Ebikorwa 11
11
PETRO NA BATISIMU Y’ABASENZI. — EKLEZIA Y’ANTYOKIYA NETANDIKA.
1Entumwa na batabani bazo, abaliga bali Buyahudi, nibahuliza okw’abasenzi bona bayanankwire ekigambo cha Mungu. 2Mbe Petro ka yanegere Yeruzalemu, abaliga basazirwe nibamuhakanisya, 3nibagira bati: Osagerwe ki mu bantu abatasazirwe, okalya nabo? 4Aho Petro natandika kubarobeza ebyagwire nagira ati: 5Naliga ndi mu charo cha Yope, nindembereza, mbe nkatwarwa mu mwoyo, nimbonekerwa, nimbona elintu elyo nilihanantuka, kuti itambala ihango, nilihananturwa kuruga mw’igulu niliza hal’ine, likwasirwe ha mbazu zalyo ina; 6nindoramo ninetegereza, nimbona enamenswa z’amaguru ana za ha nsi, n’ebikaka, n’ebikwekwesa ha nsi n’enoni zo mu lutumba. 7Kandi nimpulira n’ilaka nilingambira liti: Petro, imuka; obage, olye. 8Ine ningira nti: Nangu, Mukama wange, kuba ekintu ch’obuyaga n’ekilofu tikikatahaga mu kanwa kange. 9Ilaka niliruga mw’igulu nilisubamo lwa kabili liti: Ebyo Mungu yasemeze, otabyeta oti: ni bilofu. 10Mbe ebyo nibikorwa kasatu, niho byona nibitwarwa kunegezibwa mw’igulu. 11Aho honka nibo n’abaseza basatu, bemerere mu k’omwo naliga ndi, batumirwe kuruga Kaizariya kwiza hal’ine. 12Kandi Omwoyo nigungambira kugenda nabo, nzira kutimatimya. Nitwiza nabo na batabani betu banu mukaga, nitutaha mu nzu y’omwozo ogwo. 13Naturobeza okwo yabwene mumalaika aimerere mu nzu ye namugambira ati: Tuma abantu Yope kweta Simoni, owe bakweta bati: Petro; 14ogwo niwe alakutengera ebigambo eby’olichungukiraho, iwe n’abo mu ka yawe bona. 15Mbe ka natandikire kufumora, Mwoyo Mutakatifu nabahanantukira, nka hal’itwe ha butandikiro. 16Nimba wo kwizuka ekigambo ech’Omukama yagambire ati: Kuba Yohana yabatizaga mu menzi, nawe imwe mulibatizibwa mu Mwoyo Mutakatifu. 17Mbe raba Mungu yabahere enema egyo yonene nk’etwe abekirize Omukama Yezu Kristu, kai ine n’ine ga mpiche kuzibira Mungu? 18Bonene ka bahulire ebyo, nibasima Mungu nibagira bati: Waza! Mungu ahere n’abasenzi kutamwa, niho babone obulame.
19Mbe abaliga basambazibwe kunaranazibwa okwabereho ha bwa Stefano, nibalibata kuhika Fenisya na Sipriya n’Antyokiya, tibayolekereraga muntu ekigambo, nibo Abayahudi bonka. 20Muli bonene haliga halimo abandi, abaseza ba Sipriya na Sirene; ka bahikire Antyokiya, nibafumora n’Abagereki, nibayolekerera Omukama Yezu. 21Omukono gw’Omukama gwaliga guli na bonene; olubaro luhango lw’abekirize nibahindukira ha Mukama. 22Ekigambo echo nikihika mu matwi g’Eklezia eyaliga eli Yeruzalemu, nibatuma Barnaba kuza Antyokiya. 23Ogwo ka yahikireyo, akabona enema ya Mungu, akasemererwa, nabahana bona bagume ha Mukama n’omutima gwetegekire; 24kuba yaliga ali muntu muzima, aizwire Mwoyo Mutakatifu no kwikiriza. Embaga ningi neruba Omukama. 25Kumara Barnaba nagenda Tarsi kuhiga Sauli; ka yamubwene, namuleta Antyokiya. 26Nibamarayo mwaka gwona mw’Eklezia egyo, nibayolekerera embaga ningi; abahemba nibatandika Antyokiya kwetwa bati: bakristu.
27Mu naku ezo abalagi#11, 27 Nibo abakristu abahabwaga engabirano y’obulagi. ba Yeruzalemu nibeza Antyokiya; 28nihemukaho omo muli bonene, izina lye Agabi, nagambisibwa Omwoyo okw’enzala mpango ekwiza mu nsi yona, eyabereho mu naku za Klodi. 29Abahemba nibetegeka, buli muntu mu lulengo lw’ebyo yaliga ali nabyo, kuhwera batabani babo ba Buyahudi. 30Bakabikora, nibasagalira abagurusi mu mikono za Barnaba na Sauli.
ទើបបានជ្រើសរើសហើយ៖
Ebikorwa 11: KED1946
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
First published in 1946 by the White Fathers. Published online with the permission of the White Fathers.
