Utusang pung Carita 28
28
Paulus dong di Malta
28:1-6
1Waktu katong sampe di pante deng salamat, katong baru tau kalo itu pulo Malta. 2Orang-orang di pulo tu tarima katong samua deng bae-bae paskali. Dong kampong api basar biar katong bisa baasar, barang waktu itu paleng dinging deng ujang. 3Paulus bajalang kumpul kayo-kayo la taru akang dalang api. Waktu dia ada taru kayo-kayo tu, skrek bagini, ular babisa saekor kaluar dari dalang kayo tagal seng kuat tahang panas, la gigi dia pung tangang, la seng talapas. 4Waktu orang-orang Malta lia ular tu tagantong di dia pung tangang, dong laeng bilang par laeng kata, “Dia ni pasti tukang bunu orang. Barang, biar kata dia su salamat di lautang lai, mar katong pung dewi yang jadi hakim tu seng kasi biar dia hidop.”
5Tarus, Paulus kabas ular tu ka dalang api. Dia seng rasa saki sadiki lai. 6La dong pikir kalo Paulus pung tangang nanti bangka, ka seng dia nanti jatu la mati. Mar dong tunggu-tunggu lama paskali la lia kalo dia seng apapa. Jadi, dong pung pikirang soal dia baroba la dong bilang kalo dia tu dewa.
Paulus kasi bae orang-orang
28:7-10
7Seng jau dari pante tu, gubernur yang pegang parenta di pulo tu ada pung tana di situ. Dia nama Publius. Dia tarima katong bae-bae di dia pung ruma par manumpang tiga hari sepe-sepe. 8Waktu itu, Publius pung bapa ada di tampa tidor tagal damang deng buang-buang aer. Paulus maso di antua pung kamar la sombayang deng taru tangang di atas antua. Oras itu jua, antua bae.
9Waktu orang-orang di pulo tu dapa tau kalo Publius pung bapa su bae, orang-orang laeng yang saki di pulo tu mulai datang par Paulus la dia kasi bae dong lai. 10Dong paleng taru hormat par katong. La waktu katong mau balayar kombali, dong kasi apa sa yang katong parlu.
Paulus dong balayar ka Roma
28:11-15
11Katong tinggal di pulo Malta tiga bulang la balayar kombali deng kapal satu yang datang dari kota Aleksandria, yang balabu di Malta waktu musing omba. Di kapal tu pung muka ada patong dewa bakambar, nama Kastor deng Poluks.#28:11 Dewa bakambar: Teks bahasa Yunani bilang Dioskuri, yang pung arti ‘dewa Seus pung ana bakambar’. Orang Yunani parcaya kalo dua dewa tu jaga orang-orang di lautang.
12Katong balayar la balabu di kota Sirakusa. Katong tinggal di situ tiga hari. 13Dari situ katong balayar kombali la sampe di kota Regium. Akang pung eso bagini, anging batiop dari salatang. La akang pung eso lai katong sampe di kota Putioli. 14Di kota tu katong baku dapa deng basudara yang iko Yesus. Dong minta katong tinggal deng dong tuju hari. Abis itu, katong pi ka kota Roma. 15Basudara yang iko Yesus yang ada di Roma su dapa dengar kalo katong ada mau pi ka sana. Jadi, saparu dari dong datang cari katong sampe di Pasar Apius deng di tampa satu lai yang nama Tiga Penginapan. Waktu Paulus lia dong, dia minta dangke dari Allah la dia pung hati tamba kuat.
Paulus di Roma
28:16-31
16Waktu katong sampe di kota Roma, komandan tantara kasi biar Paulus tinggal sandiri deng tantara satu yang jaga dia.
