Mâk 13
13
Njisə̀s ə wàmnè kûmə̀ èpofsê ə Ndɛ Ètsə̀məze
(Matyò 24.1-2; Lûk 21.5-6)
1Kə Njisə̀s tè ndò ə Ndɛ Ètsə̀mə, chùmtè èpàm ə̀ vəyn zhîzè èmɔ̀ʼ ə pìə, “Nayne kə, Tyə̀ynsè!, Ə chîə əkayntəghe! è ndom vɛ ə pɛ ndɛ ə̀ Fèzhə̀ ə̀təyn nyiə tsɔ̂fə̀.”
2Njisə̀s ə pə̀ynsə̀ “Ghànə fe pɛ techûŋ nə tɨnə? Nâʼà èchi emɔ̀ʼ tə faŋə va etùə zhîze. Ə tə sâʼtə̀ maʼà nâʼà ə̀kɨ̂m.”
Ə tetsôs tɛ ə te tə pə̂
(Matyò 24.3-14; Lûk 21.7-19)
3Njisə̀s tè tsɨs etûə pfɨ̀yn ə̀ Sèolìf. Pfɨ̀yn ə̀təyn tè kyàʼnə tyâŋsə̀ Ndɛ Ètsə̀mə. Pità yî Njə̂m, è Njɔyn, è Andɨ̀lò ə nyaʼtə̂ pə̂ fe vəyn ə pfɨfə nə, 4“Tsàyn sê ghàs nə ghɛ nə ghɨnə tə kyâynə̀ zɨ̂yn zə? Ə̀ tə nə̂ ə nyi chwìə èkè se tyə̀yn nə ghɛ nə ghɨnə se nyi se kyàyn ə?”
5Njisə̀s ə pìə sê ghənə nə, “Ghàyn e tɔfə kə wùə tə kyîŋsè ghàyn. 6Ghɨə tə pə̂ se tsɨ̀ ə Mì ezə ə pîə nə ‘Ə̀ nyi Mi vɛ ə Zhə̀fè kɨmne!’ ə ghənə ə kyîŋsə̀ ə̀ghɨ tsɨə. 7Ə ghàyn tə zɨə nə ə tɨmə èghɔŋ, èghɛ mɔ̀ʼɔ kûmə̀ èghɔŋ etɨmeze, kə ndɨmke tsɛ wùə. Ghɛ nə ghɨnə nyîə kyi se kyàyn, pîza e tyə̂ynə̀ va nə kwùŋseke ə pə̀yn. 8Ndaʼàtè tə nô tîte, fɔ̂yntè e nô tîte. Chike tə pə̂ ə ke ə nəʼə̀ ə telùʼ ə telùʼ, shumfe nyi kepî. Ghɨnə mə tə pə ə ghə nyi kə etɨ̂m əshi zɛ ə wùzhɔyn zɨə ə è nyì se pîə ə vayn.
9Ghàyn e tɔ̂ʼnə̀. Ə tə kyiə ghàyn ə ndu ə ndɛ̂ èsaʼ. Ə tə pusə ghàyn ə sendɛ sə atsɨ̀yntese, ə ghàyn fɨyn tyə̂m əghɨ tesaʼ ghə əshi, è fɔ̂yntè kè kûmə̀ mi. Zɨnə tə kyânə̀ kə ghàyn ndaʼa tom èchùŋ sê ghənə. 10Pîza tsɔfə kə mbi mi, ə kyi se tsâ tom èchùŋ sê ndaʼ tə mbi tekɨ̂m. 11Ezhoghɛ ə kyi ndû è ghàyn elùʼ ə saʼve, kə ghàyn nə kayn mbi nə ghàyn nə̀ ndûə pîə nə ghe ə. Ghàyn pi ke èghɛ zɛ ə ze fɨ nə ghàyn pi ashìŋə̀ nə kɛ. Kûmə̀ nə ghɛ ghɛ ə ghàyn tə wàmnə̀, tə ndô pə̂ sê Zuʼse Ŋwaʼase ə̀ vachi sê ghàyn. 12Ghɨə tə njîə fo ə̀ ghɔnyìə ghənə̂ghè nə zhwi, ə pɨ̀a ə ghɔnə nji fo ə̀ghɔyn nə ə zhwi. Ghɔynə tə kə̀mnə̀ ə nô ghə̀ pɨ̀a yî ghə̀ nyì, ə fo nə zhwi. 13Ghɨghə əkɨ̂m tə panə̀ ghàyn ə mì ezə. Pîza mə ə kol pîndè təmə se nduə tàyn ə mɨ̀se ə è tə kyî èzɔzaze.”
