Misɔ́n mí Ɓáōmɓɛ 27
27
Mikɛ mí Póol á Lóma
1Eceg bisúghɛ́nɛ́ bí nyɔŋɓɛ́ɛ nɛ́ biíg kɛ á Itália, bú nyɔ̄ŋ Póol la ɓot-bí-míɓog ɓatám, bú vá ɓɔ́ á sí bitátlé bí Yúlius, ŋ̀kanʼyɛ nlɔŋ á eɓógo ɛ́ sónja, nyɔ́ a ɓɛ́ɛ́ sónja ya átē a livuŋ lí sónja yí Ogústo. 2Bu ɓét hɔ́ á kūŋgá á tísɔn Adalamítium, nyí á ŋga kɛ á sáwá yí Ásia. Alistálke mɔɔ́n Masedónia á Tesaloníka a ɓɛ́ɛ́ elɔŋ la ɓɛ́hɛ. 3Á ɔlɔ́ ví ŋgí oŋ víŋ, bu cág yágá á Sídon, kasig Yúlius a ŋgí táthan la Póol, ɔ mwahɛ́ yágá nyɛ nɛ́ a kɛ́ a ɛ́n miwándá mɛ́ɛ́ nɛ́ mí óŋgánɛ nyɛ́. 4Li ɓógo váŋ, bu nyɔ̄ŋ sīg-pɛ edúga ɛ́ túwɛ, ndí kaa ŋgɔá ɛ ŋgí tɛ́ŋgánɛ ɓɛ́hɛ, bu kēlé á yéŋé épah yé éon yé Kípele. 5Bu yáɓe túwɛ nyɔ́ a ŋgí loole á ŋgwáāg epah ékombo yé Silísia la yé Pamfília la ɓɛ́hɛ bu cág á tísɔn Míle á épah-ékombo yé Lísia. 6Wóŋ á Míle, kasig Yúlius ŋ̀kanʼyɛ a nlɔŋ á eɓógo ɛ́ sónja a kɔ́pɔ́ɔ́ kūŋgá nyí tísɔn Alegsandēlíya nyí ɛ ŋgí kɛ á Itália, bu ɓét múŋ. 7Edúga yáhá yú wú ŋguu ányúū puh alɔ́. La ŋgandag esɔghe nɛ́ ɓaá loo tísɔn Sinidéa. Ákaa ŋgɔá ɛ ŋgí bíŋhánɛ ɓɛ́hɛ edúga, bu loolé á éon yé Keléta, jé lí ɔ́sɔ́ŋga ví sí bí ŋga yáŋa nɛ́ Salmónɛ. 8La ŋgandag ndutu nɛ́ ɓaá lóō víŋ ɔsɔ́ŋga ví sí, la ɓɛ́hɛ bú pám á voóm wa bí ŋga yáŋa nɛ́ Miɓóŋ-Mílāām, ɓɛɓɛ la tísɔn nyí Lasáya.
9Bu lóɛ puh eceg váŋ, túwɛ ɔ ɓéé, edúga yú kɔnhán woŋ. Ákaa eceg yé étɔɔ-nzal ɛ́ ɓɛ́ɛ́ nlolóog, Póol ɔ sómo lí tíi lí éɔ̄ŋɔ yɛ́ɛ́, aá la ɓɔ́ nɛ́: 10«Á míwāndá máma, mag ɛ́n nɛ yé edúga ɛ́g ɓɛ́ ɓɛ́hɛ eɓé, nyú kúŋgā la yí mbɛgɛ bíg kɛ li ɓɔ́lan, kí ɓāh tát ɓé ki, ɓɛ́hɛ-mɛ̄n biíg la lí jáŋɛ lí éniŋ yáhá.» 11Yúlius ŋ̀kanʼyɛ nlɔŋ á eɓógo ɛ́ sónja a ɓɛ́ɛ́la mipitá ŋgandag la ŋ̀kanʼyɛ kuŋgá la ǹdúg yɔ̄ li loo lí biyíhɛ́nɛ́ bí Póol. 12Kasig jéŋ liɓóŋ ki líh ɓɛ́ɛ́ ɓé m̀ɓɛɛŋ li loɛ lí ǹdiyo á avɔ́l, náŋ ɔ yíglé jogo licɛ́ŋ lí ɓot bí ɓɛ́ɛ́ á nyíŋ kuŋgá nɛ́ bí nyɔ̄ŋ bisúghɛ́nɛ́ lí ɓógo váŋ, la miɔ́ŋɔ nɛ́ kí póla ya ɓɛ́, bí pám á liɓóŋ lí Fénis, jé lí áhɛ́ li ɓotle á ŋgokólá-nsoɛ li pám á ŋgɛkɛ́lá-nsoɛ nyí Keléta, á lí loɛ lí ǹdiyo á avɔ́l váŋ.
Ŋkwɛɛ átē a túwɛ
13Ŋgɔá yú sɔ́lé á ŋkɛɛ, lú ɓōtlé lí vuŋ, la ɓɔ́ bú ɔ́ŋɔ́ nɛ peg yáɓá ɛg la li yál. Bú ɓétɛ́ édiyo, bú lɔ́gɓan li dúgle á ŋgwáāg eon yé Keléta. 14Ndí, ámbúh puh eceg, ŋkwɛɛ bí ŋga yáŋa nɛ́ «elakílɔn» nyɔ́ a ŋgí sɔ́le á éon ɔ vūŋlé ɓɔ. 15Ɔ ɓōtlé li kɛ́la lí kūŋgá nyaa nyí ɛ lɛ nɛ́ bí ŋgí la ɓé pɛ li ɓɔŋ lí jam tɔ já, aɓé wú ɛ́ni, la ɓɛ́hɛ bu mwahɛ́ nɛ́ ŋgɔá ŋkwɛɛ ɛ kɛ́nɛ́g la ɓɛ́hɛ. 16Bu átɓé á mɔɔ́n éon bí ŋga yáŋa nɛ́ Kóda. Váŋ nɛ́, ácácicóló, ɔnyandá ví ɓɛ́ɛ́ vú kɛ́, ndí bu byée vɔ. 17Ɛnɛ́ ɓaá ɓétɛ́ vɔ, bu kág vɔ la mikɔɔ á ŋgwáāg kuŋgá ápah ví ɓɛ́ɛ́ ví yɛ́ŋɛ. Kasig bí ŋgí kɔn woŋ li ón á míɓōm mí ŋkógá mí lɛ á sáwá nyí ɔsɔ́ŋga vicɛ́ŋ ví Sílte, bú lɛ̄ŋgɛ́ mbéndú á ɔ́sōō, bú mwahɛ́ ŋgɔá ɛg kɛ ɛg bíh la kūŋgá. 18Ɔlɔ́ ví ŋgí oŋ víŋ, kasig ŋkwɛɛ a ɓɛ́ɛ́ a ŋgí vuŋúg la ŋguu, bú ɓōtlé lí léé lí mbɛgɛ á míndīm. 19Á ɔlɔ́ vá yáhɛ áŋháa, bú léé bínjēŋ bí mikúkú la mikúkú mɔ́-mɛ̄n á míndīm. 20Náŋ a ɓɛ́ɛ́ alɔ́ ŋgandag nɛ́, atɛ́ tɔ vaŋgá bí ŋgí ɛ́ni ɓé. Ŋkwɛɛ a ŋgí vuŋ aɓé ŋgandag, mipitá mí éniŋ mú mān ɓɛ́hɛ.
21Kasig ɓot bí tɔɓéé nzal ŋgandag, Póol ɔ tɛ́lɛ ɔ́sū váɓá, ɔ lága nɛ́: «Á míwāndá máma, kí ɓɔŋ nɛ́ miní ámblége ma, kí ɓāh ɓógo ɓé ɓɛ́hɛ á éon yé Keléta, náŋ aá ŋga yígle nɛ́ bih ɓɔ́lkágán ɓé ɓɛ́hɛ jé lisaŋgó lísɛ. 22Ndí, nyí vɔ́ŋɔ́ɔ mag laga ɓɛ́nɛ nɛ́ mut sig a létɛ̄ nyuú, ányúū nɛ mut tɔ wa á átē wahá a ŋgá wú ɓé, kuŋgá yɔ-ntámɛ́ nɛ bi ŋga ɓɔ́lan. 23Jé díɓe jɔ́-mɛ̄n nɛ́, áŋgɛl Ɔlolómɛ̄ nyɔ́ ma yéɓe la nyɔ́ mi ŋga ɓɔ̄ŋle, ya pámlé ma, 24yu lága ma nɛ́: ‹Á Póol ɔh kɔnɔ́g ɓé woŋ, ɛ́g somlɛ nɛ́ ɔ tɛ́lɛ́ á míkāl á ɔ́sū ví káísa ecɛ́ŋ. Ányúū yɔ́ɔ, Ɔlolómɛ̄ ag mwahɛ ɓot bísɛ bí lɛ́ élɔŋ la wa á édūga á éniŋ.› 25Lethánɛ hɔ́ nyúū á miwándá, mi byɛ́ɛ lipitá la Ɔlolómɛ̄. Ɛg kɛ li ɓɔŋɓɛ kaa áŋgɛl ya lága ma. 26Biíg kɛ li pámlé á éon yá.»
Li suŋɓɛ á eyínhá
27Náŋ a ɓɛ́ɛ́ díɓe lá yáhɛ́ jóom la mínáa li ɓotle lí eceg ŋkwɛɛ a kɛnɛ́ɛ́ la ɓɛ́hɛ á túwɛ nyɔ́ a Meditelanéa. Ɓɛɓɛ la m̀mím-á-áū, ɓadúg-kūŋgá bú ɔ́ŋɔ nɛ bi lɛ li siŋgle á sáwá. 28Ɛnɛ́ ɓá ɓóólé sí la ntúm, bú sɔ́ŋtánɛ́ nɛ njiɓa ɛ lɛ́ váŋ, jam-kaa muúmíŋháa mí méta la nzambúwá. Ɛnɛ́ ɓá ɓóólé sīg-pɛ puh enɛŋɛ́ ɔ́sū, bú sɔ̄m nɛ njiɓa ɛ lɛ jam-kaa muúmɓáa mi méta la mwaam. 29Kasig bi ŋgí kɔn woŋ nɛ́ kuŋgá yāhá ɛh ɓomtágán ɓé bikumú, náŋ ɔ yíglé ɓádūg nɛ bí léé bidiyo bínáa á ŋkɛɛ á kūŋgá, á nlaaŋkán nɛ kítí ɛ vóó li yɛ́. 30Á nlemlem á eceg, ɓadúg-kūŋgá bú ɓāŋhánɛ́ li kɛ lí li léé lí bídiyo bí lɛ ɔ́sū ví kūŋgá, ndom nɛ́ bíg somo li túú lí pɛ́ɛ́, la ɓɔ́ bú kɛ lí suhɛ lí ɔ́nyandá á míndīm. 31Póol ɔ lága ŋ̀kanʼyɛ nlɔŋ á eɓógo ɛ́ sónja nɛ́: «Kíyáɓɛ́nɛ ɓá ɓot ɓáh tɔɔ ɓé á kūŋgá, miní ŋgá kɛ ɓé lí véé lí nyɛmb.» 32Váŋ hɔ́ nɛ́ sónja yá sɛ́m mikɔɔ mí ɓá káglé víŋ ɔnyandá, la yɔ́ yú mwahɛ́ vɔ víg kɛ́ víg ɓɛm.
33Á nlaaŋkán á kítí, Póol ɔ yáŋá ɓɔ́ bísɛ á lí dí, ɔ lága ɓɔ nɛ́: «Lɛn nɛ́ a yáhɛ́ jóom lí alɔ́ la ánáa nɛ́ miní lɛ́ átē á nsɛ́glānɛ́, ɛ́h ɓɛ́ ɓé lí dí lí tɔ jam. 34Mag yáŋá hɔ́ ɓɛ́nɛ nɛ́ miní sɔ́ á lí dí, átɔm nɛ́ ɛ́g ɓat ɓɛ́nɛ jɔ́ ányúū lisuŋga jáná. Mut tɔ wa á elɔŋ yáná a ŋgá kɛ ɓé lí jáŋɛ́ lí nzíŋ yɛ́ɛ̄ voŋ tɔ ya nyí m̀mú.» 35Muŋ á bíŋ biɓaŋgá, Póol ɔ nyɔ̄ŋ ékɔgá, ɔ tí Ɔ́lolómɛ̄ mítamlan ɔ́sū ví ɓot bísɛ, la nyɛ́ ɔ búg yɔ, ɔ ɓōtlé lí dí. 36Ɓɔ́ bísɛ bú letɛ́ nyúū, bú dí. 37Bi ɓɛ́ɛ́ múŋ á kūŋgá biɓógo bí ɓot bíɓáa la muúnzambúwá la bísáama. 38Ɛnɛ́ mut sig a dí ɔ yál, bu léé bléya á túwɛ ányúū li saaɓɛ lí kūŋgá.
39Ɛnɛ́ kítí ya yɛ́, ɓadúg-kūŋgá bíh lémee ɓé pɛ sí. Ndí bí ɛ́nɛ́ɛ́ ɔ́sɔ́ŋga vitɔ́ga la mí miɔ́ŋɔ nɛ́, kíyáɓɛ́nɛ póla ɛ lɛ nɛ́ ya ɓɛ́, bí cág á sí. 40Bú kúhú bídiyo, bú léé byɔ á túwɛ, bú kúhú ki mikɔɔ mí éɓag ɛ́ kūŋgá, la ɓɔ́ bú legé likúkú ɔ́sū, á lí ɓɔŋ nɛ́ ŋgɔá ɛ núgɛ́ kūŋgá á sáwá. 41Ndí bú ɓétlé liɓóm lí ŋkógá la ɓɔ́ bú ón átē, m̀mú á kūŋgá wú súŋɓán á ŋkógá la wɔ́ wú pagɓe. Múŋ á yéŋ eceg, kí bíkule bí túwɛ bí byelánɛ li ɓól lí ŋkɛɛ á kūŋgá. 42Váŋ hɔ́ nɛ sónja yá veég peg li ól li ɓot-bí-míɓog bísɛ, á ŋkɔnwoŋɛ́ nɛ bíg la li túú lí pɛ́ɛ́ la nyɔgí. 43Ndí, kasig ŋ̀kanʼyɛ nlɔŋ á éɓōgo ɛ́ sónja a ɓɛ́ɛ́la kóó li suŋ lí Póol, ɔ púnɛ́ ɓɔ li yáhɛ lí nyíŋ peg. Ɔ kānʼyɛ́ nɛ ɓot bí ŋgá yí nyɔgí nɛ bí dúgú lí ɓɛ́han á míndīm bí ɔ̄g li kɛ á sí. 44Ɓáŋá bíg kɛ ɓɔ́ li oŋ bí káhɛ á lóō lí biɓám tɔ á lōo lí bipah bí kúŋgā. Náŋ nɛ ɓɔ́ bísɛ bí pámáá á sí ɛ́h ɓɛ́ ɓé ɓɔ li kuh lí áɓē tɔ wá.
ទើបបានជ្រើសរើសហើយ៖
Misɔ́n mí Ɓáōmɓɛ 27: NTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, CABTAL