17Akang pung tiga hari bagini, Paulus panggel pamimping-pamimping Yahudi yang ada di kota tu par bakumpul. Waktu dong samua su bakumpul, Paulus bilang kata, “Basudara e! Beta seng malawang katong pung orang-orang Yahudi deng katong pung moyang-moyang pung atorang. Mar orang Yahudi di Yerusalem tangkap beta la bawa beta ka pemerinta Roma. 18Waktu pemerinta Roma su abis kasi sidang beta, dong mau kasi lapas beta. Barang, beta seng biking sala apapa sampe dong musti hukum mati beta. 19Mar orang-orang Yahudi tu seng mau tarima kalo dong kasi lapas beta. Jadi, beta musti nai banding ka Raja Basar Roma biar antua urus beta pung parkara. Mar beta biking bagitu bukang par kasi sala katong pung basudara Yahudi.#Utusang pung Carita 25:11 20Tagal itu sampe beta minta baku dapa deng kamong par bicara. Beta mau kamong tau kalo beta dapa rante ni tagal beta pung parcaya par Kristus, yang katong orang Israel samua tunggu-tunggu par kasi salamat katong tu.”
21Tarus, pamimping-pamimping Yahudi tu bilang kata, “Paulus e, katong ni seng parna tarima surat sapanggal lai dari propinsi Yudea soal ale. La basudara yang datang dari sana jua seng parna carita ale pung sala par katong. 22Mar katong mau dengar dari ale pung mulu sandiri soal apa yang ale parcaya tu. Barang, katong dengar kalo di mana-mana orang malawang kalompok Kristen tu.”
23Tarus, dong pili satu hari par baku dapa deng Paulus. Parsis akang hari tu, orang Yahudi paleng banya datang ka ruma yang Paulus tinggal. Dia ajar deng kasi tau par dong dari pagi sampe sore soal bagemana Allah pegang parenta jadi Raja. Dia coba buju dong par parcaya Yesus pake nats-nats yang ada dalang Kitab Torat yang Musa su tulis deng dalang Allah pung juru-juru bicara pung tulisang. 24Saparu orang dari dong parcaya apa yang dia bilang, mar ada lai yang seng parcaya. 25Dong baku malawang sampe dong pi dari situ. Mar waktu dong mau pi, Paulus bilang par dong kata, “Hoe basudara e! Apa yang kamong biking ni, akang pas deng apa yang Allah pung Roh su bilang par katong pung moyang-moyang lewat Antua pung Juru Bicara Yesaya dolo. 26Antua bilang par Yesaya kata,
‘Pi bilang par orang-orang ni,
“Kamong nanti pasang talingang bae-bae,
mar kamong seng mangarti jua.
Kamong nanti lia bae-bae,
mar kamong seng tau akang pung arti.”
27Barang, bangsa ni pung hati su jadi batu,
dong pung talingang su tuli,
deng dong pung mata su tatutu.
Deng bagitu, dong pung mata seng lia,
dong pung talingang seng dengar,
dong pung hati seng mangarti,
biar dong jang bale par Beta
la Beta kasi bae dong.’#Yesaya 6:9-10
28Jadi basudara e, kamong musti tau kalo tagal kamong orang Yahudi seng mau tarima barita soal Allah kasi salamat manusia, jadi Antua suru katong kasi tau akang par orang-orang yang bukang Yahudi. Dong nanti parcaya akang!” 29[Abis Paulus bicara soal orang-orang bukang Yahudi, orang-orang Yahudi ni bajalang pulang la dong baku malawang mati soal apa yang Paulus su bilang tu.]
30Paulus tinggal dua taong di ruma yang dia sewa di Roma. Waktu dia tinggal di situ, deng hati sanang dia tarima samua orang yang datang baku dapa dia. 31Dia deng barani kasi tau par orang-orang soal bagemana Allah pegang parenta jadi Raja deng soal Tuhan Yesus Kristus. La seng ada satu orang lai yang larang dia par biking bagitu.
ទើបបានជ្រើសរើសហើយ៖
Utusang pung Carita 28: ABMA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022, Sinode Gereja Protestan Maluku