Afɨa epi kyîke
(Matyò 24.15-28; Lûk 21.20-24)
14Ghàyn tə fe èghɛ epi zhîze mə ze pə̂ èghomə̂zè ə Zhə̀fè əshi ə zə nyi elùʼ mə ze kyi va sə̂ nyi fu. (Ghàyn ghɛ ə ghàyn tɔŋɔ ghɛ ghɨ̀yn tɔʼ zɨ kê ghɨnə mə). “Ə ghɨ ghɛ ghe nyi ə Njòndyâ tə nyɨŋə kɔʼɔ ə pfɨyn ə ndə fumə. 15Kə wùə mə è nyì ə vəyn etûə ndɛ kɛse tso, pî se njiə njìə fɨ èfɨake. 16Kə wùə mə è nyi afùʼ, kɛse kwɨlə̂ se njiə fepfɨ̂ fə vəynfe. 17E tə pə̂ ə zə pofə sê zəyn ghɛ ə ghe nyi ndwûə, è ghɛ ghe nyɔŋsə̂ ghɔynghe ə mtuʼ nə mɛ! 18Ghàyn tsəm nə kə ghɛ nə ghɨynə tə kyayn è pìŋ mə fofke nyi tsɛ̂sè ndò. 19Fumə mtuʼ, ghɨ tə fe ètsôs vîve ndɔ̀ʼɔ wùə tyəm fe nâʼà ə zhə̀te kə Zhə̀fè tè pom mbi. Tsôs vîve e va se tə fɨnə kyàyn kə vɨ̂nə mə. 20Pîza Pɛ̂pɛ nyi mə è və fàftè tuʼ mə ètsòs nə mɨ̂yn. Ə è tè tàʼa nə̀yn zamə, mə wùə vîvè tə sɔ̂ fɨə va. Kûmə̀ kə ə̀ghɨ və kə è chɔʼ ndə̂m, è və fàftè tuʼ nə mɛ.
21Fumə mtuʼ, ə wùə pì sê ghàyn nə, ‘Ghàyn fe kə, Vɛ Zhə̀fè chɔʼ ndə̂m, È vɨ̀nə fàyn!’ kə è pi pî nə, ‘Fe kə, È vîə fɛ̂!’ kə ghàyn pomə ghɛ zɛ ə è pìə. 22Ghɛ ə kaŋkaŋə pîə nə ə nyi vɛ Zhə̀fè chɔʼ ndə̀m, è ghɛ ə kaŋkaŋə pîə nə ə nyi sèfɨ̀aʼtè, tə fɨə mtuʼ nə mɛ. Ghənə tə nə̀ ə tyəynə̀ sèchwìə, fɨnə nə̂ əghɛ ə kayntəghe. Ghənə tə nə̂ nyiə se kyìŋsə nâʼàpî ə̀ghɨ Fèzhə̀ ghɛ ə Zhə̀fè chɔʼ, ə ghənə kyi ndom ətəyn. 23E nyi nə ghàyn ə tɔ̂ʼnə̀. M tsâ ndə̂mə̀ ə̀ghɛ nə ghɨ̂yn sê ghàyn, tsɔ̀fə kə shîŋə̀ ətəynke kwəyn.
