Деяния 7
7
Стефаным Акузилъҳа
1Та̄хкын первосвященнигым а̄птыка̄ Стефан: «Ипа таўатын акузика̄зӣн укут авуткистыхпык апылъҳистун?» 2Стефаным кӣмсиқа̄: «Аңлыгутымнилъю, сӣванлъыӷнилъю, нагатаҳтыңъа уңипамсюгунъақамси! Сивуныҳпут Авраам сялин Месопотамиямылъюку, нӯхтылъҳилъюку Харранымун, Ниӷуҳқыңъалӷӣм Кияӷныӷым алӣӷвиклъюку 3пика̄: “Унитигу алъхыӷвигын нуна, илякўа̄ҳтынлъю, аӷуляқи маӷьяҳқуӷна̄ӷамкын”. 4Ынка̄м Авраам аӷуляқыхкақ Халдеямың, нӯхтыкақ Харранымун. Атаңа туқуян, Кияӷныӷым маӷьяҳқуқа̄ Авраам нунамун ма̄тын кияҳфихпысинун. 5Тагисюхўа̄ӷақңамигу натыңӣҳақ нуналисимаңита̄ лъңанун пикаҳқамың. Иўырңа талўа сялин авақутӣлъюку Кияӷныӷым акықусяқыхкақа̄ уна нуна лъңанунлъю, киңунӷанунлъю. 6Кияӷныӷым хўатынлъю пикақа̄: “Киңуныҳтын аӷуляқсяҳқа̄гут нунакынӷилъкымыхнун ынка̄м нуната̄лъықут. Тама̄ни қыпҳаҳтыля̄ӷуяҳқа̄гутлъю, амьюқыта̄ткысиҳлъягьяҳқа̄гутлъю 400 аюмиқулъылӷутни. 7Иўырңа аӷью̄ҳлъықанка қыпҳаҳтыля̄ӷуҳтыстилӷӣт. Киңуңаның аӷью̄ӷилъыӷма киңуныҳтын тагилъықут нунамун акықусяқыхкамнун, тама̄ни манигуҳлъықа̄тңа”. Таўатын Кияӷнық пика̄гуқ. 8Та̄хкын Кияӷнық акықусяңлъяқақ Авраамымун налъюнӣӷуткысқылъюку обрезаниялъық. Ынка̄м Авраам обрезаниякақ. Иӷныңьями Исаакымың пиңаюның иңлюлык аӷнық атуӷьягу обрезанияка̄ лъңалъю. Таўатыҳпигақ Исаакым обрезанияка̄ иӷныни Иаков. Иаковым обрезанияляқӣ қуля ма̄лӷук сӣпнықлъюку иӷныни. Та̄кут пӣнлӣсиқӣ рамкыңан Израилым.
9Аңлиляӷа̄лъютың Иаковым иӷныӷита ақинакыпихтыка̄т аңлыгутни Иосиф, ынка̄м акикыхка̄т Египетыӷмӣнун қыпҳаҳтыля̄ӷулюку. Иўырңа Кияӷныӷым наюқыхка̄, 10сыӷлылӣнӷани каюсиӷақыхкаңа. Кияӷныӷым пыҳқинылъылитка̄ ынка̄м Фараоным умӣлган Египетым, ыфқуқлъюку умӣлгатаӷа̄ҳтыстыка̄ Египетмун, иглыӷутистыңлъяқа̄лъю мыңтыӷаминунлъю, қыпҳаҳтыминунлъю. 11Та̄хкын нықаңисяхлъякақ Египетмилъю, Ханаанымилъю, ынңа̄талъ угляқ игатиқутыҳлъякақ. Сивуныпутлъю нықаңисяхлъякат. 12Иаковым нагақуӷьямики Египетыӷмӣт зерномың кахпахлъягуманилюки, иӷныни пикыңьяҳтӣсқыхкӣ. 13Тӯңлиҳа̄ни алъя пията, Иосифым аныңани уңипа̄ткӣ лъңитнун уюӷақнилюни. Ынка̄м умӣлгым Фараоным аңлыгуткутутаңи лӣгикыхкӣ. 14Та̄хкын Иосифым липыҳсяқа̄ атани Иаков, ныңлъюгутылӷутаңилъю нӯхтысқылъюки Египетмун. Қамахлъютың ю̄к пиңают акимигақ сӣпнықлъюкуңуфтут. 15Ынка̄м Иаков нӯхтыкақ. Тама̄ни Иаков туқукақ, киңуңаның тахталми та̄кўани иляңилъю сивуныпут туқуляӷа̄ткат. 16Та̄кўаниңани ныҳқўа̄ӷит агля̄лъюки Сихемымун, лъивынқихтыкӣт нунакун Авраамым тукфиқа̄кун Емморым киңунӷаның.
