Nʋnʋgbɩɩ 13

Kplɔɔkplɔɔ‑wugɔɔ ‑sä Sɔlʋ ‑yä Banabasö 'sɔ ‑Laagɔ‑lebhee' ‑za

1‑Mɔɔ Atɩɔsöduu' 'cɔcɩnyʋa nëëdë nä, 'plɔfɛtɩnyʋä ‑yä Laagɔwälɩɩ' cɩanyʋä ‑kʋ bhä ‑mɔɔ. Cɩanyʋaa' ‑bhlo plöö‑ bhä Banabasö. ‑Bhlo plöö‑ bhä Simeyɔɔ. Ɔmɔ wa ‑zie bhä Nyɩkpa ‑Kpɔkpɔ. ‑Bhlo plöö‑ bhä Lisusö. Ɔ ‑glö bhä Silɛnöduu' nyɩkpɔ. ‑Bhlo plöö‑ bhä Manayɛnö. Ɔ ‑yä 'loyo Elodö Atipasö 'sɔ 'bhʋä‑ ‑däbhloo', nyɩkpɔɔ ‑bhlo yëku. 'Nɩ ‑bhlo plöö‑ bhä Sɔlʋ. 2‑Maa, 'tänyɩ ‑bhloo', 'cɔcɩnyʋa 'wlää‑ 'wlu 'nɩ wa bhibhie bhä 'nɩ wa goo bhä ‑gbugbe. 'Nɩ Kplɔɔkplɔɔ‑wugɔɔ yi ci, ʋ lä Banabasö ‑yä Sɔlʋ 'sɔ nä, a gboguwa ‑yä wa 'kä 'naa lebhee nʋ ‑kää mʋ ‑mä, ɛɛ' ‑zä n lʋwa‑ lä. 3Wa ‑goo ylä ‑gbugbee 'nɩ wa ‑bhɩä ylä bhibhielɩ nä, kwa ‑gbɛɛ Banabasö ‑yä Sɔlʋ 'sɔ ‑klɔgbö 'kʋ, 'nɩ wa yiwa 'nyu 'pä. 'Nɩ wa yiwa 'yi ‑taa nynä wa mʋ yɩ.

