Misɔ́n mí Ɓáōmɓɛ 23
23
1Váŋ nɛ́ Póol a tīŋ ɔ́ku-vicɛ́ŋ-ví-bíkāāhɛ́nɛ́ miíh, a byɛ́ nɛ́: «Á ɛ́lōgɛ́tāŋ, m̀mím wáma á ŋgá kááhɛ ɓé ma jam tɔ já likɔlɓan la nsɔ́n á Ɔlolómɛ̄ ma sál nɛ́-tɛ́ɛla nyí lɛn.» 2Váŋ nɛ́ ŋ̀kanʼyɛ ǹcɛ́ŋ a ɓatíi-nsúlé Ananías a tí ɓot ɓɛ́ɛ́ kundɛ nɛ́ bí lɔ́g nyɛ́ á ányu. 3La Póol ɔ lága nɛ: «Wa yé epúpúɛ édidiya ɛ́ kɔ́tá, wa nɛ́ Ɔlolómɛ̄ a ŋga kɛ́ li lɔ́g! Ɔ tɔ́ɔ̄ váŋ á li kááhɛ lí ma li oŋle la Mbéndá nyí ɔ ŋgɔ sáá, jɔ́ nɛ́ wa tí kundɛ nɛ bí lɔ́g ma!» 4Ɓot ɓá bí ɓɛ́ɛ́ Póol ɓɛɓɛ bú yíhɛ́ nyɛ nɛ́: «Ɔg óŋo Ǹtíi-nsúlé Ǹcɛ́ŋ nyɔ́ a Ɔlolómɛ̄!» 5Póol ɔ pélē ɓɔ nɛ́: «Á ɛ́lōgɛ́tāŋ, māh yí ɓé ma nɛ́ Ǹtíi-nsúlé Ǹcɛ́ŋ nyɔ̄ŋ. Ákaa ɛ́sɛ, yá ciiɓɛ́ nɛ: ‹Ɔ ŋgɔ́ kɛ́ ɓé lí óŋo lí ŋ̀kanʼyɛ a lilóm jɔ́ɔ›.»
6Kasig nyɛ́ Póol a ŋgí yí nɛ́ jogo lí ɓot li yéŋ eti lí ɓɛ́ɛ́ Élōg-Sadúkái la Elōg-Falísái, ɔ tɛ́ɛ́ nlón á m̀mím á ɔ́ku-vicɛ́ŋ-ví-bíkāāhɛ́nɛ́ a byɛ́ nɛ́: «Á élōgétāŋ, mi lɛ mɔɔ́n Élōg-Falísái, m̀byál ma ɔ ɓɛ́ mɔɔ́n Élōg-Falísái. Mi tɛ́ɛ́ á míkāl ányúū lipitá jáhá bi byɛ́ɛ̄ la lipahye lí ɓá ɓá wū.» 7Póol a ɓɛ́ɛ́ ŋgí lí manɛ lí mpɔ́t, jómo lú ɓóo á póla Sadúkái la Falísái, la eti yú káaɓan. 8Ákaa ɛ́sɛ, Elōg-Sadúkái bíg laga nɛ́ lipahye lí ɓá ɓá wū lí sē ɓé, áŋgɛl tɔ m̀búl ki bí sē ɓé. Ndí Elōg-Falísái bíg páha bíŋ bísɛ. 9Eduŋgú yú ɓɔ̄ŋɓɛ́ ŋgandag. Jogo lí ɓáyī-mbéndá á élɔŋ yé Élōg-Falísái, bú níŋgí á jómo, bú pɔ́t la elóh nɛ: «Ɓāh kɔt ɓé ɓɛ́hɛ nyɔ́ mut njɔm tɔ ya. Yéé ɛ́ ŋga yíhɛ ɓɛ́hɛ kí nɛ́ m̀búl tɔ nɛ́ áŋgɛl ɓé nɛ ya pɔ́tɛ nyɛ é?» 10Kasig jómo lí ŋgí ɓét bí lí ɓét, ŋ̀kanʼyɛ ǹcɛ́ŋ a ɔkóó ví sónja ɔ kɔ̄n woŋ nɛ́ bíg saŋ Póol bitun bitun, ɔ kānʼyɛ́ nɛ bí ɓógtɛ́ nyɛ́ á m̀mím wáɓá, bí tímān la nyɛ́ á yáli-sónja. 11Díɓe lí ŋgí oŋ váŋ, Nyɔ́ŋ-Ɛsáŋɛ́ ɔ pámlé Póol, aá la nyɛ nɛ: «Letɛ́ nyuú! Wa sɔ́lé lí tíi lí mbóŋ yáma á Yélūsalɛm, ɛ́ somlɛ ki nɛ́ ɔ tí nlemlem á mbóŋ á Lóma.»
Elōg-Yúda ɛ́g tɔɓene Póol á dimb
12Ɛnɛ́ kítí ya yɛ́, apuh á ɓɔ́ɔ̄n bí Élōg-Yúda wú vúl dimb la li kan lí sɔŋ nɛ́ bí ŋgá dí ɓé tɔ li nyú, ɓɔ́ ŋgí lí ól lí Póol. 13Ɓakan-sɔŋ múŋ á jéŋ dimb bí ŋgí loo muúmínáa mí ɓot. 14Váŋ nɛ́ ɓá kɛ lí ɛ́n lí ɓákanʼyɛ ɓacɛ́ŋ bí ɓátíi-nsúlé la ɓacɛ́ŋ bí lílōmɛ, bú lága ɓɔ nɛ́: «Ɓaá kan-sɔŋ á ntélélé nɛ́ bi ŋgá dí ɓé tɔ li nyú, ɓɛ́hɛ ŋgi lí ól lí Póol. 15Nyí vɔ́ŋɔ́ɔ hɔ́ á ɛ́yānā épah, la kundɛ nyí ɔku-vicɛ́ŋ-ví-bíkāāhɛ́nɛ́, sɔ́hyán hɔ́ ŋ̀kanʼyɛ ǹcɛ́ŋ a ɔkóó ví sónja nɛ́ a sɔ́la ɓɛ́nɛ nyɛ́, á m̀ɓaŋhanɛ́ nɛ́ miníg légɓe ŋkwɛl wɛ́ɛ́ nyaa m̀ɓɛɛŋ, ndí ɓɛ́hɛ, ɓaá ɓoŋhán nɛ biíg ól nyɛ́ sɔ́kágánɛ́ ag pám vá.» 16Ndí, ɛnɛ́ mɔɔ́n mɔɔ́nyāŋ a mindígá a Póol a ámblé bíg ɓoŋhan víŋ ɔám, ɔ kɛ́ á yáli-sónja, ɔ níŋgí á lí yíhɛ lí Póol náŋ. 17Váŋ nɛ́ Póol a yáŋá ŋ̀kanʼyɛ wa a nlɔŋ a eɓógo ɛ́ sónja, aá la nyɛ́ nɛ́: «Kɛɛ́n la ví ɔwándá á mbóg ŋ̀kanʼyɛ ǹcɛ́ŋ a ɔkóó ví sónja, a byɛ́ɛ́ jam a ŋga yíhɛ nyɛ́.» 18Ŋ̀kanʼyɛ nlɔŋ á eɓógo ɛ́ sónja ɔ nyɔ̄ŋ víŋ ɔwándá, ɔ kɛ́la vɔ́ á mbóg ŋ̀kanʼyɛ wɛɛ́, aá la nyɛ́ nɛ́: «Póol, mut a miɓog a yáŋá ma, ɔ lága ma nɛ́ mi sɔ́la ví ɔwándá á yóg yɔ́ɔ, ví byɛ́ɛ́ jam á lí yíhɛ lí wa.» 19Váŋ nɛ́ ŋ̀kanʼyɛ ǹcɛ́ŋ a ɔkóó ví sónja a byée víŋ ɔwándá á wɔ, ɔ ɓáāgɓán la vɔ́, ɔ ɓāt vɔ nɛ́: «Yéé ɔ ŋgɔ sómo ma lí yíhɛ é?» 20Ɔwándá vú pélē nyɛ nɛ́: «Elōg-Yúda yá súgɛ nɛ bíg sɔ́ wa lí ɛ́n, nɛ́ likɛ́ɛ́ ɔ sɔ́la Póol á ɔ́sū ví ɔ́ku-vicɛ́ŋ-ví-bíkāāhɛ́nɛ́, á m̀ɓaŋhanɛ́ nɛ́ bíg légɓe ŋkwɛl wɛ́ɛ́ m̀ɓɛɛŋ. 21Ndí, ɔh kuág ɓé á ɔ́ām váɓá. Bíg ɓɛ́ lí loo lí muúmínáa mí ɓot má ám nyɛ á nzen. Ɓáŋ ɓot ɓá kān-sɔŋ nɛ́ bí ŋgá dí ɓé, tɔ li nyú ɓɔ́ ŋgí lí ól lí Póol. Ɓá ɓoŋhán mam mísɛ, kundɛ yɔɔ nɛ́ bí ŋgí laaŋkégé.» 22Ámbúh náŋ, nyɔ́ŋ ŋ̀kanʼyɛ ǹcɛ́ŋ a ɔkóó ví sónja ɔ soɛ́ víŋ ɔwándá, aá la vɔ́ nɛ́: «Ɔh máŋlɛ́gɛ́ ɓé tɔ mut nɛ́ wa yɛ́ɛ́léné ma jéŋ dimb.»
Bíg kɛla Póol á Sezaléa
23Ŋ̀kanʼyɛ ǹcɛ́ŋ a ɔkóó ví sónja ɔ yáŋá ɓákanʼyɛ ɓɛ́ɛ́ bíɓáa bí milɔŋ mí eɓógo ɛ́ sónja, aá la ɓɔ́ nɛ́: «Miní ɓōŋhán nɛ́, á ŋgɛ́ŋ ɛ́buu yí ŋgōgó, miníg kɛ á Sezaléa la biɓógo bí sónja bíɓáa, muúnzambúwá mí ɓáɓēt-á-vɔ́si, la biɓógo bíɓáa bí ɓádu-wélan. 24Miní ɓōŋhán ki vɔ́si ɛ́ ŋga ɓɛ́gɛ Póol á lí kɛ á mbóg gɔ́mna licɛ́ŋ Félis nɛ́ a pám wóŋ m̀ɓɛɛŋ ŋgíla ɔɓag.» 25Ɔ cíi káati nyí ŋga pɔ́t nɛ́: 26«Nyɔ́ a adit Gɔ́mna licɛ́ŋ Félis, mā Kolódius Lísias, mag tama wa! 27Elōg-Yúda yá byeé nyɔ́ mut mi ŋga óm wa, bí ŋga somo nyɛ́ lí ól, váŋ nɛ́ ma la ɓot ɓáma, ɓaá sɔ́, bu nyɔ́ŋlé ɓɔ nyɛ́. Ma ámblé nɛ a lɛ́ mɔɔ́n Lóma. 28Kasig ma sómo lí yí lí njɔm yɛ́ɛ̄ sɔ́mɔn, jɔ́ nɛ́ ma kɛ́la nyɛ́ ɔ́sū ví ɔ́ku-vicɛ́ŋ-ví-bíkāāhɛ́nɛ́ váɓá. 29Ma sɔ̄m nɛ bíg sɔ́mánɛ nyɛ́ li oŋle la mbéndá yaɓá, ndí māh ɛ́n ɓé ma njɔm tɔ ya nyí ɛ ŋga óm nyɛ́ á nyɛmb tɔ á míɓog. 30Kasig ɓá yíhɛ́ ma nɛ́ ɓá ám nyɛ á nzen, jɔ́ nɛ́ mi ŋga óm wa nyɛ́ la li laga lí ɓásɔ̄mánɛ nyɛ́ nɛ́ bí sɔ́la sɔ́mɔn yaɓá ɔsú vɔ́ɔ.»
31Li oŋle la bitɛ́ɛ́yɛ́nɛ́ bí ŋ̀kanʼyɛ ǹcɛ́ŋ a ɔkóó ví sónja, sónja yú kɛ́la Póol díɓe la díɓe á tísɔn Antipátilis. 32Ɛnɛ́ kítí ya yɛ́, sónja yú tímān á yáli-sónja, yú yíg Póol á mɔ mí ɓáɓēt-á-vɔ́si nɛ́ ɓɔ́ bí kɛnɛ́g la nyɛ́. 33Ɛnɛ́ ɓá pám á Sezaléa, sónja yú tí Gɔ́mna licɛ́ŋ kálati, yú byéehɛ́ ki nyɛ́ Póol. 34Gɔ́mna licɛ́ŋ ɔ sɔ́ŋgɔ́ kálati, la nyɛ́ ɔ ɓāt á yɔɔ́yɔ́ɔ epah ékombo Póol a byááyéne. Bú yíhɛ́ nyɛ nɛ́ a lɛ mɔɔ́n Silísia. 35Gɔ́mna licɛ́ŋ aá la Póol nɛ́: «Mag kɛ wa li ámble eceg ɓasɔ́mánɛ wa ɓɔ́g bí ŋga ɓɛ́ váŋ.» Ɔ tí kundɛ nɛ́ bí tɔ́ɔyɛ́ Póol la li tát lí nyɛ á ndáá nyí likanʼyɛ Elóde.
ទើបបានជ្រើសរើសហើយ៖
Misɔ́n mí Ɓáōmɓɛ 23: NTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, CABTAL
