Nʋnʋgbɩɩ 22

1 Ɔ lä 'bäsɩnyɩ‑, bhelienyɩ‑! ‑Pɛpɛɛ' nä, a poo'o yɩ 'nyukwli ‑yä, n 'kä n yëkuu' wlu ci! 2‑Maa, wa nii‑ lä 'yi nynä Eblëë‑wälɩɩ' Pɔlʋ sonönʋwa bhä nä, kä waa' ‑lefɩɩn plöö‑ ‑siin. 'Nɩ ɔ yiwa soo, 3ɔ lä n ‑glö 'Zufʋyu. Silisiibhlɩ 'kʋ 'duu wa laa lä Tasö nä, ‑mɔɔ wa ‑gänönö'ö. ‑Mä ‑mää Zolizalɛmʋduu' n 'bhʋä‑. Nyɩkpɔɔ wa laa lä Gamalɩɛ nä, ɔmɔ yëku n 'cɩä‑. ‑A 'bäsɩɩ' ‑lɔɔ nä, kä Gamalɩɛ cɩä'ä 'mʋ wɩa. Sä a 'tɛ lä ‑lää ‑zɩkä ‑Jlämaa' ‑za 'yikʋ nä, ‑amʋ ‑mä 'sɩɩ, kä n 'tɛ bhä sää 'titi 'clöö aa ‑za 'yikʋ. 4'Naa 'yikʋ 'tɛnɔɔ 'mnö nä, nyɩkpa 'fɩɩn ‑wa bhlü bhlä Kwlienyɔɔ' ‑Blɔɔ nä, 'ŋʋʋ 'ŋwnɩä ‑yä ŋwadie‑, kä n ‑gbä 'nɩ wa nii‑ ‑zʋɛ. N ‑bhlü ‑nänʋä 'kʋ 'nɩ n pʋwa‑ ‑jɩɩ'. 5'Cibhisänyɔ 'kädɔɔ, ɔ ‑yä ‑Dɔɔpänyʋa 'sɔ, wälɩnɩ n ci lä ‑lää nä, wa yi mii 'nɩ wa yi ɩɩ' ‑dläfʋɛ lü. Kä wa ‑jɩjlä 'bɔɔgʋ 'nɩ wa nyɛɛ'ɛ 'mʋ nynä Damasöduu' bhelia ‑wa plöö‑ lä 'Zufʋnyʋä nä, n ‑fʋwanyʋ. 'Duu 'mnö ‑mɔɔ n ‑mʋ lä ‑yä, ‑wa ‑kʋ bhlä ‑mɔɔ nä, n 'kwa 'kʋ bhlü ‑yä, n 'kwa gʋä. Ɩyä n 'kwa Zolizalɛmʋduu' ‑lä ‑yä, wa 'kwa ‑kä gbenyenyisä klä.