Epə̂yn ə Vâ ə̀ Wùəzè
(Matyò 24.29-31; Lûk 21.25-28)
24Fumə mtuʼ, mə shîŋə̀ etsòs eghaʼâ nə kɛ ə tsɛ̀,
‘ə lɨmke kɨyte zhwize,
ə njɔŋ ə fɨnə panə va,
25Lìmè tə tâyntə̀ fɨə ekwùtwəyn,
ə twɔʼ vɛ ə ve nyi ekwùtwəyn nə̂ʼ kə èkɨ̂m.’
26Fumə ashìŋə̀, əghɨ fe kə Va Wùə tso pə̂ əfètə̂ sèmbàʼ, è tyaʼa ə kayntəke, è pomsêzè. 27È tə tomə sètsì sə vəynse ə tepòlə̀ tə mbi tekɨ̂m nə se kwi zùŋtè ə̀ghɨ ghɛ Zhə̀fè chɔʼ ndə̂m, se ndò ə epòlə mbize emɔ̀ʼ se nduə tàyn ətə̂ zə mɔ̀ʼɔze.
Ezaʼlê kûmə̀ fekaʼ fə sèfîkfè
(Matyò 24.32-35; Lûk 21.29-33)
28Zôyn ghàyn zaʼle ghɛze sê kâʼ fə sèfîkfè. Ə ghàyn fe nâʼàpî ashìŋə̀ àkè kə fe tô pə̀, ghàyn ə kê nə pìŋ sè pfɨ̀ə pə̂ ndò. 29Ə ghàyn fe ghɛ nə ghɨnə̀ e kyanə̀, ghà ə kê nə Vâ Wùə mòtə̀ kə nyî ə è pəyn, mə shîŋə̀ kə paʼsê. 30M pîə sê ghàyn səmɔʼ nə ghâŋ fɨnə zôyn vayn tə kwutə mɨ̂sè ndɔ̀ʼɔ ghɛ nə ghɨnə kyayn nâʼà əkɨ̂m. 31Kwutwəyn tə tsɛ̂ ndô, ə chike tsɛ ndo, pîza ə zaʼlê zɨmze tə tàʼa tsɛ ndò.
Wùə vîvè keva tuʼ fɛ ə Vâ Fèzhə̀ tə pə̂ ətəyn
(Matyò 24.36-44)
32‹Wùə vîvè ke va tuʼfe è shîŋə̀ kɛ ghɛ nə ghɨynə tə kyâynə̀ ətəyn. Nâʼàpî sètsì ekwùtwəyn ke va, nâʼàpî Vâ Fèzhə̀ e ke va, ə̀ tsɛ̂ kə va Pɛ̂pɛ. 33Ghàyn e tɔ̂ʼnə̀, fɨnə pfɨ̂tə̀, kûmə̀ nə ghàyn ke va nə shîŋə̀ ətəynke tə pə̂ zəynzə. 34E nyi kə wùə ə è ndùə kwîzè. È və zà ə̀ghɛ ə̀kɨ̂m əghɨ fɨaʼa vəynghe əgho. È və tsà èghɛ zɛ kə nâʼàpî ndè ə nə̂, ə pìə sê wùə vɛ ə è tsɨ̀ŋnə̀ echondɛ nə è və tɔ̂ʼnə̀. 35Ghàyn e pfɨ̂tə̀ kûmə̀ nə ghàyn ke va nə pɛ̀ ndɛ nə pə̂ ashìŋə̀ àkè ə. Ə̀ kàʼa nyi ezhwikwɨlə, Ə̀ kàʼa nyi əfètəyn ètuʼ, ə̀ kaʼa nyi mə tuʼve zo pə̂ ndò, pî mə zhwize sè sa pə ndò. 36Ə wùə ə̀təyn pfɨ̂ŋə̀ pə̂yn, kə è kote mə ghàyn pɨəynə̂ ndò. 37Ghɛ zɛ ə m pîə sê ghàyn, m pîə kə se ghɨghe əkɨ̂m. ‘Ghàyn e tɔ̂ʼnə̀!›”
ទើបបានជ្រើសរើសហើយ៖
Mâk 13: bfm
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល