Matiyu 13
13
Angmǝ gerpo aa aza ondo owaale ebelo
(Mar 4:1-9; Luk 8:4-8)
1A lengme leme na Yeso suri akwilǝ me, naka ale aa ka cikǝ o wulu o lepong. 2Na leguki le aromo leegong deya a kai, naka lyǝ o onggo o tara manyi naka cikǝ. Aa leguki le aromo me kangza ne itǝ o wulu lepong le me.#Luk 5:1-5. 3Naka bele ne mapapa cake aa nyimi angmǝ a gerpo na, “Ondo ogole ara yende wa ale ara aa waale ebelo. 4Nangka waya waale me, na ebelo eyende taru a za orona, na engmeng de nane donge e. 5Na eyende taru aa za acale araaka makeke ta gongha ne. Na e suri a saseya obena makeke arame taa gerpo ne. 6Nangka ongme wa tamana na ma ya rauwo, na ma waka obena madǝrǝ mame taa gerpo ne. 7Ee belo yende kangza taru a nyimi ekana, na ekana me gong na e gatakale e. 8Ee yende kangza taru a makeke ma rere, na ekare eyo, na eye eyo liwinu, liwunu, eyende etuuru taashe, taashe, eyende kangza etuuru taaro, taaro. 9Pate ondooka waye ka toto to konaza a wa kone angmǝ aa na.”
Masanto ma angmǝ aa gerpo aa na
(Mar 4:10-12; Luk 8:9-10)
10Na atoma Yeso de, aa ne pirkǝ kai na, “Eyaaka o beya angmǝ aa gerpo ka aromo?” 11Naka kabare ne na, “Ying aa kabare o bena e rose o ela o togomo te Ashili, aa ne ata a nya nee ne. 12O bena ondooka waya ka eyapa waya ayo wala wai ne, ka wa cǝ a cake. Kangza ondo odera eyapa, ee baate kawa ye ka e, ayo emba e a wai. 13Epa eeka e ote na eyang beya ngmǝ gerpo kane,
‘Adorana na ne gonte a neta laka ne,
aa ne rakara a neta a kona ne,
obena epa eme e lyǝ aane amaring.’
14Azaa one ayo panza epa eeka ondo beya ngmǝ ka mawo ma Ashili Ishaya wa beke na,
“Eyo konaza,
aa eto rosa ne dakememe,
eyo kang gonta
aa eto laka ne ko babate.
15Obena anyong aromo ana aya katakau,
aa teto tene ta konaza ne.
Kangza ne pate ayizi ane,
obena kana ne gonte ka ayizi ane ne,
kana ne kone ka teto tene ne,
obena kana ne cǝ orosa ne,
kane kuri a mi kang womza nee ne.’
16Ana o kona oleba ying obena ayizi aying aya gonta, a teto teying kangza taya konaza. 17Eyang dongdong baala oying ana obeya angmǝ ka mawo ma Ashili ka ana o kona boome Ashili a cake ne yeme olaka epana eeya gonta me, na ne ta laka ne, aa ne kone epa eeka eya konaza me, na ne ta kona ne.
18“Anna masanto ma angmǝ a gerpo ondo o waale ebelo na. 19Pate ondooka wa kona ngmǝ a togomo nawa ta rosa ne, ogomo o bere oburu deese kawa kwagale epaaka a waale a lenyong le wai. Enna ebelo eeka a wale a za orona. 20Ebelo eeka ee tǝru ara acale, eya naa ondooka wa kona angmǝ Ashili, nawa embe ka o kona o leba. 21Oo bena wata ka oting ne, nawa ta rabo aa cake ne. A were aka o kedeya na opoba wa era, azaa a ngmǝ Ashili, aa oromo me kuri sidimǝ. 22Ebelo ee ka e taru a nyimi ekana, eya na ondooka wa kona ngmǝ Ashili, na madoola ma ocǝ ka o kona oleba awere na a nare angmǝ o gongha, ka ngmǝ me itǝ o dera edang. 23Ebelo eemea ee tǝru a makeke ma rere, waya na ondooka wa kone ngmǝ Ashili na wa rose ai, awa eze ogole ka ai. Kangza awa cǝ eyapa aza ame, eyende lewinu, lewinu, eyende etuuru taashe, taashe, ee yende etuuru taaro, taaro.”
A ngmǝ a gerpo azaa mawake a nyimi o alkama
24Na Yeso kang bele ne angmǝ a gerpo yende na, “Ayo kedeya togomo ta shili ka oromo ooka wa waale ebelo e rere ara awai. 25Awere aka aromo neya malau, na oja okara wai ale na wa waale a belo o wake yende ara o alkama me, awa sokoo ale. 26Nangka ebelo me e ere na eye eyo, na owake me kang gongha. 27Na azara ateakwilǝ me ne de, na ne bekaa wai na, ‘Ateakwilǝ, teya beya na ebelo erere ba waale ara au sang? A wiinia na mawake ma surǝ ara ame? 28Nawa kabare ne na, ‘Oja okara waya nyimi.’ Na azara me pirkǝ wai na, ‘Oya yeme aa te ale kate lope mawake mame na?
