Nʋnʋgbɩɩ 21

Pɔlʋ mʋ Zolizalɛmʋduu'

1'Tänyɩɛ 'mnö ‑a ‑bhʋwa lä yëku nä, kä ‑a ‑plä 'mɩɩ 'nɩ ‑a yi Kɔsʋduu' ji‑lëkpëa 'klʋ mʋ. Zeli ‑ze lä 'nɩ ‑a yi Lodöduu' ji‑lëkpëa 'klʋ ŋëë. ‑A ‑bha lä ‑lɔɔ nä, ‑n ni ‑mɔɔ ‑anyɩ Pataladuu'. 2‑Lɔɔ Pataladuu' nä, ‑a nii‑ ‑lɔɔ 'mɩɩ 'nɩ ɛ mʋ bhä Fenisiibhlɩ 'kʋ. 'Nɩ ‑a yi 'mɩɩnɛ plä 'nɩ ɛ yi‑anyɩ fämʋ. 3‑Mä ‑a ‑ŋëë lä Siplöduu' ji‑lëkpëa' 'yigëlɩɩ nä, ‑a nia 'flɛ 'yi ‑mä kä ‑a 'pänöa mëëcë 'kʋ 'nɩ ‑a yi Siliibhlɩ 'kʋ mʋʋ ‑yä ‑a 'gä bhɛ Tilöduu' kwli. ‑Ɔnözä bhää? ‑Lɔɔ Tilöduu', ‑lɔɔ 'mɩɩɛ 'kä bhlä 'wlu ‑sää. 4‑Maa, ‑a ‑ŋëë ylä Tilöduu' nä, ‑a nii‑ ‑lɔɔ 'cɔcɩnyʋä. ‑A ‑kʋwa yëku ‑aaa 'nɩ, ɩ ‑nʋ 'sɔlɩcë. Tilöduu' 'cɔcɩnyʋa nä, Laagɔɔ' Kplɔɔkplɔɔ‑wugɔɔ kwlinʋwa‑ 'kʋ 'nɩ, wa ‑soo Pɔlʋ nynä ɔɔ' mʋ ‑lä Zolizalɛmʋʋ'. 5'Sɔlɩcëa ‑bhɩä ylä nä, kä ‑a ‑bha yɩ 'kʋ 'nɩ ‑a yi ‑blɔkʋ sloo. ‑Mä waa' ‑lefɩɩn ‑kpää ‑kpää 'nɩ wa ‑länö‑anyɩ ‑blɔkʋ. 'Ŋʋʋ yɩ 'ŋwnɩä ‑yä 'yuë. Wa ‑länö‑anyɩ ‑blɔkʋ ‑aaa 'nɩ, ‑a yi 'duu 'nëë bhɩä. 'Nɩ ‑lɔɔ' jiee' 'nyigbëa 'kʋ, ‑a yi ‑lɔɔ ‑kokoowli glu 'pä 'nɩ ‑a yi däbhloo' bhibhie. 6‑A ‑bhänö ‑bhänö ylä 'fɩa nä, 'nɩ ‑a yi 'mɩɩɛ 'mnö ‑gblää 'nɩ wamä ‑mä, wa yi 'ylɩbhɔ.

7'Mɩɩɛ luu‑ ‑aaa 'nɩ, ‑a ‑bha Tilöduu' 'nɩ ‑a yi Tolemayisöduu' ŋëë. ‑Mɔɔ ‑a ‑sää 'wlu. ‑A ‑bhää ‑mɔɔ' bhelia 'nɩ, ‑a ‑kʋwa yëku ylʋʋ ‑bhloo' ‑za.

