Markut 9

9
1Na̱ ya ka̱son, a̱ bo hywa da̱ mba, “Se yi swat bvwo, ba̱yanyet a̱ shyi ka̱yat nyin kyi, ba ni kwi ba, se ba ryi ba Dityok Ka̱za ka̱yat cet nti.”
Rwam Yesu na brak
(Matta 17:1-13; Luka 9:28-36)
2Ba yya nom a̱kitat, Yesu a̱ yei Bitut, bu Yakubu, bu Yohana, ba wrak a̱ nat tazwa a̱gba̱dang dihwan, ba shyi swat a ka̱ yemi. Ba̱pfong nu ba a̱ bu swat-swat a̱ ryi rwam Yesu na ku shei. 3Ba̱tro nu ba a̱ sai ba̱kinkyai a̱ seyak ka̱rek tssu a̱yin. 4Ba̱pfong ba a̱ ryi Musa bu Iliya ba ryat bu Yesu. 5Bitut a̱ hywa, “Malam, ku yet ka̱sham zin shyi kyi. Se zi yya mbvut ba̱na ntat. Yring ni yet nwaan, yring nying Musa, Iliya a̱ byyi yring.” 6Bitut a̱ ryin kyang a na̱ ni hywa ni, rot ba hok ka̱wun ba̱t.
7Bi ka̱baram, a̱ninyyan a̱ nyyai a̱ bu ba̱ kup i ba̱ tyyi a̱gba̱dang ma̱nwwuk. Ba hok diwan ti hyok ka̱yat a ninyyan ka, i hywa, “Ka̱won nzuk a̱ nkaa. Nu a̱ yet ka̱won rya nzuk ka, yi ka̱ hok.” 8Ba shyi i cyang, a̱ brak bi ka̱baram di ba bo ryi a̱yin ba, se bu Yesu ba̱ mba.
9Ba shyi kyyep nyyai tazwa dihwan ka, Yesu a̱ ba̱ gbang a̱ hywa, “Ki di yi du tyyei a̱yin kyang a yi ryi ni ba, se ka̱ram ka Ka̱won A̱neywu ka̱n kwu a̱ ta̱za i dibyyi ti ni.”
10Ba shim, ma a̱ nwa ya zzim bu mba-mba, a̱ hywa, “A̱nzan a̱ yet ta̱za i dibyyi ti?” 11A̱ brak a̱ zzim Yesu, “A̱nzan a̱n byyi ba̱malam ba a̱ zzek truwang ji ni ban hywa di Iliya nu a̱ ni yet ka̱son a̱ ba?”
12Na̱ hywa da̱ mba, “Ee, ka̱ryong a̱mi, Iliya nu a̱ ni yet ka̱son a̱ ba a̱ ga bi jyi kozan nkyang. Ma a̱nzan a̱n byyi ba̱ryat Ka̱za ba ban hywa di Ka̱won A̱neywu a̱ ni sswa ka̱bvung ba̱t, ba bo ka̱ rak? 13Iliya ma a̱ wa ka̱n ba, ba̱nyet ba a̱ bu ku yya kyang a shyi a ndya mba na ni. A̱mi ma ba̱ryat Ka̱za ba ban hywa.”
Yesu a̱ creng ka̱won ka a̱ byyi a̱ka̱tuk tswa ni
(Matta 17:14-21; Luka 9:37-43a)
14Ba brek a̱ bu mon bu kpikpit na̱won pfong nu na, ba ryi ba̱nyet ba̱gingang ba tung ka̱bvwa ka; ba̱malam truwang ba̱yaan ba shyi i ya a̱cecet ba̱ mba. 15Ba̱nyet ba ba bu ryi Yesu, ka̱hat ba̱ pyyem, ba tyyi ncyi a̱ bu ku byyek. 16Yesu a̱ zzim na̱won pfong nu na, “A̱cecet a̱nzan yi ya?”
17A̱yanyet ka̱yat ka̱tswa ka a̱ shot ba ahwa, “Malam! Ka̱won nzuk, n ba mi da̱ nwan, rot ka byyi a̱ka̱tuk tswa nu a̱ ka̱ bvwo ba̱ryat ba ni. 18Kozan ka̱ram na̱n ka̱ yrek se a̱ ka̱ sook mak ka̱byen, ka nwa tuu fwi ka̱nu, a̱ bvok a̱nyi na, rwam a i brek bu tyyi ba̱kinka̱ng. To, n naai na̱won pfong nwan na ba nyying a̱ka̱tuk ntswa nu, ma na̱ ba̱ kaat.”
19Yesu a̱ hywa da̱ mba, “A̱nzan taka̱i ba̱nyet yi yet, nyin cei ba̱nyet sang ka̱ryong? Hat a̱nzan ka̱ram n ni n swat ba̱ nyin? Hat a̱nzan ka̱ram n ni n jyat? Yi ba ba̱ nka kyi!” 20Ba nat ba̱ nka di Yesu.
A̱ka̱tuk tswa nu a̱ bu ryi Yesu, a̱ bo sook ka̱won ka a̱ mak ka̱byen, ka kprang, fwi ji zi wwut ka̱nu ka. 21Yesu a̱ zzim a̱tyyi ka̱won nu, a̱ hywa, “Nyyai a̱nzan ka̱ram ka nwa taka̱i hywu nani?”
A̱tyyi nu a̱ hywa, “Nyyai ka yet bu cincong ka̱bawon. 22Ka̱ram ka̱yaan ku kwan zwang ka̱ hywat. Ka̱ram ka̱yaan ku ka̱ ta an dong, ka̱ram ka̱yaan ka̱yat ba̱shekwot. Ka ni maai, hok dizot njit i za brang!”
23Yesu a̱ hywa da̱ nu, “A̱nzan a̱ yet a̱nyyi hywa ki n ni maai u? A̱yin nu a̱n tyyi rya nu na ni, kyang n shyi ni ku kaat ba.”
24Na̱ shim ba ahwa, “N nin tyyi rya, ma ku rat. N brang bu rat ka̱ryong nzuk ka.”
25Ka̱ram ka Yesu na̱n dyi ba̱nyet ba̱gingang ba tyong a̱ bai ni, na̱ kam a̱ka̱tuk tswa nu a̱ bvwo ka̱won ka di ba̱ryat ba ni, a̱ hywa da̱ nu, “Nwan wruk ka̱yat nka ba̱nyying ka i bu ryok brek ba da̱ nka ba!”
26A̱ka̱tuk tswa nu a̱ tyyi kun, a̱ jim ka̱won ka, a̱ ka̱ mak ka̱byen, a̱ si wruk. Ka̱won ka a̱ brek a̱ myyi di kom ni. Ba̱nyet ba̱gingang a̱ hywa, “Ka kwu.” 27Ma Yesu a̱ pyyem ka̱won ka mbvak a̱ ka̱ yrek, ka ta̱za a̱ sseng.
28Yesu na̱ bu drok a̱ nwa ka̱yat ka̱ryi, na̱won pfong nu na a̱ nwa ku zzim ka̱nrang. A̱ hywa, “A̱nzan a̱n byyi nying a̱ka̱tuk ntswa nu na̱ bun za kaat?”
29Yesu a̱ hywa da̱ mba, “Kyang yaan i shyi yi ni yya i nyying taka̱i nkyang a̱ni ba, se ba̱ a̱duwa.”
Yesu a̱ bo tyyei dikwu nu ti
(Matta 17:22-23; Luka 9:43b-45)
30Ba drok ka̱ yemi, a̱ bu hyok ka̱byen Galili. Yesu a̱ cat a̱yin a̱ bvwo ba, 31rot a̱ shyi i zzek na̱won pfong nu na. Na̱n shyi i ba̱ zzek a ni, a̱ hywa da̱ mba, “Ba ni wrak Ka̱won A̱neywu a mbvak ba̱nyet ba hywat. Ki ba yya nom ntat, ka ta̱za.”
32Mba di ba si wa hok kyang a na̱ ba̱ zzek i a̱ bvwong ba, ma ba pfong ka̱wun ku zzim ka.
A̱nyan a̱ yet a̱gba̱dang u?
