Nʋnʋgbɩɩ 14

Pɔlʋ ‑yä Banabasö 'sɔ ‑kʋ Yikonɩɔmʋduu'

1Pɔlʋ ‑yä Banabasö 'sɔ ‑mʋ lä Yikonɩɔmʋ‑duu' nä, kwa ‑plä 'sɩɩ 'Zufʋnyʋa' Laagɔ‑bhutuu 'mnö. 'Nɩ wa yi ‑mɔɔ Laagɔwälɩ cii. Ɩ ‑gbä nä, 'Zufʋnyʋä ‑lɛɛ bhutukpä, ɩyä 'yigädabhlɩɩ 'mnö nyɩkpaa, wa ŋoo‑ Zozii 'kʋ. 2‑Mä 'Zufʋnyʋa' nëëdëë' ‑lʋa bhɔɔ lä Zozii 'kʋ ŋoo‑ nä, wa pä bhä ‑waa ‑wʋ lä 'Zufʋnyʋä plöö‑ nä plɛ ŋää ‑yä wa 'kä Pɔlʋ ‑yä Banabasö 'sɔɔ nyenyi bhobho. 3Ɩ ‑kʋ sɔɔ 'nɩ, Pɔlʋ ‑yä Banabasö 'sɔ ‑gwlɛ ‑mɔɔ Yikonɩɔmʋduu'. Wälɩɩ' 'fɩɩn wa cɩa bhlä nä, wamä 'titi ‑känɩ bhä kpänyɩ plɛkʋ. Wa cɩa bhä nyɩkpa Laagɔɔ' ‑wawʋʋ' yëkuu' wälɩ. Waa' ciciwälɩɩ 'kä bhɛ lä glää nä, Laagɔ gbä 'nɩ wa nʋ bhä 'yiziziogbɩ ‑yä ‑daminë. 4‑Mä Yikonɩɔmʋduu' nyɩkpaa doo‑ 'mʋ. ‑Nänʋä ‑yä 'Zufʋnyʋa 'sɔ plöö‑, 'nɩ ‑nänʋä ‑yä Kwlienyɔɔ' lobho lobhonyʋa Pɔlʋ ‑yä Banabasö 'sɔ plöö‑. 5Nyɩkpaa‑ bhɔɔ lä 'Zufʋnyʋä plöö‑ nä, wa ‑yä 'Zufʋnyʋa ‑yä waa' 'cifinyʋa 'sɔ yä bhɛ ‑ghlɩlɩ nynä wa 'kwa zɔgblö fä, ‑yä wa 'kwa cɛkwɩ 'bhlä wa 'kä 'ku. 6Nä, Pɔlʋ ‑yä Banabasö 'sɔ nii‑ lä wälɩɩ 'yi nä, kä wa ‑bha Yikonɩɔmʋduu', 'nɩ wa yi 'yigädadi 'kʋ zizio ‑kää mʋ. Wa mʋ Likaoniibhlɩ 'kʋʋ 'dii 'mnö. Wa ‑mʋ 'sɩɩ Lislöduu' ‑yä Dɛböduu' ɩyä sɔɔ' kpëkpë 'kʋʋ 'lëkpüü 'mnö. 7'Nɩ wa yi ‑mɔɔ Kwlienyɔɔ' 'Nägädöö fä.

Pɔlʋ ‑yä Banabasö 'sɔ ‑kʋ Lislöduu'

8‑Mɔɔ Lislöduu' nä, nyɩkpɔ ‑bhlo ‑kʋ bhä ‑mɔɔ nä, ɔɔ' nää bhɔɔ. Kɔ kplää‑ bhä nä, kɔ ‑kʋ bhä 'kɔɔkɔ sä. Ɔɔ' 'bhlʋlɛɛ 'yuëdäkʋ ɛ ‑slänöɔ lä nä, ɔɔ' ‑läzä nää. 9‑Mä 'tänyɩɩ Pɔlʋ sää bhlä 'mʋ nä, nyɩkpɔɔ ‑puo bhä 'nyukwli. Pɔlʋ ‑wloo nyɩkpɔnɔ ‑plɩɩ, 'nɩ ɔ nii‑ 'yi nynä ‑mä ɔ ‑kä bhä pɔlötɛtɛ nä, ɔ yi ‑lɔɔ nëë' ‑bha. 10'Nɩ Pɔlʋ yi 'mʋ ‑gaa, ɔ lä ‑n ‑bha 'kʋ ‑yä ‑n 'nynigo 'kʋ 'nägäsä! ‑Mä nyɩkpɔɔ ‑bha 'kʋ 'vlikiti! 'Nɩ ɔ yi näälɩ 'kʋ cie. 11‑Mä wälɩɩ Pɔlʋ ‑nʋ lä nä, ‑jlëa nii‑ lä 'yi nä, ka ‑gbä 'mʋ. Nyɩkpaa ci bhä Likaonii‑wälɩɩ, wlä ‑laagwɩɩ jɩjlä‑ nyɩkpaa' 'nɩ ɩ yi‑anyɩ nëëdë kwli! 12Ɩ ‑kä 'ŋnö 'nɩ Banabasö, wa ‑zienöɔ 'Zësö#14.12 'Zësö: Nyɩkpaa wa laa lä 'Glɛkönyʋa nä, waa' ‑zlëa 'kämä lä ‑zlüü 'fɩɩn nä, amä wa laa lä 'Zësö., 'nɩ sä Pɔlʋ 'mɔɔ‑ ciwa bhlä nëkʋ nä, wa ‑zienöɔ Ɛmɛsɩ#14.12 Ɛmɛsɩ: Nyɩkpaa wa laa lä 'Glɛkönyʋa nä, waa' ‑zlëa yi bhlä cisä nä, amä wa laa lä Ɛmɛsɩ.. 13‑Zlëa wa laa bhlä 'Zësö nä, 'duu kpëkpë 'kʋ, ‑lɔɔ aa' bʋbɔda ‑kʋ bhä. ‑Zlëënä, aa 'cibhisänyɔɔ ‑mʋ 'nɩ ɔ yi ‑dodobhlüü' 'wö 'kʋ bhlü. Ɔ ŋʋɩ‑ ‑gbadi ‑blɩɩ' 'nɩ ɔ yii ‑jlëë' ‑lä. Ɔ bhobho bhɛ nynä ɔ 'kä 'cibhi ‑sä ‑yä ɔ 'kä Pɔlʋ ‑yä Banabasö 'sɔ bʋbɔ. 14‑Mä Pɔlʋ ‑yä Banabasö 'sɔ nuu‑ lä wälɩɩ nä, kwa 'ŋätlö wa yëkuu' 'kwëtii.#14.14 'Zufʋnyʋä nä, wälɩ kä ‑bhlü 'nɩ ɩ kwa yëkuu' kään nä, kä wa 'ŋätlö wa yëkuu' 'kwëti. Wa sloo‑ ‑jlëë' 'nɩ wa woo bhä, 'nɩ wa soo bhä nyɩkpaa. 15Wlä bhelienyɩ‑, ‑ɔnöza 'nɩ a nʋ bhä sɔɔ? ‑Anyɩ nä, ‑a ‑glö nyɩkpa anyɩ 'bhisäkʋ! Kwlienyɔɔ' 'Nägädöö 'mɩ ‑a ‑laa'anyɩ lä nynä bʋbɔlɩyɩ 'fɩɩn a bʋbɔ, 'nɩ ‑ɩɩ ‑wʋ lä gba ‑kä nä, a ‑bha ɩɩ' gbʋʋ' ‑yä a yii ‑Yäyä Laagɔɔ. ‑Yäyä Laagɔɔ 'mʋʋ‑ ‑nʋ lä ŋɔkʋ, 'nɩ ‑ʋ ‑nʋ lä ‑dʋdʋkʋ, 'nɩ ‑ʋ ‑nʋ lä jie ‑yä ‑lɩɩ 'fɩɩn ‑kʋɛ lä 'mnö nä. 16‑Gɔgɔbhlää' nä, kä Laagɔ ‑taa nyɩkpaa 'fɩɩn 'yi 'nɩ nyɩkpɔ nyɩkpɔ bhlü bhä ‑blɔɔ' ‑lʋʋ ɔ ‑waa bhlä nä. 17'Nɩ sɔɔ ɩ ‑kʋ 'nɩ Laagɔ panö‑anyɩ 'kɔɔkɔ nynä kʋ ‑waanyɩ. Laagɔ gbä 'nɩ 'tänyɩ ŋëë 'nɩ 'nyu bha ŋɔkʋ 'nɩ ʋ bhlä. 'Nɩ 'kälöö 'mnö gogolɩɩ namää 'kʋ. Laagɔ nyɩ‑anyɩ lülülɩɩ ‑vlu! 'Nɩ ʋ ŋʋ‑anyɩ ‑jäkä pleyii. 18Wälɩnɩ Pɔlʋ cii‑ bhɛ 'flɛ ‑mä, ɔ ‑yä Banabasö 'sɔ 'kä lä ‑jlea 'täpʋ nynä wa 'nä bʋbɔnʋwa ‑lä nä, wa nii‑ 'fɩa nyäkälɩ 'kädɩ.