8Zeli ‑ze lä nä, kä ‑a ‑bha bʋkʋ 'kʋ. ‑A luu‑ ‑aaa, 'nɩ ‑a yi Sezaleeduu' ŋëë. 'Nɩ ‑a yi Kwlienyɔ Zozii' 'Nägädöö' ‑säänyɔ Filipʋ dää mʋ. ‑Lɔɔ ‑a ‑plä 'kʋ. Filipʋ nä, nyɩkpaa ‑ngbɔɔsɔ Zolizalɛmʋduu' 'cɔcɩnyʋa ‑sä bhlä nynä ‑mä ‑wa kʋ 'cɔcɩɛ ‑mnö lülülɩɩ' dëlɩɩ' nëkʋ kʋ nä, ɔ ‑glö bhä waa' nëëdëë' nyɩkpɔ. 9Ɔ ‑kä bhä 'yuŋnʋgbɛnyʋä ‑mɔɔnä 'nɩ waa' ‑lä bhä ‑tee ŋwadi ‑yibhë. 'Yuënä nä, kä Laagɔ cinʋwa bhä nëë'.

10‑A ‑kʋ ‑lɔɔ 'nɩ ɩ ‑nʋ ylɩɩ zio, 'nɩ nyɩkpɔ ‑bhlo yi yi. Ɔ ‑glö bhä 'plɔfɛtɩ, ‑mä Zudee‑lëkpëa 'mnö ɔ bha bhä, ɔmɔ wa laa Agabusö, 11ɔ yi‑anyɩ bhä 'yi 'ni kää. Ɔ bhlüü‑ lä Pɔlʋʋ' 'bɛtʋʋ 'kʋ nä, kɔ ‑gʋä ɔ yëku bhɩ ‑yä ‑klɔgbö 'nɩ ɔ yi ci, ɔ lä a ni sä Laagɔɔ' Kplɔɔkplɔɔ‑wugɔɔ ci lä nä, ʋ lä nyɩkpɔɔ' ‑lɔmɔ ‑ɔ ‑kä lä 'bɛtʋnʋ nä, sää ‑säkä ‑säkä Zolizalɛmʋduu' 'Zufʋnyʋa 'kɔ lä gʋä ‑yä wa 'kɔ 'yigädabhlɩ 'mnö nyɩkpa wlɩɩ' pënö.

12‑Mä ‑a nuu‑ lä sä Agabusö cii‑ lä nä, ‑a ‑yä Sezalee' bhelia 'sɔ, kä ‑a ‑bhibhie Pɔlʋ nynä ɔɔ' mʋ ‑läyɩɔ Zolizalɛmʋduu'. 13‑Mä Pɔlʋ ‑sonö‑anyɩ, ɔ lä ‑ɔnözä 'nɩ a tu bhä, 'nɩ a gbä 'nɩ ‑bhlɔlɩ 'kɔtɔ'ɔ bhä? ‑Amʋ Pɔlʋ, n ‑ghlɩlɩ. ‑Mɔɔ Zolizalɛmʋduu' nä, Kwlienyɔ Zozi Klisöö' 'ŋnöö 'mnö, wa yi'i ‑mɔɔ gʋä ‑o, wa yi'i ‑mɔɔ 'bhlää ‑o, n ‑ghlɩlɩ ‑yä n 'kä ‑lɔɔ nyäkälɩɩ 'ni. 14‑Aa ‑wʋ mii‑ 'nɩ ‑a 'gä Pɔlʋ bhobhowlu 'cɩcɩ‑. Ɩ ‑kä 'ŋnö nä, ‑a 'nɩɩ ‑wʋ 'mʋ ‑tlʋmä. Kä ‑a cii‑ yɩ nynä 'a! Kwlienyɔɔ' pɔlösaa 'mää ‑lä nʋɔ yɩ!