Sɔlʋ ‑yä Banabasö 'sɔ ‑mʋ Siplö‑lekpëa 'mnö

4'Nɩ Laagɔɔ' Kplɔɔkplɔɔ‑wugɔ yi Banabasö ‑yä Sɔlʋ 'sɔ lobho. Wa ‑mʋ Selosiiduu' 'nɩ, wa yi 'mɩɩ plä. 'Nɩ 'nyilëkpëa wa laa lä Siplö nä, wa yia 'mnö mʋ. 5‑Mɔɔ' 'duu wa laa lä Salamii nä, 'nɩ wa yi ‑mɔɔ ŋëë. 'Nɩ ‑mɔɔ' 'Zufʋnyʋa Laagɔ‑bhitii 'mnö, wa yi ‑mɔɔ Laagɔwälɩ cilɩ 'kʋ cie. Wa mʋ bhlä nä, wa ‑fämʋ bhä Zään Makö ‑yä ɔ 'kwa klää. 6Wa tɔɔ‑ ji‑lëkpëa 'fɩɩn, 'nɩ wa yi Pafɔsöduu' ŋëë. Wa ‑ŋëë lä ‑mɔɔ nä, wa nii‑ 'Zufʋyu ‑bhlo. Ɔmɔɔ wa laa bhä Baa Zozii#13.6 Baa Zozii: Kɩ sä lä ‑zɔɔ nynä Zozii ‑yowli.. 'Zufʋyunɔ nä, kɔ ‑kä bhä 'sëkë, 'nɩ ɔ plöö‑ bhä 'sɩɩ ‑kpläkplö 'plɔfɛtɩ. 7Siplö‑lekpëa' ‑gɔmnɔɔ wa laa bhlä Sɛzusö Polusö nä, ɔɔ' daa ‑lɔɔ Baa Zozii ‑kʋ bhä. Sɛzusö Polusö nä, ɔ ‑glö bhä nyɩkpɔɔ' lɔɔ ‑ɔ ‑yi bhlä kpänyɩ dɩgälɩ nä. Ɔ ylä bhä nynä ‑mä ɔ 'kä Laagɔwälɩ 'numʋ. Ɩ ‑kä 'ŋnö 'nɩ ɔ laa‑ Banabasö ‑yä Sɔlʋ 'sɔ ‑yä wa 'kɔ Laagɔwälɩ soo. 8'Sëkünyɔɔ 'mɔ wa laa bhä 'sɩɩ Elimasö. Ɔɔ' 'Glɛköbhlɩ 'kʋʋ 'ŋnö lä. Elimasönɔ, sä ɔɔ' 'ylä bhɔɔ lä nynä ‑mä ‑gɔmnɔɔ ŋoo Zozii' 'kʋ nä, ɔ nʋ bhä saa 'fɩɩn ‑yä, Banabasö ‑yä Sɔlʋ 'sɔɔ kä ‑kä ‑gɔmnɔɔ 'yii ghlä. 9‑Mä Sɔlʋ wa laa bhlä 'sɩɩ Pɔlʋ nä, Laagɔɔ' Kplɔɔkplɔɔ‑wugɔɔ ‑kʋɔ bhlä kpänyɩ yëku nä, ɔ ‑wloo Elimasö ‑plɩɩ, 10'nɩ ɔ yio soo, ɔ lä ‑mɔɔ nä, ‑n ‑glö nyɩkpaa' 'nyigënyɔ, 'nɩ ‑n plöö‑ 'sɩɩ ‑abhlɛɛnyɔ. 'Dëvloo' nyɩkpɔ‑ ‑n plöö‑ lä! Kwlienyɔɔ' Laagɔɔ' 'yigëë‑blɔɔ, kä ‑n gbä 'nɩ ʋ cɩcɩɔ 'kʋ. 'Klüü ‑n nʋ lä nä, ‑n 'nɩɩ ‑lä bhä 'yi taa ‑a? 11‑N ni 'yi ‑a! ‑Pɛpɛɛ nä, Kwlienyɔ yi gbä 'nɩ ‑naa 'yii yi 'kʋ wlɔɔ. ‑Nn ‑läyɩ 'ylʋkwädlaa' zëlüü 'yi 'ni ‑aaa, 'nɩ ɩ yi 'tänyɩ nʋ! Pɔlʋ cii‑ lä 'gää sɔɔ nä, kä 'cucu ‑yi Elimasö 'yikʋ 'nɩ ɔɔ' 'ni bhɛ sä. 'Yikpü yɔ bhɛ lä slä nä, ɔ daduë bhɛ. Ɔ tään bhɛ nyɩkpɔɔ' lɔɔ‑ yio lä sɔ klä 'nɩ ‑ɔ yio lä 'tie nä. 12‑Maa, ‑gɔmnɔɔ nii‑ lä wälɩɩ 'yi nä, kɔ laa‑ Laagɔwälɩɩ nyaasäsä. Kwlienyɔɔ' yëkuu' wälɩ Pɔlʋ ‑yä Banabasö 'sɔ ‑sonöɔ lä nä, kɩ 'tanöɔ‑.

Pɔlʋ ‑yä Banabasö 'sɔ ‑mʋ Atɩɔsö‑pisidiiduu'

13Pɔlʋ ‑yä ɔɔ' näänyʋa 'sɔ ‑plä 'mɩɩ. Wa ‑bha Pafɔsö‑duu' 'nɩ wa yi Pafilii‑bhlɩɛɛ' 'duu wa laa lä Pɛze nä 'mnö mʋ. ‑Mä Zään Makö#13.13 Zään Makö: Zɛɛ 'sɩɩ 12.12,25; 13.5. nä, kɔ 'ylɩbhɔ‑ 'nɩ ɔ yi Zolizalɛmʋduu' yi. 14Wa ‑bha lä Pɛzeduu', 'nɩ wa yi Pisidii‑bhlɩɛɛ' 'duu wa laa lä Atɩɔsö nä 'mnö ŋëë. ‑Mä Sabaa‑gwlɛylʋʋ 'kʋ, wa ‑plä 'Zufʋnyʋaa' Laagɔ‑bhutuu 'mnö 'nɩ wa ‑kʋ sä. 15‑Jlämaa' 'bɔɔgʋʋ ‑yä 'Plɔfɛtɩnyʋaa' 'bɔɔgwɩɩ, wa ‑zɛnɩ ylä 'fɩa nä, kä Laagɔ‑bhutuu' 'cifinyʋa ‑soo Pɔlʋ, ɔ ‑yä Banabasö 'sɔ, wlä bhelienyɩ‑, wälɩklë 'kanyɩ pleyi ‑kʋ 'nɩ, a kä cii a yia‑anyɩma soo ‑yä, a 'ka‑anyɩ 'tɛtɩɩ 'ŋʋ nä, a mii ‑yä a cia! 16Ɩ ‑kä 'ŋnö 'nɩ Pɔlʋ ‑bha 'kʋ, 'nɩ ɔ yiwa sɔ 'pää nynä wa kʋ ‑siin. Ɔ ‑sonʋwa, ɔ lä anyɩ 'Yizlɛnyʋä, ɩyä anyɩmɔ 'fɩɩn ‑ɔ ‑kä lä Laagɔɔ' 'klʋkpää' nä, a poo 'nyukwli! 17‑Anyɩ 'Yizlɛnyʋä, ‑anyɩa Laagɔɔ, kʋ ‑sä bhä ‑a 'bäsɩ. 'Nɩ ʋ ‑gbä 'nɩ wa ‑kʋ ‑mɔɔ Ejipiti lowubhlɩ 'kʋ ‑aaa, 'nɩ wa 'plöö‑ 'kʋ. 'Nɩ Laagɔ bhlüü‑ ʋʋ' 'tɛtɩɩ 'kʋ 'nɩ ʋ yiwa Ejipiti ‑sä. 18'Ylʋbɔɔ' gwlɩ 'sɔ 'mnö, Laagɔ 'kuu‑ 'mnö 'nɩ 'popie 'mnö, ʋ ‑wluwa 'kʋ. 19'Nɩ 'Kenia‑bhlɩɛ 'mnö, Laagɔ ‑nuë ‑mɔɔ 'lëkpü ‑ngbɔɔsɔ. 'Fɩa 'nɩ ʋ yiwa lä ‑lɔɔ' 'bhlɩɛ 'nyɛ nynä wa känɩɛ. 20‑Nɩnɩ 'fɩɩn ‑nʋɔ 'ylʋbɔɔ gwlɩ ‑ngbüü' 'ci ‑mɔɔnä ɩyä 'ylʋbɔɔ' gwlɩ 'sɔ 'nɩ 'kʋgbää' (450).

'Nɩ Laagɔ yiwa 'zuzunyʋä ‑lä nynä wamää‑ ‑lä 'tie 'bhlɩɛ. Wa 'tienɩɛ sɔɔ ‑aaa, 'nɩ 'plɔfɛtɩ Samɩɛɛ' 'tänyɩɛ ‑ŋëë. 21'Nɩ ‑a 'Bäsɩ yi Laagɔ soo nynä ʋ 'nyɩwa 'loyo ‑yä ɔmɔɔ‑ 'gwa 'tie. 'Nɩ ‑a tötɔ Bɛzamɛɛ' 'lɔlʋkpaa 'kʋʋ nyɩkpɔɔ wa laa bhlä Kisö nä, ɔ ‑yowli Sayulö, Laagɔ yiwa 'nyɔ 'nyɛ. 'Loyo Sayulönɔ, ɔmɔɔ‑ 'tienʋwa ‑kaaa 'ylʋbɔɔ' gwlɩ 'sɔ. 22'Nɩ Laagɔ yi 'päwaa Sayulö ‑sä 'nɩ ʋ yia Davidö 'nyɛ. Ʋ lä Davidö 'plö 'Yizlɛnyʋää' 'loyo. Laagɔ cii‑ 'loyo Davidöö' ‑za, ʋ lä, Yizayii ‑yowli Davidö, ɔmɔ n nii‑. Ɔ ‑glö nyɩkpɔɔ' lɔɔ ‑ɔ nʋ lä 'naa pleyi gbɩ nä. Saa 'fɩɩn n ylä lä nä, ɔ yi sɔɔ nʋ. 23'Loyo Davidö nä, sä Laagɔ cii‑ bhɛ lä nä, 'zaazɩ ɔɔ' 'lɔlʋʋ 'mnö, ‑mɔɔ Zozii ‑ghlää. 'Nɩ ɔmɔɔ‑ plöö‑ lä 'Yizlɛnyʋää' Puënyɔɔ. 24'Fɩa ‑yä Zozii 'kä zëkpë 'kʋ yi nä, kä Zään Badisö ‑yi 'nɩ ɔ ‑soo 'Yizlɛnyʋä nynä ‑mä wa 'cɩcɩ waa' nʋnʋgbɩɩ ‑yä ɔ 'kwa 'nyu 'wlu 'ŋʋ. 25‑Mä Zään Badisö ŋëë bhɛ lä ɔɔ' lebhee' 'wlu koodä nä, kɔ cii‑, ɔ lä ‑amʋ nä, sa bhobho bhä 'naa ‑zaa? ‑Lɔɔ a bhobho nö'ö lä 'mʋ nä, ɔmɔ 'nn ‑wʋ plöö‑ ‑mä, kɔ yi. Ɔmɔ nä, 'nn ‑wʋ 'kʋ ‑ŋwa ‑yä n 'kɔ 'süü 'bhliyee ‑kpakpa blisie.

26'Nɩ Pɔlʋ yi bʋkʋ ci, ɔ lä bhelie ‑yä bhɛŋwnɩänyɩ‑, anyɩ ‑a tötɔ Ablaamʋʋ' 'yua, ɩyä anyɩmɔɔ‑ ‑kʋ lä ‑lää 'nɩ ‑ɔ ŋʋ lä Laagɔɔ‑ 'klʋkpää nä, anyɩa' ‑zä 'dönö ‑yi lä ‑yä a 'kä ‑lɔɔ nëë' ‑bha. 27Zolizalɛmʋ‑dunyʋä ‑yä waa' 'cifinyʋa nä, waa' ‑wʋ Zozii ‑yibhë. 'Nɩ 'Plɔfɛtɩnyʋaa' 'bɔɔgʋʋ ‑a zɛɛ lä Sabaa‑gwlɛylʋʋ 'kʋ nä, wa 'nʋʋ ‑wʋ 'mʋ nuu‑. Sä wa bhlää‑ lä Zozii nä, sɔɔ 'Plɔfɛtɩnyʋa cii‑ bhlä nä, ɩmɩɩ‑ ‑glää lä. 28Gbëgëdü nyënyëë' laa ‑a yi bhlä Zozii' 'kwie 'plö nä, wa 'nöa ‑wʋ nii. ‑Mä sɔɔ ɩ ‑kʋ 'nɩ wa ‑soo ‑gɔmnä Pilatö nynä ɔ 'bhlɔɔ. 29Wälɩɩ 'fɩɩn‑ ‑jɩjlɔɔ lä ɔɔ' ‑za nä, kwa ‑gbä 'nɩ ɩ yi glää. Wa ‑sɔɔ ylä 'kusuu 'yi nä, lesii' wa ŋʋɔ‑. 30Mä Laagɔ ‑gbä 'nɩ Zozii ‑glɔɔ 'kuëë. 31Nyɩkpa ‑wa ‑yɔsɔ nää‑ bhlä Galilee' 'bhlɩɛ 'mnö ‑aaa, 'nɩ ‑wa ‑yɔsɔ ‑mʋ lä Zolizalɛmʋduu' nä, ɔ ‑glɔɔ lä 'kuëë nä, ɔ ‑ghlʋwa 'yi ylɩɩ ‑bhutukpä 'mnö. ‑Pɛpɛɛ' nä, wamää‑ lü ylä ɔɔ' ‑dläfʋɛ nyɩkpa nëëdë. 32'Nägädönö Laagɔ ‑soo bhlä ‑a 'Bäsɩ nynä ‑mä ɩ yi a glää nä, ɩmɩ ‑a ‑la'anyɩ lä. 33‑Anyɩ plöö‑ lä waa' 'yua nä, Laagɔ yä gbä ɩ yä glää ‑anyɩa ‑za. Ʋ ‑gbä 'nɩ Zozi Klisö ‑glɔɔ 'kuëë. ‑Mɔɔ Lɔlɔɔ' 'bɔɔgʋʋ 'mnö, ɩ ‑jɩjlɔ ‑mɔɔ ciidä 'sɔɔ' nynä ‑mä,

‑Mɔɔ plöö‑ lä 'naa 'Yu,

‑A 'bhää ylä ‑zɩkä ‑lää 'kʋ nä,

‑Amʋʋ‑ plöö lä ‑n 'Bä! # 13.33 Ɩ bha Lɔlɔ 2.7.

