Mateus 25
25
Omasanekero wovasuko omurongo
1 #
Lk 12:35
“Momayuva ngo ouhona womayuru mau sana novasuko omurongo mba toorere omamunine wawo nave katjakanena omuvareke. 2Vetano vawo va ri omayova, nu vetano va ri ovanazondunge. 3Imba omayova va toorere omamunine nokuhinomaze pehi. 4Nu imba ovanazondunge va twaerera ovitjuma mbye urire nomaze womamunine. 5Ingwi omuvareke wa womba okuya, novasuko opu va utira okukoṱura nave rara ozomboṱu.
6“Nu mokati kouṱuku kwa zuvakere omaravaerero nga tjere: ‘omuvareke eye ngo weya, twendeye mu kemutjakanene!’ 7Ovasuko imba omurongo arire tji va penduka nave ṱunu omamunine wawo. 8Okuzambo imba omayova ave tja ku imba ovanazondunge: ‘Tu pewee ko komaze weṋu womamunine, omamunine wetu tjinga amaye zemi.’ 9Imba ovanazondunge ave ziri ave tja: ‘Kako! Katu nomaze nga yenene ku eṱe na eṋe. Kerirandereye oveni omaze womamunine kondjuwo yomarandisiro.’ 10Ovasuko imba omayova arire tji va karanda omaze womamunine, nu ngunda ava i ingwi omuvareke eya. Ovasuko imba vetano, mba vazewa ave rirongere va hita puna ye komukandi worukupo, nomuvero au patwa.
11 #
Lk 13:25
“Kombunda ovasuko imba ovakwao arire tji va kotoka nave isana ave tja: ‘Muhona, muhona, tu patururira!’ 12Omuvareke a ziri a tja: ‘Tjiri, me mu raere: Ami hi mu i.’ ”
13Nu Jesus wa mana okuhungira a tja: “Mamu sokukara katumba, tjinga amu hi nokutjiwa indi eyuva na indji oiri oviṋa mbi tji mavi tjitwa.
Omasanekero wovakarere vetatu
(Lk 19:11-27)
14 #
Lk 19:11-27
“Momayuva ngo ouhona womayuru mau sana nomundu ngwa vangere okukara nouyenda; eye wa isanene ovakarere ve ne ve pe otjiungura tjokuṱakamisa ouini we. 15Eye wa yandja ku auhe otja puma sora: Ku umwe wa yandja ko ovimariva ovisilveri omayovi yetano, komukwao a yandja ko omayovi yevari, nu ku ingwi outjatatu a yandja ko eyovi rimwe. Tjazumba arire tja i mouyenda. 16Omukarere ngwi ngwa perwe ovimariva ovisilveri omayovi yetano wa kaungura na vyo tjimanga, na rire tja munine po ovimariva ovikwao omayovi yetano. 17Momuhingo tjingewo omukarere ngwi ngwa perwe omayovi yevari wa munina po omayovi yevari. 18Nungwari omukarere ngwi ngwa perwe ovimariva ovisilveri eyovi rimwe wa kasa otjitoto na kahoreka mo ovimariva vyomuhona we.
19“Kombunda yoruveze orure omuhona wovakarere mba wa kotoka na vara ovivaro vyovimariva puna wo. 20Omukarere ngwi ngwa perwe ovimariva ovisilveri omayovi yetano wa hitire na yandja imbi ovikwao omayovi yetano ama tja: ‘Muhona, povimariva mbi ovisilveri omayovi yetano mbi we ndji pere, tara, ami mba munina po ovikwao omayovi yetano.’ 21Omuhona we arire tja tja: ‘Osemba, oove omukarere omuwa nomuṱakame. Ove tjinga awa ṱakama nouṋa ouṱiṱi, otjinga ame ku ziki kombanda yovingi. Hita nu u nyande puna ami!’
22“Okuzambo omukarere ngwi ngwa perwe ovimariva ovisilveri omayovi yevari arire tja hiti na tja: ‘Muhona, povimariva mbi ovisilveri omayovi yevari mbi we ndji pere, tara, ami mba munina po ovikwao omayovi yevari.’ 23Omuhona we a tja: ‘Osemba, oove omukarere omuwa nomuṱakame. Ove tjinga awa ṱakama mouṋa ouṱiṱi, otjinga ame ku ziki kombanda yovingi. Hita nu u nyande puna ami!’