Pɔlʋ sää sɩ plöö‑ lä 'kʋ 'nɩ ɔ ‑yibhë lä Zozii nä

6Nä 'ylʋ 'kä bhɛ 'sää ‑tiin 'kʋ ŋëë, n ‑kʋ Damasöduu' mʋdä 'nɩ n 'mɛmɛ bhɛ 'duu 'nɩ 'kpobhuu ‑bhlo 'kʋ, zëlüü' lɩɩ‑ ŋänɩä lä sää kpänyɩ nä, ɩ ‑bha ‑laagɔɔ' 'nɩ ɩ ‑ŋänɩä'ä 'kʋ. 'Nɩ ɩ ‑nʋ ‑düdë 'nɩ a ‑glänö‑ö 'klʋ. 7‑Mä n ‑bhlü ‑zɔɔ 'nɩ n nuu‑ nuwälɩ, 'nɩ ɩ cii‑, ɩ lä Sɔlʋ‑! Sɔlʋ‑! Sɩ ‑kʋ bhä 'nɩ ‑n nyɛɛ'ɛ bhä nyäkälɩɩ? 8'Nɩ n yi 'ylä nynä ‑mä, ‑naa 'ŋnö bhä, Kwlienyɔ‑? 'Nɩ nuwälɩɩ yi ci, ɩ lä ‑amʋ Nazalɛtöö' Zozii lä! ‑Amʋʋ‑ ‑n ŋʋ lä nyäkälɩɩ'! 9‑Mä, nyɩkpaa ‑wa ‑yä ‑amʋ 'sɔ nää‑ bhlä nä, zëlüü ‑ɩ ‑ŋänɩä lä nä, wa 'nimʋɩ‑ 'yi. ‑Mä nuwälɩɩ ‑ɩ sonö'ö bhlä nä, wa 'nɩɩ ‑wʋ 'numʋ‑. 10'Nɩ n yi 'ylä bʋkʋ, n nä, Kwlienyɔ‑, säsä n nä n nʋ bhää? Kwlienyɔɔ lä ‑n ‑bha 'kʋ ‑yä ‑n mʋ Damasö‑duu 'mnö ‑mä, ‑n gä ‑mɔɔ ‑ŋëë nä, sä Laagɔ ylä lä nynä ‑n nʋ nä, wa yi‑i sɔɔ paa. 11‑Maa, sä zëlüü' ‑ŋnäzälöö ‑wlä'ä bhɛ lä 'yikʋ nä, nn' 'ni bhɛ 'kwläkwlä sä. Ɩ ‑kä 'ŋnö nä, nyɩkpaa n ‑yʋwa 'sɔ nää‑ bhlä nä, kä wa ‑klä'ä sɔ 'nɩ wa yi'i Damasöduu' fä.

12‑Mä ‑mɔɔ Damasöduu' nä, nyɩkpɔ ‑bhlo ‑kʋ bhä ‑mɔɔ 'nɩ, 'Zufʋnyʋa 'fɩɩn ci bhä ɔɔ' 'nää. Ɔmɔ wa laa bhä Ananɩasö. Ɔ ‑glö bhä 'sɩɩ Laagɔɔ' bʋbɔnyɔ 'titi. 'Nɩ ɔ ŋʋ bhä Moyizöö' ‑Jlämaa 'klʋkpää. 13Ananɩasönɔ, ɔmɔɔ‑ ‑yi'i yëku 'nɩ ɔ yi'i soo, ɔ lä bheli‑, Sɔlʋ‑! ‑N 'ni yɩ sä! Ɔ cii‑ lä sɔɔ nä, 'kpobhuu bhlo 'kʋ, kä 'naa 'yii welio‑. ‑Lɔɔ n nii‑ Ananɩasö 'yi. 14'Nɩ ɔ yi'i soo, ɔ lä ‑a 'bäsɩɩ Laagɔɔ nä, kʋ lä‑ä lä ‑yä ‑n 'gʋʋ pɔlösaa yibhë. ‑N 'gä ʋʋ' 'Yigënyɔɔ 'yi 'ni ‑yä ‑n 'gä 'sɩɩ ʋʋ' nuwälɩɩ 'nu. 15‑Mɔɔ nä, Laagɔɔ' ‑dläfʋɛ ‑n 'gä ylä lü. Sä ‑n nii‑ lä 'yi nä, 'nɩ sä ‑n nuu‑ lä nä, sɔɔ ‑n 'gä ylä nyɩkpaa 'fɩɩn soo. 16Nä, ‑ɔnözä 'nɩ ‑n bʋä bhä ‑pɛɛ? ‑N ‑bha 'kʋ ‑yä ‑n 'gä 'nyu 'wlu 'ŋʋ! Ɩyä ‑n 'gä Kwlienyɔɔ' 'ŋnöö laa ‑yä ‑naa nyenyii 'kä cienöɔ.

