Nʋnʋgbɩɩ 12

Wa bhlää‑ Zakö 'nɩ wa ŋʋʋ‑ Pɩɛlö ‑jɩɩ'

1‑Lɔɔ' 'tänyɩɛ 'mnö nä, 'cɔcɩnyʋaa' ‑nanʋä, 'loyo Elodö ŋʋwa bhɛ 'kwlɩkaabhɩää'. 2Zään ɔ bheli Zakö, Elodö ‑gbä 'nɩ wa 'bhlänöɔ‑ ‑jlɛɛ'. 3Elodö nii‑ lä 'yi nynä wälɩɩ ɩ ‑kä bhä 'Zufʋnyʋa 'tʋ nä, kɔ ‑gbä 'nɩ, ‑glɩsɩɩsɩɛ ‑ɛnö 'tänyɩɩ wa lü lä 'flɔɔ ‑ʋʋ 'bha ‑wʋ lä nä, ɛmɛ 'kʋ, wa ‑bhlü Pɩɛlö 'kʋ. 4Wa ‑klɔɔ 'nɩ wa ŋʋɔ‑ ‑jɩɩ' 'nɩ wa ‑ku 'sʋjä ‑mɔɔnä ‑mɔɔnää' ci ‑mɔɔnä nynä wa kuo. Kɩ ŋʋɔ‑ bhä nynä ‑mä Pakö‑glɩsɩɩsɩɛ kä plöö‑ nä, wa 'kɔ ‑jlëë' ‑lä ‑yä wa 'kɔ 'tite 'ŋʋ. 5‑Mä 'tänyɩɩ' Pɩɛlö ‑kʋ lä ‑mɔɔ ‑jɩɩ' nä, 'cɔcɩnyʋa bhibhie bhä ɔɔ' 'wlu Laagɔ 'tänyɩɩ 'fɩɩn 'mnö.

‑Laagɔ‑zuzu ‑sä Pɩɛlö ‑jɩɩ'

6Naa, zeli 'kä bhɛ ze ‑yä wa 'kä Pɩɛlö ‑jlëë' ‑lä ‑yä Elodö 'kɔ 'tite 'ŋʋ. Wa ŋʋɔ bhä ‑säklöö' 'nɩ wa ‑gʋänöɔ ‑abhluëkö 'sɔɔ. ‑Maa, ɔ ŋɔmʋ bhä 'sʋjänyʋä 'sɔ nëëdë, 'nɩ ‑jɩɩgbëa' 'klʋbɛnyʋa ‑koo bhä ‑glënëa. 7'Nɩ ‑bla! Kwlienyɔɔ' ‑Laagɔzuzu yi 'kʋ ghlä. ‑Bhutuklëa wa ŋʋɔ‑ bhlä 'mnö nä, 'nɩ zëlü yia 'mnö ŋänɩä. 'Nɩ ‑Laagɔzuzu yi Pɩɛlöö' gbäköyee 'taa 'nɩ ɔ yi glɔɔ. 'Nɩ ʋ yio soo, ʋ lä Pɩɛlö‑, ‑n ‑bha 'kʋ fäfä! ‑Laagɔzuzu cii‑ lä sɔɔ nä, ‑säklö wa ‑gʋä bhlä Pɩɛlö nä, kɩ doo‑ 'kpɔ. 8'Nɩ ʋ yio soo, ʋ lä ‑n gʋä ‑naa 'bɛtʋʋ, ɩyä ‑n plä ‑naa ‑asädlɛɛ. Sä ʋ cii‑ lä nä, 'nɩ Pɩɛlö yi sɔɔ nʋ. 'Nɩ ʋ yio bʋkʋ soo, ʋ lä ‑n plä ‑naa 'kotuklëa ‑yä ‑n gë'ë kʋ! 9'Nɩ Pɩɛlö yi ‑jɩgbëa 'mnö ‑bha, ɔ gëë‑ ‑Laagɔzuzuu 'kʋ. ‑Mä ɔɔ' bhobho bhɔɔ nynä ‑mä wälɩɩ ɔ ni lä 'yi nä, ɩ plöö‑ bhä ‑mää zëkpë 'kʋʋ wälɩ. Kɔ ‑bhobho nynä kɔ ‑ghlä. 10'Nɩ ɔ ‑yä ‑Laagɔzuzuu 'sɔ yi tɛɛtɛɛ‑sʋjaa' kpaa nëë' blüë. 'Nɩ wa yi 'sɔnalʋa nëë' blüë. 'Nɩ wa yi lätö‑kpluu daa ŋëë. 'Nɩ ‑glënëa wa kä lä nëë' blüë 'nɩ wa slo lä jlukʋ nä, 'nɩ wa yi aa' kpluu ŋëë. ‑Mä kpluunʋ, ʋmʋ 'titi ‑känöɔ. 'Nɩ Pɩɛlö ‑yä ‑Laagɔzuzuu 'sɔ yi ‑zɔɔ 'wlʋ, 'nɩ wa yi 'tlii 'kʋ slo. 'Nɩ ‑Laagɔzuzuu yi Pɩɛlö yëku ‑bha. Ɔmɔ ‑bhlo ‑kʋ bhɛ ‑lɔɔ.

