Mavanga 15
15
1Mwa litangu la baatu ba baamati hu tsi a Yuda, baayato hu musyenge a Antyokya. Bo balongisi baana ba ngu ndongisili moyi: «Bavelekete benu we bu huli tumili mikele mya Moose, benu utwala uyoboho ve.» 2Pahuli na Baranabasi a baasingisili bo ve. Titswene, paha na kele yi mifudi byabwidi ŋa hati la baatu mobaana mu dyambu moliina. Libundu laavoli kesili ti Pahuli, Baranabasi na baana ba ngu bakima, bisu Antyokya, baafwana uyene hu Yeruselemi. Ni huuna bo buyatsikaha musamu mowuna huli bilumbi, na huli bakuutu ba libundu.
Likutuunu la hu Yeruselemi
3Libundu laaviidi bo likumbasa li lafwana mu uvangimasa mudyenge mowuna. Bo baavyohi mu mukesu bitanzi bya Fenesiya na Samariya. Bo baakayabisa buni ba baavele Bayudaayo baasobi mbiili mu usa hiitu mu Nzambi. Ikumbu mohinihi hyakamwese kinya yinene huli baana ba ngu boosi. 4Bu bo baatoodi hu Yeruselemi, libundu li Bakristo loosi, bilumbi na bakuutu ba libundu, baayaki bo. Pahuli na Baranabasi baayabisi bo moosi ma Nzambi havangi mu nzila na bo. 5Bu bo baakava ikumbu, hwaba na mwana a kabu mu libundu moliina, ba baaba Bafarisi. Bo baatelimi, na baaleeli bu: «Bafwana ukete ba baavele Bayudaayo, na utuma bo mu ukiinza mikele mya Moose.»
Bilumbi byapfuutini na bakuutu ba libundu
6Bilumbi na bakuutu ba libundu baapfuutini mu utsikaha musamu mowuna. 7Humbisa usobosono minywa, Peetelo atelimi na aleeli bo: «Bana ba ngu ba me, benu liyabi umata beleve, ti Nzambi asooli me ŋa hati la benu. Nzambi asooli me, mana me nzanzaabisa Musamu wu Mubwe huli ba baavele Bayudaayo, mana bu bo buyuha nde, bo basa hiitu mu Nzambi. 8Nzambi wu yaabi matswehi ma mitima mya baatu, aviidi huli ba baavele Bayudaayo Livupu la Ngidi. Nde haviidi bo Livupu la Ngidi, we bu hasiidi mu bisu, mu umwese ti nde a hatimba bo ve. 9Nde a hasa lisobosono ŋa hati la bo na bisu ve. Bu bo baasiidi hiitu mu Nzambi, nde atsyemisi ka mitima mya bo. 10Bunuubu, mu hima lili mu usongo Nzambi, mu usaha ukwiha bayihi mupfuna, wu tso bakaaha ba bisu, tso bisu mwakulu, laaveletwala ubita? 11Ka bisu na hiitu ti ni mu bubwe bwa Pfumu Yisu bisu laamiyoboho, pila mosi we bo, ba baavele Bayudaayo.»
12Na baatu boosi baasi swii. Buuna, Pahuli na Baranabasi baakayabisa bo bilimbu bya kimwili, na bipadi bi bo baasiidi mu matwala ma Nzambi, ŋa hati la ba baavele Bayudaayo. 13Bu bo baamani uyambila, Yaki avoli munywa na aleeli: «Baana ba ngu, yuhani me! 14Simoni miibindula benu, buni Nzambi havoli kesili mu usoolo ba bu uba baatu ba nde, ŋa hati la ba baavele Bayudaayo. 15Na mambu ma maaleele mimbihuli, mali mu uyelemene na vanga molinili, mu toni ati baasonehe mu ma Ngidi:
16“Ŋa mbisa a maana, me unzapfutaha,
we bu uleeli Pfumu.
Me umbwetuunga nzo a Davidi yi yabwidi.
Me utsuula bibaha bi byatsamuhi,
me utsungaha nzo mo.
17Na mabuli moosi, na baatu ba mabuli moosi ba me atsoolo,
baatu mobaana bu usaha Pfumu.
Mono ma Pfumu amiileele,
18wu ayabisi matsimi ma nde umata beleve#15.18 Amo 9.11-12..”»