15‑A ‑sä ‑lɔɔ ylɩɩ zio, 'nɩ ‑a yi kpäsö, 'nɩ ‑a yi Zolizalɛmʋduu' mʋ. 16‑Mä ‑a mʋ bhlä nä, ‑a yä Sezalee‑bhlɩɛ 'mnö 'cɔcɩnyʋä 'sɔɔ‑ ‑mʋ. Wamää‑ ‑fanyɩ nyɩkpɔ ‑bhloo' 'gbëë 'kʋ plädä. Nyɩkpɔyɩ 'mɔ wa laa bhä Nasɔɔ. Siplöbhlɩ 'kʋʋ ji‑lëkpëa 'mnö nyɩkpɔ bhlä. Ɔ ŋoo‑ lä Kwlienyɔ 'kʋ nä, ɩ yä bhɛ 'mʋ tlʋmä.

Pɔlʋ ‑yä Zakö 'sɔ 'nii‑

17‑A ‑ŋëë ylä Zolizalɛmʋduu' nä, kä ‑mɔɔ' bhelia ‑gbonö‑anyɩ 'kʋ, ‑pʋpɛɛ 'mnö. 18Zeli ‑ze ylä nä, kä Pɔlʋ ‑yä ‑anyɩ 'sɔ ‑mʋ Zaköö' 'gbëa 'mnö. ‑Mɔɔ 'cɔcɩɛɛ' nëkʋʋ' kʋnyʋa 'wlää‑ bhä 'wlu. 19‑Mä Pɔlʋ ‑bhänʋwa 'fɩa, 'nɩ ɔ yiwa 'dö ‑sää. 'Nɩ wälɩɩ 'fɩɩn Laagɔ ‑ghlänöɔ 'kʋ 'nɩ ɔ ‑nʋ lä ‑mɔɔ ‑waa ‑wʋ lä 'Zufʋnyʋä plöö‑ nä, waa' 'bhlɩɩ 'mnö nä, ɔ ‑sänʋwanyɩ 'nɩä 'nɩä.

20‑Mä wa nuu‑ lä sä Pɔlʋ cii‑ lä nä, kwa ‑fään Laagɔ 'ŋnu. 'Nɩ wa yi Pɔlʋ soo, wlä ‑n ni 'yi ‑a bheli‑, 'Zufʋnyʋä ‑bhutukpä yä 'cɔcɩnyʋää' 'plöö. 'Nɩ wa ‑gëë ‑Moyizöö' ‑Jlämaa 'kʋ 'nägäsä. 21‑Mä ‑n ni wälɩɩ wa sonʋwa lä nä. Wlä ‑mɔɔ nä, kä ‑n soo ‑mɔɔ lowubhlɩ 'kʋʋ 'Zufʋnyʋa nynä waa' 'ŋʋ ‑läyɩɔ Moyizöö' ‑Jlämaa 'klʋkpää. Wlä kä ‑n sonʋwa 'sɩɩ nynä waa' ‑döö lä waa' 'yuŋwadië 'kʋ, ɩyä waa' 'gë ‑läyɩɔ 'Zufʋnyʋaa' ‑lɔɔ 'kʋ. 22Wa yi ‑pɛpɛɛ 'nu nynä ‑n yä ‑mää yi. Nä, säsä ‑a yi bhä nʋ 'nɩ ‑a yii bhä ‑lää' wälɩnɩ 'yikʋ 'tɔɔ? 23‑N ni 'yi ‑a! Sä ‑a 'gä'ä lä soo nä, ‑n nʋ sɔɔ. Nyɩkpa ‑mɔɔnä ‑kʋ‑anyɩ ‑lää nëëdë, 'nɩ wa ŋʋʋ‑ 'bü Laagɔ dëlüü.#21.23 Wa 'ŋʋ 'bë Laagɔ dëlü nynä waa' ‑lä lü, waa' ‑lä 'mnä, 'nɩ waa' ‑lä kpään. Nä, 'tänyɩɛ wa ŋʋʋ‑ bhlä nä, ɛ yä yɩ klʋ glää. 24‑N ‑yʋwa mʋ ‑yä a wɔɔ Laagɔ dëlüü' wlɩ. Ɩyä ‑n 'pɛɛ waa' 'wlu ‑yä wa 'kä 'wlu kpään ‑yä nyɩkpaa 'fɩɩn kä sɔɔ yibhë nynä wälɩɩ 'fɩɩn nyɩkpa ci bhlä ‑naa ‑za nä, ɩ ‑glö ‑kpläkplä. Wa 'kä 'yi 'ni nynä ‑mɔɔ ‑mä 'sɩɩ, kä ‑n ŋʋ Moyizöö' ‑Jlämaa 'klʋkpää. 25‑Ɔ plöö‑ ylä nyɩkpaa' ‑lʋwa ‑waa ‑wʋ lä 'Zufʋnyʋä plöö‑ nä, 'nɩ ‑wa plöö‑ ylä 'cɔcɩnyʋa nä, ‑a ‑jɩjlʋwa 'nɩ ‑a ‑sonʋwa nynä ‑mä, mnɛɛ' lɛɛ wa ‑sää lä ‑zlëë' 'cibhi 'kʋ nä, wa 'nä lie ‑lä. Wa 'nä lü ‑lä 'sɩɩ mnä‑dolu! 'Nɩ mnɛɛ' lɛɛ nyämʋ 'suklu‑ ‑suklu lä 'kʋ 'nɩ ‑ɛ kuu‑ lä nä, waa' lie ‑lä 'sɩɩ! ‑A ‑sonʋwa 'sɩɩ nynä wa ‑sä ŋnʋ‑ylälɩɩ ‑yä wlu‑ylälɩɩ gwë. Wa 'ŋʋ wlunö‑jläma 'klʋkpää.

