मरकुस 6
6
नासरतमे येसुके इन्कार
(मती १३:५३-५८, लुका ४:१६-३०)
1येसु ओइठामसे निकैलके आपने गाम घुइमके चैलएलै। ओकर चेलासब ओकर पछा-पछा गेलै। 2बिसरामके दिन येसु सभाघरमे सिक्छा देबे लाग्लै। येसुके सिक्छा सुनैबला बहौत लोकसब छक्क परैत कहल्कै, “यि लोक यि सब बातसब कतेसे सिखल्कै? अकरा कतेसे एहेन बुइध एलै? कनङके यि एहेन अचम-अचमके कामसब करे सकैछै? 3कि यि ओह्या काठ मिसतिरी नै चियै से? कि यि मरियमके बेटा आ याकुब, योसेफ, यहुदा आ सिमोनके भैया नै चियै से? कि अकर बहिनसब अपनासबके सङे नै छै से?” तब उसब पिताइलै आ ओकरा बिस्बासे नै करल्कै। 4तब येसु ओइसबके कहल्कै, “अगमबक्ताके सब दिसन आदर हैछै महज आपन देस आ आपन कर-कुटुमबसबके बिचमे आ आपन घरमे आदर नै हैछै।” 5तहैले येसु ओते कोनो-कोनो बिमारसब उपर आपन हाथ राइखके ओइसबके निक करै बाहेक ओकरासबके अबिस्बासके कारन कोनो सक्तिसाली काम करे नै सकल्कै। 6ओइसबमे कन्हिकरो बिस्बास नै देखके येसु छक्के परलै। तब उ गाम-गाममे सिक्छा दैत गेलै।
बारहो चेलासबके परचार करैले पठेल्कै
(मती १०:५-१५, लुका ९:१-६)
7येसु आपन बारहो चेलासबके आपनलग बोलाइल्कै आ ओइसबके भुत आत्मासब निकालैके सक्ती आ अधिकारो दके दुइ-दुइ गोरा कैरके परचार करैले पठेल्कै। 8जाइसे पहिने ओइसबके येसु आग्या करल्कै: “यातराके खातिर साथमे कुछो नै बोक, नै रोटी, नै झोरा, नै धोकरीमे पैसा, महज एकटा लाठी मातरे बोकिहे। 9जुता लगा, महज एकेटा बस्तर पिन्हके जो।” 10येसु ओइसबके कहल्कै, “जब कोनो घरमे ढुकबिही, जाबेतक ओइ गामसे नै निकलबही ताबेतक ओतै रहिहे। 11यदि कोनो ठाममे मान-दान नै हेतौ आ लोकसब तोरासबके बचन सुनैले इन्कार करतौ त ओइठामसे निकलैत खिना ओकरासबके बिरोधमे गबाहीके#६:११ गबाही- ओकरासब उपर दन्ड परे कैहके गबाही। खातिर आपन टाङके गरदा झारदैहे।”#६:११ टाङके गरदा झारदैहे कहैके मतलब तु अइ सहरके लोकसबके इन्कार करनाइ जे कोइ येसुके बारेमे बोलल बचनके इन्कार करैछै आ आब ओकरासबके कुछो नै करेपरतै।
12तब उसब निकैलके गेलै आ लोकसबके “पस्चाताप कर आ हिरदय बदल” कैहके परचार करेलाग्लै। 13उसब बहौत भुतसब निकालल्कै आ तेलमे परथना कैरके बहौत रोगी-बिमारीसबके लग्याके निक करल्कै।
बप्तिस्मा दैबला युहन्नाके मिरतु
(मती १४:१-१२, लुका ९:७-९)
14रजा हेरोद येसुके बारेमे सुनल्कै, कथिलेत ओकर नामके चरचा चारुदिसन फैलगेल छेलै। कोइ कहैछेलै, “बप्तिस्मा दैबला युहन्ना फेनो मरके जिबित भेल छै, तैल्याके ओकरसे एहेन सक्तिसाली कामसब भ्यारहलछै।” 15महज औरोसब कहैछेलै, “यि त एलिया#६:१५ एलिया- बहुत यहुदीसब एलिया अगमबक्ता एतै आ खिरिस्टके आबैबला रस्ता तयार करतै कैहके आस करनेरहै। अगमबक्ता चियै।” औरोसब कहै, “यि त परापुरब कालके एक अगमबक्तासबमेसे एक गोरे चियै।” 16महज यि बातसब सुइनके रजा हेरोद कहल्कै, “युहन्नाके घेंच काटैले त हम्ही लगेलियै, महज उ फेनो जिके उइठगेलै।”