11Mä ɔ nii‑ ylä ‑nɩnɩ 'fɩɩn 'yi nä, kɔ cii‑, ɔ lä ‑pɛpɛɛ n ni ylä 'yi nynä ‑mä nʋawlɛɛ lä. Laagɔ ‑lobho 'zaazɩ ʋʋ' ‑zuzuu. Ʋ yä'ä 'loyo Elodö nëë' ‑sä! Gbenyenyii 'fɩɩn 'Zufʋnyʋa ylä bhlä nynä ‑ɩ ŋënö'ö nä, ʋ yä'ä 'mɩɩ nëë' ‑sä. 12Pɩɛlö ‑bhobho ‑plɩɩ, 'nɩ ɔ yi Zään ɔ 'nɔ Malii' ‑gbäsɩɩ mʋʋ. Zäänɔ nä, ɔmɔ wa zie bhlä 'sɩɩ Makö. ‑Mɔɔ Malii' ‑gbäsɩɩ nyɩkpa ‑bhutukpä ‑kʋ bhä ‑mɔɔ 'nɩ wa bhibhie bhä. 13‑Mä Pɩɛlö ‑bhütë 'gbëa kpluu, 'nɩ ‑gänʋŋnɔ ‑bhlo yi yi, 'nɩ ɔ yi 'nyukwli poo. Ɔmɔ wa laa bhä Lode. 14Ɔ ‑yibhë Pɩɛlöö' nuwälɩɩ, ‑mä ‑pʋpɛ bhlɔɔ bhɛ lä nä, ɔ 'kä 'gbëa kää nä, ɔɔ' ‑wʋ ‑kää ‑mä, kɔ ‑fä ‑mɔɔ ‑lʋa 'dö, ɔ lä Pɩɛlö 'mɔɔ‑ bhütë lä! 15Wlä ‑mä plɛɛ‑ bhlää ‑a! ‑Gänʋŋnɔɔ lä 'zaazɩ, ɔmɔ lä. Wlä ‑ɔ! Ɔɔ' ‑zuzu‑ yi ‑lɔɔ ‑kʋ. 16Maa, Pɩɛlö bhütë bhä 'kɔɔkɔ kpluu. 'Nɩ wa yi kään. Wa lä wa wloo nä, ‑n ni Pɩɛlö 'zaazɩ. Plɛkʋ yʋwa bhɛ 'ninio. 17'Nɩ ɔ yiwa sɔ 'pää nynä wa kʋ ‑siin ‑mä ɔ 'kwa wälɩ soo. 'Nɩ sä Kwlienyɔ ‑sɔ lä ‑jɩɛ 'mnö nä, ɔ yiwa sɔɔ soo. 'Nɩ ɔ yi bʋkʋ ci, ɔ lä a mʋ ‑yä a sonɩ Zakö ‑yä ‑mɔɔ' 'cɔcɩ‑bhelia 'fɩɩn. Ɔ cii‑ lä sɔɔ nä, kɔ wlʋʋ‑ ‑zɔɔ, 'nɩ ɔ yi 'yigäda ‑gbäsɩ mʋʋ.