17‑Maa, n 'ylɩbhɔ‑ ylä 'nɩ, n ‑yi lä Zolizalɛmʋduu' nä, n ‑kʋ bhɛ Laagɔ‑bhutu 'kädʋʋ 'mnö bhibhiedä 'nɩ, Laagɔɔ' 'päwa kwlinö'ö 'kʋ 'nɩ, wälɩklë ‑ghlä'ä 'yii. 18N nii‑ Kwlienyɔ 'yi 'nɩ, ɔ sonö'ö bhä, ɔ lä ‑n ‑vʋvʋä 'kʋ ‑yä, ‑n ‑bha 'fäfä Zolizalɛmʋ‑duu 'mnö! ‑Ɔnöza bhää? Zolizalɛmʋ‑dunyʋä nä, waa' ‑lä ‑naa ‑dläfʋɛɛ 'nyukwli poo. 19Ɔ cii‑ lä sɔɔ nä, 'nɩ n yio soo, n nä Kwlienyɔ‑, wamä 'titi, wa ‑yi sɔɔ nynä ‑mä, ‑amʋ nä, kä n plö bhä Laagɔ‑bhitii 'mnö, 'nɩ nyɩkpaa' ‑lʋwa ‑wa ŋoo‑ lä ‑naa 'ŋnöö 'kʋ nä, n klʋwa bhä 'nɩ n gbä 'nɩ wa bhütuwa 'nɩ wa ŋʋwa bhä ‑jɩɩ'! 20'Tänyɩɩ' ‑naa ‑gänʋnyɔ Etɩɛnö, wa bhlɔɔ‑ lä nä, n ‑kʋmʋ bhä ‑lɔɔ. 'Nɩ nyɩkpaa ‑wa bhlɔɔ‑ lä nä, n ‑yʋwa 'sɔ plöö‑ bhä. Waa' 'kwëtii, ‑amʋʋ‑ klɩ bhlä sä. 21'Nɩ Kwlienyɔ yi'i soo, ɔ lä ‑n ‑bha 'kʋ ‑yä ‑n mʋ ‑mɔɔ fɛɛn, ‑mɔɔ lowubhlɩɩ 'mnö ‑mä, ‑mɔɔ n 'kä‑ä lä lobho.

Pɔlʋ ‑yä Wlomɛɛ‑sʋjaa' 'kamänyɔɔ

22‑Mä Pɔlʋ sää bhlä 'mʋ nä, nyɩkpaa ‑puo 'nyukwli ‑aaa, ‑mä ɔ ‑ŋëë ylä 'klünö 'kʋ nä, kä wa cie‑ woolɩ 'kʋ, wlä 'sää nyɩkpɔ nä, kwa bhlɔɔ 'nɩ ɔ ku, 'nɩ ɔɔ' wälɩ bhɩä! Ɩɩ' ‑wʋ 'kʋ ‑ŋwa nynä ‑mä ɔ kʋ zëkpë 'kʋ! 23‑Mä nyɩkpaa woo bhä, 'nɩ wa sä bhä 'kwëtii'. 'Nɩ wa pä bhä ‑bhabhuu 'ŋäkʋ. 24'Nɩ Wlomɛɛ 'sʋjaa' 'kämänyɔ 'kadɔɔ yi gbä 'nɩ wa yi Pɔlʋ 'sʋjägbëë' plaa. 'Nɩ ɔ yi ci nynä wälɩɩ‑ Pɔlʋ ‑nʋ 'nɩ ɩ gbä, 'nɩ nyɩkpa woo lä ɔɔ' ‑za nä, wa bhütüo ‑yä ɔ 'kɩ ci. 25‑Mä wa ‑gʋɔ bhɛ lä ‑yä wa 'kɔ bhütë nä, 'sujaa' 'kämänyɔɔ ‑ɔ ‑kʋ bhlä ‑lɔɔ nä, kä Pɔlʋ ylɔɔ‑, ɔ lä nyɩkpɔɔ' lɔɔ ‑ɔ plöö‑ lä Wlomɛɛyu nä, wälɩ 'nöɔ ‑lätee ‑sɩä 'nɩ a 'kɔ bhütë ‑a? Sɔɔ anyɩa' ‑jlämaa ci ‑a? 26Pɔlʋ cii‑ lä sɔɔ nä, kä 'sʋjäyuo ‑mʋ 'nɩ, ɔ yi 'sʋjaa' 'kämänyɔɔ 'kädɔɔ soo, ɔ lä wälɩ nyenyi‑ ‑a 'gä bhlä nʋ ‑ɛɛn! Nyɩkpɔɔ ‑glö Wlomɛɛyu! 27'Nɩ 'Sʋjaa' 'kämänyɔɔ yi Pɔlʋ yëku yi, 'nɩ ɔ yio 'ylä, ɔ lä ‑maa, ‑n sonö'ö ‑wʋ saa. Wlɔmɛɛyu‑ ‑n plöö‑ ‑a? Pɔlʋ lä ‑ɛɛ! ‑N ‑glö Wlomɛɛyu. 28'Sʋjaa' 'kämänyɔɔ 'Kadɔɔ lä 'aaa! ‑Amʋ ‑n wloo lä ‑lää nä, monii ‑bhutukpä n ‑sä lä 'fɩa, 'nɩ wa plüënö'ö lä Wlomɛɛyuu'. 'Nɩ Pɔlʋ yi ci, ɔ lä ‑aaa! ‑Amʋ nä, 'naa wlɔmɛɛ‑plölɩɩ kwa ‑gänönö 'mɩɩ. 29'Kpobhuu ‑bhlo 'kʋ, nyɩkpaa' ‑lʋa ‑wa 'gɔ bhlä bhütë ‑yä ɔ 'kä 'mʋ ‑sää nä, kwa ‑sɔɔ gwë. 'Sʋjaa' 'kämänyɔɔ, ‑ŋänö yɔɔ bhɛ plä. ‑Ɔnöza bhää? Sä Pɔlʋ plöö‑ lä Wlomɛɛyu 'nɩ, ɔ ‑gbä 'nɩ wa ‑gʋɔ bhlä nä.

