Mark 12
12
1Naŋ ni me qeteg vavava muneira mun o vavae tenegag ŋaŋ wa si, O tanun me riv mona o tuqe vine, wa me tiŋgoro mun o geara, wa me nur o qarana ape varavara, wa me taur o salo ima, wa me maukeg galtag mun o tuan mawmawuitag, wa me mule te vanua. 2Naŋ alo tau ni me suware o tuara rowrowovag munra mawmawuitag, sin lav nanra mawmawuitag o tuan woai tape tuqe vine. 3Pa neira me tauria me towosia, me suware savrag mamasa kelua. 4Wa mulaŋ ni me suware at muneira o rowrowovag we sea; pa neira me patuŋia mun o vat, wa me pura wora naqatuna, me ge tagtageagia wa me suware savragia. 5Wa mulaŋ ni me suware at o tuara; pa neira me vus mateia. Wa we qoqo mulaŋ, pa me towos o tuaniu, wa me vus mate o tuaniu. 6Wa o manigiu o ine, wa natuna o wotuwale amaia o meratape, wa ni me suware at mulaŋ ineia surira o paspasoanai, we vet si, Naapera te maragai i natuk. 7Nava ira mawmawuitag ilone me varvava vires neira wa si, Iloke i lelesiu; sowo, nina ge mateia, wa te taur o vanua usurag mun vanuanina. 8Wa neira me tauria, me vus mateia, wa me virgag luea nan o tuqe vine. 9Pa o tag tuqei ilone te ge o sava apena? Ni te kel ma, te ge tagea ran ira mawmawuitag ilone, wa ni te maukeg o tuqe vine munrasei we sea. 10Wa kamiu gate vasogo tiqa o raverave iloke si;
O vat ira tautaur ima me ge vitag ti,
Me ge ilone mun qat vat tape sigrai:
11Amon i Lord iloke,
Wa o vasasa alo matanina?
12Naŋ neira me sike si a taur varagetia, pa we gogolo o sul: ape neira me gilala si ni me vava o vavae tenegag iloke ape neira; pa neira me ukegia, me kel at.
13Naŋ neira we suware ma suria o tuan Pharise tara tuan ragai nanra Herod, si neira a puea alo non o vavae. 14Wa neira we mule ma we vava munia wa, Vatogo, kamam we gilala si iniko we nun, wa si ko gate nom mava apensei; ape ko gate iloilo o nago tanun ŋaŋ, nava ko we vatvatogo ape matesalan God mun o liŋe nun. Pa we tira ape lea si a vile sargag o som mun i Kaisar, si tagai? Nina vile, si nipea we vile? 15Pa ni me lolomaran mona ape nor o liŋe sokoi goro, we vava muneira wa, Ape sava kamiu we gale ilo nau? La ma o pene si na ilo mok. 16Naŋ neira me la ma. Wa ni we varusira wa, Anonsei o totogale iloke wa o raverave apena? Naŋ neira wa si, Anon i Kaisar. 17Wa i Jesus me valui goro we vet muneira wa, Tur ukeg vano mun i Kaisar o gene ŋaŋ anon i Kaisar, wa mun God o gene ŋaŋ non God. Naŋ neira me mamakei ape neia.
18Naŋ ira Saduke we mule ma suria, irasei nane we leasag si o tavaraka kel tagai; wa neira me varusia, we vava si, 19Vatogo, i Moses me rave munina wa, Si tasinsei qe mate, wa sin qe matevtag i rasoana, pa sin qe tete matevtag o nanatui, si i tasina ni lav rasoana wa ni vawota o nanatui mun tasina. 20Pa o retatasiu pul lavearua; wa o moai me lav mona o tavine, wa me mate pa gate matevtag o natui. 21Naŋ o varuei me lavia, pa me mate; wa ineia mulaŋ gate matevtag o natui; wa o vatoliu tamaine. 22Wa ineira pul lavearua me lavia, pa gate matevtag ilo o nanatui. Naŋ ape kulara nol o tavine mulaŋ me mate vunvun mona. 23Pa si me tamaine, alo tavaraka kel, alo neira te tavaraka kel aŋaisa, o tavine te rasoansei nan neira? ape neira pul lavearua me lavia mun rasoara. 24Naŋ i Jesus me valui gorora, we vava muneira wa, Pa kamiu gate ava ran ape ike, ape kamiu gate gilala o raverave ŋaŋ, wa o mana non God? 25O manigiu si alo te tavaraka kel nanra mate, gate laglag, wa gate togatoga amaira sei, nava we tama o angel ŋaŋ vawo tuka. 26Pa apenra mate mulaŋ si neira we tavaraka kel, kamiu gate vasogo tiqa alo raverave mon Moses, ape Tangae qarqaruga, si God me vava munia, we vet wa, Inau God Abraham, wa God Isaak, wa God Jakob? 27Ni gate God nora mate, nava God nora esuesu; wa ikamiu we ava aneane apena.
