Mataayi 23
23
Yisu miisuungaha dyatili milongisi mi Mikele na yi Bafarisi
Mlk 12.38-39; Luk 11.43,46; 14.7; 20.45-46
1Buuna, Yisu aleeli huli koonge a baatu yoosi na huli bayihi ba nde ti: 2«Isalu hi milongisi mi Mikele na Bafarisi, ni ulongese na ubindula Mikele mya Moose. 3Benu laafwana usiingala bo na uvaanga moosi ma bo bali mu uleele. Ka a lidyata we bu hu li mavaanga ma bo ve. Bo a bubaasalila ma bo bubaalongese ve. 4Bo bubaakuta mipfuna mi myaleme mi mili na pasi mu ubita, na bubaakwiha bana myo mu yulu bisambaha. Ka bo mwakulu bali mu ubisa ubembe myo tso mu mulembo mumosi. 5Bo bubaakuhasa mavaanga ma bo moosi mu tooni umonehele ŋa miisu ma baatu. Ni mu buuna, mu taangu lisambulu, bo bubaakuta bisupu bi baasonehe mambu ma Ngidi mu mambalanga na mu myoho. Matsoso ma biyunga bya bo, mali ma maalutahala bunene#Mat 15.38-41. 6Bo bubaatondo mambuha ma muyusu mu mikungi mi udya miminene, na utsahala mu makiti ma busu mu manzo ma lisambulu li Bayudaayo. 7Bo baatondo kaka ti ba baabila bo mu matandala ma mikungi na ba baateele bo “Rabi, Rabi”.
8Ka benu, a lisiinga ve ti baateele benu “Rabi”, mu tooni ati, benu lili ndulu na mulongisi mumosi, na benu boosi lili baana ba ngu. 9A liteele pasi muutu ŋa toto “taata” a benu ve, mu tooni ati, benu lili na Taata ndulu mumosi, wu li hu mayulu. 10A lisiinga ve ti baateele benu “basuungihi”, mu tooni ati benu lili na musuungihi ndulu mumosi, ni Kristo. 11Woosi wu li mukuutu ŋa hati la benu, afwana uba musalili a benu. 12Woosi wu usyenoho mu nde mwakulu, sa bakulamasa. Ka woosi wu ukulamana mu nde mwakulu, sa basyenolo.»
Yisu miisaangula muwala milongisi mi Mikele na wu Bafarisi
Mlk 12.38-39; Luk 11.43-46; 20.45-47
13Yisu aleeli: «Ki pila lingebe huli benu milongisi mi Mikele na Bafarisi banga muwala! Mu tooni ati, benu libaadibuha munywa a nzo wu Ipfumu hi mayulu huli bakima. Benu mwakulu a lili mu ukoto mu hyo ve, na benu a lili mu uvyoso ba bali na nzala ukoto ve.
[14Ki pila lingebe huli benu milongisi mi Mikele na Bafarisi banga muwala! Mu tooni ati, benu libaataana manzo ma bakwili ba bakaasu. Benu libaasa masambulu ma mala, mu usaha umonehele. Benu sa liyaka tsundusu yi yaafulala bunono.]
15Ki pila lingebe huli benu milongisi mi Mikele na Bafarisi banga muwala! Mu tooni ati, benu lili mu utaangila toto yoosi na mubu woosi mu usaha ubaha tso muutu mumosi wu ukiingula buyedi. Na bu benu limiibaha nde, benu libaakitusa nde mwana a mbungulu, wu alutahala benu ndutahala yoole mu bubi.
16Ki pila lingebe huli benu, babiti ba balili binzimana! Ba lili mu uleele: “Tso muutu labi mulabu mu nzo a Nzambi, mulabu mo wuuna a haali na kaluha ve. Ka tso nde labi mulabu mu wolo la mu nzo a Nzambi, nde afwana ukiinza mulabu a nde.” 17Ki pila butsuudu na ki pila bunzimana! Hima hyalutahala tsoongo: wolo, vo ti nzo a Nzambi yi yibaava wolo mo liina bungidi? 18Benu libaabweleele ti, tso muutu labi mulabu mu diiku la tsuhili bungodu, a hu li na kaluha ve. Ka tso nde labi mulabu mu bungodu bu buli ŋa yulu a diiku la tsuhili bungodu, nde afwana ukiinza mulabu a nde. 19Ki pila bunzimana! Hima hyafulala tsoongo: bungodu, vo ti diiku li bungodu li libaava bungodu mo buuna bungidi? 20Ni mu buuna, nde wuuna wu ulaba mulabu mu diiku la tsuhili bungodu, alaba kaka mu diiku la tsuhili bungodu na mu byosi bi bili ŋa yulu a lo. 21Nde wuuna wu ulaba mulabu mu nzo a Nzambi, alaba kaka mu nzo a Nzambi na mu Nzambi wu atsahala muuna. 22Nde wuuna wu ulaba mulabu mu yulu, alaba kaka mu kiti-ipfumu hya Nzambi, na mu nde wuuna wu atsahala ŋa yo#Esa 66.1.
23Ki pila lingebe huli benu milongisi mi Mikele na Bafarisi banga muwala! Benu libaava huli Nzambi ikuuku imosi mu kuumi, hi misooso na makaya moosi ma benu libaakuna ma mu baava tsulu yimbwe mu byudya. Ka benu laamiitimba ndongisili yi Mikele yi yaalutahala tsoongo, we butsiitsa, bubwe na kangimini: maana ni mambu ma benu likiibaasalila, hwavele utiimba makima#Lev 27.30; Pfu 14.22. 24Benu babiti ba lili binzimana! Benu libaaleke malamu ma benu mu umaasa ipfudu, ka benu libaamina buuru nga irunga!
25Ki pila lingebe huli benu milongisi mi Mikele na Bafarisi banga muwala! Benu libaaswaha mu utsyemese imbadi hi mambuungu na bikoombe bya benu. Ka hutso mitima mya benu, hwaluula mu bisiha bi mayiba ma benu na mapeyu ma benu ma mabi. 26Mufarisi wu inzimana! Maatswamina utsyemese hati la mbuungu, buuna imbadi hya yo kaka sa hitsyeme.
27Ki pila lingebe huli benu milongisi mi Mikele na Bafarisi banga muwala! Benu lili we mangila ma mafuuka#23.27 Mangila ma bisu Palesitini aba baakila mwindu wu mufuuka, mu ukala baatu mu ubelehene mo mu iliba ŋa butsuhu, na uvelekoto mu matumili ma tsyemili. , ma mu baamonehele na imbadi hi ibwe, na ma maaluula mu mavisi ma bamvumbi na bi byaveletsyeme bya pila mu pila. 28Bumosi kaka mu benu, ŋa busu bwa baatu, benu libaamonehele ti benu libaasa litondo la Nzambi. Ka hu hati a benu, benu laaluula mu muwala na mu idiingu hi hyavele na mikele.
29Ki pila lingebe huli benu milongisi mi Mikele na Bafarisi banga muwala! Mu tooni ati, benu libaatuungala mimbihuli mangila ma mabwe, na libaayolo mangila ma baatu ba baasiidi litondo la Nzambi. 30Na benu libaaleele ti, tso bisu laaba mu taangu bakaaha ba bisu, kini bisu a laakiikuta pfuundu na bo mu uduba mimbihuli ve. 31Na ni buuna, benu libaatiila benu mwakulu imbangi hi hyumweese ti benu ni imbisa hya ba baadubi mimbihuli. 32Ni mu buuna, hwadaani na manisalaani isalu hi bakaaha ba benu baabaandihi. 33Benu bataadi, ibaandu hi bapili! Buni benu libaatsima upeke tsyembili a mbungulu?
34Ni mu buuna, yuhaani: me ndi mu utsindaha benu mimbihuli, banga tsiki na milongisi mi Musamu wu Mubwe. Benu sa liduba bamosi, na benu sa likomene bakima tsooso ŋa muti. Benu sa lifwiinza bakima kaka bikooti mu manzo ma lisambulu li Bayudaayo ma benu, na benu sa litsuta bo mu pasi musyenge wu bo buuyene. 35Ni mu buuna, benu luuyaka tsyembili a ba baadubi baatu boosi ba baasungama umata lipfu la Abeli, muutu wa tsiitsa natee lipfu la Zakariya mwana a Baraki. Zakariya wu benu laadubi ŋa taha a nzo a Nzambi na diiku la tsuhili bungodu. 36Mu mbuli me ndi mu undeele benu: ni baatu ba tuungi mo liniili buuyaka tsyembili ya ba baadubi baatu mo baana!»
Yisu miilila mu tooni a Yeruselemi
Luk 13.33-35
37Yisu abweleele: «Yeruselemi, we musyenge a Yeruselemi, we wu ubaaduba mimbihuli na uduba baatu ba Nzambi ali mu utsindaha we, mu ndangili mamanya! Mu mana kwe me tondi ukuukaha baatu ba we huli me, we bu tsusu ubaakuukaha baana ba nde hu tsina mapapi ma nde, ka benu a laatondi buuna ve! 38Ni mu buuna, nzo a benu sa yisaala siha#Yel 22.5. 39Mu mbuli, me ndi mu undeele benu, benu a luubwemono me ve, natee mu taangu yi benu luuleele ti: “Nyaha Nzambi asyeme nde wuuna wu li mu uya mu nduhi a Pfumu!”»
ទើបបានជ្រើសរើសហើយ៖
Mataayi 23: TSA
គំនូសចំណាំ
ចម្លង
ប្រៀបធៀប
ចែករំលែក
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.