29Aa wa bekaa nee na, ‘Nyimia dai, bayana, tana azaa olopa mawake e gwaara ka o alkama me ne. 30Baya na ne aa gong legwa a ale awere o shende. A were o shende me kangza eyang bekaa ana o shende me, kane bore ka oshende mawake mame, a ne kurki mawake mame, aane tese kane ese, aane shende o alkama me ka ne kare aa benga.’ ”
A ngmǝ a gerpo azaa o yisti ka o mosta
(Mar 4:30-32; Luk 13:18-19)
31Na Yeso bekaa ne a ngmǝ a gerpo kangza na, “Togomo te shili teya baate na beyo be o mosta, emea oromo yende wa ale kawa kpeene ara awai. 32Eya kala a bee baate a nyimi eyo, aa ee gongha, e kala kombela uti o marane, kawa itǝ uti oo gong, ka engmeng soze todo ee bana me.
33Kangza Yeso ka bele ne angmǝ gerpo yende na, “Togomo te Ashili teye na o yisti, ooka ondaye yende wa jeke nawa sakale ka maso ma taaro ma'ena ma o alkama, na ma sakalnang ka ma o yisti me.
34Na Yeso bele okurkǝnǝng aromo, pate epaname a nyimi angmǝ aa gerpo. Kata ka baaleze eyapa ne soona aa nyimi angmǝ gerpo. 35Aye nyimia ka panza o bekaa ondo beya ngmǝ mawo Ashili Ishaya na,
“Eyang beya angmǝ a nyimi ngmǝ a gerpo,
Eyang beka epa eeka a baasa obora lerambo.”#Sel 78:2.
Masanto azaa mawake a nyimi o alkama
36Na Yeso baya aromo acake me, aaka lyǝ akwilǝ. Na atoma kai kangza ne deya kai, na ne bekaa na, “Bele ro masanto ma angmǝ gerpo aza mawake ara.”
37Aaka kabare na, “Ondo owaale ebelo erere name, waya Kena ka Oromo. 38Aa ara ame, aya lerambo leena, ebelo erere name, neya ayana a togomo te Ashili, kangza mawake mame maya ayana ogomo ara a buru. 39Oja okara ka wa waale owake, waya ogomo ara a buru. Awere oshende me aya lengme le maare o lerambo leena, ana o shende me neya atoma Ashili o surǝ azaa shili. 40Nangka kurki mawake ka ese mai, nyimia wayo itǝ a lengme le omaare. 41Kena ka Oromo kayo tonga atoma kai o surǝ azaa shili, kane shende ana o ote aromo kane rizi, kangza kaa pate ana o eza epa eburu, kane sǝǝrǝ ne a nyimi togomo te kai, 42kangza kane tare ne a nyimi ola o kpwaiye. A saname neya ruuzi ka o nonza tuuni. 43A were namea ana o eza epa erere, masanto mane mayo surǝ na ongme a nyimi togomo te Ate ane. Ondooka waya ka toto to kona, awa kone.”
A ngmǝ a gerpo azaa ocǝ ka a baasa
44Togomo te Ashili teye na ocǝa ka a baasa nyimi ara, ooka ondo wa cǝ nawa kang baasa. A nyimi zanta wai, nawa ale nawa lishi pate epa eeka waye ka e nawa embe ara me.”
45Kangza togomo te Ashili teye na ondo ejamanea, ooka waya gera acale aa rere ka aye kaa emate. 46Nangka wa cǝ lecale le yende lee rere acak, na wa ale nawa lishi pate epa eeka waye ka e, na wa embe ai.”
A ngmǝ a gerpo azaa ojara o meese ekwala
47Kangza Togomo te Ashili teye na ojara o meese ekwala ooka tare a lepong, nawa meke kombela ekwala. 48Nangka wa pene, naa windi wai o wulu lepong, nane cikǝ ane zake e kwala ee rere e me nane kare a nyimi o kende, aa ne oke eburu me. 49Nyimia wayo itǝ a lengme le omare. Atoma Ashili o surǝ azaa shili neyo sǝǝrǝ ana ara aburu nyimi aromo a rere. 50Ka ne tare ana ara aburu a nyimi ola o kpwaiye, aa sanamea neyo ruuzi ko nonza tuuni.
51“E rose epaena pate na?”
Na ne kabare na “Eeye.”
52Naka bekaa nee na, “Pate ondo o baala angmǝ aaka Ashili nya Mosa wa itǝ ondo tare togomo te Ashili, wa itǝ na ateakwilǝ, ondooka wa mangka ocǝ osau ka o kozo ara a le'eke lewai.”
A nyane Yeso ba Nazarat
(Mar 6:1-6; Luk 4:16-30)
53Nangka Yeso ka mare obeya angmǝ aa gerpo name naka baya arame. 54Ko deya a peng kai, naka bore o baala aromo oo dandaro o ogwarzanang one. Na epa me tere ne ukpwei na ne beke na, “Karomo kaana ka cǝ orosa ka epa o tera ukpwei aa ba? 55Teya beyana kanna, kena ka o ondo cocoza sang? Iini kai kaya Mariya sang? Arone kai neya Yakubu, Yusupu, ka Saminu, kangza kaa Yahuda sang? 56Arone kai andaye neya ara yendea kaa ro sang? Karomo kaana ka cǝ epa eena ba? 57Na ne kone oburǝ okai.
Na Yeso bekaanee na, “Ondo obeya ngmǝ ka mawo Ashili ata kabare ka wai a nyimi apeng awai kaa kwilǝ awai ne. 58Naka ta eza epa otera ukpwei a cake a saname ne, a za odera okabare ka Ashili one.
ទើបបានជ្រើសរើសហើយ៖
Matiyu 13: XSN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2022 Luke Initiative for Scripture Translation
