Mataayi 12
12
Yisu ŋa busu bu ilumbu hya saba
Mlk 2.23-28; Luk 6.1-11
1Mu taangu mo yiina, Yisu akataangila tsyehe a mbutu mu ilumbu hya saba. Bayihi ba nde baamoni nzala; bo baabaandihi ukoolo bisaka bya mbutu, na udya yo#Pfu 23.26. 2Bafarisi bamono buuna, baleeli huli Yisu: «Mono, bayihi ba we bali mu uvanga mi baaliha usa mu ilumbu hya saba#Pal 34.21!» 3Yisu afutili bo: «Benu a laataanga ma Davidi hasiidi bu haba na nzala, nde na baatu ba nde ve? 4Nde akoti mu nzo a Nzambi, avoli mapa ma baayeholo huli Nzambi, adiidi mo na aviidi kaka huli baatu ba nde. Mapa mo maana, muutu mukima a habeedi na muswa mu udya mo ve, ka ndulu bangaanga ba Nzambi#1Sa 21.2-7. 5Buuve, benu a laataanga mu Mikele mya Moose ti, mu ilumbu hya saba, bangaanga ba Nzambi ba bubaasala ŋa mbuha ya ngidi mu nzo a Nzambi bubaasumana mikele mya saba ve? Ka liina a laakaba lisumu huli bo ve#Mat 28.9-10. 6Me ndeele benu, ŋaniiŋa huli na wu afulala nzo a Nzambi. 7Tso benu laayaaba mbinduli a mambu ma baasonehe maniima: “Me umbaatondo kwili lingebe ka a tsuhili bungodu#Ose 6.6 bu bibulu ve”, kini benu a laakwiha mbele huli baatu ba baavelesa dyambu ve. 8Ni mu buuna, Mwana a muutu li Pfumu a saba.»
Yisu miibeeloso muutu mu ilumbu hya saba
Mlk 3.1-6; Luk 6.6-11
9Titswene, Yisu amata ŋaana nde ayeni hu nzo a bo yi lisambulu li Bayudaayo. 10Muuna mwaba na muutu mumosi nga kaka li laararama. Bafarisi baafuuli Yisu: «Hu li na muswa mu ubeeloso muutu mu ilumbu hya saba?» Bo baafuuli buuna mu ukete Yisu, mana bo babaha tooni yi ukese nde. 11Yisu afutili bo: «Tso mumosi ŋa hati la benu li na limeme ndulu limosi, na lo limiibwa mu iyuna hya dohesele mu ilumbu hya saba, nde a hupalisa lo ve? 12Yaabaani ti muutu alutahala limeme biita! Buuna, baava muswa mu uvanga libwe mu ilumbu hya saba.» 13Buuna, Yisu aleeli huli muutu: «Laba kaka la we.» Nde alabi lo, na lo laafutihili polo we lina. 14Bafarisi baayeni, na baakuti pfuundu yi usaha manzila ma utuma uduba Yisu.
Yisu ni musalili wu Nzambi hasooli
15Bu Yisu hayaabi mambu mo maana, nde amati ŋaana. Baatu ba balahi baadukili nde. Nde abeelusi babeedu boosi. 16Ka Yisu akebisi bo mu mifudi mu uvelepalisa lo mbadi. 17Mo mavangimi buuna, mana mambu ma mumbihuli Esaya hayabisi, mayelemene:
18«Monwaani musalili a me wu me atsoolo,
ni nde me umbaatondo, na me ndi na kinya yindahi mu nde.
Me utsuusa Livupu la me mu nde,
na nde uyabisa butsiitsa bwa me mu matsi moosi.
19Nde a huusa tuumu na muutu ve, na a huubaba ve,
na pasi muutu a huuyuha ndaha a nde mu manzila ve.
20Nde a huutabula litsootso li baamiikwaboholo ve,
na nde a hudimasa mwinda wu liyalala laaka hoole ve,
natee bu nde hubiingasa butsiitsa.
