Acts 14
14
CHAPTIR FOWRTEEN.
Had ony oʼ Christʼs disciples sic ups and doons as Paul? Gaun to be worshipped; and than cloured wiʼ stanes, and left for deid! But itʼs aʼ weel wiʼ him, langsyne!
1Noo, it cam aboot in Iconium, that they gaed intil the Jewsʼ kirk, and sae spak, that thar believed — baith oʼ Jews and Greeks — an unco thrang.
2But the misbelievin Jews steered up and misleared the sauls oʼ the Gentiles, and garʼt them be turned again the brethren.
3Sae, a gey while they bade, speakin oot freely iʼ the Lord, wha bure witness to the word oʼ his love, grantin tokens and ferlies to be dune by their hauns.
4But the bouk oʼ the citie was dividit; and some war wiʼ the Jews, and some wiʼ the Apostles.
5And whan thar was an onset, baith oʼ the Gentiles and Jews, wiʼ the rulers, to dishonor them and stane them,
6They kent oʼt, and fled oot‐by intil the cities oʼ Lycaonia, to Lystra and Derbe, and the kintra thar‐aboot.
7And thar they proclaimed the Joyfu‐message.
8And at Lystra, thar was sittin a man, feckless in his feet, a lameter frae his mitherʼs womb, wha never gaed.
9The same man heard Paul speak; wha, strickly observin him, and perceivin that he had faith to be saved,
10Cryʼt oot wiʼ a soondin voice, “Staun ye up on yere feet!” And he lap up, and walkit aboot.
11And whan the thrang saw what Paul had done, they cryʼt oot iʼ the tongue oʼ Lycaonia, “The gods, appearin like men, hae come doon to us!”
12And they war caʼin Barnabas, “Jupiter”; but Paul, “Mercurie,” seein he was the main speaker.
13And the priest oʼ Jupiter, whase shrine was fornent the citie, brocht owsen and garlands tae the ports, along wiʼ aʼ the thrang, and wad hae dune sacrifeece.
14But, hearin oʼt, the Apostles, Barnabas and Paul, rivin their manteels, ran forrit amang the folk, cryin oot,
15And sayin, “Men! why are ye doin sic things? We are but men, oʼ like natur wiʼ you; deliverin to ye the Joyfuʼ‐message, that ye soud turn awa frae sic witless things, to the leevin God, wha made heeven and yirth, and the sea, and aʼ things in them.
16“Wha, in bygane time hindered‐na the nations to gang their ain gate;
17“Though he left‐na his sel wantin testimonie — doin gude frae aboon, giean us rain and frutefuʼ seasons; fillin fuʼ oʼ joy yere hearts.”
18And eʼen wiʼ thir sayins, jimply restrained they the thrang, that they soudna sacrifeece to them.
19But thar cam Jews frae Antioch and Iconium; and, perswadin the thrang, and #14:19 Tak tent, hoo ae day they war adored, and again in a handclap staned! The praise oʼ the warld is to be as little heedit as its spite!stanin Paul, they harled him oot‐by frae the citie; judgin him to be deid.
20The disciples stanin roon, hoobeit, he, risin up, cam intil the citie; and neist day gaed forth wiʼ Barnabas to Derbe.
21Deliverin the Blythe‐message to that citie as weel; and, makin mony disciples, they returned to Lystra and Iconium, and to Antioch.
22Makin steive the sauls oʼ the disciples, entreatin them to bide iʼ the faith; sayin, “Throwe a hantle oʼ afflictions maun we win to the Kingdom oʼ God.”
23And, appointin for them elders in ilka assembly, and wiʼ prayer and fastin — they gied them ower to the Lord in wham they pat their trust.
24And gaun throwe Pisidia, they cam intil Pamphylia;
25And, proclaimin the word in Perga, they cam doon the lenth oʼ Attalia;
26And frae that they sailed for Antioch, frae whaur they had been gien ower to the favor oʼ God for the wark they performed.
27Sae, haein come, they convened thegither the assembly, and gaed ower aʼ things that God did wiʼ them; and hoo that he had unsteekit a door oʼ faith for the Gentiles.
28And they bade a gey while wiʼ the disciples.
ទើបបានជ្រើសរើសហើយ៖
Acts 14: SCO1904
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Translated by Rev William Wye Smith. Published in Paisley, Scotland in 1904.