26Wa cii‑ ylä sɔɔ 'nɩ, zeli ‑ze ylä nä, kä Pɔlʋ bhlüü‑ yɩ nyɩkpaa ‑mɔɔnä 'kʋ, 'nɩ ɔ ‑yʋwa 'sɔ yi Laagɔ dëlüü' wlɩ wɔɔ ‑kää mʋ. 'Nɩ ɔ yi Laagɔ‑bhutu 'kädʋʋ 'mnö plä ‑yä, ylɩɩ 'mnö wlɩ wɔɔlɩ 'kä lä bhɩä ‑yä, wa 'kä lä nyɩkpɔ nyɩkpɔɔ' 'cibhie ‑sä nä, ɔ 'kɩ bhɛ pana.

Wa ‑bhlüü Pɔlʋ Laagɔ‑bhutu 'kädʋʋ 'mnö 'kʋ

27‑Mä wlɩ‑wɔɔlɩɩ' ylɩɩ ‑ngbɔɔsɔ 'kä bhɛ bhɩä 'nɩ Aziibhlɩ 'kʋʋ 'Zufʋnyʋa 'nii‑ Pɔlʋ Laagɔ‑bhutu 'kädʋʋ 'mnö 'yi. 'Nɩ wa yi ‑jlëa plɛ ŋää 'pä. 'Nɩ wa yi Pɔlʋ klä. 28'Nɩ wa yi woolɩ 'kʋ cie, wlä 'Yizlɛnyʋänyɩ‑, a yi‑anyɩ 'kʋ! A ni 'yi ‑a! Nyɩkpɔnɔ nä, nʋnʋgbɩɩ 'fɩɩn ‑ɩ bhusuë lä 'Yizlɛnyʋä, 'nɩ ‑ɩ bhusuë lä 'sɩɩ Moyizöö ‑Jlämaa, ɩyä Laagɔ‑bhutu 'kädʋʋ 'sɔ nä, ɩmɩ ɔ cɩa lä nyɩkpaa dää, 'fɩɩn. 'Nɩ bʋkʋ ɔ ‑yi lä 'nɩ, 'Glɛkönyʋa nä, ɔ ‑yʋwa 'sɔ ‑plä 'sɩɩ kplɔɔkplɔɔ Laagɔ‑bhutu 'mnö, 'nɩ ɔ yiu ‑dii zie. 29Sɩ ‑kʋ bhlä naa, wa ni bhlä Pɔlʋ 'yi, 'nɩ ɔ ‑yä Efɛzɩ‑duyuo Tlofimö#21.29 Tlofimö: Ɔ ‑glö bhlä 'Glɛköyu nä, ɔ bhɔɔ kʋ ‑ŋwa nynä ‑mä ɔ plä Laagɔ‑bhutuu mnö. Ɩɩ' ‑zä wa lɔɔ bhlä zägblö. 