19'Nɩ 'Zufʋnyʋä yi Atɩɔsö‑duu' ‑bha 'nɩ wa yi yi. ‑Nänʋä ‑bha 'sɩɩ Yikonɩɔmʋduu'. 'Nɩ wa yi ‑jlëa 'wlu nyima. Ɩ ‑kä 'ŋnö nä, wa bhlää‑ Pɔlʋ cɛkwɩɩ' ‑yä ɔ 'kä 'ku. Wa bhobho bhɛ nynä ɔ yä 'ku nä, wa ‑gbisio 'nɩ wa yio 'duu ‑glëglë 'pä. 20'Nɩ nyɩkpaa ‑wa ŋoo‑ bhlä Kwlienyɔɔ' wälɩɩ 'kʋ nä, wa ‑yi 'nɩ wa yi Pɔlʋ 'klʋ glää. ‑Mä Pɔlʋ ‑bha 'kʋ 'nɩ ɔ ‑plä duu'. Zeli ‑ze ylä 'nɩ ɔ ‑yä Banabasö 'sɔ yi Dɛböduu' mʋ.

Pɔlʋ ‑yä Banabasö 'sɔ 'ylɩbhɔ‑ Atɩɔsöduu'

21Wa ‑sää ‑mɔɔ Dɛböduu' Kwlienyɔɔ' 'Nägädöö, 'nɩ nyɩkpaa ‑bhutukpä ŋoo‑ Kwlienyɔ 'kʋ. 'Fɩa 'nɩ wa yi Lislöduu' 'ylɩbhɔ. 'Nɩ wa yi mʋ 'nɩ wa yi 'sɩɩ Yikonɩɔmʋ‑duu' ŋëë. 'Nɩ wa yi yɩ Atɩɔsöduu' yi. 22Wa bhlüë bhä 'cɔcɩnyʋa plɛɛ', 'nɩ wa sonʋwa bhä nynä wa kää 'kɔɔkɔ Kwlienyɔɔ' pɔlötɛtɛ. Wa sonʋwa bhä, wlä a yi 'kwlɩkabhɩä ‑bhutukpä 'mnö blüë 'fɩa, 'nɩ a yi lä Laagɔɔ' 'Leyiduu 'mnö plä. 23‑Mä 'cɔcɩ 'cɔcɩ nä, Pɔlʋ ‑yä Banabasö 'sɔ ŋʋɛ‑ 'tienyɔ nëkʋ. Wa ‑goo ‑gbugbe 'nɩ wa ‑bhibhie ylä nä, 'nɩ 'cɔcɩɛɛ nëkʋʋ' kʋnyʋa, wa yiwa Kwlienyɔ wlɩɩ' 'nyɛ, sä ɔmɔ wa ŋʋʋ‑ bhlä waa' pɔlötɛtɛɛ 'kʋ nä. 24'Nɩ wa yi ‑mɔɔ ‑bha, wa tɔɔ‑ Pisidii‑bhlɩɛ 'nɩ wa yi Pafilii‑bhlɩɛ 'mnö ŋëë. 25Wa cii‑ 'fɩa Laagɔwälɩ 'duu wa laa lä Pɛze nä 'mnö, 'nɩ wa yi Ataliiduu' mʋ. 26Ataliiduu' wa ‑bha 'nɩ wa yi ylä 'mɩɩ plä 'nɩ wa yi Atɩɔsöduu yi bʋkʋ. ‑Lɔɔ Atɩɔsöduu' nä, ‑lɔɔ wa 'nyɛnʋwa‑ bhlä Laagɔ wlɩɩ' nynä ʋ kʋwa yëku ʋʋ' lebhee wa ‑nʋ lä nä, ɛɛ' ‑za. 27Pɔlʋ ‑yä Banabasö 'sɔ 'ylɩbhɔ‑ 'nɩ wa ‑yi ylä Atɩɔsöduu' nä, kwa 'wlää‑ 'cɔcɩnyʋa 'wlu. 'Nɩ sa 'fɩɩn, Laagɔ ‑kʋwa bhlä yëku 'nɩ, ʋ ‑gbä 'nɩ wa ‑nʋ bhlä nä, wa yiwa ‑lɔɔ 'döö 'fɩɩn ‑sää. 'Bhlɩɩ lɩɩ ‑ɩɩ ‑wʋ lä 'Zufʋbhlɩ plöö‑ nä, sä Laagɔ ‑känɩ lä pɔlötɛtɛ 'gbëa 'klʋ nä, ‑lɔɔ' 'döö 'fɩɩn wa ‑sänɩ 'cɔcɩnyʋa. 28Pɔlʋ ‑yä Banabasö ‑kʋ ‑lɔɔ Atɩɔsöduu' 'cɔcɩnyʋa yëku ‑aaa, 'nɩ ɩ ‑tlʋmä 'mʋ.

ទើបបានជ្រើសរើសហើយ៖

Nʋnʋgbɩɩ 14: god

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី GOD - u2

ខគម្ពីរពេញនិយមពី
Nʋnʋgbɩɩ 14

ស្ដាប់នូវ Nʋnʋgbɩɩ 14

វីដេអូសម្រាប់ Nʋnʋgbɩɩ 14

ទិដ្ឋភាពទូទៅ៖ កណ្ឌគម្ពីរកិច្ចការ ១៣-២៨

BibleProject

Nʋnʋgbɩɩ 14

ខគម្ពីរពេញនិយមពី
Nʋnʋgbɩɩ 14

ស្ដាប់នូវ Nʋnʋgbɩɩ 14

វីដេអូសម្រាប់ Nʋnʋgbɩɩ 14

ទិដ្ឋភាពទូទៅ៖ កណ្ឌគម្ពីរកិច្ចការ ១៣-២៨

ព្រះគម្ពីរ:

Godié

ជំនាន់បកប្រែ: GOD - u2 - god

Nʋnʋgbɩɩ 14

Nʋnʋgbɩɩ 14

ខគម្ពីរពេញនិយមពី Nʋnʋgbɩɩ 14

ស្ដាប់នូវ Nʋnʋgbɩɩ 14

វីដេអូសម្រាប់ Nʋnʋgbɩɩ 14

ទិដ្ឋភាពទូទៅ៖ កណ្ឌគម្ពីរកិច្ចការ ១៣-២៨

ព្រះគម្ពីរ:

Godié

ជំនាន់បកប្រែ: GOD - u2 - god

Nʋnʋgbɩɩ 14

ខគម្ពីរពេញនិយមពី
Nʋnʋgbɩɩ 14