Ebikorwa 14
14
PAULO NA BARNABA BALI IKONIYA, NA LISTRA NA DERBE. — NIBASUBA ANTYOKIYA.
1Mbe Ikoniya nibahikira kutahira mw’isomero ly’Abayahudi, nibafumora batyo, netamwa embaga mpango y’Abayahudi n’Abagereki neikiriza. 2Nawe Abayahudi abasagire batekirize nibasamura abasenzi nibemuch’ebiniga byabo ha batabani betu. 3Mbe nibamarayo naku ningi nibakora ha Mukama batakutina, wenene namanyisya ekigambo ch’enema ye, nagira amahano n’ebikumyo kukolerwa mu ngaro zabo. 4Embaga yo mu charo echo netagana: abandi baliga basumbire n’Abayahudi, abandi bakobire n’Entumwa. 5Mbe abandi bo mu Bayahudi na mu basenzi hamo n’abakuru babo nibetegeka kubazuma no kubalasy’amabale. 6Ka basombokerwe, niberukira mu byaro bya Likoniya, Listra na Derbe, n’ensi yona y’oluguyo, okwo niyo nibaba bo kwolekerera Evanjeli.
7Omuntu ogwo wa Listra yaliga arwere amaguru, aikere ali mulema kuruga mu nda ya nina, yaliga atakalibataga nangu. 8Ogwo nahulira Paulo nafumora. Paulo namwetegereza, nabona okw’ali no kwikiriza kwo kukizibwa, 9namugamgira n’ilaka ihango ati: Imereza amaguru gawe, ogororoke. Nachuma, nalibata. 10Mbe embaga ka yabwene ebyo Paulo yakozire, nibayelez’amalaka gabo mu lulimi lw’ekikoniya, nibagira bati: Bamungu bakesusanisy’abantu nibahanantukira mul’ itwe. 11Barnaba nibamweta Yovi, kandi Paulo, Merkuri, obwo wenene niwe yaliga ali mukuru w’ekigambo. 12Omusaserdoti wa Yovi, ayaliga ali ha mulyango gw’echaro, naleta amanumi n’engata y’obwasyo ha mulyango, nayenda kutamba n’embaga. 13Entumwa Barnaba na Paulo ka bahulire, nibatemul’enkanzu zabo, nibachumira ha mbaga nibahamuka, 14nibagira bati: Mwakolera ki ebyo, baseza? N’etwe tuli bantu abakufwa nk’emwe, tukubagambira kuleka aga busa ganu, muhindukire hali Mungu asingire, ayahangire igulu n’ensi n’enanza, na byona ebilimo, 15ayalekire amahanga gona, mu myaka ezilahwereho, kuraba mu mihanda zago. 16Nawe hona tiyalekire kwemanyisya, akakola kuzima, nagwisy’enzula kuruga mw’igulu, nalet’enaku z’omwero, naizuz’emitima zetu ebilyo no kusemererwa. 17N’ebigambo ebyo nibazibira embaga n’amani kubatambira.
18Nibeza Abayahudi bandi b’Antyokiya na Ikoniya, nibakongakonga embaga, nibalasya Paulo amabale, nibamuhurucha mu charo, nibachwa bati: yafwa. 19Nawe abahemba ka bamwekumirireho, naimuka nataha mu charo, kai bwire kucha naimuka na Barnaba kugenda Derbe.
20Ka bamazile kumanyisya Evanjeli mu charo echo no kwolekerera bengi, nibasuba Listra na Ikoniya n’Antyokiya, 21nibagumisy’emitima z’abahemba, nibabahaniriza bagume mu kwikiriza, n’okwo tuli no kuhika mu bukama bwa Mungu, turabire mu muhanda gw’ebinaranazo bingi. 22Ka batereho abasaserdoti mu buli eklezia, no kulembereza no kusiba, nibabahereza ha Mukama owe baikirize. 23Nibaraba Pisidiya nibahika Panfiliya. 24Nibafumora ekigambo ch’Omukama muli Perga nibalengetuka Ataliya; 25ka barugireyo, nibasyabara kugenda Antyokiya, okwo niyo baterweho enema ya Mungu ha mulimo ogwo bahikize. 26Ka bahikize, nibasumbya Eklezia, nibatenga ebikorwa ebyo Mungu yabahere kukola, n’okwo yakingulire abasenzi omulyango gwo kwikiriza. 27Bakamarayo naku ningi n’abahemba.
ទើបបានជ្រើសរើសហើយ៖
Ebikorwa 14: KED1946
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
First published in 1946 by the White Fathers. Published online with the permission of the White Fathers.