'sɔ nää bhlä 'duu 'mnö nä, wa ‑luë bhä nynä kä Pɔlʋ ‑yɔsɔ ‑plä Laagɔ‑bhutu 'kädʋʋ 'mnö. 30‑Mä kplüü ‑ɩ gbä bhlä Zolizalɛmʋ‑duu 'mnö nä, ɩ ‑gbä 'nɩ nyɩkpa ‑bha dää 'fɩɩn 'nɩ wa ‑yi. Wa ‑klä lä Pɔlʋ nä, kwa ‑gbisio 'nɩ wa yio Laagɔ‑bhutu 'kädʋʋ 'mnö ‑sä, 'nɩ 'kpobhuu ‑bhlo 'kʋ wa yiu ‑gbaa. 31Wa tään bhɛ nynä wa 'kɔ 'bhlä ‑yä ɔ 'kä 'ku. 'Nɩ 'dönö yi Wlomɛɛnyʋa' 'sʋjaa' 'kämänyɔ 'kädɔɔ ŋëë. 32'Nɩ kpobhuu ‑bhlobhlo 'kʋ, ɔ yi 'sʋjaa ‑yä waa' 'kämänyʋä 'kʋ 'bhlü 'nɩ, ɔ ‑yʋwa 'sɔ yi ‑jlëa' ‑gbäsɩ sämɩɩ' mʋʋ. ‑Mä nyɩkpaa nii‑ lä 'sʋjaa' 'kämänyɔɔ ‑yä ɔɔ' 'sʋjaa 'yi nä, kä wa ‑nyɔkɔ Pɔlʋʋ' bhütëgbʋ. 33'Nɩ 'sʋjaa' 'kämänyɔ 'kädɔɔ yi Pɔlʋ yëku 'jloo, 'nɩ ɔ yi gbä 'nɩ wa yio gʋä. Ɔ cii‑ nynä wa gʋänöɔ ‑abhluëkö 'sɔɔ. 'Nɩ ɔ yi 'ylä, ɔ lä nyɩkpɔɔ' 'cësa bhää? Wälɩ ‑sä ɔ ‑nʋ bhää? 34‑Mä ‑jlëa 'mnö nä, nyɩkpɔ nyɩkpɔ woo bhä ɔɔ' sä. 'Sʋjaa' 'kämänyɔ 'kädɔɔ' 'nu bhɔ lä wälɩɩ wa ci bhlä nä, kɔ cii‑ nynä wa fä Pɔlʋ ‑mɔɔ 'sʋjä gbëë'. 35‑Maa, wa ‑yä Pɔlʋ 'sɔ ‑ŋëë ylä ‑glënëa nëë' gblääda nä, kä 'sʋjaa bhɛnöɔ ŋɔkʋ. ‑Ɔnöza bhɛɛ? ‑Jlëaa' gblu gblu gblu 'tɛ bhä kpänyɩ 'mʋ. 36Nyɩkpaa' 'kpaa ‑güo bhä 'kʋ 'nɩ, wa woo bhä, wlä a 'bhlɔɔ ‑yä ɔ 'ku!

