Sini 8
8
1Ɓay Sol tuk kəɗam kə mar Etiyen.
Sol keɓ zu kul sôwâ Kris
Kə fəta rum, sôwâ təŋ kə keɓ zu kul sôwâ Kris wə so Jeruzalem. Sôwâ daŋ' məni ve Kris pla' wa wə nya Zude kə nya Samari, say gwa' sum sini. 2Sôwâ məni wə ô Ifray tle mar Etiyen mo', ɓay handay ci' mar um juku. 3Ama Sol keɓ kədan mum ɗənok kul sôwâ Kris. Mum ta so kə so, ɓay mum ra' sôwâ məni ve Kris mə njiwkwa kə mə rawkwa daŋ' cok ta so daŋgay'i#Sin 22.4-5; 26.9-11.
Filip ka' Dan mə Kəɗam wə so Samari
4Sôwâ məni pla' ta ri cem cem wə gaŋ wə nya rum kə ka' Dan mə Kəɗam ne kə sôwâ. 5Filip ta so Samari, ɓay mum təŋ kə ka' dan Kris ne kə sôwâ so rumu. 6Kəri məni raw sôwâ mun dan Filip ɓay we yew məni mum gi, handay ve dan rumu. 7Kəri rum, gam wur mbə wa sôwâ juk kə do dan, ɓay hurbu kə lem juk cara. 8Zə rum, sôwâ so rum tuk kəɗam juku.
9Swə məsin kəta' wə so rum mə ɗe kə Simoŋ, mum bə gi yew ɓay kwa gi um jin' wa sôwâ so Samari. Mum ta' tu rum ce' ndə swə mə kə mbra', 10ɓay sôwâ rôwâ kə dawre' daŋ' ve dan um kə ini: «Swə məni nə mum nə gbəgboŋ Ifray məni sôwâ wə ɗe kə gbəgboŋ mə mbri.» 11Zə yew məni mum wə gi ɓa' kuni jin' wa ne nday, handay ve dan umu. 12Ama kəri məni handay ve Dan mə Kəɗam məni Filip ka' wa dan vari məni Ifray wə də suk jwə wa sôwâ um kə semɗe Zezu Kris, njiwkwa kə rawkwa daŋ' fe baptem. 13Simoŋ kə tu rum ve dan rum, ɓay mum fe baptem ta', mum suk hay' Filip, ɓay kəri məni mum we kwa mə jin' wa sôwâ kə yew məni Filip gi, kwa rum jin' wa ne numu.
14Daw sin məni wə so Jeruzalem mun i sôwâ so Samari ve dan Ifray si, zə rum handay sin Piyer kə Zaŋ hay' ndaya. 15Kəri məni handay ta day so Samari, handay in dan kə Ifray zə sôwâ məni ve Kris kədan handay fe Simbeɗ mə Kəleŋe. 16Zə Simbeɗ mə Kəleŋ cu dam mbə wa swə ɗaw du nday məto'o. Handay fe baptem kə semɗe Bârî Zezu tawa. 17Kəri rum Piyer kə Zaŋ njay ɓa wa nday, ɓay handay fe Simbeɗ Kəleŋe.
18Kəri məni Simoŋ we sum sin njay ɓa wa sôwâ məni ve Kris, ɓay Simbeɗ mə Kəleŋ dam mbə wa nday, mum tle səlay mbə hay' Piyer kə Zaŋ kə ndi. 19Ɓay la' ne ndaya: «I ne gbəgboŋ məni nə ne nan ta' kədan swə məni na də njay ɓa wa rum, mum də fe Simbeɗ mə Kəleŋe.» 20Ama Piyer ɗam vun rumu: «Ha də vi' kə səlay wû daŋ', zə ha ɗik i ha gak coɓ kwane Ifray kə səlaya. 21Ha cu kə kwafe ko ri kî du sin mba mi, zə vunduk ru cu njeŋ kor Ifray mi. 22Zə rum, a faŋ vunduk ru wa dan ɗik mə bro' wû ɓay a o Bârî kədan nə vrum dan ɗik mə bro' wû, vari la' kəta' si. 23Zə na we vunduk ru nyen peɗ kə dan bro' mə bak, ɓay ha bek kwa mə bro'o.» 24Simoŋ la' ne kə Piyer kə Zaŋ: «Hi kə tu ri, i o Bârî zə rin kədan kwa məni hi in dan wa rum nə mbə wa rin mi.»
