Misɔ́n mí Ɓáōmɓɛ 1
1
Miɓotlé mí Pɔ́l
1Á nyɔ́ a adit Téofil, á kálati yama nyí ɔsú, ma máŋlɛ́ wā yé ɛ́sɛ Yésus a ɓɔ̄ŋ la yé ɛ́sɛ a yéglɛ, li ɓotle á míɓotlé 2li pám nɛ́-tɛ́ɛla á ɔ́lɔ̄ ví lɛ́ nɛ a nyɔŋɓɛ́ɛ á lóō. Sɔ́kágánɛ́ a ŋgí ɓét á lóō, la ŋguu nyí M̀búl Mpúán, ɔ tí ɓáōmɓɛ a pɔhléé bíyíhɛ́nɛ́. 3Ákaa ɛ́sɛ, ɓɔ́ nɛ́ a pámléé ámbúh bisɔghe byɛ́ɛ́, á lí étɛ lí ɓɔ á patí ɛ́sɛ nɛ́ a lɛ á éniŋ. Múŋ á míŋ muúmínáa mí álɔ̄, ɔ pámlé ɓɔ, ɔ máŋlɛ́ ɓɔ mam mí Líkanʼyɛ lí Ɔ́lolómɛ̄. 4Eceg a ŋgí dí élɔŋ la ɓɔ́, ɔ ɓéhyɛ́ ɓɔ́ nɛ́: «Miníh ɓógyág ɓé á Yélūsalɛm, váŋ nɛ́ miní laaŋkéné líkakanɛ lí Étāa, jé maná ámblé á ányu wáma nɛ́: 5‹Yohánɛs a tí nzoɓan nyí mindím, ndí ɓɛ́nɛ, nzoɓan nyí M̀búl Mpúán nɛ miní ŋga kɛ́ li kuh puh eceg›.»
Miɓét mí Yésus á lóō
6Kasig ɓaómɓɛ bí ɓɛ́ɛ́ bí kɔtánɛ elɔŋ la Yésus, bú bíhī nyɛ nɛ́: «Ɓaá, Ɛtáŋɛ eceg yá kɔlán vɔ́ŋɔ́ɔ nɛ́ ɔ tɛ́ɛ́yɛ́ Ekombo Íslāɛl é?» 7Yésus ɔ pélē ɓɔ nɛ́: «Miníh byɛ́ɛ́ ɓé nɛ miní yí eceg tɔ ŋgɛ́ŋ Etāa a tɛ́ɛ́yɛ́ la ŋguu yɛ́ɛ̄ nyɛ́-mɛ̄n. 8Ndí, miníg kɛ li kuh lí ŋguu nyí M̀búl Mpúán, eceg a ŋga kɛ́ ɓɛ́nɛ li suhle. Váŋ, miníg kɛ li ɓɛ́ lí mbóŋ yáma á Yélūsalɛm, á Yúdēa ɛsɛ̄ la á Samália, nɛ́-tɛ́ɛla á míkāh mí ŋkɔŋ-á-sí mísɛ.»
9Ámbúh bíŋ biɓaŋgá, Yésus ɔ ɓét á lóō ɔ́sū váɓá, mbaga yu sɔ́, yu dímhánɛ́ nyɛ á miíh máɓá. 10Kasig bí tīŋɓéé lí légɓe lí lóō ápah Yésus a ŋgí kɛ, ɓot bíɓáa bí ɓɛ́ɛ́ bí jáhɛ bipúpúɛ bí mbɔ́tí, bú pámlé ɓɔ, 11bú ɓāt ɓɔ nɛ́: «Á ɓot bí Galiléa, ányúū yéé maná lɛndán lí légɓe lí lóō é? Nyɔ́ Yésus maná sɔ́lé lí ɛ́n ag nyɔŋɓɛ á lóō, ag kɛ li sɔ́ nlemlem kaa maná ɛ́n nyɛ ag ɓét.»
Ɔku ví ɓáōmɓɛ
12Ámbúh miɓógo mí ɓáōmɓɛ á ɔ́kolá ví ŋga yáŋlɛ nɛ́ ɔkolá ví tín ɛ́ Ólíva, bú tímān á Yélūsalɛm. Víŋ ɔkolá ví lɛ́ ɓɛ́ɓɛ la tísɔn, jam-kaa epah ɛ́ ŋgɛ́ŋ ɛ́ duwɛ. 13Ɛnɛ́ bí pámáá á Yélūsalɛm, bú ɓét á étun-ndáá-likɔgɔ, ápah Pétlos, Yohánɛs, Yákop la Andeléas, Filípo la Tómas, Baltelémia la Matéus, Yákop mɔɔ́n Álfe, Símɔn mut a nlɔŋ á ékɔ̄ɔ̄-ékombo la Yúde mɔɔ́n Yákop bí ŋgí yɔg li kɔtan. 14Eceg la eceg sig, ɓɔ́ bísɛ bí ŋgí kánɛ la m̀mím wá, elɔŋ la jogo lí ɓóndīgá kaa Malía nyaŋɛ́ á Yésus, elɔŋ la yéŋé élōgnyāŋ ɛ́ Yésus.