17Кияӷныӷым Авраамымун акықуся̄ пияҳтуңыстаӷақуқлъю, сивуныпут нуляҳлъякат Египетми. 18Та̄хкын Египет нутаӷамың умӣлыңыхкақ, та̄м умӣлгым налъюкңўа̄қаңа Иосиф. 19Сивунымта нуляҳлъялъҳит апалъюқлъюки умӣлгым пыҳқиниқулъюки икфиқыстыкӣ сивуныпут, талўа таӷнуҳаҳӣт а̄нутыстақлъюки пикӣ туқусқылъюки. 20Таўатын кияҳсималюки Моисей алъхықақ, ю̄кыхтыпихлъыҳӣ таӷнуҳақ. Аңаюқахкынка нымыгни ӣӷаҳтумың афлъыңакыхка̄т пиңают танқит. 21Ӣӷаҳтуҳпагниңӣсямыгныгу а̄нутка̄т. Умӣлгым паниган на̄лъкылъюку алъюҳқилюку, аңлистыка̄ иӷнықылӷӣстун. 22Египетыӷмӣт апыҳтуқа̄т лӣткамыхның. Ынка̄м Моисей пыҳқинӷуӷиҳлъягьялӷӣми акузилъхӯҳқа̄ҳлъякақ, аҳтӣгалңуқлъю сямың тамаҳа̄ның.
23Моисей ю̄к мальӷук уксюҳтуткалиӷьями Израилыӷмӣлгутни ысҳаӷьюглюки ысҳаӷьяҳтуқӣ. 24Таўани ысҳақа̄ Египетыӷмӣм амью̄ткыхкаңа Израилыӷмӣ. Ынка̄м Моисейем Израилыӷмӣ игуӷлюку туқутка̄ Египетыӷмӣ. 25Таўани сюмыҳтаӷақа̄ялӷӣ Израилыӷмӣлгутминун лӣгикылъықнилюку Кияӷныӷмун каяхтылъыни лъңитнун аӷуляқутистыңулюку Египетмың. Иўырңа лӣгикумаңилъкаңат. 26Уна̄миңани ысҳақакык Израилыӷмӣк пилъюгулъҳӣк. Акузинъақуткыхкақсяқык: “Пилъюгутыхпынатык юлгуткутутык”. 27Йыӷлыги амьюқытиқылӷӣм югым аягаҳлъюку Моисей пика̄: “Китум иглыӷутистыңлъяҳтатын, нанқихтистыңлъяҳтатынлъю хўаңкунъун? 28Хўаңалъю туқусюхсиңа̄ иӷивгақ туқутылъыҳпытун Египетыӷмӣ?” 29Югым таўатын пиятни Моисей қимакақ Мадианымун, тама̄ни алъяныҳта̄кақ. Қынўат нулиҳтуӷлюни иӷныңыхкақ ма̄лӷугыгның.
30Моисей, югык ма̄лӷук аюмиқулъық Мадианымытуткылъюку килга̄нун аӷуляқыхкақ Синайым найӷаҳан увитаңанун. Таўани ысҳақа̄ яқулык кумаӷулӷӣми уқфилъыгами. 31Алъя̄ҳлъюхўаӷьягуткақыхкаңа. Кынқихтыңъўа̄ӷналюку такука̄, ка̄сяҳтуӷақа̄лъю Атанӷым пика̄: 32“Кияӷныӷӯңа, сивуныҳпык Авраамылъю, Исаакамлъю, Иаковымлъю Кияӷнықа̄тңа”. Моисей алиңрӯқақ рыпалъ уңылыхтыкақ талўа ысҳаӷьюгумаңитка̄. 33Атанӷым пика̄: “Ка̄мгыхкын матаҳтикык қаюҳлъяк хўаңа апалъюқлъюңа аглыӷналӷӣңӯқ ныкывӷавигын. 34Ысҳапаганка югынка амью̄ткыхкаңит Египетми, нагатанка ңилъыхлъыҳӣт. Укихтуңа югулиналюки Египетыӷмӣның. Ынка̄м хўа̄ каяхнақамкын Египетмун”.