25Kəki məni sum sin mə hoɓ kuni in njeŋ dan wa Zezu ɓay ka' dan Bârî, handay faŋ ta so Jeruzalem. Kəri məni handay wə vari, handay ka' Dan mə Kəɗam wə so cem cem juk wə nya Samari.
Filip kə swə sərawsi mə nya Etiyopi
26Vay sin Bârî mə wafray la' ne kə Filip: «A car, ɓay a cin wa də ga' zu wə vari məni car so Jeruzalem kədan də so Gaza. Vari rum cukuɗu.» 27Filip car 'ya dle. Ɓay kəri məni mum wə vari, mum ndewa kə swə məsini. Swə nə swə nya Etiyopi. Mum jəraw na. Mum swə sərawsi mə kə mbra' məni wə ji doknay ma mə ɗe kə Kaŋdasə məti suk jwə wa nya Etiyopi. Mum ke wə so Jeruzalem kədan mum bur Ifray, 28ɓay mum faŋ wə də so umu. Mum suk wə rawti Saret um, ɓay mum wə in ɗerwa məni bə ka' dan mə ɗe kə Esaya wây'i. 29Simbeɗ in ne kə Filip: «A ta də hay' Saret nə həre' ɓay a ta kə ndi tap tapa.» 30Filip ne ta day hay' rum, ɓay mum mun swə nya Etiyopi nə wə in ri ɗerwa məni bə ka' dan mə ɗe kə Esaya wây' ɓay mum ci vun rumu: «Ha wə mun zu ri ɗerwa məni ha wə in nə kəta' su?» 31Swə nə ɗam vun rumu: «Na gak mun zu rum ma dan swə man pay zu rum su?» Ɓay mum ɗe Filip kədan nə ur mbə suk hay' rum wə rawti Saret. 32Ri ɗerwa məni mum wə in nə ni na:
«Mum ce' ndə cime məni sôwâ kaw də ri fol kə ndi.
Mum ce' ndə vay cime məni car 'yeŋ
wə kor bə ri sâ tu rumu.
Mum cu ar vun rum mi.
33Handay gi num faŋ kî,
ɓay handay cu ge dan mə njeŋ wa rum mi.
Sa nə gak in dan wa zu tlor rum su?
Zə handay vi' nyî rum wa nya si#Esa 53.7-8.»
34Swə sərawsi nə ci vun Filip: «Na o nu, a in ne nan ri', bə ka' dan in dan məni nə wa sa su? Wa tu rum su? Ko wa swə məsin su?» 35Filip təŋ kə pay zu ri ɗerwa rum, ɓay mum ta' Dan mə Kəɗam məni wə in dan wa Zezu ne numu. 36Kəri məni handay wə ta də vari, handay ta day wə ri məni mbi wə han, ɓay swə sərawsi nə ini: «Mbi ni na. Mi nə man tak dan fe baptem su?» [37Filip ɗam vun rumu: «Ha la' ve dan rum kə vunduk ru daŋ' si, ha gak fe baptem.» Swə nə ɗam vun rumu: «Na ve si: Zezu Kris nə Vay Ifraya.#8.37 Ri ɗerwa rum cu wə du ɗerwa məni wây' cem cem məsin kuni mi.»] 38Mum faŋ ne vari kədan kaw Saret um ca. Filip kə swə sərawsi nə hoɓ jak dam ta du mbi ɓay Filip gi baptem ne numu. 39Kəri məni handay wur mbə du mbi, Simbeɗ Bârî tle Filip ɓay swə sərawsi nə cu we num za' mi, ama mum tle vari kə tuk kəɗama. 40Filip ta za' tu rum wə so Azot. Mum faŋ gaŋ so kə so kə ka' Dan mə Kəɗam wə ri daŋ' hâ mum ta day so Sezare.
ទើបបានជ្រើសរើសហើយ៖
Sini 8: KMN
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Le Nouveau Testament et Psaumes en Peve © Alliance Biblique du Tchad, 2014.
