Misɔ́n mí Ɓáōmɓɛ 4
4
Pétlos la Yohánɛs ɔ́sū ví ɔ́ku-vicɛ́ŋ-ví-bíkāāhɛ́nɛ́
1Kasig Pétlos la Yohánɛs bí ɓɛ́ɛ́ bí ŋgí máŋlɛgɛ lilóm, ɓatíi-nsúlé, ŋ̀kanʼyɛ ɓatát ndáá-ēcɛ́ŋ-Ɔlolómɛ̄ la ɓot bí Sadúkái bú sīŋglé ɓɔ á ŋgwáāg. 2Bí ɓɛ́ɛ́ ŋ̀ályag ŋgandag li ɛ́n lí ɓɔ nɛ́ bíg yéglɛ lilóm, la li lɛgɛ nɛ́, ákaa Yésus, ɓot ɓá wú bíg la li pahye. 3Bú byelhánɛ́ ɓɔ, bú vá ɓɔ á ndáá-m̀ɓog tɛɛla ɔlɔ́ ví ŋgí oŋ víŋ, átɔm nɛ́ díɓe lí ɓɛ́ɛ́ lú vín. 4Á átē a ɓa-ámble nyíŋ Pɔ́l, ŋgandag yú yáan ɓáyēɓe Ɔlolómɛ̄, bí ɓɛ́ɛ́ jam-kaa akóó á ɓot átáan.
5Ɔlɔ́ ví ŋgí oŋ víŋ nɛ́ ɓakanʼyɛ bí Élōg-Yúda, ɓacɛ́ŋ bí lílōmɛ la ɓayí-mbéndá bí ɓɛ́ɛ́ á Yélūsalɛm bí kɔ̄táán. 6Háne ŋ̀kanʼyɛ ǹcɛ́ŋ a ɓatíi-nsúlé, Kaífa, Yohánɛs, Alegsándēle la ɓáŋá ɓot bí mímbiya mí ɓákanʼyɛ ɓacɛ́ŋ bí ɓátíi-nsúlé ɓɔ́g bí ɓɛ́ɛ́ múŋ. 7Bú lāgá nɛ bí sɔ́la ɓɔ́ Pétlos la Yohánɛs ɔ́sū váɓá, la ɓɔ́ bú ɓōtlé ɓɔ li bihi nɛ́: «Ɓaá, la yɔɔ́yɔ́ɔ ŋguu tɔ nɛ́ á joó lí nzáá maná ɓɔŋ míŋ mam é?» 8Ŋyálāg la M̀búl Mpúán, Pétlos ɔ yó ɓɔ nɛ́: 9«Á ɓákanʼyɛ bí Élōg-Yúda la ɓacɛ́ŋ bí lílōmɛ, ányúū m̀ɓɛɛŋ ɓaá ɓɔŋlé éɓōg-mut, nyí lɛn, bíg kááhɛ ɓɛ́hɛ nɛ́ bi lágá láá ɓaá ɓɔŋ ndí bu tɔ́ɔyɛ́ nyɛ mbólí! 10Á lílōm lí Íslāɛl lísɛ la ɓáŋá bísɛ, yíán hɔ́ nɛ́, á joó lí Yésus Kilístus nyɔ́ a Názalɛt, nyɔ́ maná tomó á mbásá ndí Ɔlolómɛ̄ ɔ pāhyɛ́ nyɛ, la ŋguu yɛɛ́ nɛ nyɔ́ mut a tɛ́ɛ́ vá ɔ́sū váná a tɔ́ɔ̄ mbólí. 11Nyɔ́ŋ Yésus nɛ́ a lɛ ŋgɔg nyí, ɓɛ́nɛ ɓaóŋ ndáá maná ɓen, yɔ nɛ́ ya tímān lí ɓɛ́gɛ lí ndáá. 12Lisuŋga tɔ já lí ŋgá sɔ́le ɓé voóm ntám amáh sig la nyɛ́, átɔm nɛ́, mú á sí vaŋgá, Ɔlolómɛ̄ āh tíi ɓé ɓot-bí-bínam joó lítām tɔ já lí ŋga sɔ́la ɓɛ́hɛ lisuŋga.» 13Ɓɔ́ bísɛ bú nyág nɛ Pétlos la Yohánɛs bíg kwɛlɛ ɓɔ́ ɛ́h ɓɛ́ ɓé woŋ tɔ wá, la ki nɛ́, á líɛ̄nɛg jáɓá, byɛmɛ́ bí ɓot byáh kɛ ɓé á ésukúlu bíŋ. Ndí bú lēm nɛ, ɓɔ́ nɛ́ bí ŋgí wɛɛ elɔŋ la Yésus. 14Bí ŋgí légɓe nyɔ́ mut Pétlos la Yohánɛs ɓá tɔ́ɔyɛ́ mbólí a tɛ́ɛ́ ɓɔ́ á ŋgwáāg, la náŋ bí ŋgí yí ɓé pɛ jam bí ɓɔŋ.