18‑Maa, zeli ‑ze lä nä, 'sʋjaa ‑kʋ bhɛ nyäkälɩɩ'. Wa ylä bhɛ wa yëku nynä ‑maa Pɩɛlö mɔ wälɩ‑ ‑sä ‑ŋënöɔ bhää? 19'Nɩ 'loyo Elodö yi nyɩkpa dafɩɩn lobho nynä wa tänöɔ. ‑Mä 'flɛ lä! Wa 'nöɔ ‑wʋ nii‑. Ɩ ‑kä 'ŋnö nä, 'sʋjaa ‑wa ‑koo bhlä ‑jɩgbëa nä, kä Elodö ‑kunʋwa tʋ 'fɩa, 'nɩ ɔ yi gbä 'nɩ wa yiwa 'bhlä. 'Nɩ Zudee‑bhlɩɛɛ' 'duu wa laa lä Sezalee nä, Pɩɛlö yi ‑mɔɔ gwë 'pää ‑kää mʋ ylɩɩ zioo' ‑za.

Loyo Elodö yä 'ku

20‑Mä Tilöbhlɩ 'kʋʋ nyɩkpa, ɩyä Sidɔɔbhlɩ 'kʋʋ nyɩkpaa' 'mnö bhɔɔ 'loyo Elodö mɛɛ. Ɩ ‑kä 'ŋnö nä, ‑mɔɔ' nyɩkpaa 'ŋʋʋ‑ 'kʋ 'nɩ wa nʋ saa 'fɩɩn 'nɩ nyɩkpɔɔ' lɔɔ‑ yiwa bhlä klää 'nɩ wa yi bhlä Elodö 'kwälö fä nä, wa nio‑. Ɔmɔ wa laa bhä Blatusö. Ɔ ‑glö bhä 'loyoo' pudaa' ‑bhutuklëa' 'klʋ ‑bɛɛnyɔ. Blatusönɔ nä, ɔmɔ 'kʋ wa ‑ghlää 'nɩ wa ‑klä 'loyo Elodö bho nynä wa ‑yɔsɔ pää' 'kʋ wɔtɔlɩ 'kä ‑mɔɔ yi. Sɩ ‑kʋ bhlä naa, Tilönyʋä ‑yä Sidɔɔnyʋä nä, 'loyo Elodöö' 'bhlɩɛ 'mnö wa sä bhä 'nɩ wa lü bhä. 21Ylʋʋ wa ŋʋʋ‑ bhlä nynä wa ‑yä Elodö 'sɔ 'kä 'nii‑ nä, ʋ ‑ŋëë ylä nä, kä Elodö ‑plä ɔɔ' 'leyi‑bänaa 'mʋ. 'Nɩ ɔ yi ɔɔ' 'leyi‑këkpëa 'mnö 'plöö 'nɩ ɔ yi sä kʋ. Ɔ bhlüü nuwälɩ 'kʋ 'nɩ ɔ yi ‑jlë soolɩ 'kʋ cie. 22‑Mä nyɩkpa wa ‑puo bhlä 'nyukwli nä, wa woo bhä, wlä ‑mɔɔ nä, Laagɔ‑ ‑n plöö lä! ‑Naa cicisaa nä, 'ylʋzɔkʋnyɔɔ' ‑lä sɔɔ cilɩ mii. 23‑Mä 'kpobhuu bhlobhlo 'kʋ, ‑Laagɔzuzu ‑yi 'nɩ ʋ paa‑ Elodö 'kʋ. ‑Ɔnöza bhɛɛ? Elodö nä, wa fänöɔ bhlä 'ŋnu nä, ɔɔ' ‑wʋ Laagɔ 'ŋnu ‑fää nynä ‑mä, 'klʋagba ŋëë Laagɔ! Ɩ ‑kä 'ŋnö 'nɩ ‑sʋmabeli ‑lüo 'nɩ ɔ yi 'ku.

24‑Maa Laagɔɔ' 'Nägädöö ‑mʋ 'nɩ ɩ ‑ŋëë dää 'fɩɩn. 25Banabasö ‑yä Sɔlʋ 'sɔ nä, wa ‑bhɩä ylä ‑mɔɔ Zolizalɛmʋduu' ‑Laagɔ‑lebhe ‑zɔɔ nä, kwa 'ylɩbhɔ‑ yɩ. Wa 'ylɩbhɔ bhlä nä, Zään wa ‑zie bhlä Makö nä, kwa ‑yɔsɔ ‑mʋ.

ទើបបានជ្រើសរើសហើយ៖

Nʋnʋgbɩɩ 12: god

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី GOD - u2