21Na baatu ba matsi moosi sa basa hiitu mu nduhi a nde#Esa 42.1-4.»
Yisu miibingasa mavupu ma mabi
Mlk 3.20-27; Luk 11.14-27
22Titswene, baatu baabehili Yisu muutu mumosi wu aba inzimana na iduka mu tooni ati, nde aba na livupu la tengo. Yisu abeelusi muutu mo wuuna, na nde abaandihi uyambila na umono. 23Baatu baakimuhi na baakaleele: «Be wunuwu me ni mwana a Davidi?» 24Bu Bafarisi baayuhi buuna, bo baakaleele: «Muutu mo wunuuwu ali mu ubinga matengo, ndulu mu tooni a bu nde ali na Belesebuli, pfumu a bo wu li mu uva nde matwala!» 25Ka bu Yisu haba ayaaba matsimi ma bo, nde aleeli bo: «Tso ipfumu hya tsi hikabuhi na tso baatu ba ipfumu mo hiina bali mu ulwana bomo na bomo, ipfumu mo hiina sa hitsaamuha. Na tso baatu ba musyenge buuve ba nzo mosi, bali mu ukaakana bomo na bomo, musyenge buuve nzo mo yiina utwala ukwilala ve. 26Tso Saatana li mu ubinga nde mwakulu Saatana, na tso nde li wu akabuha nde mwakulu, buni ipfumu hya nde hyutwala ukwilala? 27Tso mu mbuli me umbambinga matengo mu matwala ma Belesebuli, ka na ubaava batsyengi ba benu matwala mu ubinga mo? Ni mu buuna, batsyengi ba benu sa baba bo mwakulu baatsundisi ba benu. 28Ka uba ti ni mu Livupu la Nzambi me ndi mu umbinga matengo, buuna Ipfumu hya Nzambi hyamiiyaato natee huli benu.
29Muutu tso mumosi utwala ukoto mu nzo a nga pinyu na utaana bya nde ve, hwavele umaahada nde mikudu. Ka hu mbisa uhada nde mikudu, buuna nde utwala utaana bya mu nzo a nde byosi#Mlk 3.27. 30Woosi wu avele itwadi na me, nde li muboho a me. Woosi wu uvelepfuutana na me mu ukuukaha, nde li mu utsala. 31Ni mu buuna, me ndi mu undeele benu: Nzambi unyahula masumu moosi, naapa bituhi bi bali mu utuha nde. Ka pasi muutu wu utuha Livupu la Ngidi, a huuyaka nyahulili lisumu mo liina ve. 32Na pasi muutu wu utoyo bubi mu Mwana a Muutu, sa ayaka linyahula li masumu. Ka nde wuuna wu uyambila bubi mu Livupu la Ngidi, a huuyaka nyahulili lisumu mo liina ve. Tso mu taangu mo yiniiyi, tso mu matangu ma muuya.»
Muti na mbutu a nde
Luk 6.43-45
33Yisu abweleele: «Tso muti li wu mubwe, mbutu a nde kaka yili yimbwe. Ka tso muti li wu mubi, mbutu a nde kaka yili yimbi. Pasi muti ubaayabahana mu mbutu a nde. 34Benu ibaandu hi bapili! Benu ba lili baatu ba babi, buni benu luutwala ubaaleele misamu mi mibwe? Munywa a muutu ubaapalisa ma maaluula mu mutima a nde. 35Muutu wu mubwe ubaapalisa ma mabwe ma mali hutso iswehili hi ibwe hi hili mu nde. Muutu wu mubi ubaapalisa ma mabi ma mali hutso iswehili hi ibi hi hili mu nde. 36Me ndeele benu lo: Mu ilumbu hya tsundusu a Nzambi, pasi muutu sa ava ikuumbu mu mambu moosi ma maavele a tsalu ma nde hapalisa. 37Mu tooni ati, ni mu mambu ma we ubaapalisa mu munywa a we, Nzambi huubiingasa we, buuve huubelese we.»
Pondili iliimbu hya kimuhili
Mlk 8.1-4; Luk 11.29-32
38Buuna, mwana a kabu li milongisi mi Mikele na li Bafarisi, baaleeli huli Yisu: «Mulongisi, bisu litondi umono iliimbu hya kimuhili.» 39Yisu afutili bo: «Baatu ba tungi mo liniili, bali baatu ba babi na ba baavelekangama mu Nzambi, bo bali mu usaha iliimbu. Ka a buusiila bo iliimbu ikima ve ŋa yulu a hi mumbihuli Yonasi. 40Eye, we bu Yonasi havyosi bilumbu bitatu bya nyangu na bi butsuhu hutso a moonyi a tswi#Yon 2.1 wu munene, ni buuna kaka, Mwana a Muutu huvyoso bilumbu bitatu bya nyangu na bi butsuhu hutso a toto. 41Mu ilumbu hya tsundusu, baatu ba Niniive sa bateleme ŋa busu bwa baatu ba tungi mo liniili, na sa bakese bo. Mu tooni ati, bisu Niniive baasobi mbiili a bo, bu baayuhi ibila hya Yonasi#Yon 3.5. Ka ŋaniiŋa, hu li na wuuna wu alutahala Yonasi! 42Mu ilumbu hya tsundusu, mutumi wu mukaasu wa hu Sude, sa ateleme ŋa busu bwa baatu ba tungi mo liniili, na sa abelese bo. Nde husa buuna, mu tooni ati nde amati hu matsi ma maafulala lala ŋa toto. Nde ayidi mu uyayuha mambu ma maaluula mu buyedi bwa Soolomo. Ka ŋaniiŋa hu li na nde wuuna wu alutahala Soolomo.»
Pfutihili livupu li libi
Luk 11.24-26
43Yisu abweleele: «Ŋa livupu lilibi limiipala mu muutu, lo libaayene yayuhu mu mambuha ma kumu a nzala, mu usaha ivumili. Bu lo livelibaha ivumili, 44lo ka ubaaleele: “Me upfutaha hu nzo yi me amati mu yo.” Ŋa lo lufutaha hu nzo mo yiina, lo sa libiisa nzo yi bunyanga, yi baakombolo, yi baavanga bubwe. 45Buuna, lo sa liyene mu uyavolo mavupu tsambu makima ma maalutahala lo bukanyi. Mo moosi sa maayakoto na lo mu nzo, na utsahala mutso a yo. Hu tsukusu, muutu mo wuuna sa akoto mu pasi yi yafulala yatsomi. Ni buuna, sa huba bumosi kaka huli banga mavaanga ma mabi ba lolo yiniiyi.»
Ngu na baana ba ngu a Yisu
Mlk 3.31-35; Luk 8.19-21; Heb 2.11-13
46Bu Yisu haaba kini mu utoyo na kuungi la baatu, ngu a nde na baana ba ngu a nde baaba hu mbadi na baakasaha utoyo na nde. 47Muutu mumosi ni uleele Yisu: «Mono ngu a we na baana ba ngu a we hu mbadi bali, bo batondi utoyo na we.» 48Ka Yisu afutili nde: «Ngu a me ni na? Na baana ba ngu a me, ni bana?» 49Titswene, Yisu alabi kaka hu tsyelo bayihi ba nde, na nde aleeli: «Mono ngu a me, mono baana ba ngu a me! 50Mu tooni ati, woosi wu li mu ukuhasa litondo la Taata a me wu li hu mayulu, wuuna ni mwana a ngu a me, wuuna ni kedi a me, na wuuna ni ngu a me.»
ទើបបានជ្រើសរើសហើយ៖
Mataayi 12: TSA
គំនូសចំណាំ
ចម្លង
ប្រៀបធៀប
ចែករំលែក
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.