(Matta 18:1-5; Luka 9:46-48)
33Ba bu tat Ka̱fa̱rna̱hum, a̱ nwa ka̱ryi, Yesu a̱ zzim na̱won pfong nu na, a̱ hywa, “A̱cecet a̱nzan yi bu cong ya a̱zi ryen ka?”
34Ba swat ba̱ nyong, rot ba yin cong a̱zi ryen ka a̱ ya a̱cecet tazwa a̱yin nu a̱ yet a̱gba̱dang ka̱yat mba ni. 35Yesu a̱ swrang, a̱ yei ba̱pfong ba ba̱sa̱rei mba, ba̱ mba swak bu ba̱hwa, a̱ hywa da̱ mba, “A̱yin nu a̱ cat yet a̱kwak ka̱son, se na̱ ya brek a̱ ba mi riryim a̱ yya kpikpit a dikwwa.” 36A̱ yei ka̱bawon a̱ sak a̱katyyi mba ka. A̱ tyyi bvak nu na a̱ ka̱ krum, a̱ si hywa da̱ mba, 37“A̱yin nu a̱ gwai ka̱bawon da̱ni di ka̱bankaa ni ni, i diyrek nzuk, nzuk a̱mi na̱ gwai; ba nzuk ba̱ diyin ba, a̱ bo gwai a̱tuba nu a̱ n tom i.”
A̱yin nu a̱ yya dira̱ndwan ba̱ njit i ba, a̱ shyi ba̱ njit
(Luka 9:49-50)
38Yohana a̱ hywa da̱ nu, “Malam, zi bu shya a̱yanyet na̱ trung a̱ka̱tuk tswa i diyrek nwan, zi ku tyei na̱ ryok rot a̱ shyi ba̱ njit ba.”
39Yesu a̱ hywa, “Ku myyim yin ku bvwo ba, rot a̱yin nu a̱ yya kyang ka̱yat diyrek nzuk ni a̱ ni maai brak bu i ka̱baram a̱ n dyat a̱ka̱tuk ba̱ryat ba. 40Rot a̱yin nu a̱ yya dira̱ndwan ba̱ njit i ba, a̱ shyi ba̱ njit. 41Yi ryok bring ba, ba̱ a̱yin nu a̱ ya nang ba̱shekwot sswa rot yi yet ba̱nying Kristi ni, a̱ ni san zang nu.”
Digrap
(Matta 18:6-9; Luka 17:1-2)
42“A̱yin nu a̱ ma̱n tyyi ka̱bawon kani ka wwon n tssup a ni, ku ku ran ba ku ryak naan a̱ ku yrik a̱ ta i kei. 43Ki bvak nwan ni na̱ tyyi digrap, kpo tyet jing. Ku ran a nwa bu bvak yring Ka̱ryi Ka̱za di a nwa bu mbvak nhwa ka̱yat ndong. Rong a di ku byyi rryik ni ba. [ 44Ka̱ yemi ‘ba̱ma̱njyit mba ba a̱ kwi ba, di rong a ku byyi rryik ba.’] 45Ka ma̱n dyi tak nwan ku ni na̱ tyyi digrap, kpo tyet jing. Ku ran a nwa Ka̱ryi Ka̱za bu tak yring di a nwa ka̱yat ndong ba̱ a̱tak a̱hwa. [ 46Ka̱ yemi ‘ba̱ma̱njyit mba ba a̱ kwi ba, di rong a ku byyi rryik ba.’] 47Ki dissi nwan ma̱ ni tyyi a jik zan, ta̱ tun jing, nwa Dityok Ka̱za bu dissi ti yring ku ran nwa ka̱yat ndong ba̱ a̱ssi a̱hwa. 48Ka̱ yemi ‘ba̱ma̱njyit mba ba a̱ kwi ba, di rong a ku byyi rryik ba.’
49“Ba ni jyi koyan di rong da̱ni ba nan jyi kyangya di ntwak i. 50Ntwak yet ka̱sham ba̱t. Ma ki na tyyi kpyap, na bu byyi kpungtun ba. Yi byyi ntwak a ndya nyin, i swat ansham bu ba̱yaan.”

ទើបបានជ្រើសរើសហើយ៖

Markut 9: kaj

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល