Ebikorwa 25
25
PAULO MU MESO GA FESTO. — NAYAMBAZA KAIZARI. — FESTO N’OMUKAMA AGRIPA.
1Mbe Festo ka yahikire mu butware bwe, enaku isatu nizirabaho, nanegera Yeruzalemu kuruga Kaizariya. 2Abasaserdoti bakuru n’abakuru b’Abayahudi nibamuzaho kuchulira Paulo; nibamulembereza, 3nibamutweza asindike abantu kuleta Paulo Yeruzalemu, batyo bamutegere bahiche kumwitira mu muhanda. 4Nawe Festo nasubamo okwo Paulo akwikara Kaizariya, n’okwo na wenene akusubayo bwangu. 5Nagira ati: Mbe mul’imwe abakuhicha tulalengetuka twena; raba omuntu ogwo ali n’entambala, bamuchulire.
6Tiyamazire muli bonene naku ningi kukira munana hamo ikumi, nalengetuka Kaizariya, bwire kucha naikara ha kitebe che cho kulamuliraho, nalagira kuleta Paulo. 7Ka bamulesire, Abayahudi bengi, abaliga barugire Yeruzalemu, nibamuta hagati, nibamuchwererera entambala ningi, kai mpango, ezo bonene baliga batakuhicha kugumisya. 8Paulo nayetonganira nagira ati: Ine tinahenire, na mu Kilagiro ch’Abayahudi pai, na mw’eklezia pai, na hali Kaizari pai. 9Nawe Festo kwenda kusemereza Abayahudi nasubiramo Paulo ati: Okwenda kunegera Yeruzalemu kulamurwa ine muli ebyo? 10Paulo nagira ati: Ine ndi mw’ilamuliro lya Kaizari, nimwo omwo ndi no kulamulirwa; ine Abayahudi tinabahenere, nk’okwo n’ewe okumanya kuzima. 11Kuba, raba nahenire, hamo nakozire entambala yo kwitwa, hona tinkwegana kufwa; nawe raba ebyo banu bakunchulira bili bya busa, tihaliho akuhicha kubampa. Ine nkwambaza Kaizari. 12Aho Festo, ka yafumwere n’abalamuzi, nagira ati: Wayambaza Kaizari, olagenda hali Kaizari.
13Ka zarabireho naku noro, omukama Agripa na Berenike nibalengetuka Kaizariya kuza kubwacha Festo. 14Ka bamazireyo naku ningi, Festo namanyisya omukama ebya Paulo, nagira ati: Haliho omuntu ayasigirwe Felikisi abohirwe; 15aho sanga ndi Yeruzalemu, abasaserdoti bakuru n’abagurusi b’Abayahudi beza kungambira ebigambo bye nibayenda anaranazibwe. 16Ine nimbasubiramo nti: Ti ntungwa z’Abanaroma kulamula omuntu wena, onu ayachulirwa atakabonene n’abamuchulira meso n’agandi, akabona omwanya gwo kwetonganira kwo kumaraho entambala ze. 17Mbe ka basumbire hanu, tinalangezire, bwire kucha ninikara ha kitebe cho kulamuliraho, nindagira kuleta omuntu ogwo. 18Abatonganisya be ka bezire, tibamuchuzire entambala n’emo nk’ezo nachwaga nti: yazikora; 19nawe bamuchuliraga eby’edini yabo, na ha muntu ogwo Yezu ayafwire, owe Paulo akweta ati: akulora. 20Ine nintimatimya mu kigambo chezabo kityo, nimmugambira nti: Raba noyenda kuza Yeruzalemu, niyo olamulirwe ebigambo bityo. 21Nawe Paulo nayambaza, nayenda kulindwa, ahiche kulamurwa Ogusto, nindagira kumulinda kuhik’aho ndimusindikira kuza hali Kaizari. 22Aho Agripa nagambira Festo ati: N’ene nena nkwenda kuhulira omuntu ogwo. Nagira ati: Olamuhulira nencha.
23Mbe bwire kucha Agripa naiza na Berenike n’ikuzo lingi, nataha mu lukale n’abakuru b’abasirikale n’abaseza nfura zo mu charo, Festo nalagira, nibaleta Paulo. 24Festo nagira ati: Lama, Rugaba Agripa, n’emwe abaseza mwena abali n’etwe hanu, mukubona omuntu onu, owe embaga yona y’Abayahudi banegomberere Yeruzalemu, nibasaba nibayomba bati: Tahikire kwikara nalora. 25Nawe ine nkabironda, ninsanga ataliho n’ekigambo kihikire cho kumwitira; kandi na wenene ka yayambeze Ogusto, nimba wo kwetegeka kumusagara. 26Hali wenene tindiho n’ekigambo kikomereze cho kwandikira omukuru; nicho namuletera hal’imwe, nawe munomuno hal’iwe, Rugaba Agripa, niho mbone ebyo kwandika, ka mulamara kumubuza; 27kuba nabona okwo kusagara embohe otatandikire kumanyisya ebyo bakumuzunanizya tikuhikire.
ទើបបានជ្រើសរើសហើយ៖
Ebikorwa 25: KED1946
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
First published in 1946 by the White Fathers. Published online with the permission of the White Fathers.
