Elōg-Lóma 13
13
Ndag nyí li ógle lí ɓákanʼyɛ
1Joó nɛ mut a ógle ɓakanʼyɛ ékombo, átɔm nɛ́ joó nɛ ekanʼyɛ ɛ́g sɔ́le la Ɔlolómɛ̄. Ɔlolómɛ̄ ki nɛ́ a tɛ́ɛ́yɛ ɓakanʼyɛ bísɛ bí lɛ̄. 2Jɔ́ nɛ, nyɔ́ a ŋga a tɛ́ŋgánɛ ŋ̀kanʼyɛ, ag dɔ́gɓéne mbéndá Ɔlolómɛ̄ a tɛ́ɛ́yɛ. Ɓá bí ŋga ógle ɓé yɔ, bíg somle ɓɔ́-mɛ̄n ekɔ́ghɛ. 3Ákaa ɛ́sɛ, eceg mut ag ɓɔŋ m̀ɓɛɛŋ, a ŋgá nyɛɛ ɓé lí kɔn lí ɓakááhɛ woŋ. M̀ɓɔŋ-miɓé nɛ́ a ŋga kɔ̄n ɓɔ́ woŋ. Kíyáɓɛ́nɛ ɔg ŋgɔ́ somo ɓé li kɔn lí ɓakanʼyɛ woŋ, ɓɔŋ m̀ɓɛɛŋ la náŋ bíg kɛ wa lí lɔ́gle lí páh, 4átɔm nɛ́, likanʼyɛ lí lɛ́ á nsɔ́n á Ɔ́lolómɛ̄ ányúū li ɓɔŋhanɛ lí wā m̀ɓɛɛŋ. Ndí, kíyáɓɛ́nɛ ɔg ɓɔŋ aɓé, kɔ̄n hɔ́ ŋ̀kanʼyɛ woŋ. Átɔm nɛ́, ah ányúū yɛmɛ́ ɓé nɛ́ a byɛɛ́ ŋguu li kɔ́ghɛ. Eceg a ŋga kɔ́ghɛ, a lɛ á nsɔ́n á Ɔlolómɛ̄ á lí étɛ lí ɔ́ūn Ɔ́lolómɛ̄ a byɛɛ́ likɔlɓan la m̀ɓɔŋ-miɓé. 5Ányúū náŋ nɛ́ ɛ́ lɛ́ nsɛ́ŋ lí ógle lí ɓákanʼyɛ, ah ányúū li nāŋga lí ɔ́ūn ví Ɔlolómɛ̄ m̀bíí jɔ́-ntámɛ́ ɓé, ndí ányúū nɛ́ cíŋ-m̀mím yāhá yɔg ɛg laga ɓɛ́hɛ náŋ. 6Ányúū náŋ ki nɛ miní ŋgá sála táas. Ɓabyee nyúŋ nsɔ́n, Ɔlolómɛ̄ nɛ a tɛ́ɛ́yɛ́ ɓɔ nɛ́ bí nyɔŋ eceg á lí sál lí wɔ̄. 7Tíán ŋ̀kanʼyɛ sig yé ɛ́ ŋga sōmlɛ nɛ́ miní tí nyɛ́. Miní sálá táas á yóg nyɔ́ mut a ŋga lɛ́gle yɔ, miní sálá bíkondo mbéndá ya tɛ́ɛ́yɛ kí mut a búú yɔ á yóg nyɔ́ a ŋga lɛ́gle yɔ́. Miní óglé ɓá miní ŋga nyɛ́ɛ li ógle, miní dítɛ̄ ɓá miní ŋga nyɛ́ɛ li ditɛ. Sáálán mut sig yé miní byɛ́ɛ̄ nyɛ́ kaa epíl.
Ediŋ linyaŋ la liɓɛ́ɛg lí pɛɛ lí kílīstɛn
8Mut tɔ wa ah ɓɛ́ɛ́gla ɓé épīl étām tɔ yá, amáh sig épīl yé lí diŋan ɓá la ɓáŋá, átɔm nɛ́, nyɔ́ a ŋga diŋ mɔɔ́nɛ́sāŋ, a óglé mbéndá ɛsɛ̄ nɛ́ ɓam. 9Ákaa ɛsɛ̄, mbéndá ɛ byɛ́ɛ́ mí mitiŋ nɛ́: «Ɔh kɛnɛ́g ɓé á ndeŋg, ɔh ólóg ɓé, ɔh yíí ɓé, ɔh támág ɓé jam lí mut», mí la míŋí mítiŋ mí mbéndá mísɛ, má byáŋɓɛ́ mú á yé eɓaŋgá nɛ́: «Dīŋ mɔɔ́nɛ́sɔ̄ŋ ákaa wā-mɛ̄n.» 10Kí ɔg diŋ mɔɔ́nɛ́sɔ̄ŋ, aɓé ɓé nyúŋ ɔ ŋgɔ ɓɔŋ nyɛ́. La náŋ, li diŋ lí lɛ́ ja lí ógle lí mbéndá ɛsɛ̄ nɛ́ ɓam. 11Ákaa miní ŋga yí yɔɔ́yɔ́ɔ eceg bi byɛɛ́, eceg yé nɛ́ miní vɛɛɓé á ɔ́lɔ̄. Nyí vɔ́ŋɔ́ɔ, lisuŋga lá sīŋglé ɓɛ́ɓɛ ɓɛɓɛ la ɓɛ́hɛ li loo lí á éceg bi ɓōtléé lí yéɓe la Kilístus. 12Díɓe la kɛ, kítí ɛ lɛ ɓɛ́ɓɛ. Bi cóó hɔ́ mísɔ̄n mí lívito, bi nyɔ̄ŋ bidulé-bí-wélan bí bi ŋga ɓɔ̄ŋle á mípūū. 13Bi nīŋ kaa ɛ́ ŋga sōmlɛ á nyaa nyí ɛ lɛ́ m̀ɓɛɛŋ nyí ɛ ŋga ɛ́ni á ŋkam á nzámuh, ɛ́h ɓɛ́ ɓé éōt-lídī tɔ yé mílɔg, ɛ́h ɓɛ́ ɓé lí ūgan tɔɔ́ nɛ̄-láá, tɔ eniŋ yé mpuŋgú, ɛ́h ɓɛ́ ɓé mómo tɔ nzoŋ. 14Ndí nyɔŋán miɓɔŋɔg mí péná Nyɔ́ŋ-Ɛsáŋɛ́ Yésus Kilístus a ŋga tíi, miní jálɓán mɔ́. Miníh loɛ́gɛ́ pɛ eceg á lí ɔ́ŋɔ li mam miɓé mí nyúū yāná ɛ ŋga óm ɓɛ́nɛ li ɓɔŋ, la ɓɛ́nɛ somo mɔ li yáhɛ.
ទើបបានជ្រើសរើសហើយ៖
Elōg-Lóma 13: NTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, CABTAL