17कुछ समय पहिने रजा हेरोद आपन भाइ फिलिपके घरबाली हेरोदियासके खातिर युहन्नाके पकैरके जहलमे राखने छेलै, कथिलेत उ हेरोदियाससे बियाह करने छेलै। 18युहन्ना हेरोदके एहेन कहैछेलै, “आपन भाबोके आपनसङे रखनाइ उचित नै हैछै।”
19ओहैसे हेरोदियास ओकरसे दुस्मनी राखने रहै आ ओकरा मारैले ताकैछेलै महज मारैले नै सकैछेलै। 20कथिलेत युहन्ना एक धरमी आ पबितर लोक चियै थाह पाइबके हेरोद ओकरसे डराइछेलै आ सुरक्छित राखने छेलै। युहन्नाके सिक्छा सुनैबखत उ बहुत घबराल छेलै महज तैयो ओकर बातसब धियान द्याके सुनैछेलै।
21महज एक दिन हेरोदियासके बदला लैले मौका भेटलै। जब हेरोद आपन जलम उत्सबमे बरका भोज करल्कै, उ भोजमे ओइ इलाकाके बरका बरका पदाधिकारीसब, फौजके कप्तान आ गालिलके अगुवासब छेलै।
22तब उ भोजमे हेरोदियासके बेटी आइबके नाच्लै, जे हेरोद आ ओते एल मेजमानसबके खुसी करल्कै। तब रजा हेरोद ओकरा कहल्कै, “तोरा जे इक्छा लागैछौ माङ, हम तोरा दैले तयार चियौ।”
23उ किरिया ख्याके ओकरा कहल्कै, “हमरसङे जे माङबिही हम तोरा देबौ, हमर राजके अधो भाग माङबिही त हम तोरा ददेबौ।” 24तब उ बाहर निकैलके आपन माँके ज्याके पुछल्कै, “हम कथी माङबै” ओकर माँ कहल्कै, “बप्तिस्मा दैबला युहन्नाके मुरी।”
25उ झटसिना भितर रजा हेरोदलग ज्याके कहल्कै, “हमरा अखुन्ते बप्तिस्मा दैबला युहन्नाके मुरी थारीमे राइखके दिय।” 26ओइ बखत रजा एकदम दुखी भेलै आ भोजमे एल्हा मेजमानसबके अगा आपन करल बचन तोरैले नै चाहल्कै।
27तैल्याके रजा तुरन्ते आपन एकटा सिपाहीके “युहन्नाके घेंच काइटके आनैले” आदेस करल्कै। तब उ सिपाही जहलमे ज्याके युहन्नाके घेंच काटल्कै, 28आ थारीमे आइनके ओइ छौरिके देल्कै आ उ आपन माँके देल्कै।
29जब युहन्नाके चेलासब यि बात सुनल्कै तब उसब आइबके ओकर लहास उठाके चिहानमे गारल्कै।
येसु पाँच हजार लोकसबके खियाइल्कै
(मती १४:१३-२१, लुका ९:१०-१७, युहन्ना ६:१-१४)
30तब परेरितसब येसुलग घुइमके एलै। उसब जे-जे करनेरहै आ सिखेल्हा बातसब येसुके सुनाइल्कै। 31येसु ओकरासबके कहल्कै, “अपनासब सुनसान जगहमे एकछन सुस्थाले।” कथिलेत ओते आबैजाइबला अतहेक लोकसब छेलै कि ओइसबके खाइयोले फुरसत नै हैछेलै। 32तब उसब नाहमे चहैरके सुनसान जगहमे गेलै।
33महज बहुत लोकसब ओकरासबके जाइत देखल्कै आ चिन्हल्कै। तब लोकसब बहुत सहरसबसे पैदले चैलके ओते गेलै आ उसब पुगैसे पहिने लोकसब ओते पुग्लै। 34जब येसु नाहसे उतरलै तब लोकसबके बरका भिर जम्मा भेल देखके ओकरा मनमे एकदम दया लाग्लै कथिलेत उसब चरबाह बिनाके भेंरासब जखा छेलै। तब येसु ओकरासबके बहुत बात सिखाबे लाग्लै।
