Ha Banaroma 4
4
IBRAHIMU AKATAKATIFUZIBWA KWIKIRIZA KWE.
1Mbe hatyo tugambe tuta? tata Ibrahimu akabona ki, ha bw’engingo? 2Kuba Ibrahimu, akatakatifuzibwa ebikorwa, akuhicha kwesima, nawe ha bwa Mungu pai. 3Enandiko zikugamba ki mbele? Ziti: Ibrahimu akekiriza Mungu, kai echo kikamubalirwa nk’ibanza. 4Mbe akukol’omulimo, omuhero taguhabwa nk’obugeni, nawe nk’ibanza. 5Kandi atakukola, nawe akekiriza omutakatifuza w’omuheni, kwikiriza kwe kukumubalirwa nk’ibanza, n’okwo omuku gw’enema ya Mungu guli. 6Nikwo Daudi akutenga, k’akugamba omugisa gw’omuntu akusemerezya Mungu, nabalirwa obuhikire, atali n’ebikorwa, 7nagira ati: Bali n’omugisa abakizibwe entambala zabo, n’abo ebiheno biswekirwe. 8Ali n’omugisa owe Mungu atamubalire ekiheno.
IBRAHIMU N’ISE ABAKWIKIRIZA BONA.
9Nawe si omugisa ogwo ni gw’abasazirwe bonka, nangu ni gw’abatasazirwe bona? Mbe twagamba tuti: kwikiriza kwa Ibrahimu kukamubalirwa nk’ibanza. 10Hatyo kukamubalirwa kuta? Yasazirwe, nangu atasazirwe? Yasazirwe pai, nawe atakasazirwe. 11Hatyo akahabwa olunyamo lwo kusara nk’ekimanyisyo ch’obuhikire bwo kwikiriza, obwo yaliga ali nabwo atakasazirwe, abe ise abakwikiriza bona batasazirwe, niho kwikiriza kwabo kubabalirwe nk’ibanza; 12hona abe ise abasazirwe, abataherwe kusara chonka, nawe abakuruba omuhanda gwo kwikiriza, okwo tata Ibrahimu yaliga ali nakwo atakasazirwe.
13Kuba omulago ogwo Ibrahimu yaherwe, hamo oluganda lwe, gwo kuhungul’ensi, tigwahikizibwe Ekilagiro, nawe obuhikire bwo kwikiriza. 14Raba Ekilagiro nicho kikubagira bahunguzi, kwikiriza tikukigasa, n’omulago gwona tigukiliho. 15Kuba Ekilagiro kikuleta ebiniga: ekilagiro kitaliho, tibakitambuka. 16Mbe ekihungulo kikuruga mu kwikiriza, niho omulago gwizire busa chonka oluganda lwona, abaherwe Ekilagiro bonka pai, nawe hona abali no kwikiriza kwa Ibrahimu, tata wetu twena, 17(nk’okwo chandikirwe kiti: Nkakugira ise amahanga mengi) ebusyo ya Mungu, owe yekirize, akuzor’ abafu, nayeta ebitaliho nk’ebiliho. 18Ka yategeze, obutegeza butaliho, akekiriza kubera ise amahanga mengi, nk’owo chaliga kimugambirwe kiti: Obuzare bwawe buliba butyo. 19Tiyanogire mu kwikiriza, tiyetegereze okw’engingo ze zaliga zyafwire, obwo yaliga ali n’emyaka kuti igana, n’okwo Sara yaliga atakihicha kuzara. 20Tiyatimatimize omulago gwa Mungu, akabula kugwikiriza, nawe akeguminsiriza mu kwikiriza, nakuza Mungu, 21obwo yamanyaga okw’ali n’obuhicha bwo kukola ebyo yalagire. 22Nich’echo chamubalirirwe nk’ibanza. 23Nawe tichandikirwe kubera wenene wenka, kiti: Kikamubalirwa nk’ibanza, 24nawe kubera itwe twena, abalibalirwa batyo, itwe abakwikiriza ogwo, ayazozile mu bafu Yezu Kristu, Omukama wetu, 25ayaherezibwe kuber’ebiheno byetu, nazoka, atutakatifuze.
ទើបបានជ្រើសរើសហើយ៖
Ha Banaroma 4: KED1946
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
First published in 1946 by the White Fathers. Published online with the permission of the White Fathers.
