndambʉ kumoni! Jʉ ɓʉɓɨɓɨ kʉ ɓuɓomu ngiɓa mombi aakyɨa aambakaɓʉkyɨa ekoo ʉ ndʉtʉ ngiangɔ. Ɨkyɛmɨngana, mombi ngia aakyɨa ɨndambʉ, aakyɨa ɓʉɓɨɓɨ tʉkʉ ekoo ndʉtʉ ngiangɔ makʉɔngɔ. 19Ajʉ nambakambɨa‑zʉ ɓɔ ndʉtʉ ngiindɛnʉ ya ɨkáa yɨ 'Ʉtʉma wɔɔ Tu ɓiɛ? 'Ʉtʉma nguʉnanɨ uuwa wa amati ʉndɛnʉ, uwa Asʉɓɨɨ a꞉ninzo. Inu nambʉkɔmʉ ɓakʉ ɓʉ ndʉtʉ ngiindɛnʉ. 20Asʉɓɨɨ a꞉nɨkʉa nʉ ɨgabʉ yɛɛ ɓʉmʉ. Kʉ ɓwanɨ, ndʉtʉ ngiindɛnʉ yiɓio kunzo tʉkʉ Asʉɓɨɨ ɨbɨba.
ទើបបានជ្រើសរើសហើយ៖
1 Ɓakolito 6: BudKoya
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2021, Wycliffe Bible Translators, Inc.