Ebikorwa 23
23
PAULO OBUSYO Y’ABASASERDOTI. — NIBALAHIRA KUMWITA. — NASAGARWA KAIZARIYA.
1Paulo naroborera abalamuzi ameso, nagira ati: Baseza mwe, bana betu, kuhika lero nagendaga n’omutima muzima gwona mu meso ga Mungu. 2Nawe Ananiya, omukuru w’abasaserdoti, nalagira abaliga bali hehi nage kumutera ha munwa. 3Aho Paulo namugambira ati: Mungu alikutera, iwe ndugu ehomirwe omula. Iwe, oikere kundamula mu ntungwa z’Ekilagiro, kai okutambuka Ekilagiro nolagira kuntera. 4Abaliga baliho nibagira bati: Okuzuma omusaserdoti mukuru wa Mungu si? 5Paulo nagira ati: Bana betu, sanga ntakumanya okw’ali musaserdoti mukuru; kuba chandikirwe kiti: Otazumaga omukuru w’ihanga lyawe. 6Paulo ka yamanyire okw’embaga endi yaliga eli y’Abasadusayo, endi y’Abafarizayo, nahamukira abalamuzi ati: Baseza mwe, bana betu, ine ndi Mufarizayo, mwana w’Abafarizayo; nalamulirwa ebyo kutegeza mu kuzoka kw’abafu. 7Ka yagambire atyo, enkungana neimuka mu Bafarizayo n’Abasadusayo; embaga netagana. 8Kuba si Abasadusayo bagiraga bati: Tihaliyo kuzoka, na bamalaika pai, n’emyoyo zona pai; kai Abafarizayo bekirizaga ebyo byona. 9Nihabaho eyombo ningi; abandi bo mu Bafarizayo nibemuka nibakungana nibagira bati: Itwe titukubonaho kabi ha muntu onu; iwe si hamo yafumorerwa omwoyo hamo mumalaika? 10Eyombo ka yakanire, omukuru w’abasirikale natinilira Paulo kutemurirwa bonene, nalagira abasirikale kuhanantuka, bamwihe muli bonene, bamusagare mu mukobo. 11Mu kiro echarubireho Omukama namubonekera namugambira ati: Olaguma; kuba nk’okwo wammanyisize Yeruzalemu, nikwo oli no kummanyisya na Roma.
12Obwire ka bwachere, abandi bo mu Bayahudi nibesoroza, nibelahira bati: Tutakamwisire, itwe titukulya, kai titukunwa. 13Abelahire batyo baliga bali bantu kukira makumi ana. 14Nibagenda ha basaserdoti bakuru na ha bagurusi nibagira bati: Tulahire nitwelahirira kuroza kintu n’ekimo pai, tutakesire Paulo. 15Mbe imwe hamo n’abalamuzi mugambire omukuru w’abasirikale amulete hal’imwe, musane nk’abakwenda kumanya kuzima ensonga ze; itwe twetegekire kumwita atakahikire. 16Omwana w’omuhara wabo Paulo ka yahulire emitego ezo, naiza nataha mu mukobo nagambira Paulo. 17Paulo nayetaho omo mu bakuru b’abasirikale igana, nagira ati: Nosagare omusigazi onu ha mukuru wanu, kuba ali n’ekigambo cho kumutengera. 18Mbe ogwo namutwara, namusagara ha mukuru, nagira ati: Embohe Paulo yandembereza nkuletere omusigazi onu, ali n’ekigambo cho kukufumorera. 19Omukuru ogwo nakwata omusigazi ha mukono namusubya ha lubazu, namubuza ati: Okwenda kungambira kiha? 20Onu nagira ati: Abayahudi bagambenwe kukusaba olete Paulo nencha mw’ilamuliro, babe nk’abakwenda kumanya ensonga ze kuzima. 21Mbe iwe otabekiririza; kuba abantu abamutegere ni bengi kukira makumi ana, abayelahirire obutalya n’obutanwa kuhika bamwite; na hati bategerekire, balindirire iwe obafuhe. 22Mbe omukuru w’abasirikale nasindika omusigazi kugenda, namuzibira kugambira omuntu okwo yamumanyisya ebyo.
23Mu bakuru b’abasirikale igana nayetaho babili nabagambira ati: Mute aho abasirikale magana abili bo kugenda Kaizariya, abakuhanama efarasi makumi musanzu, n’abakwasi b’amachumu magana abili, mu saha ya kasatu ya mu kiro; 24muteho n’efarasi yo kuhanamyaho Paulo, mumuhiche kuzima ow’omutwale Felikisi. 25Yatinaga Abayahudi kumutwara bakamwita, kandi bakamubehereza bati: Yahongererwa. 26Nayandika ebaruwa elimo ebigambo binu: Klodi Lisiya akubwacha omugerezi mukuru Felikisi. 27Omuntu onu akakwatwa Abayahudi, bahigire kumwita, ka nezire n’embaga yange, nimmukiza, namazire kumanya okw’ali Munaroma; 28ninenda kumanya entambala eyo bamuzunanisize, nikwo kumusagara mw’ilamuliro lyabo. 29Nimmusanga nibamuzunanisya ebigambo byo mu Kilagiro chabo, nawe hatalimo ekihikire kumwita hamo kumuboha. 30Ka nahulire eby’emitego ezo baliga bamutegire, nikwo kumusindika hal’iwe, nimmanyisya n’abachulizi be baze kugamba hal’iwe. Buche.
31Mbe abasirikale, nk’omwo baliga balagirirwe, nibatwara Paulo, nibamusagara ow’Antipatri mu kiro; 32bwire kucha, ka bamazire kusindika abahanami b’efarasi kugenda nage, nibasuba ha mukobo. 33Ka bahikire Kaizariya, nibaha omutware ebaruwa nibayemerera obusyo ye na Paulo. 34Ka yagisomire, nabuza ensi eyo yarugireho; ka yamanyire okw’ali wa Silisiya, 35nagira ati: Abakukutonganisya ka baleza, ndakuhulira. Nalagira kumulindiriza mu nzu ya Herode.
ទើបបានជ្រើសរើសហើយ៖
Ebikorwa 23: KED1946
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
First published in 1946 by the White Fathers. Published online with the permission of the White Fathers.
