Elōg-Kɔlínto 1 1
1
Mitamlan
1Ma Póol, ma yáŋlɛ́ á lí ɓɛ́ lí ŋ̀ómɓɛ a Yésus Kilístus li oŋle la nsom á Ɔ́lolómɛ̄. Mi lɛ élɔŋ la Sóstɛn mɔɔ́lyāŋ wahá. 2Mag ciile Eɓasɛ Ɔ́lolómɛ̄ yé ɛ́ lɛ́ á tísɔn Kɔlínto, yé ɛ́ byɛ́ɛ̄ ndog-Ɔlolómɛ̄ nyí ya yáŋlɛ á lí ɓɛ́ lí ɓápūán li loole la Yésus Kilístus, nlemlem ki la ɓot bísɛ bí ŋga lónle Ɛtáŋɛ wahá Yésus Kilístus voóm sig, nyɔ́ a lɛ Ɛtáŋɛ waɓá ndí la ɛwahá ki. 3Ɔlolómɛ̄ Etāa wahá elɔŋ la Nyɔ́ŋ-Ɛsáŋɛ́ Yésus Kilístus bí lómbó ɓɛ́nɛ bí tí ki ɓɛ́nɛ nsaŋ.
4Ányúū yāná, mag tíi Ɔlolómɛ̄ mítamlan ɛ́h ɓɛ́ ɓé lí tɔmb, ányúū likaale a tíéé ɓɛ́nɛ yɛmɛ́ li kele la Yésus Kilístus. 5La mbálɛ, á ŋ̀atanɛ́ la Yésus Kilístus, nɛ́ miní kūhúú ábyaŋ á nyaa yɔ́ ɛ́sɛ, likaale lí eyí-ŋkwɛl la jé lí lí yí lí mam mísɛ. 6Mbóŋ nyí Nyɔ́-a-pɔ́hlɛ ya tíéɓɛ ɓɛ́nɛ ya óló á átē wāná, 7nyaa nyí ɛ lɛ nɛ́ likaale lí Ɔ́lolómɛ̄ tɔ já lí ŋgá yɛ́ɛ́le ɓɛ́nɛ lí se ɓé, ɓɛ́nɛ ɓá miní ŋga láaŋke nɛ́ Ɛtáŋɛ wahá Yésus Kilístus a ɛ́ni. 8Nyɛ́ ki nɛ́ a ŋga kɛ́ ɓɛ́nɛ li letɛ lí nyúū li pám á lísūg, nɛ́ ndí miní ɓɛ́ ŋgíla ɔnɛ́g á ɔ́lɔ̄ ví mísɔ̄ mɛ́ɛ́. 9Ɔlolómɛ̄ ag yáhɛ biɓaŋgá byɛ́ɛ́, nyɛ́ nɛ́ a yáŋá ɓɛ́nɛ á lí niŋ á ŋ̀atanɛ́ la Mɔ́ɔ̄n wɛ́ɛ̄ Yésus Kilístus, Ɛtáŋɛ wahá.
Mbáglán á Éɓasɛ yé Kɔlínto
10Á élōgyāŋ, á jóō lí Ɛtáŋɛ wahá Yésus Kilístus, mag sɔ́hye ɓɛ́nɛ bísɛ nɛ́ miní ámblán, la ki nɛ́, mbáglán ɛh ɓɛ́ɛ́g ɓé á póla yaná. Miní ɓɛ́ mut wa, miní ɓɛ́la nlemlem á peg la nlemlem á éɔ̄ŋɔ. 11Ákaa ɛ́sɛ, á élōgyāŋ, ɓot bí ndáá-m̀biya nyí Kolówe ɓá yíhɛ́ ma nɛ́ ŋ̀ámblānɛ́ a sē ɓé pɛ á póla yaná. 12Mag somo li laga nɛ́, á élɔŋ yaná, nyɔ́ wa ag laga nɛ́: «Ma, mí lɛ̄ mut a Póol», nyɔ́ŋɔ́ aá: «Ma, mi lɛ̄ mut a Apólos», nyɔ́ŋɔ́ ntám aá: «Ma, mi lɛ nyɔ́ á Pétlos», nyɔ́ŋɔ́ ntám sīg-pɛ ag laga nɛ́: «Ma, mi lɛ̄ mut a Nyɔ́-a-Pɔ́hlɛ.» 13Ɓaá, Nyɔ́-a-Pɔ́hlɛ a káaɓɛ é? Ɓaá, Póol nɛ́ a tōmlɛ́ á mbásá ányúū yáná é? Ɓaá, á jóō lí Póol nɛ́ maná kūh nzóɓan é? 14Mag tíi Ɔlolómɛ̄ mítamlan nɛ́, māh tíi ɓé ma mut waná tɔ wa nzoɓan amáh sig Kilípus la Gáyus. 15La náŋ hɔ́, mut tɔ wa a ŋgá la ɓé lí laga nɛ́ maná kūh nzóɓan á jóō jáma. 16Síkɔ̄ŋ, ma tí ki m̀biya á Stefánas nzoɓan. Ányúū ɓáŋá ɓátām, mi ŋgá ɔ́ŋɔ ɓé mā nɛ́ ma tí mut ntám nzóɓan. 17Átɔm nɛ́, Nyɔ́-a-Pɔ́hlɛ āh óm ɓé ma á lí tíi lí nzóɓan. Ndí, a óm mā á lí lɛgɛ lí Pɔ́l M̀ɓɛɛŋ ɛ́h ɓɛ́ ɓé ma lí ɓɔŋle lí éyī-ŋkwɛl yé ɓot-bí-bínam, á lí ɓɔŋ nɛ́ nyɛmb nyí Nyɔ́-a-Pɔ́hlɛ a lōó lí mbásá ɛh ɓɛ́ɛ́g ɓé yɛ́mɛ̄ ɛ́ jam.