35Та̄наңӯқ Моисей Израилыӷмӣт иҳсякақңамыхтыху пика̄т: “Китум иглыӷутистыңлъяҳтатынлъю, нанқихтистыңлъяҳтатынлъю хўаңкунъун?” Иўырңа лъңаңӯқ Кияӷныӷым утыӷниҳтыстыка̄ Египетмун иглыӷутистыңулюкулъю, югулиӷистыңулюкулъю лъңитнун. Таўатын Кияӷныӷым пикақа̄ яқулыхкун кумаӷулӷӣми уқфилъыгами. 36Моисей алъя̄ҳлюхўаҳтиҳлъяга̄таӷлюни Египетми, аӷуляқуткақӣ сивуныпут Египетмың. Ўата алъя̄ҳлъюхўаҳтӣӷа̄тақа̄гуқ Чермное Моремилъю, иглыӷалъыӷмыхнилъю килга̄ни маӷьяҳқуӷақңамики югык ма̄лӷук аюмиқулъыӷни. 37Та̄наңӯқ Моисей Израилыӷмӣнун хўатын пикақ: “Кияӷныӷым ӯкналиқиста накмикылъықа̄ юхпысиның хўаңа накмикылъыӷмитун ӯкналиқистыңулюңа”. 38Та̄наңӯқ Моисей сивунымнъиткақ қырңуӷутақңата килга̄ни Синайым найӷаҳан туңаңани. Таўани на̄йӷами яқулгым алыҳқуӷьятни тугукӣ Кияӷныӷым Лӣлиҳтӯсӣ апыҳтӯсят натын кияҳтылъыҳқамың. Та̄хкын а̄пқӣ та̄кут сивунымнъун ынка̄м лъңита нагныҳтыкақӣт хўаңкунъун.
39Иўырңа сивунымта Моисей қа̄ткысюгумаңита̄тлъю, иглыӷутистыксюгумаңита̄тлъю, йыӷлыги утыҳсюка̄гут Египетмун. 40Ынка̄м Моисейем аныңа̄ Аарон пика̄т: “Кияӷныңлъяҳтыҳқут маӷьяҳқӣсқылъюта. Налъюкаҳпут Моисей сяматаңа, лыган аӷуляқулъюта Египетмың унитӣлъю”. 41Ынка̄м кияӷныңлъяқат каумӷаҳсюгнилңуӷмың, аҳқыша̄қа̄тлъю. Нықынӷаҳқыхкатлъю қӯлваӷналюку улима̄ҳтың.
42Таўатын пията Кияӷныӷым тунуткӣлъю, пыхтыкӣлъю ынңа̄талъ манигӯтысқылъюки сиқиныӷмун, танқимун, иӷалықыта̄ӷнунлъю. Атанық хўатын пика̄гуқ ӯкналиқистыт игақылъҳитни:
“Израилыӷмӣни, югык ма̄лӷук аюмиқулъыӷни иглыӷаңулюси килга̄ни аҳқыша̄ӷумаңитаҳпысиңа туқутӣныҳпысини тыӷикусямың.
43Йыӷлыги кылъқута̄қыхкақаси палаткат манигуӷвигулюки кияӷныңлъяқамун Молохымун,
кылъқута̄қыхкақаҳсилъю иӷалықыта̄ңлъяқақ манигӯсӣлюку Ремфанымун.
Тама̄кын апалъюқлъюку аңуяхпысинун аӷуляқутыслъықамси наӷуҳлъюку Вавилон”».