34Laagɔ nä, kʋ cii‑ bhä nynä ʋ yio 'kwie nëë' ‑sä ‑yä, ɔɔ' 'yɛkɛɛ kä bhä 'zɛɛ. Ɩmɩ Laagɔ cii‑ lä nynä n cii‑ bhä nynä ‑mä, n yi Davidö 'nää 'nyɛ. Nä, 'nää laa‑ ‑kplɔɔ lä wɩa nä, n yi'anyɩma 'nyɛ.#13.34 Ɩ bha Eza 55.5. 35Ɩmɩ Laagɔ cii‑ lä bʋkʋ 'yigädadä nynä ‑mä, ‑Naa Kplɔɔkplɔɔnyɔɔ, ‑naa ‑tanöɔ ‑lä 'yi 'nɩ ɔ 'yɛkɛɛ 'kä glu 'zɛɛ.#13.35 Ɩ bha Lɔlɔ 16.10.

36‑Maa, ‑a tötɔ Davidöö' 'bhlɛsʋʋ 'mnö nä, kɔ ‑nʋ Laagɔɔ' pɔlösaa. Ɔ kuu‑ lä nä, wa ‑zizio lesii', ɔ 'bäsɩ nëëdë. 'Nɩ ɔ 'yɛkɛɛ yi glu 'zɛɛ. 37‑Mä Zozii Laagɔ ‑gälɩä lä 'kuëë nä, ɔɔ' 'yɛkɛɛ ‑wʋ glu 'zɛɛ. 38Naa, bhelie ‑yä bhɛŋwnɩänyɩ‑, wälɩklünö, ɩ ‑ŋwa 'kʋ nynä ‑mä a yibhënɩ 'nägäsä. Zozii nä, ɔɔ' ‑bɔɔ 'nɩ ‑a mii 'nɩ a sonö'anyɩ lä ‑zɩkä nynä ‑mä, kɔ cie nyɩkpɔ nyenyi, 'nɩ ɔ 'plöö‑ nyɩkpɔɔ' lɔɔ‑ gëë‑ lä 'yi nä. 39‑Lää' 'klünö nä, Moyizöö' ‑Jlämaa 'nɩɩ ‑lä nʋlɩ mii. ‑Mä nyɩkpɔɔ' lɔɔ ‑ɔ ‑kä lä Zozii pɔlötɛtɛ nä, ɔ yä 'kpɔ döɔ 'kwläkwlä. 40Nä, a gblɩmä ‑yä 'klüü 'plɔfɛtɩnyʋa ‑jɩjlä lä nä, ɩɩ' 'kanyɩ ‑kä ŋëë. Kɩ ‑jɩjlɔ nynä ‑mä,

41 A wloo

Anyɩmɔɔ‑ nyɩä lä Laagɔɔ' ciciwälɩɩ nä,

Plɛkʋ 'ninio'anyɩ ‑yä a 'mʋmnɔ!

‑Ɔnöza bhää?

Dä a ‑kʋ lä ‑lätee zëkpëkʋ nä,

N yi wälɩklë ‑bhlo nʋ.

Kä nyɩkpɔ ka'anyɩma bhä ‑sää nä,

A 'nöa ‑lä bhɔɔ ‑nʋawlɛ laa. # 13.41 Ɩ bha Aba 1.5.

42‑Maa, Pɔlʋ ‑yä Banabasö 'sɔ ‑bha ylä Laagɔ‑bhutuu 'mnö nä, kä nyɩkpaa ‑sonʋwa yɩ nynä ‑mä, 'yikʋʋ Sabaa‑gwlɛylʋʋ 'kʋ nä, wa yi bʋkʋ ‑yä, wälɩɩ wa cɩa‑ lä nä, wa 'kɩ bʋkʋ cɩa. 43Wa ‑bhɩä lä ‑zɔɔ nä, 'Zufʋnyʋaa' bhutukpä, ɩyä 'yigädabhlɩ 'kʋʋ nyɩkpaa' lʋä ‑wa ‑plä bhlä 'Zufʋ‑Laagɔɔ nä, kä wa gëë‑ Pɔlʋ ‑yä Banabasö 'sɔ 'kʋ. Wa ‑yʋwa 'sɔ ŋʋ bhä 'dö, 'nɩ wa ŋʋwa bhä dɩgälɩɩ' nynä waa' ‑sä ‑lä Laagɔɔ' 'nää gwë.

Pɔlʋ ‑yä Banabasö 'sɔ sää 'Nägädöö lowubhlɩ 'kʋ

44‑Mä 'yikʋʋ Sabaa‑gwlɛylʋʋ ‑ŋëë ylä nä, kä dubhëa ‑dubhëa ‑yi yiosä 'nɩ a 'wlää‑ 'wlu ‑yä wa 'kä Kwlienyɔɔ' 'Nägädöö 'nyukwli poo. 45'Zufʋnyʋa nii‑ lä nyɩkpaa' 'kpaa 'yi nä, waa' 'mnö bhɛ mɛɛ‑. Ɩ ‑kä 'ŋnö 'nɩ wälɩ Pɔlʋ ci bhlä nä, waa' ŋonɩ bhɔɔ 'nɩ wa 'bhɩsɩɔ bhä 'sɩɩ. 46‑Mä Pɔlʋ ‑yä Banabasö 'sɔ ‑sonʋwa wɩa, wlä anyɩ 'Zufʋnyʋä nä, Laagɔwälɩɩ, anyɩ‑ wa 'kɩ bhlä tɛɛ soo. ‑Maa, sä a 'sunɩ ylä ‑mɔɔ nä, 'nɩ a bhobho ylä nynä ‑mä, Laagɔɔ' 'pʋpʋɛɛ‑ ‑kʋ lä 'kɔɔkɔɔ ‑za nä, a 'nɩɛ ‑wʋ 'kʋ ‑ŋwa nä, ‑anyɩ, lowubhlɩɩ 'mnö nyɩkpaa 'mä ‑a 'gä ylä Laagɔwälɩ soo ‑kää mʋ. 47A ni 'klüü Kwlienyɔ ‑sonö‑anyɩ nynä a nʋ nä, ɔ lä

‑Mɔɔ nä,

Kä n ŋʋʋ‑ lä ‑lɔɔ ‑yä,

‑N 'gä 'ylʋzɔɔ' nyɩkpa 'fɩɩn zëlü 'plö.

‑N 'gä 'ylʋzɔɔ' dafɩɩn 'dö fä nynä

Laagɔ, kʋ sä ‑lɔɔ nëë'. # 13.47 Ɩ bha Eza 49.6.

48Maa, Pɔlʋ ‑yä Banabasö 'sɔɔ ciciwälɩnɩ, lowubhlɩ 'kʋʋ nyɩkpaa nui‑ lä nä, kɩ ‑nʋ ‑waa ‑jäkä, ɩ ‑kä 'ŋnö nä, wa ‑fään bhä Kwlienyɔ 'ŋnu. 'Nɩ nyɩkpa 'fɩɩn Laagɔ ‑sä lä nynä ‑wa yi ʋʋ' 'kɔɔkɔɔ zëkpëa kää nä, wa ‑kä bhɛ Zozii' pɔlötɛtɛ. 49'Nɩ Kwlienyɔɔ' ciciwälɩɩ bhlüü‑ 'bhlɩɛ 'fɩɩn 'kʋ. 50‑Maa, 'ŋwnɩa ‑lʋa ‑wa plöö‑ bhlä nyɛbhɛlɩ‑ŋwnɩa 'nɩ ‑wa ‑plä bhlä 'Zufʋ‑Laagɔɔ' nä, kä 'Zufʋnyʋa pʋwa‑ plɛ ŋää. Wa ‑yi 'nɩ wa paa‑ 'sɩɩ ‑mɔɔ 'cifinyʋa plɛ ŋää, 'nɩ wa ‑fä Pɔlʋ ‑yä Banabasö 'sɔ zɔgblö, 'nɩ wa yiwa waa' 'bhlɩɛ 'mnö 'tlü. 51Ɩ ‑kä 'ŋnö nä, kä Pɔlʋ ‑yä Banabasö 'sɔ gbɔtɔɔ‑ ‑mɔɔ waa' ‑kokokpü ‑zɔɔ' ‑bhabhuu.#13.51 Kɩ sä lä ‑zɔɔ nynä wa yä ‑lɔɔ' 'duu gbʋʋ' ‑bha. Wälɩ kä ‑lɔɔ' nyɩkpaa ‑ŋëë nä, ‑ɛɛ yɩɔ waa' gbʋʋ. 'Nɩ wa yi 'plö 'nɩ wa yi Yikonɩɔmʋduu' mʋ. 52‑Mä ‑mɔɔ Atɩɔsöduu' nä, ‑mɔɔ' 'cɔcɩnyʋa, Laagɔɔ' ‑jäkaa ‑kʋwa bhɛ pleyii, 'nɩ Kplɔɔkplɔɔ‑wugɔɔ ‑kʋwa bhä kpänyɩ yëku.

ទើបបានជ្រើសរើសហើយ៖

Nʋnʋgbɩɩ 13: god

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី GOD - u2