Mátias ag yáhɛ táŋga nyí jóom lí ɓáōmɓɛ la bíɓáa
15Múŋ á nyúŋ alɔ́, Pétlos ɔ tɛ́lɛ́ á m̀mím á éti yé ndog ɓayéɓe, ɓot bí ɓɛ́ɛ́ bí kɔtánɛ váŋ jam-kaa eɓógo ɓot la muúmɓáa, la nyɛ́ ɔ pɔ́t nɛ: 16«Á élōgétāŋ, ɛ́ ŋga sōmlɛ nɛ́, yé M̀búl Mpúán a lɛgléé á Lícii-Lipúán á ányu á káísa Dávid ɛ́ yāl, likɔlɓan la Yúdas, m̀wɛɛla elɔŋ yé ɓot bí byeléé Yésus. 17Yúdas a ɓɛ́ɛ́ élɔŋ la ɓɛ́hɛ, ɔ nyɔ̄ŋ ki ŋgaɓo á nsɔ́n wáhá. 18Ɛ́nán sig, nyɔ́ŋ Yúdas, a sómóó sí la míŋ mɔní mí mícii. La nyɛ́ ɔ ɓɛ́hán bibúbútɛ́, libum jɛ́ɛ́ lú ɓóo, byoóm byɛ́ɛ́ bí átē bú cámān pɛ́ɛ́ ɛsɛ̄. 19Ɛnɛ́ ɓátɔɓene bí Yélūsalɛm bísɛ ɓá yí náŋ, bú yáŋá nyɔ́ŋ voóm a sí la mpɔ́t wáɓá nɛ: ‹Hakeldáma›, náŋ a lɛ nɛ́ sí micii. 20Ányúū náŋ nɛ́ kálati byaá nyí Licii-Lipúán ɛ ŋga máŋa nɛ́:
‹Nlɛ́ɛ́ wɛ́ɛ́ á yéglé évōvóló,
mut tɔ wa ah tɔɓág ɓé pɛ á átē
la ki nɛ́,
Mut ntám ag kɛ nyɛ́ lí yihanɛ á nsɔ́n wɛ́ɛ́›.»
21Ɓot bí lɛ, ɓá ɓá wɛɛ́ elɔŋ la ɓɛ́hɛ eceg ɛ́sɛ Nyɔ́ŋ-Ɛsáŋɛ́ Yésus a ɓɛ́ɛ́ á m̀mú wáhá, 22li ɓotle á nzóɓan Yohánɛs, li pám á ɔ́lɔ̄ ví a nyɔŋɓɛ́ɛ á lóō ɔ́sū váhá, ɛ́g somlɛ hɔ́ nɛ wa á póla yaɓá a yáan mbóŋ lipahye jɛ́ɛ́ elɔŋ la ɓɛ́hɛ. 23Váŋ nɛ́ bí tɛ́ɛ́yɛ́ɛ ɓot bíɓáa, Yósɛp nyɔ́ bí ŋga yáŋa nɛ́ Balsábas, nyɔ́ ŋgól ɛ́ lɛ nɛ́ Yústus, la nyɔ́ŋɔ́ mut ntám nɛ́ Mátias. 24La ɓɔ́ bú kánɛ́ nɛ: «Á Ɛtáŋɛ, wa nyɔ́ ɔ ŋgɔ yí mimím mí ɓot bísɛ, étɛ́ ɓɛ́hɛ mut wa pɔ́hɔ átē á ɓá ɓot bíɓáa, 25nɛ́ a nyɔ̄ŋ etɛ́l á nsɔ́n á ɓáōmɓɛ, yé ɛ́ lɛ́ nɛ Yúdas a cóó, ɔ kɛ̄ á étɛ̄l ɛ́ lɛ́ ɛ́yɛ̄ɛ̄.» 26Bú lɛ̄ŋgɛ́ mbam, kwaa yu kúēlé Mátias, la ɓɔ́ bú níŋgɛ́ nyɛ á élɔŋ yé jéŋé jóom lí ɓáōmɓɛ la wa.
ទើបបានជ្រើសរើសហើយ៖
Misɔ́n mí Ɓáōmɓɛ 1: NTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, CABTAL