Pɔlʋ bhlää ɔ yëku 'kʋ 'Zufʋnyʋa dëlü

37‑Mä 'tänyɩ 'sʋjaa ‑yä Pɔlʋ 'sɔ 'kä bhɛ lä 'sʋjägbëë' plä nä, Pɔlʋ ylää‑ 'sʋjaa 'kämänyɔɔ, ɔ lä ‑mä, n yi bhä mii 'nɩ n yi‑i bhä wälɩklë soo ‑a? 'Nɩ 'sʋjaa' 'kämänyɔɔ yio 'ylä, ɔ lä kä ‑n nu 'Glɛköwälɩ ‑a, ‑mɔɔ? 38'Ɔɔɔ! ‑Maa, Ejipiti‑yunɔ ‑ɔ ‑gbä lä 'ylönö 'nɩ kplüü ‑gbä lä nä, ‑mɔɔ 'nöɔ ‑wʋ lä plöö‑ ‑a? Nyɩkpɔnɔ ‑ɔ ‑yä nyɩkpa ‑bhlänyʋää' ‑bhɛgö ‑mɔɔnä (4.000) ‑kʋ bhlä 'popie 'mnö nä, ‑ɛɛ ‑wʋ lä ‑mɔɔ ‑a? 39Pɔlʋ lä 'nn, n ‑glö 'Zufʋyu. Silisiibhlɩ 'kʋʋ 'duu wa laa lä Tasö nä, ʋmʋ 'mnö wa ‑gänönö'ö. 'Duu lʋʋ ‑ʋ mʋ lä 'ŋnu nä, ʋʋ' 'mnö nyɩkpɔ n plöö‑ lä. Nä, bheeje! ‑N gbä ‑yä n soo ‑jlë wälɩklë! 40'Nɩ ɔ yi Pɔlʋ ‑blɔɔ 'nyɛ nynä ɔ ci. 'Nɩ Pɔlʋ yi ‑lɔɔ ‑glënëa' ‑gblääda 'nynigo, 'nɩ ɔ yi ‑jlëa sɔ ‑pää, ‑yä nyɩkpaa 'kä ‑plɩɩ kʋ. Waa ‑lefɩɩn ‑kʋ ylä ‑plɩɩ nä, 'nɩ ɔ yiwa Eblëë‑wälɩɩ sonö.

ទើបបានជ្រើសរើសហើយ៖

Nʋnʋgbɩɩ 21: god

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី GOD - u2

ខគម្ពីរពេញនិយមពី
Nʋnʋgbɩɩ 21

ស្ដាប់នូវ Nʋnʋgbɩɩ 21

វីដេអូសម្រាប់ Nʋnʋgbɩɩ 21

ទិដ្ឋភាពទូទៅ៖ កណ្ឌគម្ពីរកិច្ចការ ១៣-២៨

BibleProject

Nʋnʋgbɩɩ 21

ខគម្ពីរពេញនិយមពី
Nʋnʋgbɩɩ 21

ស្ដាប់នូវ Nʋnʋgbɩɩ 21

វីដេអូសម្រាប់ Nʋnʋgbɩɩ 21

ទិដ្ឋភាពទូទៅ៖ កណ្ឌគម្ពីរកិច្ចការ ១៣-២៨

ព្រះគម្ពីរ:

Godié

ជំនាន់បកប្រែ: GOD - u2 - god

Nʋnʋgbɩɩ 21

Nʋnʋgbɩɩ 21

ខគម្ពីរពេញនិយមពី Nʋnʋgbɩɩ 21

ស្ដាប់នូវ Nʋnʋgbɩɩ 21

វីដេអូសម្រាប់ Nʋnʋgbɩɩ 21

ទិដ្ឋភាពទូទៅ៖ កណ្ឌគម្ពីរកិច្ចការ ១៣-២៨

ព្រះគម្ពីរ:

Godié

ជំនាន់បកប្រែ: GOD - u2 - god

Nʋnʋgbɩɩ 21

ខគម្ពីរពេញនិយមពី
Nʋnʋgbɩɩ 21