44Стефан паниның акузикақ: «Сивуныпут килга̄нилъюки Кияӷныӷым палаткаңлъӣсқыхкӣ амимың манигуӷвигулюки лъңанун. Улимакақӣт таўатыңўа̄қ Кияӷныӷым апыҳтӯтылъҳатун Моисейемун. Кылъқута̄қыхкӣт та̄кут палаткат нықаңӯсӣлюки Кияӷныӷым наю̄тңалъҳанун. 45Та̄кўаниңани Моисей туқуян Кияӷныӷым накмикыхка̄ Иисуса иглыӷутистыкысқылъюку сивунымнъун. Иисусым маӷьяҳқуӷьистың нунамун Кияӷныӷым акықусяқыхка̄нун та̄кут палаткат кылъқыхкӣт. Такукамыхнун нунамун ка̄сялӷӣмың юлгуфтуқ. Иўырңа Кияӷныӷым сивунымнъун иҳлъыҳтыстыкӣ юги, ынка̄м сивуныпут ныликат та̄хун нунакун. Тама̄ни нагныӷуткӣт та̄кут палаткат манигӯтфигулюки Кияӷныӷмун кынляңа умӣлылӣтылъыӷмыхнун Давид. 46Давидым кияҳта̄лъҳа ынңа̄талъ ыфқуӷнапихтыка̄лӷӣ Кияӷныӷми. Ынка̄м Давидым а̄птыкақсяқаңа хўатын: “Кияӷныӷа Иаковым, мыңтыӷаңлъяӷляка̄н?” Иўырңа Кияӷныӷым писимаңилъкаңа, 47йыӷлыги Давидым иӷныӷан Соломоным мыңтыӷаңлъяқа̄ Кияӷнық.
48Иўырңа Кияӷныҳлъяк кияҳсигатуқ мыңтыӷани югыт улима̄ӷитни. Хўатын Атанық пика̄гуқ ӯкналиқистым игақылъҳани:
49“Қиляк ақумутақақа, нуналъю итыгаӷӣтақақа.
Сяңан мыңтыӷаңлъяӷнақыстыңъа?
Мыӷна̄ливигита̄ңунӷитуңа.
50Улима̄қынӷӣсикӯн сяңўа̄ қамахтыңъўа̄ӷлюку?”»
51Стефаным нагныӷуткӣ: «Пиныҳлъюхлъягни лъпыси, қа̄ткысюгигатаҳси, ухпықсюгигатаҳси Кияӷнық. Кияӷныӷым уңипӣ нагасюгигатаси, иҳсякыра̄ӷақахсилъю Аглыӷналӷӣк Таӷныӷак сивуныҳпысистуңўа̄қ. 52Қамахлъюки Кияӷныӷым ӯкналиқистыңи сивуныҳпыси амью̄ткыхкақӣт. Туқуқуқақӣт ӯкналиқистыт ӯкналиқуткысятху Сыӷлыҳқумаңилңуқ тагияҳқа̄ниңатху. Ынка̄м ка̄сян, увыҳпагулъюку туқуткақаҳси. 53Лъпысиңӯси Кияӷныӷым яқулыхтыхун тӯныхкӣ Лӣлиҳтӯсяның, қа̄ткумаңитаси».
Милюҳпага̄тақаңат Стефан
54Агӷистыт нагалъюку Стефан сякшитутыҳлъякат рыпалъ хӣстаӷа̄тка̄т. 55Иўырңа Стефан, имиӷңалӷӣ Аглыӷналӷӣгның Таӷныӷагның, сивухсялӷӣми қилягмун ысҳақа̄ Кияӷныӷым ниӷуҳқылъҳа, Иисусылъю ныкывӷалӷӣ Кияӷныӷым аӷынқигныӷани. 56Пикӣ: «Ысҳақаҳтыхуқун! Ысҳаӷақа қиляк қылъпылӷӣ, Иӷныӷалъю Югым ныкывӷалӷӣ Кияӷныӷым аӷынқигныӷани!»
57Агӷистыт сигутытың ся̄плъюки ӣхмыхның, араӷа̄та̄симаӷмың қамахлъютың сюӷука̄т Стефан. 58Сӣңвага̄тамың аӷуляқутка̄т Иерусалимымың, туқунъалюку милюҳпага̄таҳӣнақ. Та̄хкын Стефаным авуткистыңита қа̄слъитың матаҳлъюки нукалъпигам Савлам ся̄ӷўакун лъилюки милюҳпага̄таӷьюха̄қа̄т. Тама̄кутлъю иляңита милюҳпага̄тақа̄т. 59Хўа̄ уйӷагым тыкиқаӷвикңатни Стефан юӷақақ: «Атанық Иисус, таӷныӷахка тугуклъиҳқык». 60Сыгысқуҳлъюни игляхтупихлъюни пикақ: «Атанық, сыӷывутики хўакын сыӷлыҳқылъҳитның». Таўатын пилюни туқукақ.
ទើបបានជ្រើសរើសហើយ៖
Деяния 7: ess2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022, Wycliffe Bible Translators, Inc. All rights reserved.