28Naŋ i tuara vatvatogo me niŋa ma, wa we roŋotagira we varsikesike, pa ni we gilala si ni me valui goro mantag neira, wa ni qara varusia wa si, O sava lea vatraŋ o moai alo lea nol? 29Naŋ i Jesus me valui goroa wa si, O moai alo lea vatraŋ nol iloke wa, Gai Israel, ka roŋotag; i Lord God inina i Lord tuwale wora. 30Wa ka tape i Lord God iniko mun natoqama nol, wa mun naatama nol, wa mun nom o nonomia nol, wa mun nom o tinegaro nol. Iloke o lea o moai nake. 31Wa o varuei iloke, Ka tape i tagvanuama tama iniko kel. Itagai mulaŋ o lea vatraŋ we liwoa nan iloke nirua. 32Naŋ i vatvatogo ilone me vet munia wa, Aia, Vatogo, ko me vava mun o liŋe nun, apen God i tuwale wora, wa i tagai mulaŋ o tuara pa ineia magesena. 33Wa si a tape ineia mun o toqai nol, wa mun o lolomaran nol, wa mun o atai nol, wa mun o tinegaro nol, wa si a tape i tagvanuansei tama ineia kel, iloke raka sage sal o val oloolo siŋsiŋ nol wa o val sale oloolo ŋaŋ. 34Naŋ i Jesus me ilo si ni me valui matanur, we vet munia wa, Iniko gate aras nan o marana non God. Wa paso nan isei gate nom mot tea si a varusia mulaŋ.
35Naŋ i Jesus me valui gorora me vava alo ni we vatvatogo alo vatine we roŋo si, Ira vatvatogo we gaganag gasei si i Christ i natun David? 36Apen i David me vava mona mun o Vui we Roŋo, si,
I Lord me vet mun i Lord inau wa si,
Ka pute alo matuak,
Nau gai map siwo nom o tavalalea ŋaŋ mun tano ververesag ape raŋoma.
37Pa alo ine i David we log mona ineia si Lord, pa ni te natuna gasei nia? Wa ineira we qoqo o sul me tiŋqoro malakalaka ineia.
38Naŋ ni me vava muneira alo non o liŋe vatvatogo si, Tur ilogoro kamiu nanra vatvatogo, ragai we maros we mulemule mun o siopa ŋaŋ we tole, wa si a wievavaera alo sare wolwol ŋaŋ, 39wa o moe tano putepute ŋaŋ alo ima siwo tuwale, wa o moe tano risarisa alo ganagana liwoa ŋaŋ. 40Wa neira we gana sopun naimara ro naro ŋaŋ, wa we tatataro maul o manig gale; wa neira nake te taur raka sage mora o lea veveg apena.
41Naŋ i Jesus me pute veta siwo we sar taniniga o tano som, wa we iloilo si o sul we saksakarag o som ilo tano som gasgasei. Wa ira meresom we qoqo me sakarag mora we qoqo. 42Nava o tavine tuwale o naro me niŋa ma, o masara, wa ni me sakarag o qatut som nirua, we sasarita ape takele pene. 43Naŋ ni me log ma suria ira tiŋqoro anana, ti vet muneira wa, We nun na we vava mun kamiu si, O naro iloke o masara me sakarag sal neira nol we saksakarag mora ilo tano som. 44Ape neira nol me sakarag nan napulara we ura sal; nava neia nan napulana gate sasarita amaia me sakarag mona o sava ŋaŋ amaia, o gene nol ni te esuesu apena.
ទើបបានជ្រើសរើសហើយ៖
Mark 12: MOTA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
New Testament was published by the British and Foreign Bible Society in 1931.