15Jɔ́ nɛ́ bí tíéé kúndɛ nɛ́ bí pámɛ́ ɓɔ́ á ndáá nyí ɔku-vicɛ́ŋ-ví-bíkāāhɛ́nɛ́, nɛ́ ndí bí mɔg á lí ɓɔŋ nɛ́ bí tí mbag-ŋkál yāɓá. 16Ámbúh náŋ, bú ɓōtlé lí ɓatan nɛ́: «Láá ɓaá nyɛ́ɛ lí ɓɔŋ la ɓá ɓot é? Ákaa ɛ́sɛ, náŋ a lɛ mbálɛ, ɓɔ́ nɛ́ ɓá ɓɔ̄ŋ jam lí mínyāká, náŋ a ɛ́ni á miíh mí ɓot bí Yélūsalɛm bísɛ, bi ŋgá la ɓé ɓɛ́hɛ li táŋ náŋ. 17Ndí tɔ náŋ, ɛ́g ɓat nɛ́ bi céŋɛ́ nyíŋ pɔ́l, nɛ́ ɛh camkágán ɓé pɛ á átē a lilómɛ, la náŋ, biíg oŋhan la ɓɔ́ nɛ́ bíh símhánɛ́gɛ́ ɓé pɛ jéŋ joó ɔ́sū ví mut tɔ wa.» 18Váŋ nɛ̄ ɓá óm hɔ́ nɛ bí yáŋá Pétlos la Yohánɛs, bú tɛ́ɛ́ ɓɔ mbéndá nɛ m̀ɓá-mɓá bíh símhánɛ́gɛ́ ɓé pɛ tɔ li yéglɛ lí jóō lí Yésus. 19Ndí Pétlos la Yohánɛs bú tímānɛ̄ ɓɔ nɛ́: «Súghánɛ ɓɛ́nɛ-mɛ̄n. Ɓaá, yéé ɛ́ lɛ́ m̀ɓɛɛŋ á miíh mí Ɔ́lolómɛ̄: li ógle lí ɓɛ́nɛ tɔ nɛ́ li ógle lí nyɛ é? 20Tɔ yá ɓɛ́ ja láá, bi sē ɓé nɛ ɓa pún lí laga lí yé ɓaá ɛ́n la yé ɓaá ámble.» 21Ɛnɛ́ ɓá kondyé sīg-pɛ lí oŋhan la ɓɔ́, bú mwahɛ́ ɓɔ, kaa bíh kúhúu ɓé njɔm tɔ ya nyí li kɔ́ghɛ lí ɓɔ. Ányúū lilómɛ nɛ́ bí mwahɛ́ɛ́ ɓɔ́, átɔm nɛ́ ɓot bísɛ bí ŋgí ɓégɛ Ɔlolómɛ̄ á yé yá loo. 22La mbálɛ, nyɔ́ mut a tɔɓéé mbólí á ŋguu minyáká a ŋgí loo muúmínáa mí mímbú mí líbyáa.
Nlɔŋ á ɓáyēɓe ásɛ ág níŋgi á míkánɛ
23Ɛnɛ́ ɓá mwahɛ́ Pétlos la Yohánɛs, ɓɔ́ bíɓáa bú kɛ lí kɔ́p lí ɓot bí elɔŋ yáɓá, bú máŋlɛ́ ɓɔ yé ɛ́sɛ ɓakanʼyɛ ɓacɛ́ŋ bí ɓátíi-nsúlé la ɓacɛ́ŋ bí lílōmɛ ɓá lagá ɓɔ. 24Ɛnɛ́ ɓáŋ ɓá ámblé nyíŋ pɔ́l, ɓɔ́ bísɛ kaa mut wa, bu níŋgí á míkánɛ, li laga lí Ɔ́lolómɛ̄ nɛ: «Á Ɛ́tāŋɛ, wa nɛ́ wa vēg sí, lóō, túwɛ la biveglé byáɓá bísɛ, 25wa nɛ́, li kele la M̀búl Mpúán, wa vá etāa wahá Dávid m̀ɓɔŋle wɔɔ bí biɓaŋgá á ányu nɛ́:
‹Ányúū yéé mpóghānɛ́ a lɛ á até á bikombo,
ányúū yéé milóm mí ŋga veg byɛmɛ́ bí peg é?
26Káísa yí ŋkɔŋ-á-sí yá ámblan
ɓakanʼyɛ ki bú byáŋ élɔŋ
á lí tɛ́ŋgánɛ lí Nyɔ́ŋ-Ɛsáŋɛ́ la ɛwɛɛ́ nyɔ́ a pɔ́hɔ›.
27Kɔɔ la mbálɛ, Elóde la Pɔ́nsio Piláto, bikombo la milóm mí Íslāɛl ɓá kómān á nyí tísɔn, nɛ́ bí tɛ́ŋgánɛ Yésus, m̀ɓɔŋle wɔɔ mpúán nyɔ́ ɔ pɔhléé. 28La náŋ, ɓá yáhɛ́ mam mísɛ ɔ ɓoŋháán ɔ́sū ví éceg la ŋguu wɔ wɔ́ɔ, mam ɔ tɛ́ɛ́yɛ́ɛ kaa nsom wɔ́ɔ. 29Nyí vɔ́ŋɔ́ɔ hɔ́ Ɛtáŋɛ, lɛ́g aɔ́ɔ́ ɔ ámblé kaa bí ŋga ōŋhan la ɓɛ́hɛ, ɔ yéɓé ki nɛ́ ɓaɓɔŋle ɓɔ́ɔ bí lɛ̄gɛ́ Eɓaŋgá yɔ́ɔ ɛ́h ɓɛ́ ɓé woŋ tɔ wá. 30Sámbá hɔ́ wɔ wɔ́ɔ á lí somo nɛ́ ɓot bí kuh mbólí-nyuú, nɛ́ ndembye-ɛ́-mam la binanaŋga bí mam bí ɓɔ̄ŋɓɛ́ɛ á joó lí Yésus, m̀ɓɔŋle wɔɔ mpúán.» 31Ɛnɛ́ ɓá manɛ́ míkánɛ, ndáá nyí bí ɓɛ́ɛ́ bí kɔtánɛ yu póghan. Ɓɔ́ bísɛ bú yál la M̀búl Mpúán, bú ɓōtlé lí lɛgɛ lí Eɓaŋgá Ɔ́lolómɛ̄ ɛ́h ɓɛ́ ɓé woŋ tɔ wá.
Li kaan lí míɓɛɛŋ, ɔvega ví Balnábas
32Ɔbul ví ɓot ví yaán ɓáyēɓe Ɔlolómɛ̄, vú ɓɛ́la m̀mím wá, miɔ́ŋɔ má, mut tɔ wa á póla yaɓá a ŋgí naŋɛ ɓé pɛ yé a byɛ́ɛ̄ ányúū yɛ́ɛ̄ nyɛ́-ntámɛ́, á mveŋghanɛ́, bí ŋgí byáŋ míɓɛɛŋ máɓá mísɛ voóm wa. 33La ŋguu ecɛ́ŋ nɛ́ ɓaómɓɛ bí ŋgí tíi mbóŋ lipahye lí Nyɔ́ŋ-Ɛsáŋɛ́ Yésus, Ɔlolómɛ̄ ki ɔ yáhɛ́ ɓɔ́ bísɛ la ndómbo yɛ́ɛ̄. 34Mut tɔ wa á póla yaɓá a ŋgí yɛ́ɛ́ ɓé jam. Ákaa ɛ́sɛ, ɓá bí ɓɛ́ɛ́la sí tɔ milɛ́ɛ́ bí ŋgí nuŋu byɔ́, ɓá sɔ́la mɔní mí nyuŋgá yaɓá, 35ɓá ɓémbé mɔ̄ á míkoo mí ɓáōmɓɛ. Mut sig a ŋgí kuh joga múŋ li oŋle la yé ɛ́ ŋga sōmlɛ nyɛ́. 36Náŋ nɛ́ Yósɛp nyɔ́ a ɓɛ́ɛ́la ǹdíí a ɓɔŋɔ́ɔ́. Nyɛ́ nɛ́ ɓaómɓɛ bí tíéé ŋgól nɛ Balnábas, náŋ ag mínɛ nɛ́ ǹtíi-mikúndá, a ɓɛ́ɛ́ mɔɔ́n Élōg-Lévi á ŋkɔŋ nyú á lɛ́ á éon yé Kípele. 37A nuŋléé ǹdíí wɛ́ɛ́, ɔ sɔ́la nyúŋ ŋkuh á nyuŋgá, la nyɛ́ ɔ ɓémbé wɔ á míkoo mí ɓáōmɓɛ.
ទើបបានជ្រើសរើសហើយ៖
Misɔ́n mí Ɓáōmɓɛ 4: NTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, CABTAL
