Nʋnʋgbɩɩ 15

'Wlu 'wläälɩ 'kädɩ ‑kʋ Zolizalɛmʋduu' 'cɔcɩɛ 'mnö

(Gala 2.1‑9)

1'Tänyɩ ‑kʋ ‑lɔɔ 'nɩ nyɩkpa zio ‑bha Zudeebhlɩ 'kʋ 'nɩ wa yi Atɩɔsö‑duu' yi. Wa cɩa bhä ‑mɔɔ Laagɔwälɩ, 'nɩ wa soo bhä ‑mɔɔ' bhelia nynä bhelienyɩ‑, kä Moyizöö' ‑Jlämaa sonö‑anyɩ nynä ‑mä, 'fɩa ‑yä nyɩkpɔ Laagɔ 'kɔ ‑lɔɔ nëë' ‑sä nä, ɩ ‑ŋwa 'kʋ nynä ‑mä ɔ ‑döö 'kʋ. 2‑Mä Pɔlʋ ‑yä Banabasö 'sɔ nä, waa' ‑wʋ ‑lɔɔ' nyɩkpaa' cɩalɩɩ ‑wamä 'nɩ ɩ yi wa ‑yʋwasɔ pää' cɛlɩ 'kädɩ ‑lä. Ɩ ‑kä bhɛ 'ŋnö nä, 'cɔcɩɛ cii‑ nynä Pɔlʋ ‑yä Banabasö, ɩyä ‑mɔɔ Atɩɔsöduu' 'cɔcɩnyʋä zio, wa mʋ Zolizalɛmʋduu' ‑yä wälɩklëa‑ ‑kʋ bhlä ‑lɔɔ nä, Zozii' lobho lobhonyʋa ‑yä ‑mɔɔ' 'cɔcɩɛɛ' nëkʋʋ' kʋnyʋa ‑yʋwa 'sɔ 'ka ci. 3Atɩɔsöduu' 'cɔcɩnyʋa ‑fänʋwa ‑blɔkʋ 'nɩ wa yi mʋ. Wa mʋ lä nä, wa ‑ghlää Fenisiibhlɩ 'kʋ ‑yä Samaliibhlɩ 'kʋ 'nɩ wa ‑sää ‑mɔɔ' 'cɔcɩnyʋa 'dö. Sɩ 'plömɔ ‑plömɔ lä 'kʋ 'nɩ ‑waa ‑wʋ lä 'Zufʋnyʋä plöö‑ nä, wa 'ylɩbhɔ‑ 'nɩ wa ‑tla lä Laagɔ 'klʋ nä, ‑lɔɔ' 'döö 'fɩɩn ɔ ‑sänɩ 'cɔcɩnyʋa. ‑Mä 'dönö nä, ɩ ŋʋʋ‑ kpänyɩ bhelia ‑pʋpɛ pleyii. 4Wa ‑ŋëë ylä Zolizalɛmʋduu' nä, ‑mɔɔ' 'cɔcɩnyʋa ‑yä Zozii' lobho lobhonyʋa, ɩyä ‑mɔɔ' 'cɔcɩɛɛ nëkʋʋ' kʋnyʋa, kwa ‑gbonʋwa 'kʋ 'nɩ wa ‑klʋwa 'nägäsä. 'Nɩ sä Laagɔ ‑ghlänʋwa lä 'kʋ 'nɩ lebhee ʋ ‑gbä 'nɩ wa ‑nʋ lä nä, ‑lɔɔ' wälɩɩ 'fɩɩn wa yi 'dö 'kʋ ‑sää.

Zolizalɛmʋduu' 'cɔcɩɛɛ' 'tienyʋa döö‑ wälɩɩ'

5‑Mä Falizɩɛnyʋaa' ‑jɛnyɩɛ 'mnö nyɩkpaa' ‑nänʋä ‑wa ŋoo‑ bhlä 'sɩɩ Kwlienyɔɔ' 'Nägädöö 'kʋ nä, wa bhlüü‑ nuwälɩ 'kʋ 'nɩ wa cii, wlaa nyɩkpaa' ‑lʋa ‑wa ŋoo‑ lä Kwlienyɔɔ' 'Nägädöö 'kʋ 'nɩ ‑waa ‑wʋ lä 'Zufʋnyʋä plöö‑ nä, ɩ ‑ŋwa 'kʋ nynä ‑mä wa ‑döö 'kʋ. 'Fɩa, 'nɩ ɩ ‑ŋwa 'sɩɩ 'kʋ nynä ‑mä, wa 'gë Moyizöö' ‑Jlämaa 'kʋ. 6'Nɩ Zozii' lobho lobhonyʋa, wa ‑yä 'cɔcɩɛɛ' nëkʋʋ' kʋnyʋa 'sɔ yi 'wlu 'wlää ‑yä ‑lɔɔ' wälɩklëa, wa 'ka däbhloo' tänö. 7Wa ‑bhlää wälɩɩ 'kʋ ‑aaa 'nɩ ‑lɔɔ ‑tlʋmä 'mʋ. ‑Mä Pɩɛlö bhlüü‑ nuwälɩ 'kʋ 'nɩ ɔ cii‑, ɔ lä bhelienyɩ‑! A ‑yi sɔɔ nynä ‑mä, ‑anyɩa nëëdë nä, nyɩkpɔɔ' ‑lɔɔ Laagɔ ‑sä lä tɛɛ nynä ‑mä, ‑waa ‑wʋ lä 'Zufʋnyʋä plöö‑ nä, ɔ ‑sänʋwa Kwlienyɔɔ' 'Nägädöö nä, ‑amʋ lä. Kä Laagɔ ‑sä'ä lä nynä ‑mä, n mʋ ‑yä n ‑sänʋwa Kwlienyɔɔ' 'Nägädöö ‑yä wa 'kɩ nyaasäsä laa. 8Naa, Laagɔ nä, ʋmʋʋ‑ ‑yi lä nyɩkpɔɔ' pleyii. Ʋmʋ 'titii‑ pana lä nynä kʋ ŋonʋwa‑ 'kʋ, 'nɩ ʋ yiwa lä ʋʋ' Kplɔɔkplɔɔ‑wugɔɔ 'nyɛ ‑anyɩ 'bhisäkʋ. 9Kä Laagɔ ŋonʋwa‑ 'kʋ ‑anyɩ 'bhisäkʋ ‑mä ʋʋ' ‑wʋ 'mʋ ‑gbäzö. 'Nɩ ʋ ‑gbä 'nɩ waa' pleyii ‑kplɔɔ wɩa. 10Nä, ‑ɔnöza bhä 'nɩ, a fʋfʋä bhä ‑pɛɛ Laagɔɔ? Kwlienyɔɔ' 'kʋgënyʋa, ‑gbaakʋ 'kädʋʋ a sluwa lä nä, ‑a tɩtɩää' ‑wʋ 'kɔɔkɔ mii‑ 'nɩ, wa 'kä sɔɔ ‑gbaakʋ ‑sluë. 'Nɩ ‑anyɩ 'titi, ‑aa ‑wʋ 'sɩɩ sɔɔ ‑gbaakʋ mii. 11‑Anyɩa ‑za nä, ‑a ‑känɩ plɛkʋ nynä Kwlienyɔ Zozii ‑wawʋʋ 'mnö, ‑a 'nii lä ‑lɔɔ nëë' ‑bhalɩ wamä 'bhisäkʋ.

12‑Mä nyɩkpa‑gbʋʋ 'fɩɩn‑ ‑kʋ bhlä ‑lɔɔ nä, kwa plöö‑ ‑düdüdlüü. Wa ‑poo bhä Banabasö ‑yä Pɔlʋ sɔ 'nyukwli. 'Nɩ 'yiziogbɩɩ ‑yä ‑damina Laagɔ ‑gbä 'nɩ wa ‑nʋʋ lä ‑mɔɔ ‑waa ‑wʋ lä 'Zufʋnyʋä plöö‑ nä waa' 'bhlɩɩ 'mnö nä, wa säänɩ bhä 'dö 'kʋ. 13Wa ‑bhɩä lä cilɩ nä, kä Zakö bhlüü‑ nuwälɩ 'kʋ, ɔ laa, bhelienyɩ‑, a poo'o 'nyukwli ‑mä, 14Simɔɔ Pɩɛlö cii‑ wälɩklë. Ɔ lä ‑waa ‑wʋ lä 'Zufʋnyʋä plöö‑ nä, cie yɩ bhäädä nä, Laagɔ ‑sʋwa nyɩkpa nëëdë, 'nɩ ʋ ‑lʋwa ʋʋ' nyɩkpa. 15'Nɩ 'Plɔfɛtɩnyʋa ‑mä 'sɩɩ, wälɩklëa ‑bhlo wa cii‑. Ɩ ‑jɩjlɔ Laagɔ‑bɔɔgʋʋ 'mnö nynä 16Kwlienyɔ lä

‑Nɩnɩ 'fɩɩn kä yɩ plöö‑ nä,

N yi 'ylɩbhɔ,

'Nɩ Davidöö' ‑bhutuu,

‑Bhutuu ‑ʋ yä lä bhlü nä,

N yiu bʋkʋ 'slä.

N yiu ‑gɔgböö' ‑sä 'nɩ,

N yi gbä 'nɩ

Ʋ yi bʋkʋ 'kʋ 'nynigo.

17 Walɩnɩ yi gbä 'nɩ,

Nyɩkpaa 'fɩɩn‑ ‑kʋ lä 'ylʋzɔɔ nä,

Wa yi Kwlienyɔ Laagɔ tään.

'Nɩ nyɩkpaa 'fɩɩn n laa lä 'naa nyʋa nä,

Wa yi'i tään.

Kwlienyɔ Laagɔ 'mɔɔ‑ cii‑ lä sɔɔ.

18 ‑Mɔɔ ‑gɔgɔbhlää' nä,

'Klüü ‑lɩɩ ɔ cii‑ bhlä nynä ‑mä ɔ yi nʋ nä,

Kɔ ‑gbä 'nɩ nyɩkpa ‑yibhënɩ. # 15.16‑18 Ɩ bha Amɔ 9.11‑12.

19'Nɩ Zakö yi bʋkʋ ci, ɔ lä wälɩɩ ‑kʋ ylä sää nä, ‑waa ‑wʋ lä 'Zufʋnyʋä plöö‑ 'nɩ wa ‑tlaa ylä Kwlienyɔ Laagɔ 'klʋ nä, ɩɩ' ‑wʋ 'kʋ ‑ŋwa nynä ‑mä, ‑a 'ŋʋwa nyäkälɩɩ'. 20‑Mä a ‑ya jɩjlä 'bɔɔgʋ ‑yä ‑a fʋwa. ‑A sonʋwa 'bɔɔgʋʋ 'mnö nynä ‑mä, mnɛɛ' lɛɛ wa bhlüü‑ lä 'kʋ 'nɩ, wa ‑sää lä ‑zlëë' 'cibhi nä, a 'nä lie ‑lä ‑mä, ɛɛ' ‑wʋ Laagɔ dëlüü ‑kplɔɔ. Mnɛɛ' lɛɛ nyämʋ 'suklu ‑suklu lä 'kʋ, 'nɩ ‑ɛ kuu‑ lä nä, a 'nä lie ‑lä. A 'nä lü ‑lä 'sɩɩ mnä‑dolu. Ɩyä ŋnʋ‑ylälɩɩ ‑yä wlu‑ylälɩɩ nä, a ‑sɩɩ gwë!