24“Tjazumba omukarere ngwi ngwa perwe ovimariva ovisilveri eyovi rimwe arire tja hiti na tja: ‘Muhona, ami me tjiwa kutja oove omurumendu omukukutu; ove u konda pu u ha kunine, nu u wonga pu u ha handjaurire ozondwi. 25Ami ee tira, nopu mba zokukahoreka ovimariva vyoye mehi. Tara, imbi ovyoye ovyo mbi.’
26“Omuhona we a tja: ‘Oove omukarere omuvi nomunatjirweyo! Ove mo tjiwa, kutja hi kondo poṋa pu mbi ha kunine, nokutja hi wongo pu mbi ha handjaurire ozondwi! 27Ove wa sere okupwika ovimariva vyandje mondjuwo yomapwikiro wavyo, nami tji mba kotoka e munine po avihe puna otjimariva otjitjoziwa. 28Nambano mu yekeye imbi ovimariva mbye na vyo nu mu vi yandje ku ingwi ngu nomayovi omurongo. 29#Mt 13:12; Mk 4:25; Lk 8:18Orondu ingwi ngu notjiṋa ma wezirwako komeho na kara novingi okukapita pupaenene, nungwari ingwi ngu hi notjiṋa ma yekwa nangarire ihi otjiṱiṱi tje na tjo. 30#Mt 8:12; 22:13; Lk 13:28Nu ingwi omukarere otjiporoporo ngwi mu nakaurireye pendje monḓorera ṱukuṱuku. Oku maku kakara omaririro nomakweyero womayo.’
Ombanguriro osenina
31 #
Mt 16:27
Mt 19:28
“Omuna wOmundu tji meya otja ombara puna ovaengeri ve avehe, eye ma kara pehi kotjihavero tje tjouhona. 32Noviwaṋa avihe mavi woronganene pu ye komurungu we. Tjazumba eye e vi haṋa movimbumba vivari tjimuna omurise tje haṋa ozonḓu kozongombo. 33Eye ma kuramisa ozonḓu kokunene kwe nu inḓa ozongombo kokumuho kwe. 34Okuzambo indji Ombara mai tja ku imba mbe ri kokunene kwayo: ‘Indjeye, vanandaya va Tate! Indjeye mu rumate ouhona mbwa ṱuninwa eṋe okuza kombutiro youye, 35orondu ami mba ṱire ondjara namu ndji pe ovikurya, mba ṱire onyota namu ndji pe omeva, mba ri owozonganda namu ndji sekirisa; 36mba ri muzu namu ndji pe ozombanda, mba verere namu yekundjitara, nu mba ri motjovakamburwa namu yekundjivarura.’
37“Imba ovasemba mave mu ziri ave tja: ‘Muhona, twe ku munine ruṋe au nondjara natu ku kutisa poo au nonyota natu ku kovisa? 38Nu twe ku munine ruṋe au ri wozonganda natu ku sekirisa poo muzu natu ku pe ozombanda? 39Twe ku munine ruṋe awa vera nau ri motjovakamburwa natu kekuvarura?’ 40Ombara mai ziri ai tja: ‘Tjiri, me mu raere, atjihe tji mwa tjitira umwe wovangu vandje ovaṱiṱi mba, mwe tji tjitira ami?’
41“Okuzambo otji mai tja ku imba mbe ri kokumuho kwayo: ‘Zapweye pu ami, eṋe mbu mwa sengwa i Ndjambi! Twendeye komuriro waaruhe mbu ha zemi, nu mbwa ṱuninwa Satan novaengeri ve! 42Orondu ami mba ṱire ondjara, nungwari kamu ndji pere ovikurya, mba ṱire onyota, nu kamu ndji pere omeva, 43mba ri owozonganda, nungwari kamu ndji sekirisire, mba ri muzu nu kamu ndji pere ozombanda; mba verere nu mba ri motjovakamburwa, nungwari kamu kendjitarere.’
44“Nowo mave mu ziri ave tja: ‘Muhona, twe ku munine ruṋe au nondjara poo au nonyota poo au ri owozonganda poo au ri muzu poo awa vera poo au ri motjovakamburwa natu he ku vatere?’ 45Nombara mai ziri ai tja: ‘Tjiri, me mu raere, aruhe tjiyamu panḓa okuvatera umwe wovangu vandje ouṱiṱi mba, iyamu panḓa okuvatera ami.’ 46#Dan 12:2Nowo mave hindwa komberero yaaruhe, nungwari imba ovasemba mave i komuinyo waaruhe.”
ទើបបានជ្រើសរើសហើយ៖
Mateus 25: HRR-UNI
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Herero Revision Bible © Bible Society in Namibia, 2021.