19Ni mu buuna, Yaki abwebwese bu: «Me tsimi ti, a lisaani bikahu mu ba baavele Bayudaayo ve. Baatu moba, baamiisa hiitu hya bo mu Nzambi. 20Ka lisonehani bo maaniima: “A lidya banyama ba baasumaha, ba baayeholo huli bifwita ve. A lidya misunya mi banyama ba baapinya ŋa mivodi, tso unywa makila ma bo ve. A lisa bumbembo ve#15.20 Lev 17.10-16.. 21Bo a bafwana uvanga maana ve, mu toni ati, umata tsikulu, baatu bali mu ulongese mikele mya Moose, mu pasi musyenge. Na ubaataanga nde mu manzo moosi ma lisambulu ma Bayudaayo mu pasi saba.”»
Muhanda huli libundu la Nzambi hu Antyokya
22Buuna bilumbi na bakuutu ba libundu, na libundu loosi baavoli kesili yi usoolo mwa bakima ŋa hati la bo. Na utsindaha bo hu Antyokya, nzila mosi na Pahuli na Baranabasi. Bo baasooli Yude nga kumbu Barasabasi na Silaasi. Bo boole baakuha ŋa hati la bana ba ngu. 23Baaviidi bo mu ubita muhanda wu baasonehe bunuubu: «Bisu bilumbi na bakuutu ba libundu, bambaahi ba benu banga imiinu, limiisuula benu baana ba ngu ba laavele Bayudaayo. Bisu limiisuula benu ba lili hu musyenge a Antyokya, hu bitanzi bya tsi a Siriya na itanzi hya Silisiya. 24Bisu laayuha ti baatu ba baamata huli bisu, baayakotese muyungisi na umwese benu boomo mu mambu ma bo. Ka, a bisu laatumasa bo mu dyambu moliina ve. 25Ni mu buuna, bisu boosi laavolo kesili mu itwadi, mu usoolo baatu na utsindaha benu bo. Bisu lutsindaha bo itwadi na bambaahi ba bisu ba litondo, Baranabasi na Pahuli. 26Ni baatu mobaana ba baamiivahula mivumu mya bo. Bo baavangi buuna, mu toni isalu hya Pfumu a bisu Yisu Kristo. 27Bisu limiitsindaha benu Yude na Silaasi, ni bo mwakulu bu uyabisa ma bisu limiisonehe benu mu muhanda mowunuwu. 28Bunuubu, Livupu la Ngidi na bisu, limiivolo kesili mu ubwevelekwiha benu pasi mupfuna, vengo mangidi momanima ma maafulala talu: 29“Uveledya banyama ba baayeholo huli bifwita. Uvelenwya makila, tso udya misunya mi banyama ba babaapinya ŋa mivodi. Uvelesa bumbembo”. Hwafwana bubwe, benu mu ubata miina myosi. Saalaani bubwe.»
30Bo baasiisi baatu ba baasooli mu uyene hu Antyokya. Bu baatoodi huuna, bo baakuukihi libundu loosi na baayakisi bo muhanda. 31Baatu baataangi muhanda mowuna, na boosi baamoni kinya mu kwadisili yi yaba muuna. 32Yude na Silaasi, ba baaba mimbihuli bo mwakulu, baatoyi bulahi na baana ba ngu, mu uhwadisa bo na uva bo mifudi mu imiinu. 33Bo baavyosi mwa bilumbu huuna, titswene bo baakabuhi mu hyenze na baana ba ngu, mu ufutaha huli ba baatsindihi bo. [ 34Ka Silaasi amoni bubwe mu usaala na bo.] 35Buuna, Pahuli na Baranabasi, baasaali hu Antyokya. Itwadi na bakima-bakima, bo baakayihasa na baakalongese mambu ma Pfumu.
Pahuli na Baranabasi baakabi manzila
36Mwana tangu hole, Pahuli aleeli huli Baranabasi: «Tswende liyamono baana ba ngu, hu misyenge myosi mi bisu a we laalongese mambu ma Pfumu, mu uyamono mbiili a bo.» 37Baranabasi atsimi ti bo bavolo ka Yowani nga kumbu Malako, mu uyene na bo. 38Ka Pahuli a hatondi ti bo babita nde ve, mu toni ati Yowani akabi manzila na bo hu musyenge a Papfiliya, na nde a habweyakumbasa bo mu isalu hya bo ve. 39Buuna, paha yinene yatelimi, na bo baakabuhi. Baranabasi avoli Malako, na bo boole baayeni hu iliiŋa hya Kipere. 40Ka Pahuli asooli Silaasi, na bo ka baayeni, bu baana ba ngu baavondi huli Pfumu mu ukeelese bo, na usyeme bo. 41Pahuli ataangili matsi ma Siriya na Silisiya mu ubaahwadisa mabundu.
ទើបបានជ្រើសរើសហើយ៖
Mavanga 15: TSA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.