21A ni 'yi ‑a! ‑A cie yɩ ‑mɔɔ ‑gɔgɔbhlää' ‑aaa ‑ya ŋëë yɩ ‑zɩkä nä, 'du 'du nä, ʋ ‑kä Moyizöö' ‑Jlämaa' cɩanyʋä. Sabaa‑gwlɛylʋ 'kʋ nä, kä wa zɛnönöa 'kɔɔkɔ Laagɔ‑bhitii 'mnö.

'Cɔcɩɛɛ' 'tienyʋa ‑fä Atɩɔsöduu' 'cɔcɩnyʋa 'bɔɔgʋ

22Ɩ ‑kʋ bhɛ la sɔɔ nä, Zozii' lobho lobhonyʋa ‑yä 'cɔcɩɛɛ' nëkʋʋ' kʋnyʋa, wa ‑yä 'cɔcɩnyʋa 'fɩɩn, kwa ‑sä waa' nëëdëë' nyɩkpa zio nynä wa ‑yä Pɔlʋ ‑yä Banabasö 'sɔ 'kä Atɩɔsöduu' mʋ. Wa ‑sä nyɩkpɔ ‑bhlo ɔmɔ wa laa bhä Zudö ‑mä wa ‑zienöɔ bhä Basabasö. 'Nɩ wa ‑sä 'sɩɩ ‑bhlo ɔmɔ wa laa bhä Silasö. Nyɩkpanä ‑glö bhä nyɩkpaa' lʋä 'cɔcɩnyʋa ŋʋ bhlä kpänyɩ 'klʋkpää nä. 23'Bɔɔgʋʋ wa fä bhlä nä, ʋ ‑jɩjlɔ bhä 'mnö nynä ‑mä, anyɩ bhelia‑ ‑kʋ lä Atɩɔsöduu' 'cɔcɩɛ 'mnö 'nɩ, ‑ɔɔ ‑wʋ lä 'Zufʋnyʋä plöö‑ nä, ɩyä anyɩmɔɔ‑ ‑kʋ lä Siliibhlɩ 'kʋ ‑yä Silisiibhlɩ 'kʋʋ 'cɔcɩɛ 'mnö nä, ‑anyɩ Kwlienyɔɔ' lobho lobhonyʋa ‑yä 'cɔcɩɛɛ' nëkʋʋ' kʋnyʋa, ‑a bhänö'anyɩ, ayayokä! 24‑A nuu‑ nynä nyɩkpa ‑bha ‑mää ‑anyɩ nëëdë, 'nɩ wa ‑yi'anyɩ ‑mɔɔ yëku, 'nɩ waa' cɩalɩɩ 'ninie'anyɩ plɛkʋ. Ɩ ‑kä 'ŋnö nä, kä plɛ belio'anyɩ mʋ. ‑Mä kä ‑a mʋ'anyɩ yɩ soo ‑kää nynä ‑anyɩ‑ 'nʋwa ‑wʋ ‑lobho. 25Ɩmɩɩ‑ ‑kä 'ŋnö 'nɩ, ‑a 'nunu lä 'mʋ 'nɩ ‑a ‑sä lä nyɩkpa ‑yä, ‑a 'gwa anyɩ yëku lobho. Nä, anyɩa ‑wawa ‑bhelia, Banabasö ‑yä Pɔlʋ 'sɔ, wamä wa ‑yʋwa 'sɔ ‑yi lä. 26Banabasö ‑yä Pɔlʋ 'sɔ nä, kwa ‑sä wa yëku 'nɩ, wa nyɛɛ‑ waa' zëkpëa ‑anyɩa Kwlienyɔ Zozi Klisöö' ‑gänʋlɩɩ' ‑za. 27Bhelia, Zudö ‑yä Silasö 'sɔ, anyɩ yëku‑ ‑a lobhuwa lä. Wa kä ‑yi nä, 'klüü ‑a ‑jɩjlä lä 'bɔɔgʋnʋʋ' nä, wa yi'anyɩmɩ nëë' sonö. 28A ni 'yi nä, Kplɔɔkplɔɔ‑wugɔɔ, ɩyä ‑anyɩ 'titi nä, ‑aa 'ylä ‑wʋ nynä ‑a 'ganyɩ 'yigäda ‑gbaakʋ sluë. ‑Mä 'klüü' ‑nɩnɩ ‑kʋ ‑lɔɔ 'nɩ, ɩ ‑ŋwa 'kʋ nynä ‑mä, a nʋɩ. 29Ɩ plöö‑ nynä ‑mä, mnɛɛ' lɛɛ wa bhlüü‑ lä 'kʋ 'nɩ wa ‑bʋbɔ lä ‑zlëë nä, a 'nä lie ‑lä! A 'nä lü ‑lä 'sɩɩ mna‑dolu! Mnɛɛ' lɛɛ nyämʋ 'suklu ‑suklu lä 'kʋ 'nɩ ‑ɛ kuu‑ lä nä, a 'nä lie ‑lä 'sɩɩ! A ‑sä wlu‑ylälɩɩ ‑yä ŋnʋ‑ylälɩɩ 'sɔ gwë!#15.29 Zɛɛ 'sɩɩ Nʋnʋ 15.20. 'Klünö 'fɩɩn ‑ɩɩ ‑wʋ lä nää‑ nä, a kɩ gwë ‑sä nä, a yä 'nägägbɩ nʋ. Bhelienyɩ‑, ‑a 'gä ‑kɛ ‑zee 'nii.

30Wa ‑bhɩä ylä jɩjlälɩ nä, nyɩkpaa wa ‑lobho bhlä nä, kwa ‑mʋ yɩ Atɩɔsö‑duu' 'nɩ, wa yi ‑mɔɔ' 'cɔcɩnyʋa 'wlu 'wlää‑ 'nɩ, wa yiwa 'bɔɔgʋʋ 'nyɛ. 31'Nɩ 'bɔɔgʋnʋ yi zɛnöɔ. ‑Mä wa ‑zɛnʋ lä 'nɩ ʋʋ' 'mnöö wälɩɩ ŋʋ bhɛ lä 'cɔcɩnyʋa 'tɛtɩɩ' nä, kä waa' ‑lefɩɩn ‑pʋpɛ ‑plʋwa. 32Zudö ‑yä Silasö 'sɔ, wamä 'titi, wa plöö‑ bhlä 'plɔfɛtɩnyʋä nä, wa bhlüü‑ yɩ 'tänyɩ 'kʋ 'nɩ ŋʋwa‑ yɩ 'tɛtɩɩ' 'nɩ wa ‑bhluwa plɛɛ'. 33Wa ‑kʋ ‑mɔɔ 'nɩ, ɩ ‑nʋ tänyɩ, 'nɩ wa yiwa ‑blɔ 'nyɛ nynä wa 'ylɩbhɔ ‑yä, ‑wa ‑lobhuwa bhlä nä, wa mʋwa yëku pɔlöwätɛɛ'. [34‑Mä Silasö nä, kɔ ‑too ‑mɔɔ.] 35Pɔlʋ ‑yä Banabasö 'sɔ ‑too bhä 'sɩɩ Atɩɔsöduu' 'nɩ wa ‑yä nyɩkpa ‑bhutukpä 'yigädalʋä 'sɔ sää bhä Kwlienyɔɔ' 'Nägädöö, 'nɩ wa cɩa bhä ‑mɔɔ' nyɩkpaa.