Yésus Kilístus a lɛ́ ŋguu la peg nyí Ɔlolómɛ̄
18Ákaa ɛ́sɛ, li kwɛl ányúū nyɛmb nyí Nyɔ́-a-Pɔ́hlɛ á mbásá lí lɛ́ jam lí nzeg ányúū ɓot ɓá jáŋ. Ndí ányúū ɓɛ́hɛ ɓot bí tɛ́ɛ́ á nzen lisuŋga, lí lɛ́ ŋguu nyí Ɔlolómɛ̄. 19Átɔm nɛ́ Licii-Lipúán líg laga nɛ́:
«Mag kɛ́ li sáá lí peg nyí ɓot bí peg,
mi yáánɛ́ ki éyī yé ɓáyī-jam yɛmɛ́.»
20Mut-a-peg a lɛ véé é? Ŋ̀yí-mbéndá a lɛ véé é? Ŋ̀yí-ŋkwɛl a yé eceg ɛ́ lɛn a lɛ véé é? Ɔlolómɛ̄ a étɛ́ nɛ peg ɛ ŋkɔŋ-á-sí ɛ́ lɛ̄ jām lí nzeg! 21Ákaa ɛ́sɛ, kasig ŋkɔŋ-á-sí li oŋle la peg yɛ́ɛ̄ wáh la ɓé li lemlene lí Ɔ́lolómɛ̄ átē a peg yɛɛ́, ányúū náŋ nɛ́ Ɔlolómɛ̄ a súgɛ́ nɛ ag suŋ ɓá bísɛ bí ŋga yéɓé la nyíŋ pɔ́l bi ŋga lɛ́gɛ, nyí ɛ lɛ̄ káa jam lí nzeg ányúū ɓot-bí-bínam. 22Eceg ɓɔɔ́n bí Élōg-Yúda bí ŋga ɓāt li ɛ́n lí mínɛ̄ŋ, ɓɔɔ́n bí Élōg-Gelékia ɓɔ́ bíg somo jā peg. 23Ndí ɓɛ́hɛ, biíg lɛgɛ pɔ́l nyí Nyɔ́-a-Pɔ́hlɛ nyɔ́ a tōmlɛ́ á mbásá. Nyíŋ pɔ́l ɛ lɛ́ ntugɛ ányúū Elōg-Yúda, nzeg ányúū ɓá bí sē ɓé ɓɔ́ɔ̄n bí Élōg-Yúda. 24Ndí, ányúū ɓá ɓá yáŋlɛ, ɛ́ ɓɛ́ ɓɔ́ɔ̄n bí Élōg-Yúda tɔ ɓá bí Gelékia, Yésus a lɛ Nyɔ́-a-Pɔ́hlɛ, ŋguu la peg nyí Ɔlolómɛ̄. 25Á mbálɛ, nzeg nyí Ɔlolómɛ̄ ɛ́g loo peg nyí ɓot-bí-bínam, áɓɔt wɛ́ɛ́ ki ág loo ŋguu nyí ɓot-bí-bínam.
Jam Ɔlolómɛ̄ a pɔ́hɔ
26Á élōgyāŋ, ɓɛ́nɛ ɓá maná kūh ŋyáŋlán á Ɔ́lolómɛ̄, ɔ́ŋlán sig yé miní lɛ̄. Ányúū ɓot-bí-bínam, ŋgandag ɓōt bí peg ɛ́ sē ɓé á póla yaná, tɔ ŋgandag ɛ́ mbii-ɓōt, ndí tɔ ŋgandag ɛ́ ɓot yí tāŋ mímbiya. 27Ndí, Ɔlolómɛ̄ a pɔ́hɔ̄ yé ɛ́ ŋga ɛ́ni nzeg á ŋkɔŋ-á-sí, ányúū li kɔnhanɛ lí ɓot bí peg mbɔɔla. Ɔlolómɛ̄ a pɔ́hɔ̄ ki yé ɛ́ ŋga ɛ́ni aɓɔt á ŋkɔŋ-á-sí, ányúū li kɔnhanɛ lí ɓot bí ŋguu mbɔɔla. 28Ɔlolómɛ̄ a pɔ́hɔ̄ yé ɛ́ lɛ́ yɛ̄mɛ́, yé ɓot bí ŋga yāŋa, yé ɛ́ lɛ́ ŋgíla eɓáha, mú á ŋkɔŋ-á-sí, á lí sáá lí yé ɛ́ ŋga ɛ́ni taŋ, 29nɛ́ ndí mut tɔ wa ah yátɓág ɓé ɔ́sū vɛ́ɛ́. 30Nyɛ́ Ɔ́lolómɛ̄ nɛ́ a āt ɓɛ́nɛ la Yésus Kilístus, Yésus Kilístus ki ɔ ɓɛ́ peg ɛ ŋga sɔ́le la Ɔlolómɛ̄ ányúū yāhá. Li loole la nyɛ́ nɛ́ Ɔ́lolómɛ̄ a yáanɛ́ ɓɛ́hɛ ɓot bí lɛ́ sim, ɔ pɔ̄hɔ́ ɓɛ́hɛ ányúū yɛ́ɛ̄, la nyɛ́ ɔ ɓógtɛ́ ɓɛ́hɛ á míɓē. 31Ányúū náŋ nɛ́ Lícii-Lipúán lí ŋga lága nɛ́: «Nyɔ́ la nyɔ́ a ŋga yáta, a ɓɔ́ŋ náŋ á ŋ̀atanɛ́ la Nyɔ́ŋ-Ɛsáŋɛ́.»
ទើបបានជ្រើសរើសហើយ៖
Elōg-Kɔlínto 1 1: NTB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, CABTAL