Ha Banaroma 8
8
OMUKRISTU ALI NO KURUBA ENTUNGWA ZA YEZU KRISTU.
1Mbe hatyo tibalisingwa abali muli Yezu Kristu, abatatungwa kinangingo; 2kuba ekilagiro ch’omwoyo gw’obuzima muli Yezu Kristu chanchungwire mu kilagiro ch’ekiheno n’ech’olufu. 3Kuba echaliga kitahikibwa Ekilagiro, obwo chanogibwaga engingo, Mungu akakihicha, natuma Omwana we mu ngingo zyezabo ez’ekiheno, nasinga ekiheno mu ngingo kuber’ekiheno, 4niho obuhikire bw’ekilagiro buhikibwe mul’itwe, abatatungwa kinangingo, nawe kinamwoyo. 5Kuba abakutungwa kinangingo bakunulirwa eby’engingo; nawe abakutungwa kinamwoyo bakunulirwa eby’omwoyo. 6Mbe obwetegereza bw’engingo ni lufu; nawe obwetegereza bw’omwoyo ni buzima n’omulebo. 7Kuba obwetegereza bw’engingo buhatene na Mungu, obwo butahulira ebilagiro bya Mungu, kai butakuhicha kubihulira. 8Mbe abakutungwa kinangingo tibakuhicha kusemereza Mungu. 9Nawe imwe timuli mu ngingo, nawe mu mwoyo, raba Omwoyo gwa Mungu nigwo gutura mul’imwe. Kuba omuntu akaba atali n’Omwoyo gwa Kristu#8, 9 “Omwoyo gwa Mungu”, “Omwoyo gwa Kristu”, niwe Mwoyo Mutakatifu wenene., tali we. 10Nawe raba Kristu natura mul’imwe, engingo hatyo zifwire ha bw’ekiheno, nawe omwoyo gukulora ha bw’obuhikire. 11Kandi raba Omwoyo gw’azozile Yezu mu bafu nigutura mul’imwe#8, 11 Mwoyo Mutakatifu akutura mu bantu abali n’enema ntakatifuza; niwe akuleta obuzima bw’omwoyo, obukukira obuzima bw’engingo., ayazozile Yezu Kristu mu bafu aliha engingo zanu z’amafwerezi obuzima, ha bw’Omwoyo gwe ogutura mul’imwe. 12Mbe, bana betu, tituli n’ibanza ha ngingo, tukatungwa kinangingo#8, 12 Engingo zonka tizituleter’ebizima; zileta enaku n’obunale, tukaruba emihanda zazo. Ebizima bya kimo bikuletwa obuhabuzi bw’omwoyo.. 13Kuba mukatungwa kinangingo, mulifwa; nawe mukesy’omwoyo ebikorwa by’engingo, mulilama#8, 13 Olufu lw’engingo ti kintu: nitutine munomuno olufu lw’omwoyo..
TULI BANA BA MUNGU.
14Kuba bona abakuhaburwa Omwoyo gwa Mungu ni bana ba Mungu. 15Kuba timwaherwe omwoyo gw’obwiru, mwikare mu butini; nawe mukahabwa Omwoyo, ogubagira bana, niho muhiche kugamba muti: Abba, Tata. 16Omwoyo gwonene gukumanyisya omwoyo gwetu okwo tuli bana ba Mungu. 17Mbe raba tuli bana, hona tuli bahunguzi: bahunguzi ba Mungu, tukobere obuhunguzi na Kristu, tukaba nitusaswa nage, niho tuhiche kukuzibwa hamo nage. 18Kuba nkuchwa nti: Obusasi bwa hati tibukuhicha kulenganisibwa n’ikuzo elilibonekera mul’itwe mu naku z’obusyo. 19Nicho ebihangwa byona bikulindiririra obuboneki bw’abana ba Mungu#8, 19 Mungu akahangira abantu ebintu byona, hatyo bikususana kuti bikobere nabo hamo ekinaranazo hamo omuhero.. 20Kuba ebihangwa bikatwarw’obubi bitakwenda, mu mani g’ayabitwere mu butegeza, 21obwo ebihangwa byonene bilichunguka mu bwiru bw’obuzunde, bibone obweyagazi bw’ikuzo ly’abana ba Mungu.
OBUTEGEZA BW’ABANA BA MUNGU.
22Kuba tukumanya okwo buli kihangwa chona kikugenera kuti henda kikurumw’obusungu, kuhika hati; 23kai chonene chonka pai, nawe n’etwe twena, abali n’emigaso zo kutandika z’Omwoyo, tukugenera itwe abene, nitulindirira kugirwa bana ba Mungu, nibw’obuchunguki bw’engingo zetu. 24Nimwo mu butegeza tukuchungukira. Nawe obutegeza obubonwa tibukili butegeza, kuba ech’obona, okitegeza ota? 25Mbe ka tutegeza echo tutabona, tukilindirira n’obweguminsiriza. 26Mbe nikwo hatyo Omwoyo gukuzuna obunoge bwetu: kuba titukumanya echo tuli no kusaba Mungu mu sala zetu; nawe Omwoyo gwonene gukutusabira n’obugenezi obutagambwa. 27Kandi akwetegereza emitima, niwe akumanya eby’Omwoyo gukwegonga, kuba akusabira abatakatifu ebyo Mungu akwenda. 28Mbe tukumanya okwo byona bikugasira abakwenda Mungu, abo yasozire babe batakatifu. 29Kuba abo yamanyire mu bumanyi bwe, akabasora basusane n’olulengo lw’Omwana we, niho wenene abe muzigezo w’abatabani babo bengi. 30Kandi abo yasozire, akabayeta; n’abo yayesire, akabatakatifuza; kai abo yatakatifwize, akabakuza. 31Tugambe ki kandi? Mungu akatwemaho, akuturwana ni ga? 32Wenene k’atasasire Omwana we wa kimo, nawe yamuhereze kubera itwe twena, akwanga ata kutuha byona nage?#8, 32 Mungu akukoler’abantu bazima nk’abana be, nabaha ebibasasire byona.
33Ni ga alilega abasozirwe Mungu? Mungu wenene niwe akubatakatifuza. 34Alibalamura akabasinga ni ga si? Kristu Yezu ayatufwerere, kandi ayazokire naikara ha bulyo bwa Mungu, niwe akututwezera. 35Mbe ni kiha si ekilitutaganisya n’obwenzi bwa Kristu? Si hamo obusasi? hamo obunale? hamo enzala? hamo obuzuka? hawo ebitegezi? hamo obunaranaza? hamo embanda? 36(Nk’okwo chandikirwe kiti: Tukwitirwa iwe buli lunaku, bakutulenganisya nk’enabalega zo kubaga). 37Nawe ebyo byona tukubisinga, kubera ayatwenzire. 38Kuba nkumanya kimokimo okw’olufu, nali obulame, nali Bamalaika, nali Abanangoma, nali Ab’amani, nali ebya hati, nali ebiliza, nali obusiniriza, 39nali eby’oluguru, nali eby’ifwo, nali ekihangwa kindi chona, bitalihicha kututaganisya n’obwenzi bwa Mungu, obuli muli Kristu Yezu Omukama wetu.
ទើបបានជ្រើសរើសហើយ៖
Ha Banaroma 8: KED1946
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
First published in 1946 by the White Fathers. Published online with the permission of the White Fathers.