Pɔlʋ ‑yä Banabasö 'sɔ ‑yä 'mʋ ‑bhä ‑bhä

36‑Mä 'tänyɩ plöö‑ 'nɩ Pɔlʋ yi Banabasö soo‑, ɔ lä 'dii 'fɩɩn ‑a ‑mʋ lä 'kʋ, 'nɩ ‑a ‑sää lä Kwlienyɔɔ' wälɩɩ nä, ‑a 'gä bʋkʋ ‑mɔɔ mʋ ‑yä ‑a 'gä ‑mɔɔ' bhelia 'kʋ bi. Sä waa' 'lɩɩ kä nʋ nä, ‑a 'gä sɔɔ 'ni. 37Ɩ ‑kʋ bhɛ lä sɔɔ nä, Banabasö lä Zään wa ‑zie bhlä Makö nä, wa ‑yɔsɔ 'kä mʋ. 38‑Mä Pɔlʋʋ' ‑wʋ ŋoo‑. Ɔ lä 'tänyɩ wa ‑kʋ bhlä Pafiliibhlɩ 'kʋ nä,#15.38 Zɛɛ 'sɩɩ Nʋnʋ 13.13. kä Zään Makö ‑bhʋwa yëku 'nɩ ɔ ‑mʋ. Ɔ 'nʋwa yɩɔ lebhee ‑klää ‑mä, kɔ ‑cienʋwa 'nyɛ. 39Wälɩklënä ‑gbä 'nɩ Pɔlʋ ‑yä Banabasö 'sɔ ‑wʋ 'mʋ 'nunu. Wa ‑bhlänɩ 'kʋ kpänyɩ. Ɩ ‑kä 'ŋnö nä, kä Banabasö bhlüü‑ Zään Makö 'kʋ, 'nɩ ɔ ‑yɔsɔ yi Siplöbhlɩ#15.39 Siplöbhlɩ: Ɛ ‑glö 'lëkpëë' laa jie ‑bii lä 'kʋ nä. 'kʋ mʋʋ. 40Pɔlʋ ‑mä, ɔ bhlüü‑ Silasö 'kʋ 'nɩ, ‑mɔɔ' bhelia ‑bhibhie waa' 'wlu, 'nɩ wa nyɩwa‑ Kwlienyɔ wlɩɩ' 'fɩa, 'nɩ wa yi mʋ. 41Pɔlʋ ‑bhlü Silii‑bhlɩɛ ‑yä Silisii‑bhlɩɛ, 'nɩ ‑mɔɔ' 'cɔcɩnyʋa, ɔ ‑gbä 'nɩ wa nii‑ 'tɛtɩ.

ទើបបានជ្រើសរើសហើយ៖

Nʋnʋgbɩɩ 15: god

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី GOD - u2

ខគម្ពីរពេញនិយមពី
Nʋnʋgbɩɩ 15

ស្ដាប់នូវ Nʋnʋgbɩɩ 15

វីដេអូសម្រាប់ Nʋnʋgbɩɩ 15

ទិដ្ឋភាពទូទៅ៖ កណ្ឌគម្ពីរកិច្ចការ ១៣-២៨

BibleProject

Nʋnʋgbɩɩ 15

ខគម្ពីរពេញនិយមពី
Nʋnʋgbɩɩ 15

ស្ដាប់នូវ Nʋnʋgbɩɩ 15

វីដេអូសម្រាប់ Nʋnʋgbɩɩ 15

ទិដ្ឋភាពទូទៅ៖ កណ្ឌគម្ពីរកិច្ចការ ១៣-២៨

ព្រះគម្ពីរ:

Godié

ជំនាន់បកប្រែ: GOD - u2 - god

Nʋnʋgbɩɩ 15

Nʋnʋgbɩɩ 15

ខគម្ពីរពេញនិយមពី Nʋnʋgbɩɩ 15

ស្ដាប់នូវ Nʋnʋgbɩɩ 15

វីដេអូសម្រាប់ Nʋnʋgbɩɩ 15

ទិដ្ឋភាពទូទៅ៖ កណ្ឌគម្ពីរកិច្ចការ ១៣-២៨

ព្រះគម្ពីរ:

Godié

ជំនាន់បកប្រែ: GOD - u2 - god

Nʋnʋgbɩɩ 15

ខគម្ពីរពេញនិយមពី
Nʋnʋgbɩɩ 15