35जब साँझ परेलाग्लै तब ओकर चेलासब आइबके कहल्कै, “यि उजार ठाम चियै आ साँझ परेलाग्लै। 36यि लोकसबके छुट्टी दियौ आ उसब आसपासके गामसबमे जाके आपन लेल खाइबला चिज किन्तै।” 37महज येसु ओकरासबके कहल्कै, “तुहेसब अकरासबके खाइले दहै।” चेलासब कहल्कै, “परभु, कि हमसब दुइ सय चानीके टकासे#६:३७ चानीके टका- एकटा चानीके टका काम करैबलाके एक दिन बोइन बराबर मानल जाइछै। रोटी किनके अकरासबके खिएबै?” 38तब येसु ओकरासबके कहल्कै, “तोरासबसङे कतहेक रोटी छौ? जाके देख!” उसब पता लगाके कहल्कै, “पाँचटा रोटी आ दुइटा माछ।”
39तकरबाद येसु लोकसबके चौरीमे समुह बनाके बैठैले आग्या करल्कै। 40लोकसब सय-सय आ पचास-पचास गोराके समुह बनाके बैठलै। 41तब येसु पाँच रोटी आ दुइ माछ लके स्वरग दिसन ताकैत परमेस्वरके धन्यबाद देल्कै आ रोटीके टुकरा टुकरा करल्कै। लोकसबके बाइट दहै कैहके चेलासबके देल्कै। तहिनङे माछोसब बाइट देल्कै। 42तब सबकोइ पेट भरके खेल्कै। 43उबरल रोटी आ माछके टुकरा चेलासब बिछल्कै त बारह चङेरा भेलै। 44ओते रोटी खाइबला मरद-पुरुखसब मातर पाँच हजार छेलै।
येसु पानी उपरमे चललै
(मती १४:२२-३६, युहन्ना ६:१६-२१)
45तब येसु तुरन्ते आपन चेलासबके नाहमे चहैरके ओइपार बेथसेदामे अपना जाइसे पहिने जाइले लगाइल्कै। महज उ लोकसबके भिरके बिदा करैले ओतै रैहगेलै। 46भिरके बिदा कैरदेलाकेबाद येसु परथना करैले पहारमे गेलै। 47जब साँझ परलै, नाह समुन्दरके बिचमे छेलै आ येसु असगरे पखामे रहै। 48येसु चेलासबके नाह चलाबैके एकदमसे दिकत भ्यारहल देखल्कै, कथिलेत अन्हर-बिहार अगा दिसरसे बहैछेलै। करिब भिन्सरके तिन बजेदिसन येसु पहारसे निचा एलै आ तालके पानी उपर चैलके आबैत चेलासब देखल्कै आ येसु उसबसे अगा जाइले लाग्लै।
49महज उसब ओकरा पानी उपर चलैत देखके “भुत चियै” कैहके चेलासब जोरसे हल्ला करल्कै। 50कथिलेत सबकोइ ओकरा देखके डराएल छेलै। महज येसु झटदबर ओकरासबके कहल्कै, “नै डेरा, हम्ही चियौ, साहस कर!” 51तब येसु नाहमे चहरलै आ अन्हर-बिहार सान्त भेलै। तब ओकर चेलासब एकदम छक परलै। 52कथिलेत उसब पाँच हजार लोकके रोटी खियाइने छेलै से घटनाके अरथ बुझने नै छेलै आ उसबके हिरदय कठोर भेल छेलै।
53तब उसब तालके ओइपार गनेसरेत इलाकामे पुग्लै आ नाहके पखामे आनल्कै। 54जब उसब नाहसे उतरलै तखुन्ते लोकसब येसुके चिन्हल्कै। 55तब लोकसब पुरे इलाकामे दौरके गेलै आ रोगी-बिमारीसबके ओकर खटिया सहित बोइकके येसुलग आनैले लाग्लै। 56जे गाम, सहर या बस्तीसबमे येसु गेलै ओते-ओते लोकसब रोगी-बिमारीसबके हाट बजारमे राखदेल्कै। येसुके बस्तरके एक खुँट मातर छुबैले उसब ओकरा बिन्ती करल्कै आ जे-जे ओकर बस्तर छुबल्कै से सबकोइ निक भेलै।
ទើបបានជ្រើសរើសហើយ៖
मरकुस 6: MTHB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 by Mother Tongue Translators Society and Wycliffe Bible Translators, Inc.