Wa ‑lä Pɔlʋ 'Zufʋnyʋaa' 'Tütüplä‑jɛnyɩɛ dëlü

30'Sʋjaa 'kämänyɔ 'kädɔɔ, ɔ ylä bhɛ lä nynä ‑mä wälɩɩ ‑ɩnözä 'Zufʋnyʋa 'nyɛɛ bhlä Pɔlʋ gbʋ nä, ɔ 'kɩ yibhë nä, zeli ‑ze lä nä, kɔ ‑blisie Pɔlʋ. 'Nɩ 'Cibhisänyʋaa' 'cifinyʋa, ‑yä 'Tütüplä‑jɛnyɩɛ 'mnö nyɩkpaa 'fɩɩn, ɔ yi gbä 'nɩ wa yi 'wlu 'wlää‑. 'Nɩ ɔ yi Pɔlʋ ‑jlëë' ‑lä.

ទើបបានជ្រើសរើសហើយ៖

Nʋnʋgbɩɩ 22: god

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី GOD - u2

ខគម្ពីរពេញនិយមពី
Nʋnʋgbɩɩ 22

ស្ដាប់នូវ Nʋnʋgbɩɩ 22

វីដេអូសម្រាប់ Nʋnʋgbɩɩ 22

ទិដ្ឋភាពទូទៅ៖ កណ្ឌគម្ពីរកិច្ចការ ១៣-២៨

BibleProject

Nʋnʋgbɩɩ 22

ខគម្ពីរពេញនិយមពី
Nʋnʋgbɩɩ 22

ស្ដាប់នូវ Nʋnʋgbɩɩ 22

វីដេអូសម្រាប់ Nʋnʋgbɩɩ 22

ទិដ្ឋភាពទូទៅ៖ កណ្ឌគម្ពីរកិច្ចការ ១៣-២៨

ព្រះគម្ពីរ:

Godié

ជំនាន់បកប្រែ: GOD - u2 - god

Nʋnʋgbɩɩ 22

Nʋnʋgbɩɩ 22

ខគម្ពីរពេញនិយមពី Nʋnʋgbɩɩ 22

ស្ដាប់នូវ Nʋnʋgbɩɩ 22

វីដេអូសម្រាប់ Nʋnʋgbɩɩ 22

ទិដ្ឋភាពទូទៅ៖ កណ្ឌគម្ពីរកិច្ចការ ១៣-២៨

ព្រះគម្ពីរ:

Godié

ជំនាន់បកប្រែ: GOD - u2 - god

Nʋnʋgbɩɩ 22

ខគម្ពីរពេញនិយមពី
Nʋnʋgbɩɩ 22